Ka ki ici wapatahakaniwitc Jean 13 - Kice Manito Ocki Omirwatcimowin

E nicitcik matci awesisak

¹ Minawatc ni ki wapamaw matci awesis e otci pekopetc kitcikamik e nicowatcinik octikwan, kaie e mitatciritci oteckan. Apatcitapan okimaw actotiniw tato e taciritci oteckana. Icinikasowiniw ka maratanik masinateripan octikwanik tato e tatinik, e marerimatc Kice Manitowa.

² Anahwe awesis ka wapamak mia piciw e icinakositc. Osit mia masko e icinakonik. Oton mia micapiciw e icinakonik. Atikocimakan ki acotamawew anihi matci awesisa omackawisiwin, kaie omicta otetapiwakan kitci tiperitamiritci, kaie ki mirew tiperitamowiniw e micarik.

³ Peikw aniheriw octikwan anahwe matci awesis mia e ki apinehikaterik nac e iti nipotc e icinakositc, aric aniheriw ka ki ici apinehakaniwitc ki kikew. Kaskina iriniwok ota askik ki micta mamiskateritamok e mirwinowatcik anihi matci awesisa e nosanehwatcik.

⁴ Kaskina iriniwok ki kicterimewok anihi atikocimakana, e ki miraritci aniheriw omackawisiwin matci awesisiriw. Ki kicterimewok kaie anihi matci awesisa, e itetcik: “Awin ka asitci mackawisitc kirika anahwe matci awesis? Awin ke ki natoparictowatc kitci cakotcihatc?”

⁵ Aci minawatc ki mirakaniwiw anahwe matci awesis kitci mirwatcimitisotc kaie kitci marerimatc Kice Manitowa. Ki mirakaniwiw aniheriw kitci itotisketc nemitana acitc nicwo pisimwo irikik.

⁶ Ki micta pactamo e papirotowatc Kice Manitowa, e papirotak e icinikasoritci, kaie neta e ici tacikeritci e mareritak, acitc peikon anahweriw kaskina wakwek ka tacikeritci e marerimatc.

⁷ Ki mirakaniwiw kaie matci kitci natoparictowatc iriniwa ka nosanehwaritci Kice Manitowa, matci kitci cakotcihatc. Kaie ki mirakaniwiw kitci mackawisitc e tiperimatc iriniwa kaskina e tato otenwesiritci ota askik, kaskina papitoc e aicinakosiritci, kaskina tatowek e ici arimweritci, kaie kaskina wiec e wetciritci.

⁸ Kaskina iriniwok e tacitcik ota askik ki kicterimewok anihi matci awesisa, kaskina aniki aka ka masinaterik oticinikasowiniwaw neta Pimatisi Masinahikanik esko ka kiceritcikaterik askiriw. Maritcenic ka ki nipahakanitc, enko na ka tiperitak aniheriw masinahikaniw.

⁹ “Wewerita natotamokw ohwe, kirawaw ka kackitaiekw kitci nisitotamekw!

¹⁰ Anahwe ka iteritakositc kitci kipohwakaniwitc, tapwe kata kipohwakaniwiw. Anahwe ka iteritakositc micta mokomanik kitci otcinetc, tapwe ekota neta ke otcinetc. Ekoni wetci acterik Kice Manito otirinima kitci sokikapowiritci kaie mocak kitci asperimototakotc.”

¹¹ Minawatc ni ki wapamaw kotak matci awesis, askik e otci pe orowitc. Niciripana oteckana, mia maritcenic oteckana e icinakosiritci. Ekoni peikon e ici arimwespan mitowi atikocimakan.

¹² Anahwe kotak matci awesis ki mirakaniwipan kaskina omackawisiwiniw anihi nictam matci awesisa ka ici kackitaritci. Aci tca apatcitapan aniheriw omackawisiwiniw mekwata e kanawapamikotc. Wikosomepan kaskina iriniwa ota askik otcitakotc kitci kicterimaritci anihi nictam awesisa ka ki micta apinehakaniwiritci minawatc ka ki kikeritci.

¹³ Kackitapan anahwe kotak matci awesis ka matawinakonik e aitotak. Wawatc kackitapan icpimik kitci pe otciparinik ickoteriw, askik kitci ici pakitinik, mekwata e kanawapamatcik kaskina iriniwok.

¹⁴ Tekaci onicimepan iriniwa ota askik, e wapatahaspan e ici mata kackitatc, e ki mirakaniwitc ani kitci ici kackitatc, mekwata e tacikerispana neta nictam matci awesisa. Ki wikosimew ota ka tacikeritci askik kitci ociharitci manitokana tepirak kitci kicterimakaniwiritci nictam anihi matci awesisa ka ki apinehwakaniwiritci, micta mokomaniw e ki totcikaterik, minawatc kiapatc e pimatisiritci.

¹⁵ Minawatc anahwe kotak matci awesis ki mirakaniwiw mackawisiwiniw kitci potatatc anihi manitokana mia e icinakosiritci nictam matci awesis, kitci ki pimatisiritci kaie kitci ki arimweritci, acitc kitci nipaharitci kaskina aka ka kicterimikoritci.

¹⁶ Anahwe matci awesis wikosimepan kaskina iriniwa ota askik kitci kicawatcihakaniwiritci onihiwini otcitcirik kekotc oskitikorik: ka kicteritakosiritci, kaie peikon aka ka kicteritakosiritci, ka micikitaritci acitc ka kitimakisiritci, ka atoskectakeritci, peikon kaie aka ka atoskectakeritci.

¹⁷ Kecpin awik aka e ki otci kicawatcihakaniwitc, tekaci nama kekociciriw ki otapinamokopan, nama kaie ki atawekopan, kecpin aka ki otci masinahikaterik aniheriw matci awesisa oticinikasowiniw neta otcitcik kekotc oskitikok, kekotc e tatosinaterik.

¹⁸ Actew kitci omiro omitoneritcikaniekw kitci ki nisitotamekw ohwe ka iteian. Kecpin awik e kakitaweritak, kata kackitaw kitci nisitotak wa itemakanik anihi matci awesisa e tatosinasoritci. Aniheriw e tatosinaterik, mia mitowi iriniw oticinikasowin e tatosinaterik. Enkweriw e tatosinasotc: nikotwasow mitato mitana acitc nikotawaso mitana acitc nikotwaso.