Ka ki ici wapatahakaniwitc Jean 10 - Kice Manito Ocki Omirwatcimowin

Aceriw kirika masinahikanicic

¹ Minawatc kotak ni ki wapamaw aceriw e micta mackawisitc, icpimik e pe raciretc, tekaci e waskackakotc oskoriw kaie e nokonik pisimwapiriw waska octikwanik. Otactamikw micta wasiteriw mitowi pisimw, oskat mia ickote e icinakonik.

² Takonamopan masinahikaniciciriw e cetinik. Ekota neta kitcikamik ka ici takosketc, onihiwini osit e totak, minawatc anahweriw kotakeriw ki ici takoskew askik.

³ Ki notakosiw e micta kiciwetc, mia mitowi micapiciw e notakositc. Ka ickwa notakositc, ki petakosiwok e nicowatcitcik onimiskiwok e micta kiciwetcik.

⁴ Ka ickwa petakositcik onimiskiwok e arimwetcik, ekoni ka ici nta masinahaman aniheriw ka ki itetcik. Aric ni ki petawaw kotak awik e icitc, wakwek e otewetak: “Aka masinaha ka ki itetcik aniki e nicowatcitcik onimiskiwok, aka awik kitci kiskeritak.”

⁵ Aceriw, anahwe ka ki wapamak e nanipowitc kitcikamik kaie askik, ki icpinam ospiton onihiwinik itekera, wakwek e itinak.

⁶ Ki nespi tapwew, Kice Manitowa oticinikasowiniw e apatcitatc, anihi mocak ka pimatisiritci, ka ki kiceritamiritci wakwek, kaskina e ici takonik, kaie askiriw acitc kaskina e ici takonik, kaie kitcikamiriw kirika kaskina e ici takonik, e itetc: “Nama awocamec ki ka petanano kitci pe iciwepak!

⁷ Aric ani apitc kekatc kitci kweckoctatciketc anahwe mamitcitc aceriw, Kice Manito kata totam aniheriw aci weckatc ka iteritakipan kitci pe iciwepanik ka katcicterikipan, kotc ka ki itatc nikan tipatcimo iriniwa ka ki pe atoskectakotc.”

⁸ Minawatc anahwe ka ki pe otci aimihitc wakwek e otewetak kiapatc ni ki aimihikw, e icitc: “Matca nta otapina masinahikanicic ka cetik, aceriw ka takonak, neta ka nanipowitc kitcikamik kirika askik.”

⁹ Ni ki natawapamaw anahwe aceriw. Ni ki itaw kitci miritc aniheriw masinahikaniciciriw. Ni ki itikw: “Otapina. Mitci. Kata ciwacin kitonik, mia mitowi amo namanas kitci ispokok. Aric ickwa kotciparitaine, kata wisakan kimisitak.”

¹⁰ Ni ki otapinamwan aniheriw masinahikaniciciriw ka takonakipan, e ki mitciwak. Nitonik micta ciwacinopan, mia peikon amo namanas. Aric ka ickwa kotciparitaian, wisakanopan nimisitak.

¹¹ Ni ki itikowin minawatc: “Kiapatc peikwaw ki ka tipatcimowan Kice Manito e itetc e arimomatc mitcet iriniwa kirika okimamiwawa, papitoc askik ka otciritci kaie papitoc ka itacakeritci, kaie papitoc arimwewiniw ka ici arimweritci.”