Ka ki ici wapatahakaniwitc Jean 4 - Kice Manito Ocki Omirwatcimowin

Kice Manito e kicterimakaniwitc wakwek

¹ Minawatc kotak kiapatc ni ki icinen: ni ki wapaten ickwatem e cetik wakwek. Kiapatc ni ki petawaw anahwe nictam ka aimihispan, ka micta sokitakonik otarimwewin, mitowi kweckoctatcikan e ititakonik, e pe icitc: “Pe ica ota icpimik. Ki ka wapatahitin ke isparik nikanik.”

² Tecikotc Miro Manito ni ki pe nta pitciteheckakw. Ni ki wapatamwan nete wakwek okimaw otetapiwakan, aci awik neta e taci apispan.

³ Micta mirosipan e micta wasisospan, mitowi asiniik ka micta mirwapiskosiritci, “jaspe” kirika “sardoine” ka icinikatakaniwitcik. Aci waska anihe okimaw tetapiwakanik nokonopan pisimwapi e micta wasitek, mia asini ka osawapiskositc ka icinikatakaniwitc “émeraude.”

⁴ Waska anihe okimaw tetapiwakanik nicitana acitc new tatinopan kotakihi okimaw tetapiwakana. Ekota neta e apiwaspan nicitana acitc new ka kiceatisitcik, e wapekohowaspan, kaie octikwaniwak okimaw actotiniw e osawo coriawapiskowonik e apatcitawaspan.

⁵ Ekota neta e otci orowiparikipan okimaw tetapiwakanik e micta waskoreparik. Kaie onimiskiw e petakosispan e micta kiciwetc. Nicowatcinopana wactenamakana ka kanowaskoki e ki iskahikateki, neta nikanik anihe okimaw tetapiwakanik. Anihi wactenamakana ka ki iskahikateki, tarasak enko ni aniki e nicowatcitcik manitowok ka atoskectawatcik Kice Manitowa.

⁶ Kaie kiapatc takonopan kekocic nikanik okimaw tetapiwakanik, mia peikon kitcikami e micta wasipekitik, mia osapiwakanapiskw e icinakok. Micta cipwacteharik, mia peikon asini ka icinikatakaniwitc “cristal.” Nokosipanak “new ka pimatisitcik” ka icinikatakaniwitcik, neta waska aniheriw okimaw tetapiwakanik kirika opimera e icikapowitcik, tekaci e itikititcik ocakawak nokonipan ockicikowaw e mitcenik.

⁷ Anahwe nictam ka pimatisitc neta icinakosipan mia micapiciw. Minawatc anahwe tec icinakosipan mia toro. Minawatc anahwe kotak mia irinik e icinakosispan otactamikok, minawatc anahwe kiapatc kotak mia mikisiw e icinakosispan e opohotc.

⁸ Tato neta e tacitcik aniki new ka pimatisitcik nikotwatcinipan otatakoniwaw. Tekaci e itikititcik nokonipan ockicikowaw ocakawak, wawatc okitc otatakoniwak nokonipan ockicikowaw. Mekwata e kicikarik kaie e tipiskarik, nama ponitawok e nakamotcik, e itetcik: “Kitcitwawisiw, kitcitwawisiw, kitcitwawisiw, Teperitciketc Kice Manito, wir ka mawotci mackawisitc, mocak ka ki pe tatc, ka tatc anotc kaie nikanik ke pe icatc.”

⁹ Tatwaw ka nakamotcik aniki new ka pimatisitcik kitci icperimatcik, kitci kicterimatcik kirika kitci naskomatcik anihi ka apiritci okimaw tetapiwakanik, nespitc ka pimatisiritci,

¹⁰ aci nta aniki nicitana acitc new ka kiceatisitcik ki nipiskoctawewok anihi ka apiritci neta okimaw tetapiwakanik, e kicterimatcik anihi nespitc ka pimatisiritci. Pe nta actawok aniheriw okimaw actotiniwaw, octikwaniwak ka acterik, neta nikanik okimaw tetapiwakanik, e itetcik:

¹¹ “Teperitcikein, Nikice Manitominan, ki tipi iteritakosin kitci mirwatcimikoin, kitci kicterimikoin kaie kitci pe otitikoin mackawisiwin. Kir meka kaskina kekocic ka ki kiceritaman, e ki iteritaman kitci pe icinakok.”