Pirip iriniwok 2 - Kice Manito Ocki Omirwatcimowin

Cecoc ka ki tipaterimitisotc kitci pe nta atoskectatokw

¹ E mamweritakosiekw kirika Krist, ki otci sokerimonawaw ia? Ki kakitcihikowinawaw ia aci e kiskeritamekw e apitc sakihitakw? Ki mamweritakosinawaw ia kaie Miro Manito? Ki sakihitonawaw ia acitc ki miro totatonawaw ia?

² Ki ka tca mirinawaw tekaci kitci mirerimowan kecpin e miroparihitoekw, kaie e sakihitoekw, e mamo iteritakosiekw kitehiwak kaie kimitoneritcikaniwak.

³ Kaskina ke totamekw, aka wi pacitcickowakw awik, kaie aka mirwatcimitisokw kitci wi kanawapamikoiekw. Aric ki ka iterimawawok kiwitc iriniwok kirawe e kicteritakositcik patoc kirawaw, tekaci e tipaterimitisoekw.

⁴ Actew tato neta e taciekw aka kitci natowi totak tepirak wir kitci miroparitc, aric kirawe kitci mamitonerimatc owitc iriniwa.

⁵ Kotc e itatisispan Cecoc Krist, ekoni ke itatisiekw kaie kirawaw.

⁶ Tapwe mocak ki kice manitowiw, nama aric ki otci natowi totam tapickotc kitci asiteritakositc kirika Kice Manitowa.

⁷ Aric tekaci ki pakiterimitiso, mia arotakan kitci asiteritakositc. Ki pe iriniwihitiso. Mia irinik ki icinakohakaniwiw.

⁸ Ki oreritam kitci tipaterimitisotc. Ki natotawew Kice Manitowa nac e nipotc tcipaiatikok.

⁹ Ekoni wetci ki mirikotc Kice Manitowa mawotci kitci icperimakaniwitc. Ekoni kaie wetci ki mirikotc icinikasowiniw kirawe e kicteritakonik patok kaskina kotakihi icinikasowiniw.

¹⁰ Nataweritamopan Kice Manito, kaskina ka pimatisiritci, waskok kaie ota askik, acitc atamik askik ka tacikeritci, kitci nipiskoctawaritci Cecoca, kitci kicteritcikaterik oticinikasowiniw,

¹¹ kaie kaskina e tacinaniwonik kitci witcikaterik: “Enko na tapwe Ka Tiperitciketc Cecoc!”, ekoni ke otci icperimakaniwitc Kice Manito Kotawino.

Kitci wasisoikw ota askik mia mitowi atcikocak e wasisotcik

¹² Nimiro nikwimesak, mocak ki ki pe natotawinawaw mekwata ka tacikeiapan neta. Wawatc tca kirawe anotc ki ta itotiskanawaw, misawatc aka e tacikeian. Aci ki ki akwacimikowinawaw. Mantokasokw kitci otamirotaiekw anihe ka ki ici cawerimikoiekw, mocak e kicterimekw Kice Manito kaie e tipaterimitisoekw.

¹³ Mocak meka otamiro kipimatisiwiniwarik Kice Manito, kitci kackitaiekw e nataweritamekw kaie kitci totamekw ka ici nataweritak.

¹⁴ Totamokw kaskina ke itotiskeiekw aka kitci kakiterimowiekw kaie aka kitci kikamitoekw,

¹⁵ aka kitci takok ke ki otci itactahorikoekw, kitci pekiteheiekw, Kice Manito onitcanica e iteritakosiekw, aka e takok ka maratak kitehiwak, mekwata e waskakapowitcik matci iriniwok arotc ka iteritakik neta ka ici tacikeiekw. Ki ta wasosonawaw neta ka ici taciketcik mia mitowi atcikocak e wasisotcik waskok,

¹⁶ e witamawotcik aniheriw tipatcimowiniw ka pimatisimakanik. Kecpin ni itotiskeiekwe, ki ka mirwatcimitinawaw minawatc takocike Cecoc, aka ceckwat e ki otci mantokasoan kaie e ki otci arimihitisoian kitci witcihitakok.

¹⁷ Kaskina ka ici pakitinamekw kipimatisiwiniwak Kice Manito otci aci e asperimototawekw, mia tapickotc icinakon aiamihe pakitinikan ka pakitinamekw Kice Manito otci. Pot ni ka nipahikowin. Mia peikon caweritcikan kata icinakon anihe nimikw ke macikowik ke pakitinamowak Kice Manito, tapickotc kirika kirawaw kipakitinikaniwaw. Kecpin anihe isparike, ni mireriten. Kirika kaie kirawaw kaskina e taciekw e mireritamekw, ni mireriten.

¹⁸ Peikon kaie kirawaw ki ta mirerimonawaw, kirika kaie nin e mirerimoan kitci mireritamekw.

Timothée kaie Épaphrodite

¹⁹ Nit asperimon Teperitciketc Cecoc otci kitci iciticohwak Timothée kitci natawapamitakw, e wi mireritamihikoan kitci natotakeian e itatcimikoiekw.

²⁰ Ekoni e peikocitc anahwe Timothée e iterimitakw tapickotc ka iterimitakok. Mocak ki mamitonerimikowaw, e nataweritak kitci miropariekw.

²¹ Kaskina kotakihik tepirak mamitoneritamok wirawaw tipirawe ke isparitcik. Nama mamitonerimewok Cecoc Krist e ici nataweritamiritci.

²² Kirawaw tipirawe ki miro kiskerimawaw Timothée ka ki pe aitotak wetci kiskeritakonik e miro atoskectaketc. Mitowi awik okosa ka witcihikotc, mocak ni ki pe witcihikw ka ici otamirotahian Omirwatcimowin.

²³ Nit asperimon tca kitci iciticohwak ickwa kiskeritamane ke isparian.

²⁴ Ni ketcinahon, kirika nit asperimototawaw Teperitciketc, tapwe aci kekatc kitci miroparik nin tipirawe kitci pe nta kiwotamitakok.

²⁵ Nit iteriten acteriw kiwitcicanino Épaphrodite kitci koski iciticohwak kitci natawapamitakw, anahwe anotc ka witc otamiromitc, niwitci cimakanic kaie e iterimak, tapickotc e mantokasoiak tapweritamowinik itekera. Enko meka anahwe ka ki pe iciticohwekw kitci pe nta witcihitc.

²⁶ Mictahi nataweritam kiapatc kitci wapamitakw. Arimeritam e ki petakeiekw e ki akositc.

²⁷ Tapwe ki akosiw kaie kekatc ki nipo. Aric Kice Manito ki kitimakerimew. Nama aric wir tepirak ki otci kitimakerimew, tapickotc ni ki kitimakerimikonan. Kecpin meka e ki nipotc Épaphrodite, kirawe ni ta ki micta arimeritetai. Nama aric ki otci pakitinew kitci niporitci.

²⁸ Ekoni wetci nakasian kitci iciticohwak kitci natawapamitakw, kitci ki mireritamekw kiapatc wapamekwe kaie aka awocamec kitci arimeritaman.

²⁹ Miro mihakw, kaie mireritamokw minawatc wapamekwe, kaskina tapickotc e nosanehwekw Cecoc. Ki ta kicterimawawok meka kaskina towihik iriniwok.

³⁰ Kekatc meka ki nipo, Cecoca e atoskectawatc. Kekatc ki pakitinam opimatisiwin kitci ki itotisketc aka ka ki kackitaiekw kitci totamekw e witcihiekw.