Rome iriniwok 3 - Kice Manito Ocki Omirwatcimowin

¹ Pot awik ni ka kokwetcimikw, kitci icitc: “Kicteritakon ia e cota iriniwinaniwok?” Pot kaie ni ka itikw: “Tapwe kirawe ia mirwapatan e kicawatocwakaniwitcik cota ockinikiwok?”

² Nin ni ta itaw, kaskina wiec kirawe mirwapatan! Nictam e kanawapatcikatek, enko aniki cota iriniwok ka ki mirikotcik Kice Manitowa onespi tapwewiniw.

³ Tapwe atita nta e tacitcik nama wewerita ki otci nosanetawok ka ki itakaniwiwaspan kitci totakik. Aric Kice Manito, kaie wir ia peikon kata totam? Kata ponitaw ia kaie wir kitci itotisketc aniheriw ka ki ici nespi tapwetc?

⁴ Nama ketcinatc kata totamopan! Misawatc kaskina iriniwok e kiraskitcik, wir tipirawe Kice Manito nama wiskat kiraskiw, kotc e itemakanik Omasinahikan: “Tatwaw e arimwein, kaskina awik kiskeritam e tapwein, kirika e itactahorikoin, wewerita ki wapatahiwan mocak e icinakok e iteritaman.” Psaumes 51.6(4)

⁵ Aric kecpin kirawe e miro nokonik Kice Manito icikowisk e totak, osam kirano e ki patahamokw, tan ke ki iteikw? Ki ka ki itwanano ia nama icikowisk totam Kice Manito, apitc e kicakonitokw? (Ekoni meka e iteritakik atita iriniwok ota askik.)

⁶ Nama nte icinakon! Kecpin meka Kice Manito e matci totak, nama kata kackitaw kitci tipaskonatc iriniwa ota askik!

⁷ Pot awik kata itepan: “Kecpin nin e nosanetaian meskanaw ka icinikatamekw kiraskiwin, kirawe wewerita otci miro nokon Kice Manito e apitc tapwetc kirika kirawe otci kiskeritakoniw wir e apitc icperitakositc. Nama tca ni ta iterimikowin pactati iriniw, nama kaie ni ta anwerimikowin anihe otci.”

⁸ Pot kaie ohweriw peikon kata itepan: “Matci totetan, otcit kitci totamokw, tepirak kitci orowiparik ka mirwacik.” Atita iriniwok nit itactahorikok e itetcik nin tipirawe ohwe e ki iteiak, e wi marerimitcik. Kata anweritakosiwok, e ici kackitamatisotcik.

Nama mocak awik icikowisk itatisiw

⁹ Kekwan tca wa itemakak anihe? Kirano e cota iriniwiikw, kirawe ia ki kicteritakosinano kaie tca kotakihik iriniwok? Nama nte icinakon! Aci nit ickwa wapatahiwan kaskina awik e tiperimikotc pactatowiniw, misawatc e cota iriniwitc kaie aka e cota iriniwitc.

¹⁰ Itemakan Kice Manito Omasinahikanik: “Nama taw iriniw icikowisk ka iterimikotc Kice Manitowa, nama wawatc peikociw.

¹¹ Nama taw awik e nisitotak, nama taw e nanto kiskerimatc Kice Manitowa.

¹² Kaskina iriniwok ki nakatamok miro meskanariw, kaskina tapickotc ki oniciniwok. Nama taw awik e miro totak, nama wawatc peikociw. Psaumes 14.1-3; 53.2-4(1-3)

¹³ Kecpin witakik iriniwok e arimwetcik, wapatahiwewok e ici maratanik otehiwak ka katcicterik, mitowi e cehikatek matikowoc e wapatcikaterik awik owiaw e taci pakickaritinik. Kaskina wiec aitewok, tepirak kitci oniwiratcik owitc iriniwawa. Psaumes 5.10(9) Aniheriw ka itetcik, mia peikon kinepikw, awiriw e ki makomatc e matci mackikiwoparinik omakotcikan. Psaumes 140.4(3)

¹⁴ Aspinikotc matci arimwewok kirika atameritcikewok. Psaumes 10.7

¹⁵ Wewepitawok kitci macihiwetcik kirika kitci manohotcik.

¹⁶ Kaskina wiec e ici pimotetcik arimeritamihewok owitc iriniwawa kirika totamok kitci arimiparitcik.

