Ka ki ici wapatahakaniwitc Jean 18 - Kice Manito Ocki Omirwatcimowin

Babylone otenaw e pakitik

¹ Minawatc kiapatc ni ki wapamaw kotak aceriw, e pe nitciretc wakwek. Takonipan micta mackawisiwiniw. E irikokoskamikarik ki wawacteriw omirwasiwin e micta micarik.

² Ki tepwew e micta kiciwetc: “Ki pakitin! Micta otenaw Babylone ki pakitin! Aci anotc matci manitowok tacikewok neta otenak, kotc e aicinakositcik. Kaskina pirecicak, kaie awesisak aka e mirwinakositcik, iriniwok aka ka sakihatcik e wapamatcik, ekota neta kaie wirawaw e ici pimatisitcik.

³ Iriniwok ka ototetcik kaskina e irikokoskamikarik ki pe icawok neta micta otenak Babylone, e pe nta pacikwatisitcik kaie matci iriniwa ka tacikeritci neta, mia mitowi e ki minihikotcik minicaporiw ka mackawakaminik, e itatisitcik. Okimawok ota askik kaie wirawaw ki pakiterimitisowok kitci pe nta pacikwatisitcik acitc niheriw Babylone iriniwa. Kaie iriniwok kaskina wiec ka pe owetcitcik ka atawetcik ki iti misikisiwok, e ki otapinakik neta kaskina kekociciriw ka mirwacinik kitci ki otci mirwatcitahitisotcik.”

⁴ Minawatc ni ki petawaw kotak awik e arimwetc, wakwek e otewetak, e itetc: “Kirawaw nitirinimak! Orowikw neta otenak, aka kitci ici pimoteiekw aniki e ici pactatitcik neta iriniwok ka taciketcik, aka kaie kitci mirikoiekw nekatcitawin ke ici mirakaniwitcik.

⁵ Mictahi meka mitceniw opactatowiniwaw, mia e ki okoctakaniwonik, nac wakwek e ici takocapikecterik. Kice Manito nama onikatew ka ki ici matci totamiritci.

⁶ Ki ka mihawawok aniki iriniwok Babylone otenak ka taciketcik mia ka ki ici totawatcik owitc iriniwawa. E ki akohatcik, nicwaw irikik ki ka akohawawok. Mockinepitakw orakaniwaw nicwaw irikik kitci asitci mackawakaminik patok ka ki ici ocitatcik ke asitci mackawakaminik ke minihitakok.

⁷ Ki ka mirawawok kitci nekaterimotcik kaie kitci micta arimiparitcik, irikik ke totawakaniwitcik ka ki ici miritisotcik kitci kicterimakaniwitcik kaie kitci mirwatcitakerimotcik. E iteritakik aniki iriniwok, mia iskwew ka aimihitisotc, e itetc, ‘Nit apin ota mia e okimakwewian. Nama ni cikawin. Nama kaie wiskat ni ka kiskeriten e aiciwerimonaniwok.’

⁸ Nikotin tca, peikwaw e kicikarik, kata otci mirakaniwiwok aniki iriniwok kaskina nekatcitawiniw ka kanaweritamawakaniwitcik. Kata akosiwok nac kitci poni pimatisitcik. Mictahi kata kackeritamok. Kata takon mitawokatewin. Kaie tekaci kata tcakaskiteriw otenamiwaw. Mictahi meka mackawisiw Teperitciketc Kice Manito, wir ka ki tipaskonatc.”

⁹ Okimawok ota askik ka ki pakiterimitisotcik kitci nta pacikwatisitcik kirika aniheriw iriniwa Babylone otenak ka tacikeritci, kaie ka ki mirwatcitahitisotcik neta e ici taciketcik, kata matowok kitci micta mitatakik aniheriw otenariw, wapatakawe e ickwaterik e micta akwapiterik.

¹⁰ Warawik kata nanipowiwok, ke apitc koctakik kitci ici kicakonakaniwitcik kaie wirawaw ka ki ici kackitamatisotcik. Kata itewok: “Arimiparin! Arimiparin neta Babylone otenak! Micapan anahwe otenaw, kaie micta mackawisimakanopan! Tepirak peikwo tipahikan ki taciketew kitci anweritcikatek!”

¹¹ Atawe iriniwok kaskina wiec e owetcitcik ota askik kaie wirawaw kata matowok kitci mitatakik e wapatakik otenariw e ickwaterik. Nama meka awocamec awiriw kata otapinamiriw kekociciriw e ici atawetcik:

¹² osawo coria, coria, asiniik ka misakitakositcik, kaie peikon mikisak; pakiwanic ka micta mirwekik, kotak pakiwanic ka mikwekik, kaie kotakihi arakwatcikana ka micta mirwaciki acitc ka tiripanekik, kaie kaskina papitoc mictikw ka icinakositc ka misakitakositc, kaskina kekocica ka ki totcikateki e ocitakaniwoki micta potatcikesiw oteckan e ki apatcitakaniwonik, kirika mictikw ka mirositc e ki apatcihakaniwitc, kirika mitcet kekocica piwapiskw e ki totcikatek e ocitakaniwok, kaie kotak piwapiskw e wasapiskitek e ki sosokatek ickotek, kaie peikon asini e mirositc e cacakwesinapiskisitc;

