Ka ki ici wapatahakaniwitc Jean 14 - Kice Manito Ocki Omirwatcimowin

Onakamowiniwaw iriniwok ka ki kiwe otapinakaniwitcik

¹ Minawatc kiapatc ni ki itapin. Ni ki wapamaw Maritcenic e nanipowitc okititin matinak Sion ka icinikaterik. Mitcet iriniwa witcikapowictakopan, aniki ka masinaterik oskitikowak Maritcenica oticinikasowiniw kaie Otawiwa oticinikasowiniw. Aniki iriniwok mitcetipanak, peikwaw kice mitato mitana acitc nemitana acitc new mitato mitana e taciwaspan.

² Ni ki petawaw kiapatc awik, wakwek e otewetak, e micta sokitakositc, mia pawictikw e ititakositc, mitowi kaie onimiskiw e micta kiciwetc. Anihe ka ki petaman e arimwaniwok, mia e mitcetitcik iriniwok e pwapwapikepitciketcik ka ititaman, aceriw pwapwapikepitcikaniw e metowetcik.

³ Aniki ka micta kice mitcetitcik iriniwok ka ki wapamakik, ekota neta e ici icikapowiwaspan nikanik okimaw tetapiwakanik, kaie nikanik neta e ici icikapowiritci anahweriw new ka pimatisiritci kaie ka kiceatisiritci, e nakamotcik ocki nakamowiniw. Aniki iriniwok peikwaw kice mitato mitana acitc nemitana acitc new mitato mitana ka tacitcik wirawaw tepirak kackitawok e nakamotcik aniheriw ocki nakamowiniw, aniki Kice Manito ka ki otci otapinatc ota askik, otirinima kitci ki iteritakosiritci.

⁴ Enko aniki ka ki nanakatcihitisotcik aka kitci witcewatcik iskwewa. Ki kanawerimitisowok kitci mirwinakositcik otehiwak. Nosanehwewok anihi Maritcenica kaskina wiec e pa icaritci. Ki otci wikotcihakaniwiwok neta e taciritci iriniwa ota askik, kitci ki tiperimikotcik Kice Manitowa kaie Maritcenica, tarasak nictam ka aiamihe pakitinakaniwonik e ki iteritakositcik.

⁵ Nama wiskat ki otci kiraskiwok. Nama wiskat ki otci patahamok kitci ki itactahorakaniwitcik.

Aceriwok ka nictitcik

⁶ Minawatc kotak ni ki wapamaw peikw aceriw icpimik waskok e miretc. Petaw Mirwatcimowiniw aka wiskat ke ickwaparinik, e pe nta witamawatc kaskina iriniwa ota askik ka tacikeritci: kaskina wiec e wetciritci, kaskina e tato otenwesiritci, kaie kaskina papitoc e ici arimweritci.

⁷ Ki itew e micta sokitakositc: “Kicterimakw Teperitciketc, kaie icperimakw! Aci meka otcitciparin irikik ka actakaniwok kitci tipaskonatc iriniwa. Kicterimakw anahwe ka ki kiceritak wakwek kaie askiriw acitc kitcikamiriw kaie peikon moskitciwonipekoriw.”

⁸ Minawatc kotak aceriw ki pe nosanehwew anihi nictam aceriwa, e pe itetc: “Ki pakitin! Micta otenaw Babylone ki pakitin! Iriniwok nta ka taciketcik ki micta nosanetawok pacikwatisiwiniw, kaie e ki wikosimatcik kaskina iriniwa e taciritci kotakihik askik kaie wirawaw kitci nosanetaritci. Tarasak ki minihewok ominicapomiwaw ke ki otci micta kiwockwepiritci!”

