Rome iriniwok 11 - Kice Manito Ocki Omirwatcimowin

Kice Manito nama ki otci wepakinew Israël iriniwa

¹ Ki kokwetcimitinawaw: Kice Manito ki wepakinew ia otirinima cota iriniwa? Nama ketcinatc! Nin meka tipirawe nit Israël iriniwin. Ekote nte e otapikecinian Abrahamik, kaie Benjamin otirinimik.

² Kice Manito nama ki otci wepakinew otirinima ka ki nikan orapamatc. Ki kiskeritenawatake e itemakak Kice Manito Omasinahikanik, neta ka atisokatakaniwitc Élie ka ki arimotamawatc Israël iriniwa Kice Manitowa, e ki itatc:

³ “Teperitcikein, aniki iriniwok ki nipahewok anihi iriniwa ka ki pe nikan tipatcimorispana kir otci, kaie ki pikotawok aiamihe mitcisowakaniw ka ici aiamihe pakitinakaniwonik. Nircike kiapatc ki nosanehitin, kirika natowi totamok kitci nipahitcik.” 1 Rois 19.10,14

⁴ Ki mikawinawaw ia Kice Manito ka ki itatc anihi Élie? Ki itew: “Nama tepirak ki peikocin e nosanehoin. Kiapatc nicwasowaw kice mitato mitana taciwok iriniwok ka kanawerimakik aka e ki otci nipiskoctawatcik manitokana ka icinikatakaniwiritci Baal.” 1 Rois 19.18

⁵ Ekoni kiapatc anotc e icinakok. Tawok kiapatc atita cota iriniwok Kice Manitowa ka ki orapamikotc e ici miroteheritci.

⁶ Ki orapamew osam e mirotehetc, nama osam wirawaw tipirawe e ki miro totamiritci. Kecpin meka ki orapamikotcik osam e ki mirotehetcik nama kata ki itwaniwon Kice Manito cawerimew iriniwa aka e wi koski nataweritamawatc kekociciriw.

⁷ Nama tca ki pe otitikowok Israël iriniwok e ici natowi totakwakopanen. Tepirak anahweriw Kice Manito ka ki orapamatc ki pe otitikoriwa. Minawatc anahweriw kotakihi ki mirew aka kitci kackitaritci kitci nisitotamiritci,

⁸ kotc e itasinatek Kice Manito Omasinahikanik: “Kice Manito ki mirew otehirik aka kitci nisitotamiritci, kaie ki totam aka kitci wapatamiritci acitc aka kitci petamiritci. Ekoni ka icinakok nac anotc.” Deutéronome 19.3(4); Ésaïe 6.10; 29.10

⁹ Okimaw Tapit ki arimotam kaie wir, e itetc: “E aiamihe makocetcik, wirawaw otci kata ispariniw mia awesis e onihamowakaniwitc e wi makonakaniwitc, kitci pe pakicikik, kaie kitci pe otitikotcik ka ki kackitamatisotcik.

¹⁰ Kitci mirakaniwitcik aka kitci wapatakik, kitci onitatcik tekaci e ici wapatakik, nac kirawe kitci iti wakawokanetcik mia kekociciriw e miwotatcik e kosikonik kitci icinakositcik.” Psaumes 69.23-24(22-23)

¹¹ Kiapatc kekocic ki wi kokwetcimitinawaw: Kit iteritenawaw ia cota iriniwok tekaci ki pakiciniwok, ka pacwactecikik? Nama ketcinatc! Tepirak wirawaw otitowinawaw e ki pactatitcik wetci ki pe akwacimakaniwitcik aniki kotakihik aka ka cota iriniwitcik. Kice Manito, ekoni ka ki totak tepirak kitci otcinawekeritamiritci cota iriniwa.

¹² Apitc cota iriniwok e ki pactatitcik, Kice Manito ki miro totawew kaskina awiriw ota askik. Kaie e pe atimikapowictakik meskanariw cota iriniwok, Kice Manito ki ocitaw meskanariw kaskina kotakihi iriniwa ota askik kitci ki cawerimakaniwiritci. Ekoni wetci kiskeritamokw anotc ke asitci cawerimakaniwitcik cota iriniwok apitc mia koski mitametawe omeskanamiwekw.

