Rome iriniwok 2 - Kice Manito Ocki Omirwatcimowin

Kice Manito otipaskonikewin

¹ Kecpin awik e iteritak kitci ki tipaskonatc iriniwa e ki matci totamiritci, acteriw kitci aiekwamisitc. Apitc meka e tipaskonatcik kiwitc iriniwok, kecpin tca peikon kaie kir ani e ici matci totaman, kit tipaskonitison.

² Ki kiskeritenano icikowisk e tipaskonatc Kice Manito anihi kaskina ka ici matci totamiritci.

³ Kit iteriten ia, aka kir kitci tipaskonisk Kice Manito, kir ka tipaskonatcik kiwitc iriniwok e matci totakik mitowi kir kaie e ici aitotaman.

⁴ Micta mirwasiw Kice Manito, ciciperitam, nama kaie wewepitaw kitci kicakonatc awiriw. Kit anwerimaw ia e iteritakositc? Nama ia ki kiskeriten, kirawe ki ta nataweriten kitci kweskatisiin osam e wapataman Kice Manito omirwasiwin?

⁵ Nama aric ki wi nisitoten, nama kaie ki wikotcitan kitci kweskatisiin. Eckam tca ki ka anwerimikw Kice Manito, otcitciparinike kitci tipaskonatc kaskina iriniwa. Ani apitc takociparinike aniheriw kecikarik, kata wapatahiwew Kice Manito okiciwasiwin kirika icikowisk kaskina kata tipaskonew iriniwa.

⁶ Kata mamirew tato nta e taciritci iriniwa aniheriw ka ki ici kackitamatisoritci.

⁷ Kakike pimatisiwiniw kata mirew anahweriw mocak ka mantokasoritci kitci miro totamiritci kirika ka nataweritamiritci Kice Manitowa kitci mirikotcik icperitakosiwiniw, kicteritamowiniw kirika kakike pimatisiwiniw.

⁸ Aric ma kotakihik iriniwok aka ka wi natotawatcik Kice Manitowa, ka anweritakik tapwewiniw kitci tca nosanetatcik ka maratanik, enko aniki ke wapatahikotcik Kice Manitowa e kiciwasiritci kirika kata anwerimikowok.

⁹ Aniki kaskina ka matci totakik kata otitikowok kitci arimisitcik kirika kitci nekateritakik. Wirctamiwaw cota iriniwok kata otitikowok, minawatc kaie aka ka cota iriniwitcik.

¹⁰ Aric ma aniki ka miro aitotakik kata mirikowok Kice Manitowa icperitakosiwiniw, kicteritamowiniw kirika pekaterimowiniw. Wirctamiwaw cota iriniwok kata otitikowok, minawatc kaie aka ka cota iriniwitcik.

¹¹ Nama meka kirawe miro totawew Kice Manito atita iriniwa patok kotakihi.

¹² Aka ka cota iriniwitcik aka ka kiskeritakik Kice Manito otaiamihe irakonikewiniw, aniheriw Moïse ka ki mirakaniwispan, peikon kaie wirawaw pactatiwok. Kata tca oniciniwok aka e ki otci kiskeritakik aniheriw aiamihe irakonikewiniw. Aric cota iriniwok kiskeritamok aiamihe irakonikewiniw. Kaskina tca nta e tacitcik ka pactatitcik kata tipaskonakaniwiwok kotc e itacterik neta.

¹³ Nama meka awik icikowisk kata iterimiko Kice Manitowa tepirak e motci natotak aiamihe irakonikewiniw. Acteriw kitci itotisketc kotc e itacterik, patoc tca minawa icikowisk kata iterimiko Kice Manitowa.

¹⁴ Aniki aka ka cota iriniwitcik nama kiskeritamok aniheriw aiamihe irakonikewiniw. Kecpin e totakik aniheriw ka itasinaterik, ekoni e ici wapatahiwetcik e kiskeritakik e apitc miro itatisiwakwen kekotc e apitc pactatiwakwen, misawatc aka tapwe e tatakik aniheriw aiamihe irakonikewiniw.

