Rome iriniwok 5 - Kice Manito Ocki Omirwatcimowin

Kitci nahitatoikw kirika Kice Manito

¹ Aci tca icikowisk kit iterimikono Kice Manito osam e asperimototawokw, kaie ki nahitatonano kirika Kice Manito, anihi Ka Tiperimitokw Cecoc Krist e ki totamiritci kitci icinakonik.

² Wir Cecoc ka ki ocitatc meskanariw kirano otci kitci ki kiskeritamwokw Kice Manito omirotehewin, nta e ici sokikapowiikw e asperimototawokw. Ki mireritenano e asperimoikw, e ketcinaweritamokw otcitakotc kitci icperitakosiikw mia wir e asitci icperitakositc.

³ Wawatc ki mireritenano misawatc e arimiparihokw. Ki kiskeritenano meka, ekota ni wetciparik ciciperitamowin, e nekatcitaikw.

⁴ Minawatc e ciciperitamokw, ekota ni wetciparik kitci ki sokiteheikw. E tca sokiteheikw, ekota ni wetciparik kitci asperimoikw.

⁵ Nama ceckwat kit ici asperimonano. Ki meka cawerimikono Kice Manito osakihiwewin kitehinak, e ki miritokw Miro Manitowa.

⁶ Mekwata orina aka e kackitaikopanen kitci wi kotcihoikw, ki pe nta nipo Cecoc Krist kaskina iriniwa otci ka pactatiritci, kotc Kice Manito ka iteritak kitci isparinik.

⁷ Mictahi arimaniw awik kitci pakiterimitisotc kitci nipotc awiriw otci, misawatc icikowisk e iteritakosiritci. Matci pot kata nipopan awik owitc iriniwa otci ka miro iriniwiritci.

⁸ Aric ki wapatahikono Kice Manito otcitakotc e apitc sakihitokw: Cecoc Krist ki nipo kirano otci, kiapatc pactatowinik e ici pimatisiikopanen.

⁹ E ki pakiterimitisotc kitci nipotc, omikw e ki macikowinik, ki itotiskew icikowisk kitci iterimitokw Kice Manitowa. Ekoni wetci ketcinaweritamokw kitci akwacimitokw, aka kitci kiciwasictatokw Kice Manito.

¹⁰ Weckatc ki ki anwerimano Kice Manito. Anotc aric aci ki koski miroparihitonano kirika wir, e ki niporitci Okosa kirano otci. Anotc e koski miroparihitoikw, ekoni wetci ketcinaweritamokw kitci akwacimikoikw, osam e pimatisiritci Okosa.

¹¹ Minawatc awocamec, ki mireritenano Kice Manito otci, aci anotc e koski miroparihitoikw kirika wir, osam anihi Ka Tiperimitokw Cecoc Krist ka pe itotiskeritci kitci icinakonik.

Adam kirika Cecoc Krist

¹² Wetci ki kitciparik e pactatinaniwok ota askik, osam peikw iriniw Adam ka icinikasotc wirctam e ki pactatitc. Ekoni wetci takok anotc nipowin. Ekoni kaie wetci nipotcik kaskina iriniwok, osam e ki pactatitcik.

¹³ Weckatc, epwamoci miratc Kice Manito aiamihe irakonikewiniw anihi Moïsa, aci takonokopan pactatowin ota askik. Nama aric pameritamokopan aniheriw Kice Manito. Nama meka moci ki otci pakitinamokopan aiamihe irakonikewiniw kitci ki kiskeritamiritci iriniwa e ici nataweritamokopanen.

¹⁴ Aric peikon ki pe nipowok iriniwok, misawatc aka e ki otci pactatitcik mitowi Adam ka ki ici pactatitc aka e ki otci pamitowatc ka ici witamakotc Kice Manitowa. Ekoni ka pe isparik esko ka pe pimatisitc Adam, nac Moïse kaie wir. Ani e iteritakosispan Adam, ki wapatahiwew Cecoc ke icinakosispan, anahwe ke pe takocikipanen.

¹⁵ Aric kirawe kicteritakoniw Kice Manito ocaweritcikewin kaie tca aniheriw Adam ka ki kitciparitatc. Mitcet iriniwok ki nipowok aniheriw pactatowiniw otci anihi peikw iriniwa ka ki kitciparitaritci. Aric Kice Manito omirotehewin kirawe micariw kirika kirawe kicteritakoniw aniheriw ocaweritcikan ka ki cawerimatc mitcet iriniwa, aka e ki otci nataweritak kitci kiwe mirakaniwitc kekociciriw, tepirak tca peikw iriniwa e ki pe nta totamiritci kitci icinakonik, enko na Cecoc Krist.

¹⁶ Kice Manito ocaweritcikan pitoc icinakoniw kaie anahwe iriniw nictam ka ki pactatitc. Adam meka e ki pactatitc, ki kitcipariw tipaskonikewiniw kitci takonik, ekoni anotc iriniwok wetci anwerimakaniwitcik. Aric Kice Manito ki wikotcitaw mitcet pactatowiniw kitci kasihikaterik, icikowisk kitci iterimakaniwiritci otirinima.

¹⁷ Ki kiskeritenano anahwe peikw iriniw Adam e ki matci totak e ki ispatak kaskina iriniwa kitci niporitci. Aric wir tipirawe Cecoc Krist ki ispatam kekociciriw kirawe ka kicteritakonik. Kaskina iriniwok ke otitikotcik aniheriw Kice Manitowa omirotehewiniw e micarik kirika ka mirakaniwitcik icikowisk kitci iterimikotcik, kata sokikapowiwok e pimatisitcik, wir Krist ka ki wikotcitamatokw.

¹⁸ Anahwe tca peikw iriniw e ki matci totak, ki ispatam kaskina iriniwa kitci anwerimakaniwiritci opactatowiniwariw otci. Kaie peikon anahwe kotak iriniw Cecoc Krist e ki miro totak, ki mirew kaskina iriniwa e taciritci kitci ki kackihoritci aka kitci tipaskonakaniwiritci, kaie kitci ki tca pimatisiritci.

¹⁹ Anahwe peikw iriniw aka e ki otci natotawatc Kice Manitowa, ki totam mitcet iriniwa kitci iteritakosiritci pactati iriniwok. Kaie peikon anahwe kotak iriniw e ki natotawatc Kice Manitowa, ki mirew mitcet iriniwa icikowisk kitci iterimikoritci Kice Manitowa.

²⁰ Ki pakitinikatew aiamihe irakonikewin kirawe kitci ki kiskeritamiritci iriniwa e asitci pactatiritci. Minawatc e iti kiskeritamiritci aniheriw, kirawe nisitotamiriwa kaie e apitc micarik Kice Manito omirotehewin.

²¹ Tapwe mackawisimakanokopan pactatowin. Ki cakotcihikowakopan meka iriniwok, ekoni wetci ki nipotcik. Aric peikon mackawisimakaniw Kice Manito omirotehewin kitci miritokw icikowisk kitci iteritakosiikw. Enkoni ke otci pe kakike pimatisiikw, osam Cecoc Krist, anahwe Ka Tiperimitokw, e ki totak kaskina kitci icinakonik.