Rome iriniwok 1 - Kice Manito Ocki Omirwatcimowin

Pwar e arimikowatc okwimesa

¹ Nin Pwar ohwe ka masinahamatakok. Cecoc Krist ka atoskectawak, e ki wicamitc kitci iteritakosiwak otarotakana. Kice Manito ni ki orapamikw kitci witamawimiki iriniwa Omirwatcimowin.

² Aci weckatc Kice Manito ki nespi tapwepan kitci pe iciticahak aniheriw Mirwatcimowiniw. Ki witamawepan otirinima ka nikan tipatcimoritci. Ki tca masinahamok aniki wirawaw, neta Kice Manito Omasinahikanik ka kitcitwaweritakonik.

³ Neta Mirwatcimowinik arimomakaniwiw Kice Manito Okosa, anahwe Ka Tiperimitokw Cecoc Krist. E ki pe nitawikitc, Okimaw Tapit e ki otaniskotape osimitc.

⁴ Apitc Kice Manito ka apitcipahatc Cecoca, Miro Manito ki wapatahiwew wir anihi Kice Manito Okosa ka micta mackawisiritci.

⁵ Osam aniheriw ka ki itotiskeritci Okosa, Kice Manito ni ki cawerimikw omirotehewin, kitci ki iteritakosiwak Krist otarotakan, wir kitci kicterimakaniwitc, kitci tca pa wicamimaki iriniwa ota askik kaskina wiec e pe otciritci kitci tapwerimikotc kaie kitci natotakotc.

⁶ Kaie kirawaw Kice Manito ka ki wicamitakw kitci tiperimitakw Cecoc Krist.

⁷ Ki masinahamatinawaw kirawaw Rome otenak ka tacikeiekw, kaskina e taciekw ka sakihitakw Kice Manito kaie ka ki wicamitakw kitci pimatisiekw wir otci. Ni pakoserimawok Kotawino Kice Manito kirika Cecoc Krist Teperitciketc kitci miritakok mirotehewiniw kaie pekateritamowiniw.

Pwar e wi natawapamatc iriniwa Rome otenak ka tacikeritci

⁸ Nictam, mikwetc nit itaw Nikice Manitom e mamitonerimitakok, aniheriw wetci ki itotiskeritci Cecoc Krist. Kaskina meka e irikokoskamikak e petakaniwok e asperimototawekw Cecoc.

⁹ Kice Manito kiskeritam tapwe aniheriw ka ititakok, anahwe ka atoskectawak e irikokotehewak e tipatcimowak Mirwatcimowin, Okosa e arimomimaki. Kiskeritam mocak e mamitonerimitakok,

¹⁰ tatwaw e aiamihaian. Ni pakoserimaw kitci miritc wipatc kitci ki icaian e pe kiwotamitakok, kecpin ici nataweritake.

¹¹ Mocak meka ki wi pe natawapamitinawaw, e wi miritakok kaie kirawaw aniheriw ka ki miritc Miro Manito, kirawe kitci ki sokikapowiekw.

¹² Anihe ka wi iteian, ni nataweriten tapickotc kaskina kitci witcihitoikw kitci sokikapowiikw. E asperimototawekw Cecoc ki ka otci witcihinawaw, kaie nin ki ka otci witcihitinawaw e asperimototawak Cecoc.

¹³ Niwitcicanak, ni nataweriten kitci kiskeritamekw, mitcetwaw e ki kokwetcitaian kitci pe natawapamitakok, aric wiec ko ki isparin aka kitci miroparik kitci icaian. Mictahi meka ni nataweriten kitci icaian neta kitacikewiniwak kitci nta witcihakik aniki aka moci ka kiskerimatcik Cecoca kitci pe asperimototawatcik, mia ka ici witcihakik kotakihik iriniwok, wiec askik e taciketcik.

¹⁴ Ni ki mirikowin meka otcitakotc kitci natawapamakik kaskina iriniwok kitci tipatcimoctawakik Mirwatcimowiniw, iriniwok ka kicteritakositcik ota askik kaie aka ka kicteritakositcik, iriniwok ka ki kiskinohamasotcik kaie aka ka ki otci kiskinohamasotcik.

¹⁵ Ekoni wetci pasoweritaman kitci nta witamatakok Mirwatcimowin, kaie kirawaw Rome otenak ka tacikeiekw.

E ici mackawisimakak Mirwatcimowin

¹⁶ Nama ni waneriten e pa tipatataman ohwe Mirwatcimowin. Enkweriw meka aniheriw omackawisiwin Kice Manito ka apatcitatc e akwacimatc kaskina iriniwa ka tapwerimaritci Cecoca, nictam cota iriniwok ki pe otitikowok, aric kaie anahweriw aka ka cota iriniwiritci.

