Matio 8 - Kice Manito Ocki Omirwatcimowin

Cecoc kikehew iriniwa e micta omikiwapineritci

¹ Minawatc Cecoc ki pe pinisiwew matinariw. Micta mitcetiripana iriniwa ka nosanehikotc.

² Aci peikw iriniw e omikiwapinetc pe natcikapowictawew Cecoca. Ki nipiskoctawew e itatc: “Teperitcikein, kecpin ici nataweritamane, matci ki ka ki kikehin.”

³ Cecoc ki icitcitcerictawew. Ki takinew, e itatc: “Nit ici naheriten. Ekoni ici kike!” Tecikotc ki kikew anahwe iriniw ocakak.

⁴ Minawatc ki itiko Cecoca: “Wewerita natota: akawir awik arimotamo e ki kikehitan. Aric matca natawapam makatewokorew kitci ki wapamisk. Minawatc ki ka aiamihe pakitinikan, kotc ka ki itactatc Moïse kitci totcikaterik, otcitakotc kitci kiskeritakok aci tapwe e ki kikein.”

Cecoc e kikehatc kitci cimakanica otarotakaniw

⁵ Apitc ka pitaketc Cecoc Capernaüm otenak, peikw Romain kitci cimakanica ki pe natawapamiko e nataweritamakotc kitci witcihatc,

⁶ e itikotc: “Teperitcikein, nitarotakan mackociniw nete nimikiwamik. Niponesiw kirika micta nekatcitaw.”

⁷ Cecoca itiko: “Ni ka ican kirika ni ka kikehaw.”

⁸ Aric naskamo anahwe kitci cimakanic, e itatc: “Teperitcikein, nama ni tipi asiteritakosin kitci ki pe pitakein nimikiwamik. Aric tepirak peikw itewin ki ka itan, ekoni kitci kiketc anahwe nitarotakan.

⁹ Kaie nin tawok ka tiperimitcik. Minawatc tawok cimakanicak nin ka tiperimakik. Kecpin peikw nicimakanicim itake: ‘Matca!’, kata matcaw. Kecpin kotak itake: ‘Petcimote!’, kata pe icaw. Kirika kecpin kiapatc kotak nitarotakan itake: ‘Anihe itotiske!’, kata itotiskew.”

¹⁰ Ka petawatc Cecoc ani e iteritci, ki mamiskasitawew. Ki itew anahweriw iriniwa ka pa nosanehikospan: “Tapwe ohwe ka witamatakok: ekoni pitcerak e miskawak awik ota Israël askik e apitc asperimototawitc.

¹¹ Ki witamatinawaw kaie, micta mitcet iriniwok nte kata ototewok wapanok itekera, kaie nte nakapehonok kitci pe ototetcik. Kata pe nta natapiwok mitcisowakanatikok nete Kice Manito Okimawinik, kitci tca witapimatcik Abrahama, Isaka kaie Cakopa.

¹² Aric aniki kotakihik ka ki itacterikipan kitci taciketcik neta, kata orowepinakaniwiwok, e ici kiski tipiskarik kitci iciwepinakaniwitcik. Ekota ni ke taci matotcik kirika kitci kakiceapitecikik.”

¹³ Minawatc Cecoc ki itew anihi kitci cimakanica: “Ekoni ici kiwe kimikiwamik. Ki ka mirikowin anihe ka ki ici nataweritaman, e tapweritaman.” Ekoni mia apitc ka kikeritci anihi otarotakana.

Cecoc e kikehatc mitcet iriniwa ka akosiritci

¹⁴ Minawatc Cecoc ki icaw nte Pien omikiwamirik. Osikosa Pien mackociniripana nipakanatikok e kisiswapineritci.

¹⁵ Cecoc ki takinew otcitcirik. Tecikotc ki matcamakaniw e kisiswapineritci. Anahwe tca iskwew ki pasiko e nta atoskectawatc Cecoca.

¹⁶ E iti otakocinik, mitcet iriniwa ki pe iciwitowakaniwiw Cecoc e ki pitciteheckakoritci matci manitowa. Tepirak e aiarimwetc, Cecoc ki orowiticohwew anahweriw matci manitowa. Kaie kaskina ki kikehew ka akosiritci.

