Ka ki ici wapatahakaniwitc Jean 8 - Kice Manito Ocki Omirwatcimowin

Anahwe mamitcitc kipotcickiwokisikan e pikopitcikatek

¹ Minawatc ka pikopitak Maritcenic mamitcitc kipotcickiwokisikaniw, ekoni aci nicowaso, tekaci nama ki otci kitonaniwon wakwek apita tipahikan wiec irikik.

² Minawatc ni ki wapamawok aniki nicowaso aceriwok neta e nanipowitcik nikanik Kice Manitowa e ici tacikeritci. Ki mirakaniwiwok nicowaso kweckoctatcikaniw ka kakinwaskonik.

³ Minawatc kiapatc peikw kotak aceriw ki pe nta nanipowiw neta ko ka ici aiamihe pakitinikaniwonik. Takonamopan orakaniw ka osawo coriawapiskowonik, neta ko e ici iskahikaterik sakatakaniw ka miromakonik. Nipara sakatakaniw ki mirakaniwiw kitci iskahak Kice Manitowa otci neta ka ici aiamihe pakitinikaniwonik, kitci icpipanik kaie peikon kaskina Kice Manito otirinima otaiamihewiniw. Neta ka ici aiamihe pakitinikaniwok, osawo coria ki totcikatepan e ocitakaniwok, nikanik e actekipan okimaw tetapiwakanik.

⁴ Sakatakan e ki iskahikatek e akwapitek ki icpiparin aceriw otcitcik e otciparik, nte e itinak Kice Manitowa e ici apiritci, kaie peikon aniheriw otirinima otaiamihewiniwariw.

⁵ Minawatc aceriw ki otapinam aniheriw osawo coria orakaniw. Ki mockinam e actatc ickoteriw, neta e ki otinak ka ici aiamihe pakitinikaniwonik, e iciwepinak askik. Ki petakosiw onimiskiw e micta kiciwetc, e wawaskoreparik, kaie e kwekok.

Kweckoctatcikana ka kakinwaskoki

⁶ Minawatc aniki nicowaso aceriwok ka takonakik nicowaso kweckoctatcikaniw ka kakinwaskonik ki weriwok kitci kweckoctatakik.

⁷ Nictam anaha aceriw ki kweckoctatcikew. Ka ickwa kweckoctatciketc, ki sesekaniw, kaie ickoteriw ki pakitiniw mamo kirika mikoriw, askik e ici pakitinik. Neta e nicto tipahikatek aski, peikw aniheriw tekaci ki ickwateriw, kaie mictikok kekatc apita e tacitcik ki ickwasowok, peikon kaie kaskina mackoci ki ickwatew.

⁸ Minawatc anahwe kotak aceriw ki kweckoctatcikew. Kekocic e micak, mia matina e icinakok, tekaci paskireparin e iciwepinikatek kitcikamik. E nicto tipahikatek kitcikami, peikw anihe ki iti mikwakamin e mikowonik,

⁹ kaie kekatc apita e tacitcik kitcikamik ka pimatisitcik ki nipowok, acitc peikon kiapatc kekatc apita micta tcimana tekaci ki oraparino.

¹⁰ Minawatc anahwe kotak aceriw ki kweckoctatcikew, ekoni aci nicto. Micta atcikoc ki pakicin, wakwek e otciparitc, e micta kanokorowetc, mia mictikw e icinakok onoskotc e otci ickwasotc. Ekota neta ka ici pakicik sipik kaie moskitciwonipekok, peikw nta e nicto tipahikateki.

¹¹ Anahwe atcikoc “Ka wisakisitc” icinikatakaniwiw. Anihe nipi tekaci nama wikacin. Mitcet ki nipahikowok e minikwetcik e ki pitcipotcik.

¹² Minawatc kotak aceriw ki potatam kweckoctatcikaniw, ekoni aci new. E nicto tipahakaniwitc kicikaw pisimw kekociciriw ki ispariw kaie peikon tipiskaw pisimw acitc atcikocak, kiapatc peikw nta e nicto tipahakaniwitcik, aka kitci wasisotcik. Tekaci nama ki otci wasisowok peikw e nicto tipahakaniwitc irikik mekwata e kicikarik kaie peikon e tipiskarik.

¹³ Kiapatc nit itapitai. Kek ni ki petawaw mikisiw e miretc micta icpimik, e kitotc e micta sokitakositc: “Arimiparin! Arimiparin! Kata arimipariwok kaskina ka pimatisitcik ota askik, petakosiritena anahweriw kotakihi e nictiritci aceriwa kweckoctatcikeritena okweckoctatcikaniwarik!”