Ka ki ici wapatahakaniwitc Jean 3 - Kice Manito Ocki Omirwatcimowin

Ka ici witamawakaniwiritci Cecoc otirinima neta ka tacikeritci Sardes otenak

¹ Minawatc kiapatc ni ki itikowin: “Masinahamo anahwe aceriw ka mihatc iriniwa ka tapwerimiritci neta ka tacikeritci Sardes otenak: Enko ohweriw ka itetc anahwe ka taritci anihi ka nicowatciritci manitowa kaie e nicowatciritci atcikoca: Ni kiskeriten e aitotamekw. Ni kiskeriten iriniwok arotc e iterimitakok ‘pimatisiwok,’ aric tapwe wirata ki niponawaw kitcitcakociwak itekera.

² Kockosikw! Mantokasokw kaketin kitci kanaweritamekw anihe kiapatc kitehiwak e actek, aka tekaci kitci nipomakak. Ni ki meka nanakatcitan aka moci e totamekw kaskina ka ici nataweritamatakw Nikice Manitom.

³ Mikaweritamokw tca anihe kiskinohamakewin ka ki pe otitikoiekw kaie ka ki ici petamekw. Sapitamokw kaie kweskatisikw! Kecpin aka kockosiekwe, kimotc ki ka keskopititinawaw, aka kitci kiskeritamekw apitc ke pe icaian, mia mitowi kimoti iriniw e itotisketc aka e kiskeritakositc apitc ke pe takocik.

⁴ Anotc mekwata atita neta e taciekw nta ka taciketcik Sardes otenak mirwinakosiwok, mia mitowi aka e ki otci ometciwotatcik owikasimiwaw. Ni ka witcewikok, tapickotc kitci pimoteiak, e wapekinik owikasimiwaw. Aci meka ici naherimakaniwiwok kitci ici kicterimakaniwitcik.

⁵ Aniki ke cakotcitatcik ka maratanik kata ici wapaspisowok. Nama wiskat ni ka kasisinahamwan oticinikasowiniwaw Pimatisi Masinahikanik. Notawi Kice Manito kaie otacerima ni ka witamawawok ohweriw: Enko aniki nin tipirawe nitirinimak.

⁶ Acteriw kaskina iriniwok ka kackitatcik kitci petawitcik wewerita kitci natotawatcik Miro Manitowa e itaritci nitirinima.”

Ka ici witamawakaniwiritci Cecoc otirinima neta ka tacikeritci Philadelphie otenak

⁷ Minawatc ni ki itikowin: “Masinahamo anahwe aceriw ka mihatc iriniwa ka tapwerimiritci neta ka tacikeritci Philadelphie otenak: Enko ohweriw ka itetc anahwe ka kitcitwawisitc, mocak kaie ka witak tapwewiniw, anahwe ka takonamwatc Okimaw Tapita ocehikaniw. Kecpin wir e cenak ickatemiriw, nama awik kata ki kipaham. Kecpin e kipahak, nama awik kata ki cenam.

⁸ Ni kiskeriten e aitotamekw. Ni kiskeriten aka orina e mackawisiekw, peikon e ki natotamekw nitarimwewin, aka kaie e ki otci pakiterimiekw. Ni ki tca cenen peikw ickwatem kirawaw otci, aka awik ke ki kipahak.

⁹ Aric aniki iriniwok ka nosanehwatcik Matci Manitowa, ka kiraskitcik e itetcik ‘ni cota iriniwinan,’ aric aka tapwe e iteritakositcik, wikockatc ni ka pe iciwirawok kitci pe nta nipiskoctatakok kitci kicterimitakok. Kata kiskeritamok e sakihitakok.

¹⁰ Ki ki natotawinawaw ka ititakok mocak kitci sokikapowiekw. Ki ka tca nanakatcihitinawaw aka wiec kitci ispariekw, mekwata ke pe arimiparik. Kata meka pe arimiparin ota askik, kaskina iriniwok kitci nta kiskerimakaniwitcik e apitc ma tapwerimiwakwen.