¹⁵ Ekoni e ici wapatahiwetcik e tatakik otehiwak aniheriw itatisiwiniw ka itacterik irakonikewinik. Kiskeritamok kaie omitoneritcikaniwak e apitc miro totamwakwen. Nanikotino kiskeritamok e ki matci totakik, nanikotino ma sokeritamok miro meskanariw e nosanetatcik.

¹⁶ Kaskina ohwe ka arimotaman kata miro nokon kotc iteritake Kice Manito kitci pe iciticohwatc Cecoc Krist kitci pe nta tipaskonikeritci kaskina ka ki kataikw kitehinak. Ekoni mia e icinakok ohwe Mirwatcimowin ka tipatcimoan.

Cota iriniwok kirika otaiamihe irakonikewiniwaw

¹⁷ Aric kir “ni cota iriniwin” kit itwan. Kit asperimototen cota aiamihe irakonikewin kirika ki micta kicteriten e tiperimisk Kikice Manitom.

¹⁸ Ki kiskeriten e nataweritak Kice Manito kitci itatisian, kirika ki ki kiskinohamakowin aiamihe irakonikewin kitci ki otapinaman ka mirwacik kitci totaman.

¹⁹ Ki tapweten e kackitain icikowisk kitci iciwiratcik aka ka wapitcik, kirika kitci wactenamowotcik iriniwok ka pimatisitcik e ici tipiskarik.

²⁰ Kit iteriten kitci kackitain kitci kiskinohamawotcik iriniwok aka kekociciriw ka kiskeritakik kaie kitci miro kiskinohamawotcik awacak. Ki ketcinaweritan meka aiamihe irakonikewinik e takok kaskina e ici kiskeritakok kaie e ici tapweritakok.

²¹ Kir tca ka kiskinohamawotcik iriniwok, kekwan wetci aka kir tipirawe kiskinohamasoin? Kir ka kiskinohamakein aka kitci kimotinaniwok, kekwan wetci kimotiin?

²² Kir ka itein aka kitci pacikwatisinaniwok, kekwan wetci pacikwatisiin? Kir ka itein “ni cikerimawok manitokanak,” kekwan wetci kimotiin kekocic neta ka ici kicterimakaniwitcik?

²³ Ki mirwataten Kice Manito otirakonikewin, nama aric wir ki kicterimawaw, osam aka e nosanetain aniheriw ka ici nataweritak.

²⁴ Ekoni meka e itasinatek Omasinahikanik: “Iriniwok aka ka cota iriniwitcik papirotawewok Kice Manitowa osam e wapatakik kirawaw e itatisiekw.” Ésaïe 52.5

²⁵ Kir e cota iriniwiin, ki ki kicawatacokowin kitci ki wapatahiwein Kice Manito otirinima e iteritakosiin. Mirwapatan anihe e totcikatek, kecpin tapwe e nosanetain aiamihe irakonikewin. Kecpin aric aka nosanetawonen, mia aka e ki otci kicawatacokoin e iteritakosiin.

²⁶ Kecpin awik aka ka ki otci kicawatocwakaniwitc e nosanetatc aiamihe irakonikewiniw, iterimiko Kice Manitowa mia peikon e ki kicawatocwakaniwitc.

²⁷ Kir ka cota iriniwiin, ki ki pe otitikon aiamihe irakonikewin ka masinatek kirika ki ki kicawatacokowin, nama aric wirawata ki nosanetawan anihe irakonikewin. Aric awik aka ka cota iriniwitc, aka ka ki otci kicawatocwakaniwitc, aric tca ka nosanetatc aniheriw irakonikewiniw, wapatahiwew e pimotein pactatowinik.

²⁸ Kecpin awik tapwe e cota iriniwikwen, nama tepirak onoskotc e icinakositc nisitowinakosiw, nama kaie tepirak e ki kicawatocwakaniwitc kitci nokonik owiawik.

²⁹ Anahwe tapwe ka cota iriniwitc, enko na atamik otehik e iteritakositc. Tarasak otehik ki kicawatocwakaniwiw e iterimakaniwitc. Tapwe kicawatacowewin, enkweriw Miro Manito ka totak iriniwa otehirik, namaiew aiamihe irakonikewin ka ki masinahikatek ka itotiskemakak. Enko ni tapwe cota iriniwok ka otitikotc mirwatcimowiniw Kice Manitok itekera, nama nte irinik e otciparinik.