Ka ki ici wapatahakaniwitc Jean 20 - Kice Manito Ocki Omirwatcimowin

Peikwaw kice mitato mitana tato pipona

¹ Minawatc ni ki wapamaw peikw aceriw e pe nitciretc wakwek e otci pe nokositc. Takonamopan cehikaniw kitci ki cenak aniheriw ka pokoneckarik ka micta wararik, kirika peikw micta piwapiskwapiriw takonamopan.

² Ki makonew atikocimakana, anihi weckatc ka ki kinepikowiritci, Matci Manito ka icinikatakaniwiritci, kekotc Satan. Anahwe aceriw ki takopitew kitci kipohwakaniwiritci peikwaw kice mitato mitana tato pipona irikik.

³ Ki iciwepinew neta anahwe aceriw ka ici pokoneckarik ka micta wararik. Ki kipohwew e ki atisekohwatc kaie ki akoskactam, tekaci aka awocamec atikocimakana kitci oniriweritci ota askik. Ickwa peikwaw kice mitato mitana tato piponikarike kiapatc memacic kata pakitinakaniwiriw.

⁴ Minawatc ni ki wapaten okimaw tetapiwakana. Aniki neta ka apiwaspan ki mirakaniwiwok kitci tipaskoniketcik. Kaie ni ki wapamimawok iriniwok Kice Manitowa ka nosanehwatcik otcitcakociwawa, aniki ka ki ickwanakaniwiwakopanen, e ki pa tipatcimotcik Cecoca tapwe e tiperitcikeritci, kaie anahweriw e ki tipatatakik Kice Manitowa otitewiniw. Nama ki otci kicterimewok wirawaw anihi matci awesisa kaie manitokana mia ka icinakosiritci. Nama ki otci mirakaniwiwok matci awesisa okicawatcikaniw oskitikowak, nama kaie otcitciwak. Ki koski pimatisiwok, kaie tapickotc ki tiperitcikewok kirika Krist peikwaw kice mitato mitana tato pipona irikik.

⁵ Enko aniki nictam ka ki apitcipatcik e ki poni pimatisiwaspan. Aniki kotakihik iriniwok ka ki poni pimatisitcik nama wirawaw ki otci koski pimatisiwok, nac peikwaw kice mitato mitana tato piponikarik kitci ickwa miparinik.

⁶ Caweritakosiwok kaie kitcitwaweritakosiwok aniki wirctamiwaw ka ki apitcipatcik! Nama nicwaw kata ki poni pimatisiwok. Kata makatewokorewiwok kitci atoskectawatcik Kice Manitowa kaie Krist, kaie tapickotc kata tiperitcikewok kirika anihi Krist peikwaw kice mitato mitana tato pipona irikik.

Matci Manito e cakotcihakaniwitc

⁷ Ickwa miparike anahwe irikik peikwaw kice mitato mitana tato pipona, Matci Manito minawatc kata pakitinakaniwiw ka ici kipohwakaniwitc.

⁸ Kiapatc kata pa icaw kitci nta wecimatc iriniwa kaskina e irikokoskamikarik, neta askik ka icinikaterik Gog kirika Magog. Kata mawotcihew kitci wi nta natopariritci. Ke apitc mitcetiritci, mia mitowi reko ka tatik rarewak kitcikamik kata taciriwa.

⁹ Ni ki wapamawok e matcekapowitcik, kaskina askiriw e capoctakik. Ki waskakapowictamok Kice Manito otirinima e ici kapeciritci, kaie ki waskakapowictamok aniheriw otenariw ka sakitaritci Kice Manitowa. Aric ickote ki pe nokon icpimik e otciparik, tekaci e ki ickwanakaniwitcik.

¹⁰ Minawatc Matci Manito, anahwe ka wecimaspan anahweriw iriniwa, ki iciwepinakaniwiw neta ickote sakihikanik e osawapiterik, neta e ici tacikeritci anihi matci awesisa kirika anihi arotc ka nikan tipatcimoritci. Mocak kata nekatcihakaniwiwok, kape kickwa kaie kape tipiskwa, kakike nespitc.

Mamitcitc tipaskonikaniwoke

¹¹ Minawatc ni ki wapaten peikw micta okimaw tetapiwakan e wapak, kaie ni ki wapamaw awik neta e apitc. Aski kirika wakwek ki ocimoctakwinano, aka awocamec e ki otci nokoki.

¹² Minawatc ni ki wapamawok ka ki poni pimatisiwaspan, aniki ka kicteritakositcik, kaie aniki aka ka kicteritakositcik. Ekota neta nikanik e nanipowitcik anihe okimaw tetapiwakanik. Ki cenikatewa masinahikana, minawatc kotak peikw ki cenikatew masinahikan: Pimatisi Masinahikan. Ki tipaskonakaniwiwok ka poni pimatisitcik, e ki kanawapatcikaterik ka ki totakik mekwata ka pimatisitcik, ekoni ka itasinahikateki anihi masinahikana.

¹³ Kaskina ka ki poni pimatisitcik e kwapawetcik, ekota neta ka otci pe orowitcik nipik. Kaie kotakihik ka ki poni pimatisitcik ki pe orowiwok kaie wirawaw nipowinik, kirika neta ka ici kanaweritakositcik ka poni pimatisitcik. Kaskina ki tipaskonakaniwiwok e ki kanawapatcikaterik ka ki pe totakwapan.

¹⁴ Minawatc ki iciwepinikatew nipowin neta ickote sakihikanik. Ki iciwepinikatew kaie e ici kanaweritakositcik ka poni pimatisitcik neta ickote sakihikanik. Anihe sakihikan, enko ni nicwaw e niponaniwok.

¹⁵ Kecpin awik aka ki otci masinaterik oticinikasowin neta Pimatisi Masinahikanik, ki iciwepinakaniwiw neta ickote sakihikanik.