¹¹ Aci peconakon kitci pe koski takocinian! Wewerita kanaweritamokw kitasperimowiniwaw, aka awik kitci maskamatakw ke ici kackitamatisoekw.

¹² Aniki ke cakotcitatcik ka maratanik ni ka arawok mitowi apocowatikw e micta sokaskotik, Kice Manito okitci aiamihe mikiwamik ka takok. Nama wiskat minawatc kata orowiwok. Ni ka masinahamwan oskitikowak e icinikasoritci Kice Manitowa, kaie e icinikaterik otenamiriw. Enko anihe otenaw ‘Ocki Jérusalem’ ka icinikatek, wakwek kitci pe otciparik, Nikice Manitom ke pe iciticahak. Ni ka masinahamwan kaie ocki niticinikasowin oskitikowak.

¹³ Acteriw kaskina iriniwok ka kackitatcik kitci petawitcik wewerita kitci natotawatcik Miro Manitowa e itaritci nitirinima.”

Ka ici witamawakaniwiritci Cecoc otirinima neta ka tacikeritci Laodicée otenak

¹⁴ Minawatc ni ki itikowin: “Masinahamo anahwe aceriw ka mihatc iriniwa ka tapwerimiritci neta ka tacikeritci Laodicée otenak: Enko ohweriw ka itetc anahwe ka icinikatakaniwitc ‘Amen,’ mocak ke ki asperimototawakaniwitc kitci witak tapwewiniw, mocak e tapwetc. Enko na ka otciparinik kaskina Kice Manitowa ka ki ici nitawikitaritci.

¹⁵ Ni kiskeriten e aitotamekw. Ni kiskeriten aka mocak e nosanehwiekw, kaie aka tekaci e wepiniekw, mia mitowi nipi e iteritakosiekw aka ka tipi takikamik kaie aka ka tipi kicakamitek. Mocak ki ta nosanehwinawaw, tepirak peikw kitehiwaw kitci apatcitaiekw!

¹⁶ Aric ani e icinakosiekw, aka tekaci e pe nosanehwiekw, nanikotino e wi wepiniekw, ki ka cecikokwatitinawaw.

¹⁷ Kit itwanawaw: ‘Ni micikitanan kaie ni micta miro kackitamatisonan. Nama kekocic ni noteparinan.’ Nama aric ki kiskerimitisonawaw e apitc arimisiekw kaie nekasinakosiekw. Ki kitimakisinawaw, aka e owikasimiekw kaie aka e wapiekw.

¹⁸ Ekoni wetci wikosimitakok kitci pe natawapamiekw kaie kitci otapinamekw osawo coria ka mawotci mirwacik. Ekoni patoc ke totamekw tapwe kitci micikitaiekw. Pe natawapamicikw kitci pe nta otapinamekw wikasi e wapekik kitci icihoekw. Nama tca ki ka otci wanakatcinawaw, aka e owikasimiekw. Pe natawapamicikw kaie kitci natcipataiekw mackiki kitci actaiekw kickicikowak kitci ki wapiekw.

¹⁹ Kaskina ka sakihakik, ni witamawawok icikowisk kitci matcatcik, kaie peikon ni sikiskimawok kecpin aka mia e itatisitcik. Mantokasokw kitci nosanehwiekw kaie kweskatisikw.

²⁰ Natotamokw! Pecotcik ickwatemik ni nanipowin kirika ni papawohen. Kecpin awik petawite, cenamowite tca ickwatemiriw, ni ka pitakewan omikiwam, kaie ni ka nta witci mitcisomaw acitc ni ka witci mitcisomikw.

²¹ Aniki ke cakotcitatcik ka maratanik ni ka mirawok kitci pe apitcik neta nokimaw tetapiwakanik e ici apiwak, tapickotc kitci tiperitamak, mitowi kaie nin ka totaman ka ickwa cakotcitaian ka maratak, e ki nta apian Notawi e ici apitc okimaw tetapiwakanik.

²² Acteriw kaskina iriniwok ka kackitatcik kitci petawitcik wewerita kitci natotawatcik Miro Manitowa e itaritci nitirinima.”