Ka ki ici wapatahakaniwitc Jean 5 - Kice Manito Ocki Omirwatcimowin

Masinahikan acitc Maritcenic

¹ Minawatc ni ki wapaten masinahikan e aitowi notimickweminikatek, onihiwinik e takonak anahwe neta ka apitc okimaw tetapiwakanik. Anahwe masinahikan aitowisinatepan. Nicowaso kipotcickiwokisikaniw ki actakaniwoniw neta masinahikanik aka awik kitci ki cenak.

² Ni ki wapamaw peikw aceriw ka mackawisitc, e tipatcimotc e micta sokitakositc: “Awin ka tipi iteritakositc kitci ki pikotatc kipotcickiwokisikaniw kaie kitci cenak aniheriw masinahikaniw?”

³ Nama aric awik tapan neta wakwek kirika askik kaie atamik askik kitci ki cenak aniheriw masinahikaniw kitci nta kanawapatak tan e itasinaterik.

⁴ Ni ki micta maton anihe otci, aka e tatc awik ka tipi iteritakositc kitci ki cenak aniheriw masinahikaniw kitci ki tca kanawapatak.

⁵ Aci peikw nta ka kiceatisitc ni ki itikw: “Aka mato. Kanawapatamokw! Anahwe ka icinikatakaniwitc ‘Micapiciw ka tiperimatc iriniwa Juda otaskirik ka tacikeritci,’ anahwe ka ki otaniskotape omocomitc Okimaw Tapita, wir kaskina ki cakotcitaw ka maratanik! Matci kackitaw kitci pikotatc aniheriw nicowaso kipotcickiwokisikaniw kitci cenak masinahikaniw.”

⁶ Minawatc ni ki wapamaw peikw Maritcenic, e nanipowispan tetawitc okimaw tetapiwakanik, e waskakapowictakopanen anahweriw ka newowiritci ka pimatisiritci kaie anahweriw ka kiceatisiritci. Mia e ki nipahakaniwitc e icinakositc. Nicowatciripana oteckana. Kaie nicowatcinipan ockicikw, enko aniki nicowaso manitowok Kice Manito ka ki iciticohwatc kaskina e irikokoskamikarik.

⁷ Anahwe Maritcenic ki pe iti icikapowiw, e otapinak masinahikaniw onihiwinik anihi ka apiritci nta okimaw tetapiwakanik.

⁸ Ka otapinak aniheriw masinahikaniw, aci aniki ka newotcik ka pimatisitcik kirika aniki nicitana acitc new ka kiceatisitcik ki nipiskoctawewok anihi Maritcenica, kaskina tato nta e tacitcik e takonakik aceriw pwapwapikepitcikaniw, kaie e osawapiskarik orakaniw e mockinerik, ka miromakonik e akwapiterik e takonik. Anahwe akwapite mia peikon Kice Manito otirinima otaiamihewiniw e iteritakok.

⁹ Aci ocki nakamowiniw nakamowok, e itetcik: “Kir ki tipi iteritakosin kitci otapinaman ohwe masinahikan kaie kitci pikopitaman kipotcickiwokisikana kitci cenaman masinahikan. Ki ki meka nipahikowin, e ki pakitinaman kimikw kitci macikowik. Ki ki tca otapinawok iriniwok Kice Manito otci, kaskina e tato otenwesitcik ota askik, kaskina tatowek e ici arimwetcik, kaskina papitoc e aicinakositcik, kaie kaskina wiec e wetcitcik ota askik.

¹⁰ Ki ki mawotcihawok kokimawinik. Ki ki mirawok kaie kaskina e tacitcik makatekorek kitci iteritakositcik, Kikice Manitominowa kitci atoskectawatcik, kaie kata nikaniwiwok ota askik.”

¹¹ Nit itapatai kiapatc kaie ni ki petawawok e micta kice mitcetitcik aceriwok, micta mitcetwaw kice mitato mitana e tacitcik. Nama ki akimakaniwiwok e apitc mitcetiwaspan. Waska aniheriw okimaw tetapiwakanik icikapowipanak aniki aceriwok kaie nta e ici nanipowirispana anahweriw ka pimatisiritci acitc ka kiceatisiritci.

¹² Nakamopanak e micta kiciwetcik: “Maritcenic ka ki nipahakaniwitc tipi iteritakosiw kitci pe otitikotc mackawisiwiniw kaie micikitawiniw, miro mitoneritcikaniw acitc tiperitamowiniw, kaie kitci kicterimakaniwitc, kitci icperimakaniwitc acitc kitci mirwatcimakaniwitc!”

¹³ Minawatc ni ki petawawok aniki kaskina ka ki kicerimakaniwitcik: wakwek ka taciketcik, askik ka pimatisitcik, atamik askik ka taciketcik, acitc kitcikamik ka taciketcik, —kaskina e tatcik e irikokoskamikarik— e nakamotcik: “Anahwe ka apitc okimaw tetapiwakanik, kaie anahwe Maritcenic, nespitc kitci mirwatcimakaniwitcik, kitci kicterimakaniwitcik, kitci icperimakaniwitcik kaie kitci mackawisitcik!”

¹⁴ Aniki new ka pimatisitcik ki itewok: “Kekora ki iki!” Minawatc aniki ka kiceatisitcik ki nipiskoctawewok e kicterimatcik.