Matio 7 - Kice Manito Ocki Omirwatcimowin

Aka kitci tipaskonekok kiwitc iriniwawok

¹ “Akawir awik tipaskonakw, nama tca kaie kirawaw ki ka tipaskonikowaw Kice Manito.

² Ki ka meka tipaskonikowaw kotc kaie kirawaw e ici tipaskonikeiekw. Kotc ke ici tipahamekw e tipaskonekw kiwitc iriniwaw, ekoni ke ici tipahamatakw kaie kirawaw Kice Manito.

³ Kekwan wetci kanawapatamowotc mirikosiriw e pisinitc kiwitcican, aka tca wawatc e wapamatc napakitokw kickicikok e tatc?

⁴ Tan ke ki itatc kiwitcican: ‘Pakitinici kitci maninaman anihe mirikosi ka pisiniin,’ kir tca napakitokw e tatc kickicikok?

⁵ Kir ka miro iriniwikasoin, pitama manini anahwe napakitokw kickicikok ka tatc. Ki ka tca miro wapaten kitci ki maninamowotc kiwitcican aniheriw mirikosiriw ockicikok.”

⁶ “Aka mirakok atimok kekociciriw ka kitcitwaweritakonik. Kwecwan meka kata pe kiweparihowok, kirawaw tca kitci makomitakok. Aka iciwepinamowakok kokocak kimikisimiwawa ka misakitakosiritci. Kecpin meka itotiskeiekwe, otcitakotc kata tatokoskatewok.”

Nataweritamokw! Nantowapatamokw! Papawohikekw ickwatemik!

⁷ “Nataweritamokw kekocic. Ki ka tca mirikowinawaw. Nantowapatamokw. Ki ka miskenawaw. Papawohamokw ickwatem. Ki ka cenamakowinawaw.

⁸ Anahwe meka ka nataweritak kekociciriw, pe otitiko. Anahwe ka nantowapatak, miskam. Anahwe ka papawohak ickwatemiriw, cenamowakaniwiw.

⁹ Atita ota e taciekw tariw okosiwawa. Kecpin tca kikosis nataweritamaske pakwecikana kitci mowatc, nitowatc ia ki ka miraw asiniwa?

¹⁰ Kecpin tca nataweritamaske namesa kitci mowatc, nitowatc ia ki ka miraw kinepikwa?

¹¹ Kirawaw ata e matci iriniwiekw, peikon ki kiskeritenawaw kitci mirekok miro kekociciriw kinitcaniciwawok. Wir tca Kotawiwaw icpimik ka taciketc wawatc kirawe mictahi kackitaw kitci miratc miro kekociciriw anahweriw ka nataweritamakotc.”

¹² “Miro totawakok kiwitc iriniwawok, tapickotc e ici nataweritamekw kitci miro totakoiekw. Ekoni meka mia e ici kiskinohamakaniwonik otirakonikewiniwaw Moïse kaie ka ki pe nikan tipatcimotcik.”

Ickwatem ka cakwacik

¹³ “Tarasak nicino ickwatem ke ki pitakaniwok, pimatisiwinik itekera. Ekoci pitakekw anihe ickwatem ka cakwacik! Arakackaw meka anihe kotak ickwatem, kirika wetan meskanaw ka iticimok ke ici onicininaniwok. Mictahi kaie mitcetiwok ka pitaketcik neta.

¹⁴ Aric anihe ickwatem ka ici pitakaniwok pimatisiwinik cakwacin. Ariman kaie anihe meskanaw ka iticimok pimatisiwinik. Nama mitcetiwok ka miskakik.”

E wapamakaniwitc awik e itatisitc, ekoni e otci kiskerimakaniwitc

¹⁵ “Ekwamictowakok iriniwok ka itekasotcik ‘ni nikan tipatcimonan Kice Manito otci,’ aka aric tapwe e itotisketcik. Ki pe natawapamikowawok mia maritcenicak e icinakohitisotcik, aric atamik iteritakosiwok mia mahikanak ka micta matcitwatcik.

¹⁶ Aric ki nisitowinawawok tapwe e icinakositcik, osam e wapatamwekw otitatisiwiniwaw. Nama meka otinakaniwiw cwemin minesikacik. Peikon kaie mictikw ka kawositc nama nitawikihew wapimina.

¹⁷ E mirokitc wapiminatikw, nitawikihew ka mirosiritci wapimina. Aric e maratisitc wapiminatikw, nitawikihew ka maratisiritci wapimina.

¹⁸ E mirokitc wapiminatikw, nama kata ki nitawikihew ka maratisiritci wapimina. Peikon kaie e maratisitc wapiminatikw, nama kata ki nitawikihew ka mirosiritci wapimina.

¹⁹ Tato wapiminatikw aka ka nitawikihatc e mirosiritci wapimina kata kickikohwakaniwiw kitci motcictewepinakaniwitc.

²⁰ E itotisketcik tca aniki iriniwok ka itekasotcik ‘ni nikan tipatcimonan Kice Manito otci,’ ki ka otci kiskerimawawok.”

E itaniwok acitc e itotiskaniwok

²¹ “Tawok ke pakoserimitcik kitci itetcik: ‘Teperitcikein, Teperitcikein!’ Nama aric kaskina nta e tacitcik kata pitakewok neta Kice Manito Okimawinik, tepirak aniki ka itotisketcik e ici iteritamiritci Notawiwa, wakwek ka tacikeritci.

²² Nikotin takociparike anihe ke kicikak kitci tipaskonikaniwok, mitcet iriniwok ni ka pe itikok: ‘Teperitcikein, Teperitcikein, ni ki pa nikan tipatcimonan, kiticinikasowin e ki totamak! Kaie matci manitowok ni ki orowiticohwananak, kiticinikasowin e ki apatcitaiak! Kirika micta mitcetwaw ni ki mata kackitanan, kiapatc kiticinikasowin e ki totamak!’

²³ Aric ni ka witamawawok: ‘Nama wiskat ki ki otci kiskerimitinawaw. Matcakw nta warawik, aka kitci pecowapamiekw, kirawaw ka matci totamekw!’”

Nicw mikiwama

²⁴ “Ki ka witamatinawaw e icinakositc awik ka natotak kirika ka itotisketc aniheriw ka itewak: mia ni iriniw ka kakitaweritak ka ki manikasotc micta asinik.

²⁵ Ki micta kimiwon. Ki riskipotewa sipia, kirika ki micta rotin neta anihe mikiwam ka ici actek. Nama aric ki otci kowactan anihe mikiwam, wewerita e ki manikaniwok neta micta asinik.

²⁶ Aric anahwe ka natotak nitarimwewiniw, aka aric e itotisketc ka ki itewak, mia ni iriniw aka ka kakitaweritak, tepirak rekak ka ki maniketc.

²⁷ Ki micta kimiwon. Ki riskipotewa sipia, kirika ki micta rotin neta anihe mikiwam ka ici actek. Ki tca kowactan. Tekaci ki oraparin.”

Cecoc otiperitamowin

²⁸ Ka ickwa kiskinohamaketc Cecoc, kaskina ki micta mamiskaterimiko e ici kiskinohamakespan anihi iriniwa e mitcetiritci.

²⁹ Pitoc meka ici kiskinohamakepan Cecoc kirika aniki ka kiskinohamaketcik aiamihe irakonikewiniw. Mictahi meka ki mackawisimakaniw okiskinohamakewin.