Matio 5 - Kice Manito Ocki Omirwatcimowin

Matinak ka aiarimwetc Cecoc ( Matio 5–7 )

¹ Ka wapaketc Cecoc e mitcetinaniwonik waska e nanipowitc, ki amatciwew matinak e nta apitc. Owitcewakana ki pe natawapamiko.

² Ekoni e iti kiskinohamawatc, e aitetc:

Tapwe caweritakosiwin

³ “Caweritakosiwok kaskina ka kiskerimitisotcik e kitimakisitcik otcitcakociwak itekera. Enko aniki tapwe ka ici tatakik Kice Manitowa Okimawiniw.

⁴ Caweritakosiwok aniki ka matotcik. Kata meka kakisomikowok Kice Manitowa.

⁵ Caweritakosiwok aniki ka pekatisitcik. Kata meka pe otitikowok askiriw ka ki itikotcik Kice Manitowa kitci mirakaniwitcik.

⁶ Caweritakosiwok aniki ka pasoweritakik kitci ici pimatisitcik Kice Manitowa e ici nataweritamiritci. Kata meka mirikowok kaskina aniheriw ka ici nataweritakik.

⁷ Caweritakosiwok aniki ka kitimakerimatcik owitc iriniwawa. Kecko meka kata kitimakerimikowok Kice Manitowa.

⁸ Caweritakosiwok aniki tekaci ka mirwinakositcik otehiwak. Kata meka wapamewok Kice Manitowa!

⁹ Caweritakosiwok aniki ka otamirotatcik pekaterimowiniw kitci miroparihitonaniwonik neta e ici taciketcik. Kata meka icinikatikowok Kice Manitowa ‘ninitcanicak’!

¹⁰ Caweritakosiwok aniki ka nekatcihakaniwitcik, osam e itatisitcik Kice Manitowa e ici nataweritamiritci. Enko aniki tapwe ka ici tatakik Okimawiniw.”

¹¹ “Ki caweritakosinawaw kecpin e kiraskinaniwok e marerimikoiekw, e nekatcihikoiekw, kecpin kaie kaskina wiec e itikoiekw e marerimikoiekw, osam nin e nosanehwiekw.

¹² Ekoni ici micta kice mireritamokw! Micta mireritamokw! Kecko meka ki ka micta cawerimikowinawaw wakwek. Ekoni peikon kaie wirawaw ka ki pe ici nekatcihakaniwitcik iriniwok weckatc ka pe nikan tipatcimowaspan, ka pe pimatisiwakopanen ota askik epwamoci kirawaw.”

Ciwotakan kirika wactenamakan

¹³ “Mia ciwotakan kit iteritakosinawaw ota askik. Kecpin aric aka awocamec nisitospokoke ciwotakan, tan ke ki totcikatek kitci koski ciwak? Nama aci wiec irapatan. Ekoni e ici orowepinikatek kitci takoskatakik iriniwok.”

¹⁴ “Mia kaie wactenamakan kit iteritakosinawaw ota askik. Nama kata ki katakaniwon otenaw, okititin e ki ocitakaniwok.

¹⁵ Peikon wactenamakan nama iskahikatew tepirak kitci actakaniwok atamik askikok. Nitowatc actakaniwon neta ko ka ici tcimatakaniwonik kitci ki miro wactek mikiwamik, kaskina neta ka taciketcik kitci miro wapatakik.

¹⁶ Ekoni tca e actek kitci irapatisiekw iriniwok otci, kitci wactenamowekok mia wactenamakan, kitci ki miro wapatakik aniheriw ka mirwacinik ka totamekw acitc kitci otci mirwatcimatcik Kotawiwawa wakwek ka tacikeritci.”

Aiamihe irakonikewin

¹⁷ “Aka iteritamokw e ki pe icaian kitci pe nta pikotawak Moïse otirakonikewin kirika okiskinohamakewiniwaw aniki ka ki pe nikan tipatcimowaspan. Nama ni ki otci pe ican kitci pe nta otamirotawak aka awocamec kitci nosanetakaniwonik, aric ma kitci pe nta wapatahiwewak tan mia wa itemakanik.

