Ka ki ici wapatahakaniwitc Jean 21 - Kice Manito Ocki Omirwatcimowin

Ocki wakwek kirika ocki aski

¹ Minawatc ni ki wapaten ocki wakwek kaie ocki aski. Nictam wakwek kaie nictam aski nama awocamec ki otci nokono, nama kaie ki otci takon kitcikami.

² Ni ki wapatamwan anihe otenaw ka kitcitwaweritakok, enko ni ocki Jérusalem. Ekota nta ka otciparik wakwek, Kice Manito e ki pe iciticahak, e ki wecitakaniwok kitci micta mirwacik, mitowi iskwew ka wecihitisotc kitci mirositc e natawapamatc iriniwa kitci nipowitcik.

³ Ni ki petawaw awik e arimwetc e sokitakositc, neta itekera e otewetak okimaw tetapiwakanik, e itetc: “Aci Kice Manito ki ocitaw ke ici taciketc, ekota neta iriniwok kaie wirawaw ke ici taciketcik. Kaskina kata witci tacikemew, kaie enkweriw ni ke otirinimitc. Wir tipirawe Kice Manito kata witcewew. Enkweriw ni kaie ke Okice Manitomitcik.

⁴ Kata pekotcapohew e macikowinik omatowinapowaw. Nama awocamec kata niponaniwon. Nama awocamec kata nipepinaniwon kekotc kitci matonaniwok e kackeritcikatek. Nama kaie kata akosinaniwon. Kaskina weckatc e icinakokipan, kaskina kata matcamakan.”

⁵ Minawatc anahwe ka apitc okimaw tetapiwakanik ki itew: “Aci anotc kaskina kekocic ocki ni toten.” Minawatc ni ki itikw: “Masinaha ohwe. Kaskina meka ka iteian tapwe icinakon, kaie kata ki asperimonaniwon.”

⁶ Kiapatc ni ki itikw: “Aci nit ickwa toten! Nin kaskina ka ki kitciparitaian, nin kaie kaskina ke ickwanaman. Aci ni tacikatai kaskina kekocic ka kitciparik, kaie mocak ni ka tacikan nac kaskina kekocic ickwaparike. Anahwe ka pakatamotc, ni ka miraw nipiriw kitci minikwetc, aka kekwariw kitci koski nataweritamwak. Aniheriw nipiriw ke mirak neta otcipariniw moskitciwonipekok e ici otacikowinik nipiriw ka pimatisickakemakanik.

⁷ Ekoni ke ici cawerimak kaskina awik ke sokikapowitc, ni ka miraw kaskina aniheriw. Nin ke Okice Manitomitc, kaie ‘ninitcanic’ ni ka iterimaw.

⁸ Aric iriniwok aka e sokeritakik e tapwerimatcik Cecoca, kaie aniki aka ka tapwerimatcik, aniki ka matcatikositcik, kaie aniki ka manohotcik, peikon kaie aniki ka pacikwatisitcik, acitc aniki ka matci totakik e matawositcik ka maratanik e wi ispatakik, kaie ka kicterimatcik manitokana, kaskina aniki ka wi nita kiraskitcik, wirawaw kata iciwepinakaniwiwok ickote sakihikanik ka osawapiterik. Enko ni nicwaw e niponaniwok.”

Ocki Jérusalem

⁹ Minawatc ni ki wapamaw aceriw e pe natawapamitc. Enko na peikw e nicowatcitcik aceriwok ka takonakipan orakaniw ka mockinerik mamitcitc nekatcitawiniw. Ni ki itikw: “Pe ica, ki ka wapatahitin owiwa Maritcenic ka ki nipowitc.”

¹⁰ Miro Manito ni ki pe nta pitciteheckakw. Aceriw ni ki iciwirikw onoskotc e micta icpatinarik. Ni ki wapatahikw aniheriw otenariw ka kitcitwaweritakonik, Jérusalem, wakwek e pe otciparinikipan, Kice Manitowa e ki pe iciticahamiritci.

¹¹ Anihe otenaw micta wasitepan, Kice Manito okicteritakosiwin ka nokonik e wasiterik. Mia mitowi asini ka misakitakositc icinakonipan e wasitekipan, mia mitowi asini ka micta misakitakositc, mitowi anahwe ka micta mirositc “jaspe” ka icinikatakaniwitc, tekaci e cipwacteapiskisitc mia peikon asini ka icinikatakaniwitc “cristal.”

¹² Takonopan neta micta kipaskohikan e micta icpokotek neta waska otenak, e mitato acitc niciki ickwatema. Mitato acitc nicw aceriwok kanaweritamopanak papeikw aniheriw ickwatemiriw. Neta papeikw ickwatemik masinatepan e icinikasotcik peikw e mitato acitc nicw otenawesiritci, Israël iriniwok.

¹³ Nictinokopan ickwatema awopimera otenak: nicto wapanok, nicto kiwetinok, nicto cawonok, kaie nicto nekapehonok.