⁹ Minawatc kotak kiapatc aceriw ki pe nosanehwew aniheriw tec aceriwa e niciritci, e pe itetc e micta pe sokitakositc: “Anahwe ka kicterimatc anihi matci awesisa kaie manitokana mia ka icinakosiritci, kaie ka masinasotc oskitikok kekotc otcitcik,

¹⁰ ki kiciwahew Kice Manitowa. Mia peikon mitowi kata mirakaniwiw kitci minikwetc minicaporiw ka mackawakaminik, Kice Manitowa e ki sikinamiritci orakanik, mia peikon Kice Manito okiciwasiwin e iteritakonik. Kaskina aniki ka itatisitcik kata nekatcihakaniwiwok ickotek kaie ka akwapiterik, mekwata e kanawapamikotcik Kice Manitowa otacerimiriw acitc Maritcenica.

¹¹ Ickotekeriw ka akwapiterik ka nekatcihikotcik iriniwok kakike icpapiteriw. Aniki ka ki kicterimatcik anahweriw matci awesisa kaie manitokana mia ka icinakosiritci, acitc aniki kaskina ka ki masinaterik oticinikasowiniw nama wiskat kata arwepiwok, mocak kata ici nekatcitawok e kicikarik kaie e tipiskarik.”

¹² Ekoni wetci acterik mocak kitci ciciperitakik iriniwok ka tiperimikotcik Kice Manitowa, aniki ka sapitakik otirakonikewiniw kaie mocak ka nosanehwatcik Cecoca.

¹³ Minawatc kiapatc ni ki petawaw awik e arimwetc, wakwek e otewetak, e icitc: “Masinaha ohwe: Aci anotc caweritakosiwok kaskina iriniwok ka tapwerimatcik Teperitcikeritci ka nipotcik e mekwa atoskectawatcik.” Minawatc Miro Manito itew: “Ehe, tapwe ni, kata ki arwepiwok e ki micta otamirotcik. Ka ki ici miro totakik mocak kata nosanehikowok.”

Nakickakawe Kice Manito okiciwasiwin

¹⁴ Kiapatc ni ki itapin. Ni ki wapaten osko e wapak. Neta okitc oskok ni ki wapamaw awik e apitc, mia irinik e icinakositc. Okitc octikwanik apatcitapan okimaw actotiniw tekaci e osawo coriawapiskowonik, e takonak mackoci mokomaniw ka kinarik.

¹⁵ Kotak aceriw ki pe orowiw neta kitci aiamihe mikiwamik. Ki tepwew e micta kiciwetc, e itatc anihi ka apiritci oskok: “Otapina kimackoci kimokoman. Mawotcita kikitikana. Aci meka otcitciparin ota askik kaskina kitci mawotcitakaniwok.”

¹⁶ Aci tca anahwe ka apitc okitc oskok ki miparitaw mackocikoman, e ki mawotcihatc iriniwa ota askik.

¹⁷ Minawatc kotak aceriw ki pe orowiw neta kitci aiamihe mikiwamik, wakwek ka takonik. Kaie wir takonamopan mackocikomaniw ka kinarik.

¹⁸ Minawatc kotak aceriw kaie wir ki pe takociniw. Nte ka ici aiamihe pakitinikaniwonik itekera ki pe ototew. Enko na ka mitatc ickoteriw. Ki tepwew e micta sokitakositc, e itatc anihi ka omackocikomaniritci ka kinarik: “Otapina kimackocikoman. Kickikaha cweminatikwa neta askik. Aci mirosiwok cweminak!”

^19-20 Anahwe aceriw ki miparitaw omackocikoman neta askik. Ki kickikaham cweminatikoriw, e ki nta iciwepinak neta ka ici camakohwakaniwiritci cwemina, kitci otci otcikowinik cweminaporiw. Neta ka ici camakohwakaniwitcik cweminak, nakewara otenak actekopan. Ka camakohwakaniwitcik aniki cweminak, tepirak miko ki nokon e macikowik, mia mitowi sipi e micta mitcakamik: nicowa mitato mitana tato tipahikan e asitci kinwarik, nac atikw okwakonearik e istakaminik. Ekoni tca ke apitc arimisitcik iriniwok ka matci totakik, nakickakawe Kice Manitowa okiciwasiwiniw.