Ka ki ici wapatahakaniwitc Jean 7 - Kice Manito Ocki Omirwatcimowin

Ka kicawatcihatc Kice Manito otirinima

¹ Ka ickwa ani isparik, ni ki wapamawok new aceriwok, kaskina e new kakikearik askik e nanipowitcik, e matcikonatcik papeikw pisitosiwa, tekaci aka kitci rotinik ota askik, kaie kitcikamik acitc tekaci aka kitci matacitcik mictikok.

² Minawatc kotak ni ki wapamaw aceriw, nte e pe ototetc wapanok, e takonak Kice Manitowa okipotcickiwokisikaniw, kakike ka pimatisiritci. Ki micta tepwatew anahweriw new aceriwa ka ki mirakaniwirispana mackawisiwiniw kitci akotaritci askiriw kaie kitcikamiriw. Ki kiciwew e itatc:

³ “Aka moci akotakw aski kaie kitcikami, peikon kaie mictikok nama moci ki ka akohawawok. Ki ka petanawaw patoc ickwa masinahamake okipotcickiwokisikan Kikice Manitomino oskitikowarik ka ki atoskectakotc.”

⁴ Ni ki witamakowin irikik ke tacitcik aniki ka ki kicawatcihakaniwitcik, mitatowaw kice mitato mitanowaw acitc nemitana acitc newaw kice mitato mitana ki taciwok aniki iriniwok, nte ka pe otapikecikik Israël iriniwok, kaskina e mitato acitc nicw otenwesitcik:

⁵ Mitato acitc nicwaw kice mitato mitana ki taciwok peikw otenaw Juda otaniskotape osima ka ki masinahwakaniwiritci e ki kipotcickiwokisikaniwiritci; peikon kaie anahweriw Ruben otaniskotape osima mitato acitc nicwaw kice mitato mitana ki taciriwa; peikon kaie anahweriw Gad otaniskotape osima mitato acitc nicwaw kice mitato mitana ki taciriwa;

⁶ kaie anahweriw Asser otaniskotape osima mitato acitc nicwaw kice mitato mitana ki taciriwa; kaie anahweriw Neftali otaniskotape osima mitato acitc nicwaw kice mitato mitana ki taciriwa; kaie anahweriw Manassé otaniskotape osima mitato acitc nicwaw kice mitato mitana ki taciriwa;

⁷ kaie anahweriw Simio otaniskotape osima mitato acitc nicwaw kice mitato mitana ki taciriwa; kaie anahweriw Lévi otaniskotape osima mitato acitc nicwaw kice mitato mitana ki taciriwa; kaie anahweriw Issakar otaniskotape osima mitato acitc nicwaw kice mitato mitana ki taciriwa;

⁸ kaie anahweriw Zabulon otaniskotape osima mitato acitc nicwaw kice mitato mitana ki taciriwa; kaie anahweriw Sosep otaniskotape osima mitato acitc nicwaw kice mitato mitana ki taciriwa; kaie anahweriw Benjamin otaniskotape osima mitato acitc nicwaw kice mitato mitana ki taciriwa. Kaskina aniki iriniwok ki kicawatcihakaniwiwok Kice Manitowa otci.

E mitcetinaniwok kaskina wiec e wetcitcik

⁹ Ka ickwa isparik, kiapatc ni ki itapin. Ni ki wapamawok iriniwok, e apitc ki micta mitcetitcik, nama awik kata kackitapan kitci akimatc e taciritci, iriniwok kaskina wiec e wetcitcik ota askik, kaskina e tato otenwesitcik, kaskina papitoc e aicinakositcik, acitc kaskina tatowek e ici arimwetcik. Ekota nta nikanik kaskina ka ici nanipowitcik okimaw tetapiwakanik, kaie nikanik Maritcenicik, kaskina e wapaspisotcik, tato nta e tacitcik e takonatc cikopia.

¹⁰ Ki tepitepwewok e micta kiciwetcik, e itetcik: “Enko na Kikice Manitomino ka apitc okimaw tetapiwakanik kirika Omaritcenicima ka akwacimitakok!”

¹¹ Kaskina aceriwok waskakapowipanak okimaw tetapiwakanik kaie peikon waskakapowictawepanak anahweriw ka kiceatisiritci acitc peikon anahweriw new ka pimatisiritci. Ki nipiskoparihowok nac tekaci motcik neta nikanik okimaw tetapiwakanik e kicterimatcik Kice Manitowa,

¹² e itetcik: “Kekora ki iki! Nespitc kitci mirwatcimakaniwitc Kikice Manitomino kaie kitci icperimakaniwitc, kitci asperimototawakaniwitc e omiro omitoneritcikanitc, kitci naskomakaniwitc, acitc kitci kicterimakaniwitc, kirika kitci kiskerimakaniwitc e asitcisitc, kaie e apitc mackawisitc, Kikice Manitomino, anotc nac nespitc! Kekora ki iki.”

¹³ Minawatc peikw neta e tacitcik ka kiceatisitcik ni ki kokwetcimikw: “Awin ni aniki iriniwok tekaci ka wapaspisotcik? Tante wetcitcik?”

¹⁴ Ni ki itaw: “Kir ki kiskeriten, nokimam.” Aci nit itikw: “Enko aniki ka ki capockakik ka micta nekatcitakaniwonik. Ki kisisipatawok owikasimiwaw kitci wapekinik, aniheriw e apatcitatcik Maritcenic omikoriw.

¹⁵ Ekoni wetci nanipowitcik nikanik Kice Manitowa okimaw otetapiwakanirik, kape kickwa kaie kape tipiskwa e atoskectawatcik neta okitci aiamihe mikiwamirik. Anahwe ka apitc okimaw tetapiwakanik nanakatcihew anahweriw iriniwa.

¹⁶ Nama wiskat awocamec kata pakatewok, kaie nama kata pakatamowok. Nama wiskat awocamec kata ickwasokowok pisimwa, nama kaie peikon kata ickwasikowok kaskina kekociciriw e kiciterik.

¹⁷ Kata mihikowok meka anihi Maritcenica neta tetawitc ka nanipowispan okimaw tetapiwakanik, mitowi awik ka nanakatcihatc omaritcenicima kitci iteritakosiritci. Kata iciwirikowok moskitciwonipekok e otci moskitciwonik nipiriw ka pimatisihiwemakanik. Kirika Kice Manito kata pekotcapohew e macikowinik omatowinapowaw.”