Ka ki ici wapatahakaniwitc Jean 16 - Kice Manito Ocki Omirwatcimowin

Acterik orakanik Kice Manito okiciwasiwin

¹ Ni ki petawaw awik e arimwetc e micta sokitakositc, nte e otewetak kitci aiamihe mikiwamik. Ki itew anahweriw aceriwa ka nicowatciritci: “Matcakw, nta sikinamokw Kice Manito okiciwasiwin askik, neta ka acterik e nicowatcinik orakanik!”

² Nictam anahwe aceriw ki matcaw e nta sikinak orakan neta askik. Aniki iriniwok ka ki masinahokotcik anihi matci awesisa kaie ka ki kicterimatcik manitokana mia ka icinakosiritci ki iti akosiwok ocakawak, e maratanik e omikitcik.

³ Minawatc anahwe kotak aceriw ki nta sikinam orakan kitcikamik. Anihe nipi ki iti isparin mia miko e icinakok, iriniw omikw e ickwa nipotc. Kaskina ka pimatisitcik neta ka tatcik kitcikamik ki nipowok.

⁴ Minawatc kotak aceriw, ekoni aci nicto, ki nta sikinam orakan nete micta sipik kaie neta moskitciwonipekok. Ki meckotcipariniw nipiriw, mikoriw kitci itakaminik.

⁵ Ni ki tca petawaw aceriw, anahwe ko ka tiperitak nipiriw, e itaspan Kice Manitowa: “Kir ka kitcitwawisiin, anotc ka tain, mocak kaie ka ki tain, mocak icikowisk e icinakok e tipaskonikein.

⁶ Aniki iriniwok ki nipahewok anahweriw ka ki nikan tipatcimoritci kir otci, kaie kotakihi kitirinima. Aci anotc ki mirawok mikoriw kitci minikwetcik. Enkweriw ni ka ki ici kackitamatisotcik!”

⁷ Minawatc ni ki petawaw kotak awik e arimwetc, neta itekera ka ici aiamihe pakitinikaniwonik e otewetak, e itetc: “Tapwe Teperitcikein Kice Manito, kir ka mawotci mackawisiin. Icikowisk icinakon ka ici tipaskonikein, mocak kaie ki tapwan!”

⁸ Minawatc kotak aceriw, ekoni aci new, ki nta sikinam orakan pisimok. Anahwe pisimw ki mirakaniwiw kitci ickwaswatc iriniwa.

⁹ Kaskina iriniwok ki ickwasokowok pisimwa e micta kicasikeritci. Ki mareritamok Kice Manitowa oticinikasowiniw, wir ka tiperitamiritci anihi nekatcitawiniw. Ki anweritamok kitci meckotatisitcik kitci tca icperimatcik Kice Manitowa.

¹⁰ Minawatc kotak aceriw, ekoni aci niaran, ki sikinam orakan okimaw tetapiwakanik, neta ka ici apitc anahwe matci awesis. Kaie kaskina okimawin tekaci ki kiski tipiskipariniw. E apitc nekatcitawaspan neta iriniwok, irin ki makotamok oteriniwaw.

¹¹ Ki marerimewok Kice Manitowa icpimik ka tacikeritci, e apitc ki wisakeritakik e akositcik ocakawak kaie e micta omikitcik. Nama aric ki otci kweskatisiwok e matci totakik.

¹² Minawatc kotak aceriw, ekoni aci nikotwaso, ki nta sikinam kaie wir orakan neta micta sipik ka icinikatek Euphrate. Anahwe micta sipi tekaci ki pactew, okimawok wapanok ka taciketcik kitci ki takonik meskanariw ke ici pimotetcik.

¹³ Minawatc ni ki wapamawok nicto matci manitowok, mia arikicik e icinakositcik. Peikw anaha ekota nta ka otci pe orowitc otonik atikocimakanik, minawatc anahwe kotak, ekota nta ka otci pe orowitc otonik matci awesis, minawatc kotak ki otci pe orowiw iriniw otonik anahwe arotc ka nikan tipatcimotc.

¹⁴ Enko aniki matci manitowok ka matawinakonik ka aitotakik. Pa icawok e natawapamatcik okimawa kaskina wiec ota askik, kitci mawotcihatcik ocimakanicimiwariwa, kitci ki nta natoparitcik kitci kicikarike, Kice Manitowa ka mawotci mackawisiritci okitci kicikom.

¹⁵ Teperitciketc itew: “Natotamokw! Keskat ni ka pe ican, mia mitowi kimoti iriniw keskat e pe takocik apitc aka e pehakaniwitc! Caweritakosiw anahwe mocak ke nanakatisitc, pecotcik e kanaweritak owikasim, mocak kitci ki ickwa aiketc wipatc kitci wespisotc, aka tca kitci miceckatetc, kaie aka kitci waneritak wapamakaniwite ani e icinakositc.”

¹⁶ Aniki matci manitowok ki mawotcihewok okimawa neta ka icinikaterik Harmaguédon, hébreu arimwewin e itwaniwok.

¹⁷ Minawatc mamitcitc anahwe aceriw, ekoni aci nicowaso, ki sikinam orakan icpimik. Ki petakosiw e micta sokitakositc, nte itekera okimaw tetapiwakanik e otci petakositc, pitakamik kitci aiamihe mikiwamik e acterik, e itetc: “Ekoni e icinakok!”

¹⁸ Ki micta wawaskorepahamok onimiskiw kaie kotakihi e matawotakoki, kaie e ki micta kwekok. Nama wiskat ki otci takon kitci isparik aski e apitc ki aiatciparik, esko nictam iriniw ka kicerimakaniwitc. Mictahi ki koctateritakon.

¹⁹ Anihe micta otenaw Babylone tekaci ki oraparin, e nicto tetawopariki, kaie kaskina otenawa ota askik tekaci ki korokotawokiparin. Kice Manito nama ki otci onikatew neta ka tacikeritci micta otenak Babylone. Ki wapatahew e apitc kiciwahikotc, tarasak e ki miratc orakaniw kitci minikweritci ominicapom ka mackawakaminik. Anihe minicapo, enkweriw omicta okiciwasiwin Kice Manito.

²⁰ Kaskina minictikw ki riskipotew, kaie matinawa nama awocamec ki otci nokono.

²¹ Ki micta sesekan, irinik e ici papikicinitcik, maskomi e macikitcitcik icpimik e otciparitcik. Iriniwok ki marerimewok Kice Manitowa, e ki pe mirikotcik kitci micta nekatcitatcik e sesekanik, kaie e ki micta koctasinakonik.