¹⁷ Enkweriw Mirwatcimowiniw ka otci kiskeritakonik ka totak Kice Manito icikowisk kitci ki iterimatc iriniwa. Kitci ki tca icikowisk iteritakositc awik, tepirak kata asperimototawew Cecoca. Nama kotakeriw kekociciriw kata ki otci totcikateriw kitci icinakonik, kotc ka itasinatek Kice Manito Omasinahikanik: “Anahwe icikowisk ka iteritakositc osam e asperimototawatc Kice Manitowa, kata pimatisiw.” Habacuc 2.4

Kaskina iriniwok patahamok

¹⁸ Wewerita ki wapatahikono Kice Manito e apitc kiciwasitc, kaskina e anweritak pactatowiniw acitc ka maratanik e itotiskeritci iriniwa, e matci totamiritci aka kitci nosanetakaniwonik tapwewiniw.

¹⁹ Mia meka e iteritakositc Kice Manito, miro nokoniw, kaskina awik kitci ki wapatak. Wir meka tipirawe Kice Manito wewerita ki wapatarew.

²⁰ Esko ka kiceritak askiriw, kata ki kiskerimakaniwiw e iteritakositc Kice Manito, misawatc aka wiskat e ki otci wapamakaniwitc. Miro kiskeritakoniw tca wir nespitc kitci mawotci mackawisitc, acitc wircike tepirak e Kice Manitowitc, e wapatcikaterik kaskina kekocica ka ki kiceritak. Nama kata ki itewok iriniwok namaiew wirawaw ka totakik wetci aka ki otci kicterimatcik.

²¹ Kiskeritamotakenak e taritci Kice Manitowa, nama aric kicterimewok, nama kaie naskamewok, mia e itacterik kitci totcikaterik Kice Manito otci. Nitowatc nama wewerita ki mamitoneritamok, mia e kiski tipiskarik e taciketcik, e kiwockweritakik.

²² Iterimitisowok “ni omiro omitoneritcikanan,” nama aric kekociciriw kiskeritamok.

²³ Nama kicterimewok Kice Manitowa aka wiskat ke ki niporitci, e ki kicterimatcik arotc manitokana e ki motci orikokotakaniwiritci e icinakosiritci mia irinik matci ke nipotc, kekotc mia pirecicak e icinakosiritci, kotakihik mia awesisa ka newokateritci, kaie kiapatc kotakihik mia kinepikok.

²⁴ Ekoni wetci ki pakiterimikotcik Kice Manitowa kitci matci totakik aniki iriniwok, kitci totatotcik matci kekociciriw mia e ici nataweritakik. Waneritakoniw aniheriw ka aitotisketcik.

²⁵ Ki wepakonamok Kice Manitowa otapwewiniw, kiraskiwiniw tca kitci nosanetatcik. Kicteritamok kekociciriw Kice Manitowa ka ki kiceritamiritci, kaie atoskectamok, nama aric kicterimewok anihi mia Ka Ki Kiceritamiritci kaskina kekociciriw. Enko na ka iteritakositc nespitc kitci mirwatcimakaniwitc! Kekora ki iki.

²⁶ Ekoni wetci ki pakiterimikotcik Kice Manitowa kitci totakik matci kekociciriw ke ki waneritamihikowaspan, kotc e ici nataweritakik kitci itotisketcik. Wawatc iskwewok pakiterimewok iriniwa, kekociciriw e totakik kirika kotakihi iskwewa, aka e acterik kitci itotiskaniwonik.

²⁷ Peikon kaie, iriniwok e totakik, pakiterimewok iskwewa, e tca moctenowatcik kotakihi iriniwa. Itotiskewok kekociciriw ke ki waneritamihikowaspan kirika kotakihi iriniwa. Matcipariwok, wirawaw tipirawe e ki kackitamatisotcik osam e ki patahakik.

²⁸ Aniki iriniwok ki iteritamok: “Nama wiec irapatan kitci kiskerimokw Kice Manito.” Ki tca pakiterimikowok, aka mia icikowisk kitci iteritakik, aspinikotc kitci ki totakik ka maratanik, aka e acterikipan kitci totamowaspan.

²⁹ Enko ohweriw kaskina matci kekociciriw e ici mockinerik otehiwak. Nama icikowisk ici mihewok owitc iriniwawa, micta matci totamok, wisakerimewok owitc iriniwawa e nataweritakik e ici tatamiritci, matcatikosiwok. Otcinawekerimitowok, manohowok, macikotatowok, wecimiwewok, mareritcikewok kaie itactahorehok.

³⁰ Pokonimewok owitc iriniwawa, cikerimewok Kice Manitowa, papirotakewok, wi kicterimikosiwok, mirwatcimitisowok. Mocak natowi totamok kitci ki miskakik ke ki otci matci totakik, nama wi natotawewok onikihikowawa.

³¹ Tekaci nama mamitoneritamok e pactatitcik. Nama ki asperimototawakaniwiwok kitci totakik kekociciriw e itetcik. Nama ki sakihewok owitc iriniwawa, nama kaie kitimakerimewok e arimisiritci.

³² Aniki iriniwok ata miro kiskeritamok Kice Manitowa e ki itactaritci: kaskina ka itatisitcik kackitamatisowok kitci nipotcik. Misawatc e kiskeritakik aniheriw, ekoni peikon e itotisketcik, kaie wawatc naheritamok kotakihi iriniwa e wapamatcik e matci totamiritci.