Pirip iriniwok 4 - Kice Manito Ocki Omirwatcimowin

Ke itatisinaniwok

¹ Ekoni tca ke ici sokikapowiekw e asperimototawekw Teperitciketc, niwitcicanak ka micta sakihitakok, kaie e masoweritaman minawatc kitci wapamitakok! Ni mireriten ko e mamitonerimitakok kaie ki micta kicterimitinawaw!

² Évodie acitc Syntyche, ki nataweritamatinawaw kaie ki pakoserimitinawaw kitci nahitatoekw aci e mamweritakosiekw kirika Teperitciketc.

³ Kaie kir mocak ka miro witc otamiromiin, ki nataweritamatin kitci witcihatcik. Mictahi meka ni ki witcihikok e tipatataman Mirwatcimowiniw, kaie anaha Clément kirika kotakihik e ki witcihitcik e otamirowak. Kaskina masinateriwa oticinikasowiniwaw Pimatisi Masinahikanik.

⁴ Mocak micta mireritamokw aci e tiperimikoekw Teperitciketc! Kiapatc kit ititinawaw, ekoci mireritamokw!

⁵ Ni masoweriten kaskina awik kitci miro kiskeritak e roskiteheiekw. Aci meka kekatc kata pe takociniw Teperitciketc.

⁶ Tekaci aka arimeritamokw kekocic. Kaskina aric ki ka nataweritamawawaw Kice Manito aniheriw ka wi apatcitaiekw, mocak kaie kitci naskomekw e pakoserimekw.

⁷ Ki ka tca mirikowaw Kice Manito opekateritamowin, tekaci aka ke ki nisitotcikaterik e apitc mackawisimakanik. Ekoni tca ke otci nanakatcihikoiekw kitehiwak kirika kimitoneritcikaniwak, mocak e mamweritakosiekw kirika Cecoc Krist.

⁸ Minawatc, niwitcicanak, ohwe mamitcitc ki wi witamatinawaw: mamitoneritamokw kaskina ka mirwacik, acitc ka iteritakok kitci mirwatcitcikatek, kaskina ka tapwemakak, ka kicteritakok, icikowisk ka iteritakok, kaskina ka peikinakok, acitc kaskina ka mireritcikatek, kaie ka kicteritcikatek.

⁹ Ekoni totamokw kaskina ka ki pe ici kiskinohamatakok acitc ka ki pe ici miritakok kitci itotiskeiekw, kaskina kaie ka ki ici wapamiekw e aitotiskeian acitc ka ki ici petamekw e aiteian. Mocak ki ka witci tacikemikowaw Kice Manito, wir ka acotamaketc pekateritamowiniw.

Naskamowakaniwitcik Pirip iriniwok ocaweritcikewiniwaw otci

¹⁰ Ni micta mireriten, e witci pimatisimak Teperitciketc, aci e ki kackitaiekw kiapatc kitci wapatahiekw e mamitonerimiekw. Ni kiskeriten mocak e ki mamitonerimiekw, nama aric ki otci miroparinopan kitci pe wapatahiekw.

¹¹ Nama nit itan anihe osam e noteparian kekocic. Ni kiskeriten meka ke totaman mocak kitci mireritaman kotc e tataman.

¹² Ni kiskeriten kitci mireritaman misawatc e kitimakisian kirika e mirwatcitaian. Ni kiskeriten aci kaskina wiec kitci ici mirerimoan, kotc e isparian, misawatc e mitcek mitcim kaie e pakateian, misawatc e mirwatcitaian kaie tca e noteparian.

¹³ Ni kackitan kaskina anihe kitci nakickaman Krist otci, e mackawisihitc.

¹⁴ Mia aric ki ki totenawaw e ki witcihiekw ka arimipirian.

¹⁵ Kirawaw tipirawe Pirip iriniwok, ki kiskeritenawaw ohwe: ka nakataman kitaskiwaw Macédoine, apitc ka kitciparik e pa tipatcimonaniwok Mirwatcimowin, kirawaw tepirak neta e tacitcik ka tapwerimatcik Cecoca ki ki witcihinawaw.

¹⁶ Wawatc ka tacikeian nete Thessalonique otenak, mitcetwaw ki ki pe iciticahamowinawaw anihe ka wi apatcitaiapan.

¹⁷ Namaiew ni aric anihe ka iteritaman, kitci cawerimikosian. Kirawe ni masoweriten kirawaw kitci cawerimikoiekw e ki witcihiweiekw.

¹⁸ Ki witamatinawaw, aci kaskina ni ki pe otitikon anihe ka ki pe iciticahamowiekw, ekoni kitci tipiparian. Aci Épaphrodite ki pe iciwitaw aniheriw ka ki ici cawerimiekw. Takon aci kaskina ka wi apatcitaian. Anihe ka ki ici miriekw, mia aiamihe pakitinikan e micta mireritcikatek iteritakon, ka ki cawerimekw Kice Manito, e micta mireritak e pe otitikotc.

¹⁹ Kaskina ke wi apatcitaiekw ki ka mirikowaw Nikice Manitom. Mictahi meka micariw kaie mitceniw omirwasiwin ke miritakw kaie kirawaw, aci e mamweritakosiekw kirika Cecoc Krist.

²⁰ Kaskina e tacinaniwok kitci kicterimakaniwitc Kotawino Kice Manito, anotc nac nespitc. Kekora ki iki.

E matcacikowakaniwitcik Pirip iriniwok

²¹ Arimikowawok kaskina ka tapwerimatcik Cecoc Krist neta ka ici tacikeiekw. Kaskina kiwitcicanowok ka witci tacikemitcik ota, kit arimikakowawok kaie wirawaw.

²² Kaskina ota ka tapwerimatcik Cecoca, kirawe aniki ka atoskectawatcik Kice Okimawa, kit arimikakowawok kaie wirawaw.

²³ Nit pakoserimon omirotehewin Teperitciketc Cecoc Krist kaskina kitci witci tacikemikoekw. Nin Pwar