Ka ki ici wapatahakaniwitc Jean 17 - Kice Manito Ocki Omirwatcimowin

Iskwew orina ka nosanetatc matci pimatisiwiniw

¹ Minawatc peikw ani e nicowatcitcik aceriwok ka takonakik e nicowatcinik orakaniw ki pe icaw, e icitc: “Petcimote. Ki ka wapatahitin ke totcikatek ke ici anweritcikatek micta otenaw ka ici takok rarewak mitcet sipik. Anihe micta otenaw, mia iskwew orina ka nosanetatc matci pimatisiwiniw e iteritakok.

² Okimawok ota askik ki pacikwatisiwok kirika wir. Iriniwok ka pimatisitcik ota askik ki kiwockwepickakowok aniheriw ominicapomiriw ka ki minihikotcik. Anihe minicapo, enko anihe ka ki ici micta pacikwatisinaniwok neta otenak.”

³ Miro Manito ni ki pe nta pitciteheckakw. Anahwe aceriw ni ki iciwirikw nete ka ici cipewatawokarik. Ka ickwa takociniak nete ni ki wapamaw peikw iskwew e tetapitc matci awesisik e mikosiritci. Anahwe awesis mitcet icinikasowiniw ki masinahikateriw misiwe ocakak, icinikasowiniw e papirotowakaniwiritci Kice Manitowa. Nicowatcinipan octikwan kaie mitatciripana oteckana.

⁴ Anahwe iskwew micta mirwacinipan owikasim e mikwaspisotc, kirika e tapickaketc osawo coriariw ka wasapiskiterik, acitc asiniwa ka mirwapiskosiritci, peikon kaie mikisa. Takonamopan osawo coria orakaniw. Anahwe orakan tekaci mockinepan kekocic ka maratak kaie tekaci aka ka mirwinakok, ni wi itwan, opacikwatisiwin ka ki paskewiriwewaketc.

⁵ Oskitikok ki masinateriw icinikasowiniw peikw otenariw ka katcicterik wa itemakanik, e itasinaterik: “Nin micta otenaw Babylone, okawiwawa kaskina iskwewok orina ka nosanetatcik matci pimatisiwiniw kaie kaskina ka matci totakik ota askik.”

⁶ Ni ki wapamaw anahwe iskwew e kiwockwepitc, e ki minikwetc iriniwa omikoriw, Kice Manito otirinima ka ki nipahakaniwiritci e nosanehwatcik Cecoca. Enkweriw omikowariw ka ki kiwockwepickakotc. Ka wapamak, ni ki micta kockoparin.

⁷ Ni ki kokwetcimikw aceriw, e icitc: “Kekwan wetci kockopariin? Ki ka witamatin anahwe iskwew mia ka katcicterikipan, kaie anahwe matci awesis ka ici okitetapitc iskwew, anahwe matci awesis ka nicowatcinik octikwan kaie ka mitatciritci oteckana.

⁸ Anahwe matci awesis ka ki wapamatc weckatc pimatisipan, aci aric nama pimatisiw. Kata orowiw neta ka pokoneckarik ka micta wararik. Kata tca nta ickwanakaniwiw. Iriniwok ka pimatisitcik ota askik aka ka masinaterik oticinikasowiniwaw neta Pimatisi Masinahikanik esko ka kiceritcikaterik askiriw, kata mamiskaterimewok anihi matci awesisa. Pimatisipan meka weckatc, anotc aci aka e pimatisitc, minawatc kata pe koski takociniw.”

⁹ “Actew kitci kakitaweritamokw kaie kitci omiro omitoneritcikaniikw kitci ki nisitotamokw wa itemakak ohwe. E nicowatcinik octikwan anahwe matci awesis, enko ni e nicowatciki e poskotawokak neta ka ici apitc anahwe iskwew. Enko ni aniki peikon nicowaso okimawok.

¹⁰ Niaran neta e tacitcik aci nama okimawiwok. Kotak aric peikw mekwata okimawiw. Minawatc kotak nama moci otci takociniw kitci pe nta okimawitc. Takocike, nama kinowec kata tiperitam.

¹¹ Anahwe matci awesis, weckatc ka pimatisispan, anotc aci aka e pimatisitc, wir tipirawe kata pe nta okimawiw, enko na nicwaso irikik okimawok. Aci weckatc ki okimawiw anahwe matci awesis, peikw ka nicowatcik okimawok. Kata nta ickwanakaniwiw.”

¹² “Anahweriw e mitatciritci oteckana ka ki wapamimatci, enko aniki ni mitato okimawok, aka moci ka ki otci tiperitakik. Kata aric mirakaniwiwok mackawisiwiniw kitci tiperitakik peikwo tipahikan irikik kirika anahwe matci awesis.

¹³ Kaskina aniki e mitatcitcik okimawok ici naheritamok kitci atoskectawatcik anihi matci awesisa tekaci e asitcitcik, kaie kitci tiperimikotcik.

¹⁴ Kata natoparictawewok Maritcenica. Aric anahwe Maritcenic kata cakotcihew. Wir meka ka tiperimatc kaskina ka tiperitamiritci, wir ka okimawitc kaskina e taciritci okimawa. Kata witcihiko kaskina otirinima, anahweriw iriniwa ka ki orapamatc kaie ka ki wicamatc kitci nosanehikotc, mocak kaie ka asperimototakotc.”

¹⁵ Minawatc anahwe aceriw ni ki itikw: “Anihi sipia ka ki wapataman, neta e itapitc anahwe iskwew orina ka nosanetatc matci pimatisiwiniw, enko aniki kaskina iriniwok papitoc askik ka pe ototetcik, kaskina e irikokoskamikarik ka taciketcik, papitoc ka ici arimwetcik.

¹⁶ Aniki e mitatcitcik eckan ka ki wapamatcik, kaie anahwe tipirawe matci awesis, kata cikerimewok anihi iskwewa orina ka nosanetaritci matci pimatisiwiniw. Kata maskamewok kaskina e ici tatamiritci. Kata maninamwewok kaskina e icihoritci, tekaci aka kitci owikasimiritci. Kata mowewok. Kata ickwasamok irikik ka ickotakik owiawiriw.

¹⁷ Kice Manitowa meka ka ki totamiritci wetci wi totakik aniheriw, wir e iteritamiritci. Kaskina tapickotc kata ici naheritamok kitci totakik, kitci atoskectawatcik anihi matci awesisa, tekaci e asitcisitcik kitci tiperitamiritci, nac kaskina kitci isparinik Kice Manito ka ki itetc kitci icinakonik.”

¹⁸ “Minawatc anahwe iskwew ka ki wapamatc, enko ni micta otenaw. Okimaw ka tiperitak neta otenak, enko na ka tiperimatc kaskina kotakihi okimawa ota askik.”