Pirip iriniwok 1 - Kice Manito Ocki Omirwatcimowin

Pwar kirika Timothée e arimikowatcik Pirip iriniwa

¹ Ninan Pwar kaie Timothée ka masinahamatak, Cecoc Krist e atoskectawakitc. Kirawaw otci kaskina Kice Manito otirinima ka tacikeiekw Pirip otenak ka nosanehwekw Cecoc Krist, kaie kirawaw ka nikaniwiekw acitc kirawaw ka atoskectawaiekw ka tapwerimatcik Cecoca.

² Ni pakoserimawok Kotawino Kice Manito kaie Teperitciketc Cecoc Krist mirotehewiniw acitc pekaterimowiniw kitci acotamatakok.

Pwar e aiamihectamowatc Pirip iriniwa

³ Ni naskamowaw Nikice Manitom kirawaw otci, tatwaw e mamikwerimitakok.

⁴ Tatwaw e aiamihectamatakok ni micta mireriten,

⁵ e ki pe witcihiekw e tipatcimoan Mirwatcimowin, esko nictam ka petamekw anihe tipatcimowin, nac kiapatc anotc.

⁶ Ni ketcinaweriten ohwe, Kice Manito ka ki kitciparitatc aniheriw miro otamirowiniw kipimatisiwiniwarik, mocak kiapatc kata otamiro, nac kitci kictakaniwonik, koski takociniritena Cecoc Krist ota askik.

⁷ Mirwacin e iterimitakok, kaskina e taciekw. Kaskina meka ki miwiritinawaw nitehik, osam kaie kirawaw e ki otitikoiekw Kice Manito omirotehewin kaie nin ka ki pe acotamawitc, misawatc mekwata kipohotowikamikok e tacikeian, peikon kaie esko ka wicamikoian kaketin kitci kispiwataman Mirwatcimowin kaie kitci wapatahiweian e tapwemakak kaskina.

⁸ Kiskeritam Kice Manito tapwe e apitc sakihitakok, wir tipirawe Cecoc Krist e ki acotamawitc kitci ici sakihiwewak.

⁹ Enko ohwe ka ici pakoserimak Kice Manito e aiamihaian: eckam kitci sakihitoekw kaie tapwe kitci kiskeritamekw acitc kitci miro nisitotamekw,

¹⁰ kitci ki kackitaiekw kitci oreritamekw ka ici mirwacik. Ki ka tca pekitehanawaw, kirika nama kata takon ke ki otci itactahorikoekw, minawatc takocike Krist.

¹¹ Kata mitcen ke ici miro totamekw, icikowisk e itatisiekw, wir Cecoc e ki miritakw kitci totamekw, kaskina e tacinaniwok kitci icperimakaniwitc Kice Manito, kaie mocak kitci mirwatcimakaniwitc.

Kitci pimatisinaniwok Cecoc otci

¹² Niwitcicanak, ni nataweriten kitci kiskeritamekw kaskina ka ki iciwepasian, ekota tapwe ka otciparik eckam kitci kiskeritcikatek Mirwatcimowin.

¹³ Ekota meka wetci kiskeritakik kaskina ka kanaweritakik kice okimaw omikiwamiriw kaie kotakihik iriniwok ota, e ki pe kipohokoian osam e atoskectawak Krist.

¹⁴ Aci mitcetiwok e tacitcik kiwitcicaninowok kirawe iti sokitehewok e tacikewak ota kipohotowikamikok. Eckam kaie nama iti koctatciwok kitci tipatatakik Kice Manito otarimwewiniw.

¹⁵ Tapwe wirata atita iriniwok tipatcimewok Cecoca e otcinawekerimitcik acitc e wi pacitcickowitcik aniheriw otci. Kotakihik aric wi tipatcimewok e mirotehetcik.

¹⁶ Wetci itotisketcik aniheriw, osam e sakihiwetcik, e kiskeritakik e ki mirikoian kitci otamiroan kitci kispiwataman Mirwatcimowin.

¹⁷ Aniheriw ka itotisketcik aniki kotakihik, ni wi pacitcickakok. Wi matciparitawok. Nataweritamok awocamec kitci arimihikoian mekwata e kipohokoian ota.

¹⁸ Marotc misawatc e mirwacinik kekotc ka maratanik, peikon tipatcimakaniwiw Krist. Ni micta mireriten tca, kaie mocak.

¹⁹ Ni kiskeriten meka kaskina kitci witcihiwemakak kitci wikotcihikoian, osam e aiamihectamowiekw acitc e witcihimitc Cecoc Krist Omanitoma.

²⁰ Ni petan acitc ni micta asperimon aka wiskat kitci waneritaman, aric anotc kiapatc kitci micta sokerimoan, mitowi mocak, kitci miro wapatahiwein okicteritakosiwin Cecoc, misiwe e iteritakosian, misawatc pe pimatisiane kekotc nipoane.

²¹ Ekoni meka wetci pimatisian, Krist otci. Wawatc nipoiane, kirawe mictahi ni ka mirerimon.

²² Kecpin aric mirikoiane kiapatc kitci pimatisian, kata miroparin kitci kictaian anihe otamirowin ka kicteritakok. Nama aric ni kiskeriten anihe mia ke oreritamapan.

²³ E niciki ni nataweriten kitci pe isparian. Ni ta mireriten kitci nakataman ohwe pimatisiwin kitci ki witci tacikemak Krist. Ekoni mawotci ke mirwacikipan.

²⁴ Aric kirawe kata kicteritakonopan, kirawaw otci, kiapatc kitci pimatisian.

²⁵ Ni ketcinaweriten anihe. Ekoni wetci kiskeritaman kiapatc kitci pimatisian, kiapatc tca kitci witci tacikemitakok, kitci ki witcihitakok e asperimototawekw Kice Manito acitc kitci mireritamekw.

²⁶ Minawatc kiapatc icaiane nete e ici tacikeiekw, awocamec kata takon ke otci mirwatcimekw Cecoc Krist, e ki witcihitakok.

²⁷ Mirwasikw, kotc e itacterik Krist Omirwatcimowin. Ekoni ke icinakok, misawatc pe icaiane kekotc aka tacikeiane, peikon ni ka kiskeriten e sokikapowiekw, kaskina tapickotc e iteritamekw, kaie kaketin tapickotc e mantokasoekw tapweritamowin otci, Mirwatcimowinik e otciparik.

²⁸ Aka pakitinitisokw kitci koctekok iriniwok ka wi cakotcihitakok. Ekoni tca ke otci kiskeritakik kitci onicikik, aric kirawaw kitci akwacimikoiekw. Kice Manitok meka otciparin.

²⁹ Ki ki mirikowaw meka Kice Manito kitci atoskectawekw Cecoc Krist, aka tepirak kitci tapwerimekw, kaie aric kitci nekatcitaiekw wir otci.

³⁰ Peikon anotc kaie kirawaw kit arimihikowinawaw, mitowi weckatc ka ki pe wapamiekw nin e ici arimihikoiapan, anotc kaie kiapatc e kiskeritamekw e ici pimoteian.