Rome iriniwok 16 - Kice Manito Ocki Omirwatcimowin

E matcacikowakaniwitcik Rome iriniwok

¹ Ni ta mireriten kitci kiskerimekw anahwe kimisino Phébé ka icinikasotc. Atoskectawew kaskina ka tapwerimaritci Cecoca neta Cenchrées otenak.

² Kicterimakw Teperitciketc otci, kotc e acterik kaskina Kice Manito otirinima kitci ici mihitotcik e tacitcik. Kaskina wiec ici witcihakw, nataweritamatakwe ke ici witcihekw. Wir tipirawe mitcet iriniwa ki witcihew, kaie nin ni ki witcihikw.

³ Nit arimikowawok nikwimesak Priscille kaie Aquilas ka witc otamiromakik e atoskectawakitc Cecoc Krist.

⁴ Ki koctatikoniw opimatisiwiniwaw otci e ki pe witcihitcik. Mikwetc nit itawok. Mitcet kotakihik iriniwok ka tapwerimatcik Cecoca aka ka cota iriniwitcik kaie wirawaw wi itewok mikwetc.

⁵ Nit arimikowawok kaskina iriniwok Cecoca ka nosanehwatcik ka mawotcihitotcik e aiamihatcik neta omikiwamiwak Priscille kaie Aquilas. Kaie nit arimikowaw nikice miro nikwimes Épaïnète. Enko na nictam iriniw ka ki tapwerimatc Krist neta askik Asie ka icinikaterik.

⁶ Minawatc nit arimikowaw Mari ka ki micta otamirotc kirawaw otci.

⁷ Kaie peikon Andronicus kaie Junias nit arimikowawok, nitcirowemakanak ka ki kipohwakaniwitcik kirika nin. E nicitcik ni micta kicterimikowok anahweriw Cecoc otarotakana. Wawatc ki oreritamok kitci nosanehwatcik Cecoca epwamoci nin.

⁸ Minawatc nit arimikowaw Ampliatus kaie wir ka sakihak, e nosanehwatc kaie wir Teperitcikeritci.

⁹ Kaie nit arimikowaw Urbain, ka witc otamiromitokw e atoskectawatc Cecoca. Kaie wir anaha nikwimes ka sakihak Stachys nit arimikowaw.

¹⁰ Minawatc nit arimikowaw Apelles, anahwe ka ki wapatahiwetc tapwe e asperimototawatc Krist. Kaie nit arimikowawok kaskina ka taciketcik Aristobule omikiwamik.

¹¹ Nit arimikowaw Hérodion, kotak nitcirowemakan. Kaie aniki iriniwok nit arimikowawok neta ka taciketcik Narcisse omikiwamik ka tapwerimatcik Teperitcikeritci.

¹² Minawatc nit arimikowawok Tryphène kaie Tryphose, aniki e nicitcik iskwewok ka otamirotcik Teperitcikeritci otci. Kaie peikon nit arimikowaw nikice miro nikwimes Perside, kaie wir e micta otamirotc Teperitcikeritci otci.

¹³ Minawatc nit arimikowaw Rufus, ka miro atoskectawatc Teperitcikeritci, kaie otcotcoma, ka iterimimaki mia tipirawe nikawi.

¹⁴ Minawatc nit arimikowawok Asyncrite, Phlégon, Hermès, Patrobas, Hermas kirika kaskina kiwitcicaninowok kaie wirawaw.

¹⁵ Minawatc nit arimikowawok Philologue kirika Cweri, kaie Nérée acitc omisa Olympas, kaie kaskina Kice Manito otirinima ka witci tacikemikotcik.

¹⁶ Arimikatokw nete e taciekw, kitci otcemitoekw kaskina e taciekw Cecoc e owitcicanitoekw. Kaie aniki kaskina iriniwok ka mawotcihitotcik kitci aiamihatcik tapickotc e tapwerimatcik Cecoca kit arimikakowawok kaie wirawaw.

Mamitcitc e witamawakaniwitcik kitci aiekwamisitcik

¹⁷ Niwitcicanak, ki nataweritamatinawaw kitci aiekwamictowekok kaskina aniki ka matciparitatcik e totakik kitci papikanitonaniwonik. Paskewirewok iriniwa ka nosanehwaritci Cecoca, aka e ici naheritakik ka ici kiskinohamakoiekw. Atimikapowictawakok aniki towihik iriniwok.

¹⁸ Nama atoskectawewok anihi Ka Tiperimitokw Cecoca. Tepirak meka omisitawaw tiperimikowok. Oniwirewok iriniwa aka ka kiskeritamiritci ka maratanik e kiskinohamaketcik, e aitatcik kekociciriw ka mirotakonik kaie e mamirwatcimatcik.

¹⁹ Kaskina awik kiskeritam e natotawekw Teperitciketc. Ni mireriten tca kirawaw otci. Aric ni nataweriten kitci omiro mitoneritcikeiekw kitci miro totamekw kaie aka kekocic kitci otimihikoekw kitehiwak, aka tca kitci matci totamekw ka maratak.

²⁰ Kice Manito, anahwe ka pakitinak pekaterimowiniw, aci kekatc kata cakotcitaw Matci Manitowa omackawisiwiniw. Kata totam kitci mackawisiekw kaie kirawaw kitci cakotcihekw. Ni pakoserimon omirotehewin Ka Tiperimitokw Cecoc Krist kitci witci tacikemikoekw.

²¹ Timothée ka witc otamiromitc kit arimikakowaw. Kaie wirawaw Lucius, Jason kaie Sosipater, ka tcirowemakik.

²² Nin Tertius ka ki masinahaman ohwe masinahikan, kaie nin kit arimikatinawaw kaskina e taciekw, mia peikw e iteritakosiikw, tapickotc e nosanehwokw Teperitciketc.

²³ Gaïus kit arimikakowaw. Ekota ota e tacikeian Gaïus omikiwamik. Kaskina Cecoc otirinima mocak ota mawotcihitowok e pe nta aiamihatcik, kaskina e tacitcik. Éraste, anahwe ka mitatc coriariw ota Corinthe otenak, kaie kiwitcicanino Quartus kit arimikakowawok.

²⁴ [Ni pakoserimon omirotehewin Ka Tiperimitokw Cecoc Krist kaskina kitci witci tacikemikoekw. Kekora ki iki.]

Mamitcitc mirwatcimowin

²⁵ Mirwatcimatan Kice Manito! Kackitaw kitci miritakw mackawisiwiniw kitci sokikapowiekw e asperimototawekw, kotc mocak ka ki iteian e tipatcimoan Mirwatcimowin Cecoc Krist e arimomakaniwitc, ka ki mirikoikw kitci kiskeritamokw aniheriw aci weckatc ka iteritakipan kitci pe iciwepanik, kinowec ka ki katcicterikipan.

²⁶ Aci anotc ki pakitinam tekaci kitci kiskeritcikaterik. Kiskeritakon meka e tapwatcikaterik aniheriw masinahikaniw ka ki pe nikan tipatcimotcik ka ki ici masinahakik, mia ka ki ici nataweritak Kice Manito, wir ka kakike pimatisitc, kaskina iriniwok papitoc askik ka taciketcik kitci kiskeritakik, kotc tan wetotetcik, kitci ki tapwerimatcik kaie kitci ki natotawatcik.

²⁷ Kakike mocak icperimatan Kice Manito, wircike tekaci ka omiro omitoneritcikanitc! Cecoc Krist meka otci e ki itotisketc kitci icinakonik! Kekora ki iki! Nin Pwar