Ka ki ici wapatahakaniwitc Jean 19 - Kice Manito Ocki Omirwatcimowin

¹ Minawatc ni ki peten e arimwaniwok wakwek, mia e kice mitcetiwotcikatek iriniwok e tepitepwetcik, e itetcik: “Alléluia! Mirwatcimatan Teperitciketc! Wir Kikice Manitomino ka akwacimiwetc! Icperitakosiw kaie micta mackawisiw!

² Icikowisk icinakoniw ka ici tipaskoniketc, mocak kaie tapwew! Ki meka kicakonew anihi iskwewa orina ka nosanetarispana matci pimatisiwiniw, aci ka micta matcipariharispana iriniwa ota askik, opacikwatisiwiniw e apatcitarispana. Kice Manito ki koski mirew anihi iskwewa ka ki ici kackitamatisoritci, osam e ki nipahakaniwiritci otarotakana.”

³ Kiapatc ki itewok: “Alléluia! Mirwatcimatan Teperitciketc! Mocak icpapitew e akwapitek micta otenaw ka ickwatek!”

⁴ Aniki nicitana acitc new ka kiceatisitcik kaie aniki new ka pimatisitcik ki nipiskoctewok e kicterimatcik Kice Manitowa ka apiritci okimaw tetapiwakanirik, e itetcik: “Kekora ki iki! Alléluia! Mirwatcimatan Teperitciketc!”

E makocaniwok, Maritcenic e nipowitc

⁵ Kiapatc ki petakosiw awik e arimwetc, neta itekera e otci petakositc okimaw tetapiwakanik, e itetc: “Alléluia! Mirwatcimatan Kikice Manitomino, kaskina e taciekw ka atoskectawekw kaie ka kicterimekw, kirawaw ka kicteritakosiekw, peikon kaie kirawaw aka ka iteritakosiekw ‘kicteritakosiwok’!”

⁶ Minawatc kiapatc ni ki peten e arimwaniwok, mia e mitcetiwotakik iriniwok e arimwetcik, wakwek e otci petakositcik, mia pawictikw ka micta kicitciwok, mia kaie onimiskiw e micta kiciwetc e pakicik, e itwaniwok: “Alléluia! Mirwatcimatan Teperitciketc! Wir meka Teperitciketc, Kikice Manitomino ka mawotci mackawisitc, wir aci ka actatc otokimawin!

⁷ Ekoni ici mireritetan! Micta mireritetan e icperimokw! Aci meka otcitcipariniw Maritcenic kitci nipowitc! Aci ickwa werihitisotc anahwe iskwew!

⁸ Ki mirakaniwiw kitci piskik e micta mirwekinik wikasiriw, pakiwaniciriw e ki totcikaterik e wapekinik, e wasiterik kaie aka e ometciwonik.” (Anihe pakiwanic ka mirwekik wapatahiwemakan icikowisk e ici pimatisiritci Kice Manito otirinima.)

⁹ Minawatc ni ki itikw aceriw: “Masinaha ohwe: ‘Caweritakosiwok kaskina ka ki wicamakaniwitcik kitci pe nta mitcisotcik e makocaniwonik, Maritcenic e nipowitc.’” Kirika ki itew: “Tapwe, ekoni ka itetc Kice Manito.”

¹⁰ Ni ki nipiskoctawaw ositik e kicterimak, aric ni ki itikw: “Aka nte tota! Kaie nin nit arotakaniwin, mitowi kir kaie wirawaw kiwitcicanak mocak ka tipatatakik Cecoca otipatcimowiniw. Wir Kice Manito ki ta kicterimaw!” Kaskina Cecoc otipatcimowin, ekota nta wetciparinik kaskina ka ki pe nikan tipatcimonaniwonik Kice Manito otci.