¹⁷ Ki itotiskew kitci ki otcitciparinik aniheriw ka ki iterispan anihi ka nikan tipatcimospan, Ésaïe ka icinikasospan: “Kaskina ki otapinam e ici maskisiikw, kirika ki ki maninamakono e ici akosiikw.” Ésaïe 53.4

Aniki ka wi nosanehwatcik Cecoca

¹⁸ Ka wapamatc Cecoc e mitcetiritci iriniwa e waskakapowictakotc, ki itew owitcewakana akam sakihikanik kitci ici pimotetcik.

¹⁹ Aci peikw iriniw ka kiskinohamakespan cota aiamihe irakonikewiniw ki pe natcikapowictawew, e itatc: “Kiskinohamake iriniw, ki ka pa nosanehitin kaskina wiec ite ke pa icain.”

²⁰ Aci ki naskamako Cecoca, e itikotc: “Wakocak takoniw owaciwaw, kaie pirecicak otcictoniwaw. Aric anahwe Ka ki pe iriniwihitisotc nama takoniw wiec nte ke ki ici mackocik kitci ki arwepitc.”

²¹ Minawatc ki iteriw kotakihi nta e taciritci owitcewakana: “Okimaw, pakitinici pitama kitci nta rikwaskatak notawi.”

²² Aci naskamawew Cecoc, e itatc: “Nosanehoci! Pakitinakok aniki ka nipotcik e iteritakositcik kitci rikwaskatatcik ka niporitci.”

Cecoc e nakahak e micta rotinik

²³ Minawatc ki positcimew Cecoc, e nosanehikotc owitcewakana.

²⁴ Kek micta keskat rotiniw neta sakihikanik. Sisikahoteriw otcimaniwaw e micta mitcahanik. Aric Cecoc taci nipapan.

²⁵ Pe natcikapowictako owitcewakana. Kockoniko, e itikotc: “Teperitcikein, wikotcihicinan! Aci ki ka niponano!”

²⁶ Naskamo Cecoc e itatc: “Kekwan wetci micta sekisiekw? Nama micaw kit asperimowiniwaw!” Ekoni e ici pasikotc Cecoc. Kaketin ki arimwew e nakahak e rotinik kirika e mitcahanik. Tecikotc ki acteraweriw kaie ki micta arwactaniw.

²⁷ Kaskina ki micta mamiskateritamok kirika ki itewok: “Awin ia anahwe iriniw, ka micta sapitakotc wawatc e rotinik kaie tca e mitcahanik sakihikaniw!”

E kikehakaniwitcik nicw iriniwok ka ki pitciteheckakotcik matci manitowa

²⁸ Nte ka iti takocik Cecoc neta akam sakihikanik Gadarénien iriniwok otaskiwak, nicw iriniwa ki pe nta nakickako, nte rikwaskanik e pe ototeritci. Aniki iriniwok ki pitciteheckakopanak matci manitowa. E apitc koctatikosiwakopanen, nama awiriwa wi pimoteripana neta meskanak ka ici taciketcik.

²⁹ Ki tepwewok e itetcik: “Kekwan ka nataweritamawiak, Kice Manito Okosa? Ki ki pe ican ia kitci nekatcihiak, aric aka moci e otcitciparik kitci tipaskonikaniwok?”

³⁰ Nama neta warawik mitcetiwakopan kokocak e pa nantowi mitcisotcik.

³¹ Aci aniki matci manitowok ki pakoserimewok Cecoca, e itatcik: “Kecpin wi matceticohwiake, ni nataweritenan nete kokocak ka tatcik kitci ki pitcickowakitcik.”

³² “Icakw!” ki itikowok Cecoca. Ekoni tca ka ici orowitcik nta irinik, nete kokoca e ki pitakeckowatcik. Tecikotc aniki kokocak ki nitcikowackotiwok e kickapiskarik sakihikanik e ici pakicinitcik. Kaskina tca ki kwapawewok.

³³ Tapanak neta iriniwok ka kanawerimatcik anahweriw kokoca. Ka wapatakik aniheriw ka ispariritci, ki ocimowok. Otenak tca ki icawok e ki nta tipatatakik kaskina aniheriw ka ki iciwepanik, kaie ka ki iciwepasiritci anihi nicw iriniwa ka ki pitciteheckakoritci matci manitowa.

³⁴ Aci kaskina iriniwok neta ka tacikewaspan otenak pe matcawok e pe nta nakickowatcik Cecoca. Ka wapamatcik ki pakoserimewok otcitakotc kitci matcaritci neta otaskiwak.