Ka ki ici wapatahakaniwitc Jean 22 - Kice Manito Ocki Omirwatcimowin

¹ Minawatc anahwe aceriw ni ki wapatahikw micta sipiriw. Ekota neta wetacikowinik nipiriw, iriniwok ka pimatisickakotcik. Anihe sipi micta wasitepan, mia asini “cristal” ka icinikatakaniwitc. Ekota neta wetacikowikipan. Kice Manito okimaw tetapiwakaniwak kaie anahwe Maritcenic.

² Ekota neta macokowik tetawitc micta meskanak otenak. Anahwe wapiminatikw ka otci pimatisinaniwok otci nitawikiw neta rarewak sipik, aitowikam e ici nitawikitc. Mitato acitc nicwaw tato pipona pakitinew wapimina, peikwaw tato pisimwa e pakitinatc. Onipicim miro mackikiwoniw. Enkweriw ka apatanik kitci kikehakaniwitcik kaskina iriniwok e irikokoskamikarik.

³ Nama kata takon neta kekocic otenak Kice Manito kitci itetc “nama mirwacin.” Okimaw otetapiwakaniwaw Kice Manito kaie anahwe Maritcenic, ekota neta otenak ke acterik. Ka atoskectawatcik Kice Manitowa kata kicterimewok.

⁴ Kata wapamewok otactamikorik, kaie oticinikasowiniw kata masinateriw oskitikowak.

⁵ Nama awocamec kata tipiskaw. Nama soka kata apatcitawok wactenamakaniw kitci wacterik, kaie peikon pisimwa. Wir meka tipirawe Teperitciketc Kice Manito kata wactenamawew. Nespitc kata tiperitamok.

Koski takocike Cecoc

⁶ Minawatc anahwe aceriw ni ki itikw: “Tapwe ohwe ka aiteian. Ki ka ki asperimototen tapwe kitci icinakok. Teperitciketc Kice Manito, anahwe ka miratc nikan tipatcimo iriniwa ke aiteritci e tipatcimoritci, ki iciticahwew otacerima kitci nta witamawaritci ka atoskectakotc ke iciwepanik nanake.”

⁷ Cecoc itew: “Natota! Aci peconakon kitci pe koski takocinian! Caweritakosiwok aniki ka kanaweritakik ka ici nikan tipatcimonaniwonik ota masinahikanik!”

⁸ Nin tipirawe Jean ka ki petaman anihe, kaie ka ki wapataman. Ka ickwa natotaman kaie ka ickwa wapataman, ni ki nipiskoctawaw aceriw ositik ka ki wapatahitc, kitci kicterimak.

⁹ Aric ni ki itikw: “Ponita nte e totaman! Kaie nin Kice Manito otarotakana, mitowi kir, kaie mitowi kiwitcicanak ka ki pe nikan tipatcimotcik, kaie aniki kaskina ka kanaweritakik e itasinaterik ota masinahikanik. Wir Kice Manito ki ta kicterimaw!”

¹⁰ Minawatc ni ki itikw: “Aka kir tepirak kanaweritamatiso kaskina ka ici nikan tipatcimonaniwok ota masinahikanik. Peconakon meka kaskina anihe kitci otcitciparik.

¹¹ Mekwata acteriw tato iriniw kitci pimatisitc mocak e ici pimatisispan. Kaskina awik ka matci iriniwitc, kiapatc kata matci itatisiw. Anahwe ka matcatikositc, kiapatc kata itatisiw. Anahwe ka miro iriniwitc kiapatc mocak kata miro totam, kaie anahwe ka kitcitwawisitc, kiapatc mocak kata icinakosiw.”

¹² Cecoc itew: “Natota! Aci peconakon kitci pe koski takocinian! Ni ka petan ke ici cawerimakik kaskina papeikw iriniwok, ka ki ici nta kackitamatisotcik.

¹³ Nin kaskina ka ki kitciparitaian, nin kaie kaskina ke ickwanaman. Ninctam ni ki tan epwamoci kaskina kekocic, nin kaie mamitcitc ke taian. Aci ni tacikatai kaskina kekocic ka kitciparik, kaie mocak ni ka tacikan nac kaskina kekocic ickwaparike.

¹⁴ Caweritakosiwok kaskina ka kisisipatatcik owikasimiwaw kitci wapekinik kitci otci iteritakositcik. Kata tca mirakaniwiwok kitci mowatcik wapimina ka nitawiritci neta wapiminatikok ka otci pimatisinaniwonik, kaie kata pakitinakaniwiwok kitci otci pitaketcik neta ickwatemik otenak.

¹⁵ Aric kaskina ka matcatikositcik kata tacikewok orowitimik otenak, kaie aniki ka matci totakik e matawositcik ka maratanik e wi ispatakik, kaie aniki ka pacikwatisitcik, ka manohotcik, ka kicterimatcik manitokana, kaie kaskina ka sakitatcik ka wi nta kiraskitcik!”

¹⁶ “Nin, Cecoc, ni ki iciticohwaw nitacerim kitci nta witamatakw kaskina aniheriw, kaskina wiec e ici mawotcihitoritci Kice Manito otirinima. Ekota neta wetapikecinian weckatc Okimaw Tapit. Nin nit iteritakosin wapan atcikoc e kicepawonik ka wasisotc.”

¹⁷ Miro Manito kaie anahwe iskwew ka ki ocki nipowitc itewok: “Pe ica!” Kaie kaskina awik ka natotak ohweriw, kaie wir kitci itetc: “Pe ica!” Kecpin awik e pakatamotc, kata pe icaw. Kecpin awik e nataweritak kitci minikwetc nipiriw ka pimatisickakemakanik, kata mirakaniwiw. Nama soka kata kiwe pakitinam kekociciriw.

Mamitcitc witamakewin

¹⁸ Nin Jean, kit ititinawaw, kaskina e taciekw ka natotamekw ka ici nikan tipatcimonaniwok ota masinahikanik, e aiekwamisimitakok. Kecpin awik rikisinahake kekociciriw, Kice Manito kata rikitaw nekatcitawiniw ke pe takonik, mitowi aniheriw ka itasinaterik ota masinahikanik.

¹⁹ Kecpin awik peikw maninake e itasinaterik ka ici nikan tipatcimonaniwok ota masinahikanik, kata maninamako Kice Manitowa aka kitci mowaritci anahweriw wapimina ka nitawikiritci neta wapiminatikok ka otci pimatisinaniwonik, ka ki iteritakipan kitci miratc kitci mowaritci. Nama kaie kata pitakahakaniwiw neta otenak ka kitcitwaweritakonik. Aci ickwa witcikatew ota masinahikanik ke icinakok anihe otenaw acitc ke icinakositc anahwe wapiminatikw.

²⁰ Anahwe ka witak kaskina e tapwemakanik, itew: “Tapwe, aci peconakon kitci pe koski takocinian!” Kekora ki iki! Ekoni ke icinakok! Pe ica, Teperitcikein Cecoc!

²¹ Ni pakoserimon omirotehewin Teperitciketc Cecoc Krist kaskina kitci witci tacikemikoekw.