Rome iriniwok 12 - Kice Manito Ocki Omirwatcimowin

Ke ici ocki pimatisitc anahwe ke atoskectawatc Kice Manitowa

¹ Niwitcicanak, wirctam Kice Manito ki ki wapatahikono e apitc mirotehekotatokw, ekoni wetci pakoserimitakok tekaci kitci pakiterimitisoekw, wir tepirak kitci tiperitak kipimatisiwiniwariw, mia aiamihe pakitinikan ka pimatisimakak kitci iteritakosiekw, wir kitci tiperimitakw kaie kitci ki mireritamihekw. Ekoni ke totamekw tapwe wewerita kitci kicterimekw.

² Aka awocamec nosanetawakw e itatisitcik kotakihik iriniwok ota askik aka ka kicterimatcik Kice Manitowa. Aric pakitinakw Kice Manito kitci miritakw pitoc kitci ki aiteritamekw, kaie pitoc kitci ki itatisiekw. Ekoni ke otci kackitaiekw kitci nta kiskeritamekw mia e ici nataweritak kitci totamekw: e mirwacinik, ka ici mireritak kaie mia e itatisinaniwonik.

³ Wetci ki cawerimitc Kice Manito e ki mirotehekotawitc, ohwe kit ititinawaw kaskina kirawaw e taciekw: aka awocamec kicterimitisokw patok tapwe e iteritakosiekw. Kirawe wewerita mamitonerimitisokw tapwe e icinakosiekw, tato nta e taciekw kitci kanawapatak e ici kackitatc, kotc ka ici mirikotc Kice Manitowa kitci asperimototawatc.

⁴ Ki kiskeritenano e icinakonik awik owiaw. Peikonok anahwe, mitceniw aric ka airapatcitatc, papitoc e aitotiskewaketc.

⁵ Ekoni peikon e icinakosiikw, kaskina tapickotc e nosanehwokw Krist, mia peikw awik owiaw, misawatc e mitcetiikw, papitoc aric e airapatisiikw. Kaskina tapickotc, mia peikw kit iteritakosinano, papitoc e irapatisiikw.

⁶ Tato neta e taciikw takoniw papitoc ka ki ici cawerimikotc Kice Manitowa ke irapatcitatc, kotc e ici nataweritamiritci. Papeikw kata totam e ici kackitatc ka ki ici mirikotc Kice Manitowa. Kecpin peikw nta e taciikw ki mirikotc kitci tipatcimotc tipatcimowiniw, kata totam e ici kackitatc, ka ki ici mirikotc Kice Manitowa kitci asperimototawatc.

⁷ Kecpin peikw nta e taciikw ki mirakaniwitc kitci atoskectawatc owitc iriniwa, patoc wewerita kata totam. Anahwe ka ki mirakaniwitc kitci kiskinohamaketc, kata kiskinohamakew.

⁸ Anahwe ka ki mirakaniwitc kitci sosokimatc owitc iriniwa, kata sosokimew. Kecpin awik ki mirakaniwitc kitci pakitinak otirapatcitcikan e wi witcihatc owitc iriniwa, kata totam kaskina omirotehewin kitci apatcitatc. Minawatc kotak kecpin ki mirakaniwitc kitci mihatc iriniwa, wewerita kata mihew. Minawatc kotak kecpin ki mirakaniwitc kitci kackitatc kitci witcihatc ka arimeritamiritci, kata itotiskew kaie mocak kitci mireritak.

⁹ Sakihiwewin mocak kitehiwak kata otciparin. Cikeritamokw ka maratak. Kanaweritamokw ka mirwacik.

¹⁰ Sakihitokw kaskina e taciekw, mia tapwe e owitcicanitoekw e sakihitoekw. E irikokoteheiekw kicterimakok kiwitc iriniwawok.

¹¹ Otamirokw, aka kitimikw. Atoskectawakw Teperitciketc kaskina e irikokoteheiekw.

¹² Mocak mireritamokw e mamitoneritamekw e ici asperimoekw. Ciciperitamokw nakickamekwe arimisiwin. Mocak aiamihakw.

¹³ Witcihakok kiwitcicaniwawok ka arimisitcik kaie miro totawakok ka pe icatcik kimikiwamiwak.

¹⁴ Pakoseritamawakw Kice Manito kitci aiamitowatatc iriniwa ka nekatcihimitakw. Pakoseritamawakw kitci cawerimatc, aka kitci anwerimatc.

¹⁵ Kecpin kotakihik e mireritakik, ekoni tapickotc ici mireritamokw. Kecpin e matotcik, kaie kirawaw matokw.

¹⁶ Ekoni ici miroparihitokw, tapickotc kitci nahitatoekw e pimatisiekw. Aka pisinateweritamokw, aric otapinamokw e ici mirikoekw kitci totamekw misawatc aka e sapinakok anihe otamirowin. Aka iterimitisokw “ni micta omiro omitoneritcikanin.”

¹⁷ Kecpin awik e akohitakw, aka kiwe akohakw. Nantowapatamokw kirawe kitci miro totamekw, kaskina awik kitci wapatak.

¹⁸ Kecpin miroparike, irikik ke kackitaiekw, mocak wewerita ici nahitatokw kaie kaskina kiwitc iriniwaw.

¹⁹ Nimiro nikwimesak, aka nantowapatamokw kitci natamatisiweokw. Mirakw Kice Manito wir tipirawe kitci orakonatc okiciwasiwin. Ekoni e itemakanik Omasinahikan: “ ‘Nin tipirawe ni ka koski mirawok ka ki ici matci totatakw,’ itew Teperitciketc.” Deutéronome 32.35

²⁰ Kaie itasinateriw kiapatc: “Kecpin iriniw ka cikerimisk pakatete, ki ka miraw ke mitcik. Kecpin pakatamote, ki ka miraw ke minikwetc. Kecpin ani itotiskeine, ki ka waneritamihaw, mia mitowi e mawotcitawotc ickwaskiteskoriw okitc octikwanik.” Proverbes 25.21-22

²¹ Aka pakitinamokw kitci cakotcihikoekw ka maratak. Kirawe natowi totamokw ka mirwacik kitci otci cakotcitaiekw ka maratak.