¹³ acitc “la cannelle” kaie nipica papitoc ka aicinakoki ka miromakoki, kaie pimite ka miromakok, acitc mitcet kotak kekocic ka miromakok, mitowi “la myrrhe” ka icinikatek kaie sakatakan ka packirek e miromakok; minicapo, pimite, napanew, mirominockw; motcewotikok, maritcenicak, kaie atikok acitc otapaniw ka otcipitakik; kaie arotakanak; wawatc tipirawe owitc iriniwawa atawepanak aniki atawe iriniwok ota askik kitci atoskectakeritci.

¹⁴ Aniki atawe iriniwok kata itewok: “Kaskina kimicikitawiniwaw ka wi ici tatamekopanen, kaskina ki tcakaskitew. Kaskina e ici nataweritamekopanen kitci micikitaiekw kaie kitci ici pimatisiekw micikitawinik, kaskina nama kata nokon, aka wiskat awocamec kitci takok.”

¹⁵ Aniki iriniwok ka ki atawetcik aniheriw, ka ki otci micta coriaketcik, warawik kata tacikewok, e koctakik kaie wirawaw ka ki ici kackitamatisotcik kitci ici kicakonakaniwitcik. Kata matowok kaie kata micta arimeritamok.

¹⁶ Kata itewok: “Arimiparin! Mictahi arimiparin anihe micta otenaw! Weckatc mirwacinopan, mitowi iskwew ka mirwaspisotc e icinakokipan, e apatcitatc wikasiriw ka micta mirwekanik, kaie e tapickaketc osawo coriariw kaie asiniwa ka mirosiritci acitc mikisa.

¹⁷ Aric tepirak peikwo tipahikan ki tacikikatew anihe otenaw tekaci kitci tcakaskiterik omicikitawin.” Iriniwok ka maminowepahikik micta tcimanik kaie kaskina aniki ka positcimetcik acitc kotakihik iriniwok ka otamirotcik neta, e kanewitcik opimatisiwiniwaw e otamirotcik kitcikamik, kaskina aniki nakewar ki icikapowiwok.

¹⁸ Ki notakosiwok e wapatakik e akwapiterik aniheriw otenariw e ickwaterik, e itetcik: “Nama wiskat ki otci takon otenaw e apitc mikinakok anahwe towi!”

¹⁹ Ki iciwepinamok mirikosiriw okitc octikwaniwak e wapatahiwetcik e apitc cikeritakik. Ki matowok e micta kackeritakik, e tepwetcik e itetcik: “Arimiparin! Mictahi arimiparin anihe micta otenaw! Ekota neta ka ki otci misakitatcik aniki ka tatakik micta tcimaniw kitcikamik. Tepirak peikwo tipahikan ki tacikasomakan tekaci kitci onitakaniwok e ici takok!”

²⁰ Kirawaw wakwek ka tacikeiekw, mireritamokw e ki oraparik anihe otenaw! Kaie kirawaw, Kice Manito otirinima, kaie Cecoc otarotakana, acitc kirawaw ka nikan tipatcimoekw Kice Manito otci, mireritamokw! Ki tipaskonew meka Babylone iriniwa aniheriw otci ka ki ici matci totakoiekw!

²¹ Minawatc peikw aceriw ka micta mackawisitc ki otapinew micta asiniwa, mitowi ka apatisitc e pakickihwakaniwitc mirominockw. Ki iciwepinew kitcikamik, e itetc: “Ekoni ke apitc soki totcikatek, orapitcikateke micta otenaw Babylone. Nama kaie wiskat awocamec kata nokon.

²² Nama wiskat awocamec kata petakosiwok neta Babylone otenak iriniwok e metowetcik aceriw pwapwapikepitcikaniw, acitc aniki ka nakamotcik, nama kaie aniki ka metowetcik kweckoctatcikaniw, nama kaie kweckoctatcikaniw ka kinwaskonik. Nama wiskat awocamec kata taw iriniw kitci otamirotc, kotc e ici otamironaniwonikipan. Nama awocamec kata petakosiw anahwe micta asini ka apatisitc e pakickihwakaniwitc mirominockw.

²³ Nama aci awocamec kata waskorewa waskorenitamakana neta ka ici tacikeiekw. Nama awocamec kata petakosiwok ka ocki nipowitcik e pa pimotetcik neta e mireritakik. Atawe iriniwok neta ka coriakewaspan kirawe kicteritakosiwakopan patok kaskina iriniwa e irikokoskamikarik. Iriniwok neta ka tacikewaspan matci apatcitapanak omatawosiwiniwaw kitci wiecimiwetcik.

²⁴ Ekota neta Babylone otenak ka ki ici macikowinik omikowaw iriniwok ka ki pe nikan tipatcimotcik kaie kotakihi Kice Manito otirinima, acitc kaskina ka ki nipahakaniwitcik ota askik.”