Anahwe ka okitapitc atikwa e wapisiritci

¹¹ Minawatc ni ki wapaten icpimik e cetik. Atikw e wapisitc ki pe nokosiw. Awik e okitapitc neta atikok. Icinikaso “Anahwe mocak ke ki asperimototawakaniwitc” acitc “Anahwe mocak ka tapwetc.” Mocak icikowisk ici tipaskonikew kaie e natoparitc.

¹² Ockicikw micta wasiteripan mitowi ickote, kaie apatcitapan mitcet okimaw actotiniw octikwanik. Ki masinahikateriw icinikasowiniw, wir tepirak e kiskeritak.

¹³ Apatcitapan kapotowaniw tekaci e mikowonik. Icinikaso “Kice Manito Otitewin.”

¹⁴ Cimakanicak e mitcetitcik, wakwek e pe ototetcik, neta pe nosanehwepanak, kaskina tato neta e tacitcik e okitetapitcik papeikw atikwa e wapisiritci, kaie e apatcitawaspan wikasiriw, ka micta mirwekanik pakiwaniciriw e ki totcikaterik, e wapekinik aka e ometciwonik.

¹⁵ Micta mokomaniw e micta kinarik orowiparinipan otonik. Enkweriw ni ke apatcitatc kitci cakotcihatc kaskina iriniwa e irikokoskamikarik ota askik. Kata micta mackawisiw e tiperimatc otirinima. Kata wapatahiwew Kice Manitowa ka mawotci mackawisiritci e ki kiciwahakaniwiritci, anihi iriniwa e ki kiciwahikoritci. Ke totawakaniwitcik, mia peikon cweminak e camakohwakaniwitcik kitci orowiparinik e ciwakamisitcik kitci ocitakaniwonik minicaporiw.

¹⁶ Anihe icinikasowin ki masinateriw okapotowanik kaie oskatik: “Wir ka okimawitc kaskina e taciritci okimawa, wir ka tiperimatc kaskina ka tiperitamiritci.”

¹⁷ Minawatc kotak ni ki wapamaw aceriw, pisimok e nanipowitc, e tepwatatc kaskina pirecica ka mireritci icpimik, e micta kiciwetc e itatc: “Petcirekw! Mawotcihitokw kitci pe nta mitciekw Kice Manito omicta omakocan.

¹⁸ Pe nta mitcikw okimawok owiawiwaw, cimakanicak, kaie anahweriw ka tiperimikotcik, atikw owias kaie aniki iriniwok ka okitapiwaspan, kaie owiawaw aniki kaskina kotakihik iriniwok: ka atoskectaketcik, kaie peikon aka ka atoskectaketcik, kaie ka kicteritakositcik, peikon kaie aka ka kicteritakositcik.”

¹⁹ Minawatc ni ki wapamaw anahwe matci awesis, kaskina okimawok ota askik kaie ocimakanicimiwawa, e ki mawotcihitotcik kitci natoparictowatcik anihi ka okitapiritci atikok kirika ocimakanicimiriw.

²⁰ Ki makonakaniwiw anahwe matci awesis, kaie wir anahwe arotc ka ki nikan tipatcimotc ka ki kiraskispan ki makonakaniwiw, ka ki matawi aitotakipan anihi matci awesisa otci. E ki matawi aitotakipan tekaci ki onirew iriniwa ka ki masinahokoritci anihi matci awesisa kaie ka ki kicterimawaspan anihi manitokana mia ka icinakosiritci. Anahwe matci awesis kirika anahwe iriniw ka ki kiraskitc ka nikan tipatcimotc ki iciwepinakaniwiwok ickotek kiapatc e pimatisitcik, e micta micarik, mia micta sakihikan e irikokwarik. Micta kiciteriw neta, micta kanokoroweriw e osawapiterik.

²¹ Minawatc kaskina aniki cimakanicak ki nipahakaniwiwok, micta mokomaniw e ki totcikaterik, neta ka otci pe orowiparinik otonik anahwe ka okitetapitc atikwa. Kaskina pirecicak ki pe nta mitciwok owiawiwariw nac e tipiparitcik.