Philémon 1 - Kice Manito Ocki Omirwatcimowin

E arimikowakaniwitc Philémon

¹ Nin Pwar ka masinahamatan. Ota kipohotowikamikok ni tacikan. Ni ki kipohokowin osam e atoskectawak Cecoc Krist. Kiwitcicanino Timothée kaie wir ni witcihikw e masinahikewak. Ki masinahamatinan, Philémon, nikwimesinan ka sakihitak, kaie kir e atoskectawotc Cecoc.

² Kaie wirawaw ni masinahamowananak aniki kotakihik ka tapwerimatcik Cecoca, kimikiwamik ka mawotcihitotcik. Kaie wirawaw ni masinahamowananak kiwitcicanino Appia acitc Archippe, kaie wir e atoskectawatc Cecoca, kiwitci cimakanicino e iterimokw.

³ Ni pakoserimawok Kice Manito Kotawino kaie anahwe Ka Tiperimitokw Cecoc Krist kitci miritakok mirotehewiniw kaie pekateritamowiniw.

Osakihiwewin kaie otasperimowin Philémon

⁴ Tatwaw e aiamihaian, Philémon, ki mamitonerimitin, mikwetc e itak Nikice Manitom.

⁵ Ni petakan meka e micta asperimototawotc Teperitciketc Cecoc kirika e apitc sakihimatci otirinima.

⁶ Kaie ni nataweritamawaw Kice Manito ohweriw kitci mirisk: kitci mirwapatak anihe tapwetamowin e takok kitehik, kaie ninan peikon nitehinak e takok, mocak kirawe kitci ki kiskeritaman kaskina ka ki ici miritokw kipimatisiwininak, Cecoc e nosanehwokw.

⁷ Ni micta mireriten, niwitcican, kaie ni sokeriten, e kiskeritaman e micta sakihatcik kiwitc iriniwok. Ki ki meka kakitcihawok iriniwok kaie wirawaw ka tapwerimatcik Cecoca.

Philémon e nataweritamakotc kekociciriw Pwara, Onésime otci

⁸ Tapickotc tca e mamweritakosiikw kaie Krist, ki ka ki witamatin ke itotiskein.

⁹ Aric ki sakihitin, ekoni wetci kirawe mireritaman tepirak kitci nataweritamatan kekocic. Nin Pwar ka nataweritamatan ohwe, kotc e icinakosian e kice iriniwian, kiapatc e kipohokoian Cecoc Krist otci.

¹⁰ Ohwe ki nataweritamatin, Onésime otci, aci mia tipirawe nikosis e iterimak ota kipohotowikamikok.

¹¹ Weckatc nama wiec ki otci irapatisiw kir otci. Aric anotc ni micta witcihikw kirika ki wi witcihikw kaie kir.

¹² Aci kit iciticahamatin anahwe Onésime kitci natawapamisk, mia nin tipirawe nitehi e iciticahamatan.

¹³ Ni ta ki micta mireritetai nin tipirawe kitci kanawerimak ota mekwata e kipohokoian Mirwatcimowin otci, kitci ki tca witcihitc, kir tca kitci ki witcihiipan.

¹⁴ Nama aric ni ki otci wi kanawerimaw ota, epwamoci kiskeritaman kitci ici naheritaman, aka kaie wikockatc kitci miro totaman, kirawe tca kir tipirawe kitci totaman e iteritaman.

¹⁵ Pot wetci ki isparik memacic kitci nakatisk anahwe Onésime, nikotin tca mocak kitci ki witci tacikemisk.

¹⁶ Nama meka awocamec tepirak arotakan iteritakosiw. Kirawe mictahi kicteritakosiw patok arotakan. Mia kicimino e micta sakihokw ke iterimokw. Ni micta sakihaw. Kir tca wawatc kirawe ki sakihatake, osam meka kiwitc iriniw e iteritakositc, peikon kaie tapickotc e nosanehwekw Cecoc.

¹⁷ Kecpin wekomesimitanen, otapin anahwe Onésime, mitowi nin tipirawe ki takocinian.

¹⁸ Kecpin ka arimihiskwen kekotc ma kekociciriw mesinahamaskwen, nin tipirawe ki ka tapictatin.

¹⁹ Nin tipirawe ni masinahen ohwi itewina: Nin Pwar ki ka tapictatin. Nama aric arimatc ki ka mikawasimitin ka ici masinahamowiin: kir tipirawe kipimatisiwin.

²⁰ Tapwe, niwitcican, ki pakoserimitin kitci miriin ohwe ka ici nataweritamatan, osam e sakihokw Teperitciketc. Ki ka tca micta kakitcihin nitehik, tapickotc e mamweritakosiikw kirika Krist.

²¹ Ni ketcinaweriten, mekwata e masinahaman ohwe masinahikan, tapwe kitci itotiskein ohwe e ici nataweritamatan. Ni kiskeriten wawatc kirawe awocamec kitci totaman.

²² Kirika kotak kekocic, matci ia ki ka ki ocitamowin aricap kimikiwamik. Nit asperimon meka wipatcikan kitci pakitinikoian, kitci ki kiwe natawapamitakok, e ki aiamihectamowiekw.

E matcacikowakaniwitc Philémon

²³ Kikwimesino Épaphras kit arimikakw, anahwe ka witci tacikemak ota kipohotowikamikok. Kaie wir kipohwakaniwiw Cecoc Krist otci.

²⁴ Mark, Aristarque, Démas kaie tca Luc kaie wirawaw kit arimikakok, e witc otamiromitcik.

²⁵ Ni pakoserimon omirotehewin Teperitciketc Cecoc Krist kitci witci tacikemikoekw. Nin Pwar