Ka ki ici wapatahakaniwitc Jean 1 - Kice Manito Ocki Omirwatcimowin

Jean e witak tante ka otci kiskeritak kekociciriw

¹ Ota masinahikanik masinatew tipatcimowin, Cecoc Krist ka ki pe otitikotc. Kice Manitowa ki miriko kitci wapataharitci iriniwa ka atoskectakoritci ke iti iciwepanik nikanik wipatcikan. Krist ki pe iciticahwew otacerima kitci pe nta witamawitc ke ici kiskeritamwak, nin Jean ka icinikasoan, e atoskectawak.

² Kaskina ni witen ota ka ki ici icinaman: Kice Manito otitewin kaie Cecoc Krist ka ki itetc e tapwemakanik.

³ Caweritakosiw anahwe ka tapwatak ohweriw ka masinaterik, kirika kaie wirawaw caweritakosiwok iriniwok ka natotakik ohweriw nikan tipatcimowiniw kaie ka wi nosanetatcik e itasinaterik. Aci meka pe otcitciparin kaskina kitci pe isparik.

E arimikowakaniwitcik ka nicowasotenwesitcik kitci aiamihe mikiwamik

⁴ Nin Jean ka masinahaman ohwe masinahikan. Ki masinahamatinawaw neta e taciekw ka nicowasotenwesiekw mawotcihitoekw kitci aiamihaiekw e tapwerimekw Cecoc, nete ka tacikeiekw Asie askik: Ni pakoserimaw Kice Manito kitci cawerimitakw omirotehewin kaie pekaterimowiniw, wir ka tatc anotc, kaie mocak ka ki pe tatc, acitc nikanik ke pe icatc. Kaie aniki e nicowatcitcik manitowok kitci cawerimitakok ka nanipowitcik nikanik Kice Manitowa okimaw tetapiwakanik.

⁵ Kaie peikon Cecoc Krist kitci ici cawerimitakw, anahwe mocak wewerita ka tipatcimotc tapwewiniw Kice Manitowa otci, Okosa nictam ka ki pe nitawikiritci, wirctam kaie ka ki apitcipatc, acitc ka tiperimatc kaskina e taciritci okimawa ota askik. Ki sakihikono Krist, kirika ki ki wikotcihikono kipactatowininak, osam e ki nipotc kirano otci, ka pakitinak omikw kitci macikowinik.

⁶ Ki ki mirikono otirinima kitci iteritakosiikw, wir e okimamiikw, kaie kitci iteritakosiikw mia makatewokorewok, matci kitci atoskectawimawiko Otawiwa Kice Manito. Nespitc kitci icperimakaniwitc kirika kitci mackawisitc! Kekora ki iki.

⁷ Itapikw icpimik! Nte kata pe icaw oskok. Kaskina iriniwok kata wapamewok, misawatc aniki ka ki pataskohwatcik. Kaskina iriniwok papitoc e aicinakositcik ota askik kata matowok ke apitc kackeritakik e mitatatcik. Tapwe, ekoni ke isparik! Kekora ki iki.

⁸ “Nin kaskina ka ki kitciparitaian, nin kaie kaskina ke ickwanaman,” itew Teperitciketc Kice Manito, ka mawotci mackawisitc. “Nin ka taian anotc, mocak ka ki taian, kaie nikanik ke pe taian.”

Jean e wapamatc e icinowatc Cecoca

⁹ Nin Jean, kiwitcicaniwaw, kaie nin e witcewak Cecoc, mitowi kirawaw. Ki witcewitinawaw, kaskina tapickotc e pimoteikw e arimiparik e tiperimitokw Cecoc Okimawinik, kaie tapickotc e sokikapowiikw. Nin ni ki kipohokowin minictikok Patmos ka icinikatek, e ki pa tipatcimoian Kice Manito otitewin, kaie aniheriw tapwewiniw Cecoc ka ki petatc.

¹⁰ Peikwaw e arwepi kicikak, Miro Manito ni ki pe nta pitciteheckakw. Ni ki petawaw awik e arimwetc e pe micta sokitakositc, otananik e icikapowiapan e otewetak, mitowi kweckoctatcikan e ititakositc.

¹¹ Ni ki pe itikowin: “Masinaha masinahikanik kaskina ke ici wapataman. Iciticahamowik ka nicowasotenwesitcik iriniwok, Kice Manito otirinima, ka mawotcihitotcik kitci aiamihatcik e tapwerimatcik Cecoca nete otenak ka tacikeritci ka icinikaterik Éphèse, Smyrne, Pergame, Thyatire, Sardes, Philadelphie kaie Laodicée.”

¹² Ni ki kiweskwerin kitci ki wapamak awin ka aimihitc. Ni ki wapaten tca nicowaso wactenamakana e osawapiskaki.

¹³ Ki pe icikapowiw awik, neta e ici acterik wactenamakaniw, mia mitowi iriniw e icinakositc. Apatcitapan kapotowaniw e kinwekinik nac ositik e askwekinik, e osawapiskiritci pokotehono otisinakek e pimakamapikeciniritci.

¹⁴ Tekaci wapiskwepan, mia maritcenic opiwiriw e icinakonik owirisis, kekotc mia kon. Micta wasiteripan ockicikw, mia ickote.

¹⁵ Kaie wasiteripan osit, mia piwapiskw e wasapiskitek e ki sosokatek ickotek. Kaie mackawitakosipan, mia pawictikw e ititakositc e arimwetc.

¹⁶ Takonepan nicowaso atcikoca onihiwinik, kaie otonik otci orowiparinipan mokomaniw ka kinwapiskarik, e aitowi kinarik. Kaie otactimikw micta wasiteripan mia peikon pisimw e apitc wasisotc e apita kicikarik.

¹⁷ Ka wapamak ni ki pakicinin e nipiskoparian e ici nanipowitc, mia e ki nipoan ka isparian. Ki pe actaw onihiwini otcitci nictikwanik, e icitc: “Aka koctatci! Ninctam ni ki tan epwamoci kaskina kekocic takok, kaie nin ni ka ickwanen kaskina kekocic.

¹⁸ Nin Ka Pimatisian. Ni ki nipotai, kakike aric aci ni ka pimatisin. Aci ni tiperiten nipowin, kaie ka ici arakaniwitcik ka nipotcik.

¹⁹ Masinaha tca kaskina ka ici wapataman, anotc e isparik kaie nanake ke iti isparik.

²⁰ Enko ka wi itemakak ka wapamatcik ka nicowatcitcik atcikocak e takonakik ninihiwinik kaie anihi nicowaso e osawapiskaki wactenamakana. Nictam ka ki katakaniwok, anotc aci kaskina kiskeritakon. Anihi nicowaso wactenamakana, enko ni aniki ka nicowasotenwesitcik ka mawotcihitotcik kitci aiamihatcik e tapwerimitcik. Minawatc aniki nicowaso atcikocak, enkweriw ni otacerimiwawa.”