Pirip iriniwok 3 - Kice Manito Ocki Omirwatcimowin

Ke totak awik icikowisk kitci ki iterimikotc Kice Manitowa

¹ Minawatc, niwitcicanak, ekoci mireritamokw e mamweritakosiekw kirika Teperitciketc! Nama ni cakwerimon kiapatc kitci witamatakok anihe weckatc aci ka ki pe masinahamatakok, e nataweritaman kirawe kitci miropariekw.

² Aiekwamictowakok aniki ka matci totakik, ka cikeritakositcik, kaie arotc ka itetcik otcitakotc kitci kicawatacokoiekw!

³ Tapwe wirata, kirano ka ici tatamokw “tapwe kicawatacowewin,” osam meka e ki mirikoikw Kice Manito Omanitoma kitci witcihitokw e atoskectawokw, osam kaie e kicterimokw Cecoc Krist, aka kaie e asperimototamokw kekocic ota askik ke ki totakoikw.

⁴ Kecpin tapwe aric ki miroparik kekocic kitci totcikatek ota askik Kice Manito otirinima kitci iteritakosinaniwok, nin tipirawe ni ta ki kackitatai. Kecpin e tatc awik e iteritak kitci kackitaspan, nin kirawe ni ta ki kackitatai, osam kirawe e mitcekipan ka totamapan kitci ki iteritakosian.

⁵ Ni ki kicawatacokowin nicwaso kickwa ka ickwa nitawikian. Tekaci nit Israël iriniwin. Benjaminik ni ki pe aniskotapecinin. Kaskina e tacitcik nitaniskotape nimocominanak otananik ka ki pe tatcik tekaci cota iriniwipanak, Hébreux e iteritakosiwaspan. Wewerita ni pe nosanetatai kaskina cota irakonikewin, nete itekera cota iriniwok Pharisiens ka icinikatakaniwitcik, e asitci miro nosanetaiapan anihe irakonikewin.

⁶ E apitc nataweritamapan kaketin kitci nosanetaian anihe cota aiamihewin epwamoci kiskerimak Cecoc, e iteritamapan “Kice Manito ni miro atoskectawaw,” ni ki pe nekatcihawok iriniwok ka tapwerimatcik Cecoca. Nama ni ki otci patahen e nosanetaiapan kaskina cota aiamihe irakonikewin e itemakak ke totcikatek icikowisk kitci pimatisinaniwok, wawatc aka e sapinakoki cota irakonikewina.

⁷ Aric ani ka itatisiapan kaskina ka mirwaciki nit ici kanawapateti, ni ki kanewiwakan e iteritamapan, pitoc anotc nit iteriten, mia tekaci aka wiec e irapataki osam e tapwewerimak Krist.

⁸ Wawatc kaskina kekocic nit iteriten “nama wiec irapatan,” kecpin e mamitoneritcikatek e apitc kirawe mictahi kicteritakok e kiskerimak Cecoc Krist, anahwe Ka Tiperimitc. Wir otci wetci iteritaman kaskina kekocic “tekaci nama wiec irapatan,” mia wepinason e iteritaman, kitci ki kiskerimak Krist,

⁹ kaie kitci ki iteritakosian tekaci mamweritakosiwok. Nama meka aci “kowiskw” nit iteritakosin tepirak e ki nosanetaian aiamihe irakonikewin, aric tepirak e tapwewerimak Krist. Wir meka Kice Manito ka cawerimatc awiriw icikowisk kitci iterimakaniwiritci, kecpin e asperimototakotc.

¹⁰ Tepirak ni nataweriten kitci miro kiskerimak Krist kaie kitci kiskeritamwak tan e asitci mackawisimakanik otapitcipawin. Kaie ni nataweriten kitci nekatcitaian kotc wir Cecoc ka ki ici nekatcitatc, kitci sokiteheian mitowi ka ki sokitehetc nac ka iti nipotc,

¹¹ kaie nin tca nikotin kitci ki apitcipahikoian.

Kitci kanawapatamikw kekwan ka wi ici kackitamatisoikw

¹² Ni kiskeriten aka moci kaskina e kackitaian, kirika aka mia moci icikowisk e itatisian. Aric mia e kwetciskataniwok e mipataniwok, e kokwetcitaian kitci makonaman anihe ke kanewian. Aci meka ni ki ickwa makonikw Cecoc Krist.

¹³ Ni kiskeriten aric, niwitcicanak, aka moci e ki otci kackitaian kaskina kitci makonaman anihe. Aric peikocin ka totaman: nama aci ni pameriten anihe otananik ka ki pe aitotaman, tepirak nikanik ni kanawapaten kekwan ka wi ici kackitamatisoan.

¹⁴ Tarasak ni kicipatan kitci miro takocinian e askocimok, nikotin kitci kackitaian aniheriw ka ki wicamitc Kice Manito icpimik kitci pe otitikowak, Cecoc Krist e ki itotisketc kitci icinakonik.

¹⁵ Kirano e kiceatisiikw kitcitcakocinak itekera, actew kitci iteritamokw, kaskina tapickotc e taciikw. Kecpin pitoc iteritamekwe patok ohwe ka ititakok, ki ka witcihikowaw Kice Manito kitci nisitotamekw.

¹⁶ Aric tca, aka ponitatan e nosanehamokw anihe meskanaw aci ka ki meskanakatokw Cecoc.

¹⁷ Niwitcicanak, keskinowapamicikw kaskina e taciekw. Ki ki wapatahitinan ke totamekw wewerita ke ici pimatisiekw. Kanawapamakw tca aniki aci ka ici pimatisitcik.

¹⁸ Ohwe mocak ni ki pe tipatcimon, kiapatc kaie ki witamatinawaw e matoan: mitcetiwok ka matci takositcik. Ani e itatisitcik, wapatahiwewok tekaci aka e kicteritakik e ki niporitci Cecoca tcipaiatikok.

¹⁹ Tekaci kata oniciniwok aniki iriniwok. Tepirak meka wirawaw e ici nataweritakik nosanetawok. Micta marataniw otitatisiwiniwaw. Nama aric wiec iteritamok niheriw ke ki waneritamihikowaspan. Tepirak mamitoneritamok ota askik kekociciriw.

²⁰ Kirano aric aci wakwek ki tiperitakosinano. Ekota meka ke pe ototetc anahwe Ka Akwacimitokw, Teperitciketc Cecoc Krist, e pehokw kitci pe takocik.

²¹ Kata meckotcitaw kiwiawinariw aka e mackawisimakanik, tekaci pitoc kitci icinakonik, mitowiriw owiaw Cecoc e icperitakonik. Kackitaw meka aniheriw kitci totak, wir e takonik mackawisiwiniw kaskina kitci ki tiperitak kekociciriw.