¹⁷ Nama kiskeritamok aniheriw meskanariw pekaterimowinik ka iticimonik. Ésaïe 59.7-8

¹⁸ Tekaci nama kicterimewok Kice Manitowa.” Psaumes 36.2(1) Ekoni e itemakak Kice Manito Omasinahikanik.

¹⁹ Ki kiskeritenano ohwe: kaskina e itemakak aiamihe irakonikewin, enkweriw iriniwa aiamihe irakonikewinik e tiperitakositcik ka mirakaniwitcik. Nama tca otci peikw nta e tacitcik kata ki itew aka e ki otci kiskeritak e ki patahak, kirika Kice Manito kata tipaskonew kaskina awiriw ota askik.

²⁰ Nama meka awik wir tipirawe kackitaw icikowisk kitci iterimikotc Kice Manitowa osam e ki nosanetatc kaskina aiamihe irakonikewiniw. Anihe irakonikewin tepirak ki witcihikonano kitci kiskeritamokw e pactati iriniwiikw.

Ka itotisketc Kice Manito kitci akwacimatc iriniwa

²¹ Aric anotc ki ki wapatahikono Kice Manito ka ki totak icikowisk kitci ki iterimitokw, aka e apatanik aiamihe irakonikewiniw. Ki arimotcikatew anihe weckatc Kice Manito Omasinahikanik neta Aiamihe Irakonikewinik kaie ka ki ici masinahakik aniki ka ki pe nikan tipatcimotcik.

²² Awik e asperimototawatc Cecoc Krist, enkoni e tipiparinik icikowisk kitci ki iterimikotc Kice Manitowa. Ekoni e totawatc kaskina awiriw ka tapwerimaritci Cecoca, kotc e icinakosiritci. Nama meka pitoc iterimew atita iriniwa patok kotakihi.

²³ Kaskina meka e tacitcik iriniwok pactatiwok. Nama otci peikw nta e tacitcik tipi iteritakosiw wir tipirawe kitci natcikapowictawatc Kice Manitowa e apitc icperitakosiritci.

²⁴ Aric Kice Manito, e micarik omirotehewin, ki cawerimew icikowisk kitci iteritakosiritci, aka e petatc kitci koski mirikotc kekociciriw, e ki iciticohwatc Cecoc Krist kitci akwacimikoweritci.

^25-26 Ki iciticahwew Krist kitci nipahakaniwiritci. Tarasak ki aiamihe pakitinam opimatisiwiniw kitci macikowinik omikw, kaskina iriniwa otci ka tapwerimikotc kitci ki kasihamawakaniwiritci opactatowiniwariw. Ekoni ka ici wapatahiwetc Kice Manito wir mocak icikowisk e iteritakositc. Weckatc meka ki wapatahiwew icikowisk e iteritakositc, e pe ciciperitamokopanen aka e ki otci kicakonatc iriniwa tatwaw ka pactatiritci. Kirika anotc mekwata kiapatc wapatahiwew wir tipirawe icikowisk e iteritakositc kirika e miratc otirinima icikowisk kaie wir kitci iteritakosiritci.

²⁷ Kekwariw tca ke ki otci mirwatcimitisotc awik? Nama kekociciriw! Matci ia wir tipirawe kata ki akwacimitiso osam wewerita e nosanetatc aiamihe irakonikewiniw? Nama wiskat kata miroparinipan! Tepirak e tapwerimatc Cecoca ke ki otci akwacimakaniwitc.

²⁸ Ki kiskeritenano meka e asperimototawatc awik Cecoca, ekoni icikowisk e otci iterimikotc Kice Manitowa, aka tca e otci nosanetatc e itemakanik aiamihe irakonikewiniw.

²⁹ Tepirak ia cota iriniwa tiperimew Kice Manito? Nama nte icinakon! Nama ia kaie kaskina kotakihi iriniwa tiperimew? Tapwe wir, tiperimew kaskina iriniwa!

³⁰ Peikociw meka Kice Manito. Kaskina awik icikowisk kata iterimew, kecpin e tapwerimikotc Cecoca, misawatc e cota iriniwiritci kaie aka e cota iriniwiritci.

³¹ Pot awik kiapatc kata iteritam: “Tepirak e asperimototawakaniwitc Cecoc ekoni tca wetci akwacimikoikw, aiamihe irakonikewin nama wiec irapatan. Nama tca ki ka nosanetanano.” Nama aric acteriw nte kitci iteritak. Tepirak e asperimonaniwok Cecoc kitci ki nisitotamokw wewerita e irapatak aiamihe irakonikewin.