Matio 9 - Kice Manito Ocki Omirwatcimowin

Cecoc e kikehatc iriniwa e niponesiritci

¹ Cecoc ki positcimew. Ki acoham minawatc aniheriw sakihikaniw, otenamik e icatc.

² Ki pe iciwitowakaniwiw iriniwa e niponesiritci, tetaskonikanik e miciniritci, atita iriniwa e pe miwirikotc. Ka wapamatc Cecoc anahweriw iriniwa e apitc asperimototakotc, ki itew anihi ka niponesiritci: “Sokitehe, nikosis! Ki kasihamakowin kipactatowina!”

³ Aci atita ka kiskinohamaketcik cota aiamihe irakonikewiniw aititowok: “Marerimew Kice Manitowa anahwe iriniw!”

⁴ Cecoc kiskeritamopan e iteritamiritci. Ki itew: “Kekwan wetci matci iteritamekw?

⁵ Kirawe ia wetan kitci iteian: ‘Ki kasihamakowin kipactatowina,’ kekotc kitci iteian: ‘Pasiko, pimote tca’?

⁶ Aric ni nataweriten kitci kiskeritamekw ohwe: kackitaw anahwe Ka ki pe iriniwihitisotc kitci kasihak pactatowiniw ota askik.” Ekoni e ici itatc anihi iriniwa ka niponesiritci: “Pasiko! Otapina kitetaskonikan! Kiwe kimikiwamik!”

⁷ Anahwe iriniw ki pasiko. Ki matcaw e tca kiwetc.

⁸ Aniki kaskina iriniwok neta ka tacikewaspan ka wapatakik aniheriw e isparinik, ki micta sekisiwok, kaie ki mirwatcimewok Kice Manitowa e ki miraritci iriniriw ani kitci ici kackitaritci.

Matio e wicamikotc Cecoca

⁹ Cecoc matcapan neta. E pimotespan, peikw iriniwa ki wapamew, Matio ka icinikasoritci, e taci apiritci neta ka ici otamirotcik ka natockaketcik. Ki itew Cecoc: “Pe nosanehici!” Ekoni e ici pasikotc anahwe Matio e tca nosanehwatc.

¹⁰ Minawatc Cecoc ki nta mitciso neta Matio omikiwamirik. Mitcetiwok ka natockaketcik kaie kotakihik iriniwok aka ka kicterimakaniwitcik neta ki pe nta orapiwok mitcisowakanatikok e ici apiritci Cecoca kirika owitcewakana.

¹¹ Pharisien iriniwok ka wapatakik e isparinik, ki itewok Cecoca owitcewakaniriw: “Kekwariw wetci, witci mitcisomatc anahwe kikiskinohamake irinimiwaw anahweriw ka natockakeritci kaie tca anihi kotakihi iriniwa aka ka kicterimakaniwiritci?”

¹² Ki petawew Cecoc ani e iteritci. Ki itew: “Iriniwok ka miro pimatisitcik nama takatc mackiki iriniwa natawapamewok. Ka akositcik, enko aniki ke natawapamatcik mackiki iriniwa.

¹³ Matca wikokwe nisitotamokw anihe ka masinatek Kice Manito Omasinahikanik: ‘Ni nataweriten kitci kitimakerimekw kiwitc iriniwaw, nama kitci aiamihe pakitinikeiekw, e ickwaswekok awesisak.’ Osée 6.6 Nama meka ni ki otci pe ican kitci wicamakik iriniwok aci icikowisk ka iterimitisotcik, aric kirawe aniki ka kiskerimitisotcik ka pactatitcik.”

Roskosowiniw e arimotak Cecoc

¹⁴ Capatis owitcewakana ki pe natcikapowictawewok Cecoca, e kokwetcimatcik: “Nanikotin ni roskosonan, kirika Pharisien iriniwok kaie wirawaw roskosowok. Kekwariw tca wetci aka totakik kir kiwitcewakanak?”

¹⁵ Itikowok Cecoca: “Kecpin e ickwa nipowinaniwok, makocaniwon. Anahwe ka nipowitc wicamew okwimesa kitci pe nta witci mitcisomikotc. Kit iteritenawaw ia, aniki ka wicamakaniwitcik kata kackeritamok aka tca kitci ki mitcisotcik mekwata kiapatc e tacikeritci anihi okwimesiwawa ka nipowiritci? Nama ketcinatc! Nikotin aric maninamowakaniwitawe anihi ka nipowiritci, aci nta kata roskosowok.”

¹⁶ “Nama awik pokoham kete wikasiriw, ocki pakiwanicekiniw kitci totak. Kecpin actate aniheriw, minawatc kisisipatate owikasim, aniheriw pokonehikaniw kata manipariniw. Kirawe tca kata iti micariw neta e pikockarik.”

¹⁷ “Nama kaie sikinikatew kete omackimotewanik ka pakekiniwonik ocki minicapo anotcikwetc e ki ocitakaniwok. Osam meka kata pakickiparin anihe kete mackimotewan, ekotca kitci onactakaniwok anihe minicapo kaie anihi mackimotewana. Patoc ocki mackimotewanik kata actakaniwon ocki minicapo, matci tca kinowec kitci kanaweritcikatek.”