¹⁴ Ka ocitakaniwokipan anihe micta kipaskohikan, mitato acitc nicw micta asiniwa ki totawakaniwipan. Neta micta asinik ki masinasoriwa e icinikasoritci anahweriw mitato acitc nicw otarotakana anahwe Maritcenic.

¹⁵ Anahwe aceriw aimihitipan takonamopan mictikoriw ka osawo coriapiskowonik, ke apatcitaspan kitci tipahak e irikokwarik otenariw, ickwatemiriw kaie peikon aniheriw kipaskohikaniw kaskina waska otenak.

¹⁶ Anihe otenaw kikeapan e icinakokipan. E asitci arakickakipan, ekoni peikon e asitci kinwakipan. Aceriw ki tipaham aniheriw otenariw, omictikom e totak. Peikwaw kice mitato mitana acitc niaranaw mitato mitana tato tipahikan asitci kinwapan. Kaie peikon ekoni e asitci arakickakipan kaie peikon e actokotek.

¹⁷ Aceriw ki tipaham kaie kipaskohikaniw kaskina waska otenak, nicwaw mitato mitana acitc mitato acitc nikotwaso tato askositemakan e asitci kispakarik.

¹⁸ Ka ocitakaniwokipan anihe kipaskohikan, asini ka micta mirositc ki totcikatepan, “jaspe” ka icinikatakaniwitc. Kaie anihe otenaw, osawo coria ka mawotci mirwacik e ki totcikatek ka ocitakaniwok, e micta cipwacteapiskositc, mia mitowi osapiwakanapiskw e icinakok.

¹⁹ Asiniik nictam ka arakaniwitcik neta ka ici itetictekipan anihe kipaskohikan neta otenak, kaskina towi asiniik ki apatcihakaniwiwok e wesitcitcikaniwok, nakowi e aicinakositcik e micta mirwapiskositcik. Nictam asini ka ki apatisitc e ocitakaniwok anihe kipwaskohikan, nte okitc e ki arakaniwitc, anahwe icinikatakaniwiw asini “jaspe,” minawatc anahwe kotak asini “saphir” ka icinikatakaniwitc, minawatc anahwe kotak asini “agate” ka icinikatakaniwitc, ekoni aci nicto. Minawatc anahwe kotak asini “émeraude” ka icinikatakaniwitc, ekoni aci new.

²⁰ Minawatc anahwe niaran asini ka icinikatakaniwitc “onyx,” minawatc anahwe kotak asini “sardoine” ka icinikatakaniwitc, ekoni aci nikotwaso. Minawatc anahwe kotak asini, ekoni aci nicowaso, ka icinikatakaniwitc “chrysolithe.” Minawatc anahwe kotak asini, ekoni aci nicwaso, ka icinikatakaniwitc “béryl,” minawatc anahwe cakitato irikik asini ka icinikasotc “topaze,” minawatc anahwe kotak mitato irikik asini, enko na ka icinikatakaniwitc “chrysoprase.” Minawatc anahwe kotak asini “turquoise” e icinikatakaniwitc, ekoni aci mitato acitc peikw. Minawatc anahwe mamitcitc asini, ekoni aci mitato acitc nicw, “améthyste” e icinikatakaniwitc.

²¹ Anihi e mitato acitc niciki ickwatema tekaci mikisiwonopan, mitowi ka miskatek pitc esimakok. Tato ickwatema tepirak peikw micta mikis ki apatisiw e ocitakaniwok. Kaskina meskanaw neta otenak osawo coriawapiskw ka micta mirwapiskositc ki totcikatepan e ocitakaniwok, e cipwacteapiskositc mia osapiwakanapiskw.

²² Nama ni ki otci wapaten kitci aiamihe mikiwam neta otenak. Wir meka tipirawe iteritakosiw kitci aiamihe mikiwam Teperitciketc, Kice Manito ka mawotci mackawisitc, acitc anahwe Maritcenic.

²³ Ni ki wapaten kaie aka arimatc kicikaw pisimw kaie tipiskaw pisimw e wasiketcik, oticperitakosiwiniw Kice Manitowa e wactenamakotcik iriniwok, kaie anahwe Maritcenic mia wactenamakan e icinakositc.

²⁴ Iriniwok kaskina wiec e irikokoskamikarik e pe ototetcik pa pimotewok nete e micta wactenamakotcik. Kaie okimawok ota askik kata pitakewok e miwotatcik kaskina ka micta mirwacinik e ici tatakik.

²⁵ Kape kickwa kata cetino ickwatema neta otenak. Nama wiskat kata kipahikatewa, nama meka aci takon nete e tipiskak.

²⁶ Kata miwotakaniwon kaskina kekocic ka micta mirwacik acitc kaskina micikitawin ota askik, kitci pakitinikatek neta.

²⁷ Nama aric kekocic e maratak kata pitakewotakaniwon neta otenak, nama kaie awik ka matcatikositc, nama kaie ka wi nta kiraskitc ko kata ki pitakew neta. Tepirak aniki kata pitakewok oticinikasowiniwaw ka masinaterik neta Pimatisi Masinahikanik, Maritcenic ka takonik.