Kitci akwacimakaniwitcik aniki aka ka cota iriniwitcik

¹³ Minawatc kit aimihitinawaw kirawaw aka ka cota iriniwiekw. Nin nit atoskectawaw Cecoc, otarotakan e irapatisiwak. Ni ki iciticohokw kitci tipatcimoctatakok Omirwatcimowin, kirawaw aka ka cota iriniwiekw. Ni mireriten ohwe otamirowin ka ki acotamakoian.

¹⁴ Nit iteriten kirawe kitci otcinawekeritakik niwitc cota iriniwok, atita tca neta e tacitcik kitci ki akwacimakaniwitcik.

¹⁵ Apitc Kice Manito ka atimikapowictawatc cota iriniwa, ki pe natawapamew kotakihi iriniwa ota askik kitci ki nahitotaritci kirika wir. Aric kirawe kiapatc kata mirwinakon cota iriniwok niheritakawe, mia e apitcipatcik ke icinakositcik aniki ka ki nipowaspan otaiamihewiniwak.

¹⁶ Kecpin awik pakwecwate memantcic pakwecikana kitci ki cawerimatc Kice Manitowa e aiamihe pakitiniketc, tarasak misiwe tiperitamiriw anihi pakwecikana. Kecpin kaie otapia e cawerimatc Kice Manitowa, mictikok e ki otinatc, tarasak wawatc kaskina otikoniw kaie tiperitamiriw.

¹⁷ Israël iriniwok, mia mitowi peikon mictikw, “olivier” ka icinikatakaniwiritci. Ki kickicwakaniwiwok atita anihi otikona. Ki tca acotarakaniwok kotakihik otikona, e ki pe nitawikitcik kotak mictikok neta notcimik. Ekoni mitowi e ki totakoiekw Kice Manito kirawaw aka e cota iriniwiekw. Ka ici pe miro totawakaniwitcik cota iriniwok, aci kaie kirawaw ki miro totakowaw, mia peikon otapi mictikok e acamatc kaskina anihi otikona.

¹⁸ Nama tca actew kitci anwerimekok aniki iriniwok ka iteritakositcik mia mitowi anihi otikona ka ki kickicikateki mictikok. Nama actew kitci mirwatcimitisoekw! Mia mitowi otikona e iteritakosiekw. Namaiew ni kirawaw ka pimatisihekw anahwe otapia; otapi tca e sokaskositc, ekoni ka otci pimatisiekw.

¹⁹ Pot ki ka iciin: “Anihi otikona ki kickicikatewa, kitci ki nitawikian kaie kitci ki matcekian.”

²⁰ Tapwe wirata, wetci ki kickicikateki, osam aka e ki otci asperimototawewok Kice Manito. Minawatc ekota ni ka arikoiekw e ici apitcik, e ki asperimototawekw Kice Manito. Ekwa kitci osam kicterimoekw! Kirawe kata miroparin kitci kicterimekw Kice Manito aniheriw otci.

²¹ Kice Manito meka nama ki otci manatcihew cota iriniwa, mitowi otikon nictam ka ki aratc. Nama kaie kirawaw ki ka manatcihikowaw kecpin poni tapwerimekwe.

²² Mamitoneritamokw Kice Manito e ici wawapatahiwetc e asitci mirotehetc kaie e tipaskonatc iriniwa. Tipaskonew anahweriw ka ki pakiciniritci kaie kirawaw ki mirotehekotakowaw. Actew aric mocak kitci asperimototawekw wir e apitc mirotehetc. Kecpin aka ani totamekwe, ki ka wepinikowinawaw kaie kirawaw, mitowi otikon ka ki kickicikatek mictikok.

²³ Kecpin cota iriniwok anweritasotawe aka e ki otci tapwerimatcik Kice Manitowa, Kice Manito kata mirew kitci koski iterimatc nitirinimak, mia peikon e koski actatc otikoniw ka ki kickicak mictikok. Kackitaw meka kitci totak.