Cota okimaw otanisa, kirika iskwew ka ki takinak Cecoca owikasimiriw

¹⁸ Mekwata Cecoc e taci itespan niheriw, peikw cota okimaw ki pe takociniw. Pe nipiskoctawew Cecoca, e itatc: “Anotcikwetc ki nipo nitanis. Aric petcimote! Pe nta takini, ekoni kitci pimatisitc!”

¹⁹ Cecoc ki pasiko e nosanehwatc, kaie wirawaw owitcewakana e nosanehikotc.

²⁰ Takopan neta iskwew, mocak e onitakopanen omikw, mitato acitc nicw tato pipona esko itapinekopanen. Aci anahwe iskwew nta icikapowiw otananik Cecoca e pimoteritci, e takinamowatc nitek okapotowaniriw.

²¹ Iteritamokopan meka: “Kecpin tepirak takinamwake owikasim, ni ka mirwatisin.”

²² Cecoc ki pe kiwekapowiw. Wapamew anihi iskwewa. Aci itew: “Sokitehe, nitanis! Tapwe kit asperimototawin, ekoni wetci ki kikein.” Ekoni mia e iti kiketc anahwe iskwew.

²³ Minawatc ki takociniw Cecoc neta omikiwamirik anihi cota okimawa. Aci wapamew neta metowe iriniwa e taci kicatapiritci kitci rikwaskaniwonik kirika kotakihi iriniwa e mitcetiritci e moskwataritci anihi ickweca.

²⁴ Ki itew: “Orowikw ota! Nama ni nipo anahwe ickwecic! Tepirak ni nipaw!” Papirotowakaniwiw aniheriw e itetc.

²⁵ Minawatc ka ickwa orowiticohwakaniwitcik aniki mitcet iriniwok, Cecoc ki pitakew neta aricapik. Ki otapiniskenew anihi ickweca kaie e iti pasikoritci.

²⁶ Kaskina wiec neta ki petakaniwoniw aniheriw ka ickwa iciwepanik.

Nicw iriniwok e kikehakaniwitcik aka ka wapitcik

²⁷ Apitc neta ka otci matcatc Cecoc, mekwata e pimotespan, nicw iriniwa aka ka wapiritci pe nosanehiko, e itikotc e tepweritci: “Okimaw Tapit Okosa, kitimakerimicinan!”

²⁸ Ka ickwa takocik Cecoc neta mikiwamik, aniki iriniwok aka ka wapiritci ki pe natcikapowictako. Ekoni e ici kokwetcimatc, e itatc: “Ki tapwetenawaw ia kitci kackitaian anihe kitci itotiskeian?” Aniki itewok: “Ehe, Teperitcikein.”

²⁹ Takinew Cecoc ockicikowariw e itatc: “Osam e asperimototawiekw, ki mirikowaw Kice Manito e ici nataweritamekw!”

³⁰ Ekoni e ki wapitcik. Minawatc kaketin ki aimihikowok Cecoca, e itikotcik: “Wewerita natotamokw ke ititakok: nama actew awik kitci kiskeritak ka ki isparinik.”

³¹ Ki matcawok aric kaskina wiec neta askik ki nta aiarimomewok Cecoca.

Cecoc e kikehatc iriniwa aka ka arimweritci

³² Mia e iti matcatcik, Cecoc pe iciwitowakaniwiw peikw iriniwa aka e kackitaritci e arimweritci, osam e ki pitciteheckakoritci matci manitowa.

³³ Mia apitc Cecoc e ickwa matceticohwatc anihi matci manitowa, kek anahwe iriniw kackitaw e arimwetc. Iriniwok neta ka mitcetiwaspan ki micta kockowapamowok kirika e itetcik: “Nama wiskat ki otci wapatcikatew anihe towi Israël askik!”

³⁴ Aric aniki Pharisien iriniwok itewakopan: “Anahwe ka tiperimatc matci manitowa, enko na ka ki miratc Cecoca kitci kackitaritci kitci matceticohwaritci matci manitowa!”

Cecoc e kitimakerimatc iriniwa e mitcetiritci

³⁵ Cecoc pa pimotepan kaskina otenak kaie otenacik. Pa kiskinohamakepan cota aiamihe mikiwamiskak. Kakeskwepan, e tipatcimospan Mirwatcimowiniw ka otci kiskeritcikaterik Kice Manitowa Okimawiniw. Kaskina kaie kikehepan ka akosiritci kotc ka itapineritci.

³⁶ E wapamaspan ko e mitcetiritci iriniwa, micta kitimakerimepan. Aieskosiwakopan meka aniki iriniwok kaie atwerimowakopan, mia maritcenicak aka e taritci awiriwa ke kanawerimikotcik e iteritakosiwakopanen.

³⁷ Aci Cecoc itew owitcewakana: “Ki ka witamatinawaw e iterimakik: mia kitikan askik e icinakosiwok, mitcen otamirowin ke ki totcikatek neta, aci e otcitciparik kitci mawotcitakaniwok kitikan, nama aric mitcetiwok iriniwok ke otamirotcik.

³⁸ Pakoserimakw anahwe ka mitatc e mawotcitakaniwonik kitikaniw kitci pe iciticohwatc kotakihi iriniwa kitci pe nta witcihiweritci.”