Ka ki ici wapatahakaniwitc Jean 6 - Kice Manito Ocki Omirwatcimowin

Apitc ka pikopitak kipotcickiwokisikaniw Maritcenic

¹ Minawatc ni ki wapamaw Maritcenic e pikopitak nictam e nicowatcinik kipotcickiwokisikaniw. Ni ki petawaw peikw nta e tacitcik aniki new ka pimatisitcik e micta kiciwetc, mia onimiskiw e ititakonik, e itetc: “Pe ica!”

² Ni ki itapin, ni ki wapamaw atikw e wapisitc. Anahwe ka okitapispan takonepan atcapia, e ki mirakaniwitc okimaw actotiniw. Enko na aci mitcet kekociciriw ka cakotcitatc. Ki matcaw, kiapatc kitci nta kanewitc.

³ Minawatc Maritcenic pikopitam kotakeriw kipotcickiwokisikaniw, ekoni aci nicw. Aci ni ki petawaw kotak ka pimatisitc e itetc: “Pe ica!”

⁴ Kiapatc peikw kotak atikw ki pe orowiw, tekaci e mikositc. Anahwe ka okitetapispan ki mirakaniwiw mackawisiwiniw kitci maninak pekateritamowiniw ota askik, kitci tca nipahitotcik iriniwok. E kinwapiskarik mokomaniw ki mirakaniwiw.

⁵ Minawatc kotakeriw ki pikopitam Maritcenic kipotcickiwokisikaniw, ekoni aci nicto. Ni ki petawaw kotak ka pimatisitc e itetc: “Pe ica!” Ni ki itapin, ni ki wapamaw atikw tekaci e makatewositc. Anahwe ka okitetapispan takonamopan tipapatcikaniw.

⁶ Ni ki peten kekocic mia peikw iriniw e arimwetc, nte e otciparik tetawitc aniki new ka pimatisitcik, e itetc: “Aci ki ka toten kitci mitawokataniwok. Coria ka kanewinaniwok peikwo kickwa e otamironaniwok, aci tepirak nicwo towatcikan kata ki otapinakaniwiw mirominockw kekotc ma tepirak nikotwaso towatcikan pitamin. Aiekwamisi aric aka kitci pikohatcik mictikok ‘oliviers’ ka icinikatakaniwitcik kaie cweminatikok, kiapatc kitci ki takok pimite kaie minicapo.”

⁷ Minawatc ki pikotaw Maritcenic kotakeriw kipotcickiwokisikaniw, ekoni aci new e pikotatc. Ni ki petawaw anahwe mamitcitc ka pimatisitc e itetc: “Pe ica!”

⁸ Ni ki itapin, kiapatc ni ki wapamaw atikw e micta wapinewositc. Anahwe ka okitapispan icinikatakaniwiw “Nipowin.” Pe nosanehikopan kotakihi awiriw ka icinikatakaniwiritci “Neta ka ici niponaniwok.” Ki mirakaniwiwok mackawisiwiniw kitci ki tiperitakik peikw e irikokoskamikarik e ki newo tetawonikaterik, atita iriniwa neta ka tacikeritci ota askik kitci nipahitoritci e natoparinaniwonik, kotakihi tca iriniwa kitci kokateritci kitci niporitci, kotakihi kitci akosiritci kitci niporitci, acitc kotakihi iriniwa kitci nipahikoritci awesisa notcimik ka pimatisiritci.

⁹ Minawatc Maritcenic ki pikopitam kotakeriw kipotcickiwokisikaniw, ekoni aci niaran. Minawatc ni ki wapamimawok iriniwok otcakocimiwaw, cekotc e ici miciniritci neta ko ka ici aiamihe pakitinikaniwonik, kaskina aniki otcitcakociwawa ka ki pe nipahakaniwitcik, osam e ki tipatcimotcik Kice Manito otitewiniw mocak e ki tipatatakik ka totamiritci Kice Manitowa.

¹⁰ Ki micta kiciwewok aniki atcakok, e itetcik: “Teperitcikein, kir ka kitcitwawisiin, mocak ka tapwein kekocic e itein. Tan apitc ke tipaskonatcik iriniwok ota askik ka pimatisitcik ka ki nipahimitcik, kitci kicakonatcik ka ki matci totawimikitcik?”

¹¹ Aci ki mamirakaniwiwok papeikw wikasiriw e wapekinik, e itakaniwitcik kiapatc memacic kitci pehotcik, nac kaskina kitci ickwa takociparinik ke tacirispana owitcicaniwawa kaie anahweriw ka ki witcewikotcik ka atoskectaketcik kaie wirawaw kitci nipahakaniwirispana mitowi wirawaw tipirawe ka ki nipahakaniwitcik.

¹² Minawatc kiapatc ni ki wapamaw Maritcenic e pikopitak kipotcickiwokisikaniw, ekoni aci nikotwaso. Kek ki micta kwekon. Pisimw tekaci iti makatewosiw, mia wikasi tekaci e makatewekik, awik e apatcitatc e cikawitc. Minawatc tipiskaw pisimw tekaci iti mikosiw, mia miko.

¹³ Atcikocak ki nitcipariwok e pakicikik ota askik, mitowi wapiminak ka otci pakicikik wapiminatikok e aiatcitcik e micta rotinik.

¹⁴ Minawatc icpimik tekaci nama ki otci nokon, mia masinahikanickwemokw e ki notimickweminikatek. Kaskina matina kaie minictikw mia e ki maniparik ka icinakok, e ki micta atcipariki.

¹⁵ Kaskina iriniwok ki nta kasowok atamapisk, neta asinik matinak, e koctakik kitci pasakactehwakaniwitcik: okimawok ota askik kirika kotakihik ka nikaniwitcik, cimakanicak okimamiwaw, iriniwok ka micikitatcik, iriniwok ka mackawisitcik kaie kaskina kotakihik iriniwok, ka arotakaniwitcik acitc aniki aka ka arotakaniwitcik.

¹⁶ Ki tepwewok matinak kirika asinik e itatcik: “Ote pe ici tetipiparikw! Ni ka tca miro kasonan, aka kitci wapamiamitc anahwe ka apitc okimaw tetapiwakanik kaie anahwe Maritcenic aka kitci pasakactehwimitc.

¹⁷ Aci meka otcitciparin e kicikak kitci micta kiciwasitcik Kice Manito acitc Omaritcenicima, kaskina iriniwa kitci pasakactehwatcik. Nama awik kata kackitaw kitci ocimohitisotc.”