²⁴ Kirawaw aka ka cota iriniwiekw, mia mitowi otikon peikw mictikw, “olivier” ka icinikatakaniwitc, ka nitawikitc notcimik. Ki manicikatew anihe otikon, ki tca actakaniwon pitoc mictikok wewerita ka nanakatcitakaniwonik. Israël iriniwok wirawaw, mia mitowi nictam otikon ka ki nitawikinik neta mictikok, mocak wewerita ka ki nanakatcitakaniwonik. Otcitakotc tca kackitaw Kice Manito kitci koski nitawikihatc cota iriniwa neta ka ki ici tewakopanen.

Israël iriniwok kata akwacimakaniwiwok

²⁵ Niwitcicanak, ni nataweriten kitci kiskeritamekw aniheriw weckatc aci iteritakipan Kice Manito kitci pe iciwepanik ka katcicterikipan, aka tca orina kitci iterimitisoekw “ni omiro omitoneritcikanan.” Atita Israël iriniwok nama kata kackitawok kitci nisitotakik, nac kitci akwacimakaniwiritci kaskina kotakihik iriniwa ka ki orapamakaniwiritci.

²⁶ Ekoni ke otci akwacimakaniwitcik kaskina Israël iriniwok, kotc e itemakanik Kice Manito Omasinahikan: “Anahwe ke wikotcihatc kaskina iriniwa nte kata ototew Sion ka icinikaterik. Kata ocitaw kitci ickwaparinik aka e pamitamiritci iriniwa ka ki pe otapikeciniritci otaniskotape omocomiwawa Cakop.

²⁷ Enko ohweriw acotamakewin ke totamwak wirawaw otci apitc maninamowake opactatowiniwaw.” Ésaïe 59.20-21; 27.9

²⁸ Kecpin e mamitoneritcikaterik e ki anwetakik Mirwatcimowiniw cota iriniwok, tarasak nama ki otci naherimewok Kice Manitowa, kirawaw tca aka ka cota iriniwiekw kitci ki akwacimikoiekw. Aric kecpin kiapatc e mamitoneritcikaterik wir Kice Manito e ki orapamatc anahweriw otaniskotape omocomiwawa kitci otirinimitc, ki kiskeritenano kaie mocak e ki sakihatc cota iriniwa.

²⁹ Nama kiwenamatiso Kice Manito ka ki ici miriwetc. Nama kaie pitoc iterimew anahweriw ka ki wicamatc.

³⁰ Weckatc kirawaw aka ka cota iriniwiekw nama ki ki otci natotawawaw Kice Manito. Aric anotc ki ki pe otitikonawaw Kice Manito okitimakeritcikewin, osam aka e ki otci natotakik cota iriniwok.

³¹ Ekoni peikon ke isparinik wirawaw otci, mitowi kirawaw ka ki ispariekw. Anotc mekwata anweritamok Kice Manitowa. Aric nikotin kata kitimakerimikowok kaie wirawaw, mitowi e ki kitimakerimitakw.

³² Kaskina meka iriniwa ki pakitinew Kice Manito aka kitci pamitakotc, kaskina tca e taciritci kitci ki otci kitimakerimatc.

Kice micariw Kice Manito omirwasiwin

³³ Kice micariw omirwasiwin Kice Manito! Micta omiro omitoneritcikaniw acitc kakitaweritam! Nama kata ki kiskeritakoniw wetci ici iteritak! Nama kata ki nisitotcikateriw e ici oreritak kitci itotisketc!

³⁴ Ekoni e itasinaterik Kice Manito Omasinahikanik: “Nama awik kiskeritam e iteritamiritci Teperitcikeritci. Nama taw ke ki witamawatc ke totamiritci.” Ésaïe 40.13

³⁵ “Nama awik ki otci tipi mirew Kice Manitowa kitci ki iteritakositc kitci koski mirikotc kekociciriw.” Job 41.3(11)

³⁶ Kaskina meka e ici takonik wir ka ki kiceritak. Kaskina wir ka mitatc kaie e tiperitak. Kakike tca icperimatan! Kekora ki iki.