¹⁸ Tapwe ohwe ka witamatakok: irikik ke takok wakwek kirika aski, tekaci nama otci peikw nta e tatiki irakonikewina kata maninikatew e itactek, misawatc anihe mawotci aka e sapinakok; nac kaskina ickwa iciwepake.

¹⁹ Anahwe tca aka ka nosanetatc Kice Manitowa otirakonikewiniw, misawatc aniheriw mawotci aka e sapinakonik, kecpin kaie itate kotakihi iriniwa aka kitci nosanetaritci aniheriw irakonikewiniw, enko anahwe mawotci aka ke kicteritakositc neta Kice Manitowa Okimawinik. Aric anahwe ka nosanetatc acitc ka kiskinohamawatc owitc iriniwa kaie wirawaw kitci nosanetaritci, kata kicteritakosiw nete Kice Manitowa Okimawinik.

²⁰ Ki witamatinawaw: kecpin aka kirawe wewerita nosanetawekwe aniheriw e ici nataweritak Kice Manito patok aniki ka kiskinohamaketcik cota aiamihe irakonikewiniw kaie Pharisien iriniwok, nama ki ka ki pitakanawaw Kice Manito Okimawinik.”

Kiciwasiwin

²¹ “Ki ki petenawatake e ki itakaniwitcik weckatc kitaniskotape kimocominapanak: ‘Nama ki ka manohon.’ Exode 20.13; Deutéronome 5.17 ‘Kecpin awik nipahate owitc iriniwa, kata kackitamatiso kitci tipaskonakaniwitc.’

²² Aric anotc nin ki witamatinawaw: kecpin awik wawatc tepirak kiciwasictowate owitcicana, kata kackitamatiso kitci tipaskonakaniwitc. Anahwe ka itatc owitcicana: ‘Ki kiwockwan!’ acteriw kitci tipaskonikotc anahweriw cota iriniwa ‘Ka Kitci Tipaskonikeritci’ ka icinikatakaniwiritci. Anahwe aric ka itatc owitcicana: ‘Tekaci nama wiec kit irapatisin!’ kackitamatiso kitci iciwepinakaniwitc matci ickotek, atamaskamikok ka takonik.”

²³ “Kecpin pe icaine aiamihe mikiwamik, neta e ici aiamihe pakitinikaniwok ko, e wi aiamihe pakitinikein Kice Manito otci, mikawiine tca e ki akohatc kiwitcican,

²⁴ nakatekan neta nikanik anihe ka wi pakitinaman. Pitama ki ka natawapamaw anahwe kiwitcican, kitci kakitcihatc kiapatc kitci miroparihitoekw. Minawatc ki ka pe kiwan neta aiamihe mikiwamik. Pitceraka tca ki ka ki cawerimaw Kice Manito.”

²⁵ “Kecpin awik wi arimihiske, tecikotc ki ka wecitowaw, mekwata kiapatc e pimoteiekw, epwamoci takociniekw arimitakosiwikamikok. Kecpin aka ni itotiskeine, tipaskonike irinik ki ka iciwirikw. Takonike irinik tca ki ka iciwirikw tipaskonike iriniw. Minawatc ki ka kipohokowin.

²⁶ Tapwe ni ohwe ka witamatan: kecpin kipohotowikamikok iciticohokoine, nama wipatc ki ka orowin neta, patoc kaskina kicikamane irikik ka actakaniwok kitci orowiin. Ekoni patoc ke pakitinikoin.”

Pacikwatisiwin

²⁷ “Ki ki petenawatake weckatc kiskinohamakewin e pe itwaniwok: ‘Nama ki ka pacikwatisin.’ Exode 20.14; Deutéronome 5.18

²⁸ Aric nin ki witamatinawaw: kecpin iriniw e kanawapamatc owitc iriniwa okomiriw, e tca natawerimatc, ekoni aci e pacikwatisitc otehik.”

²⁹ “Kecpin tca kinihiwini kickicikw e pactatiwakein, manipata! Warawik iciwepina! Kirawe kata miroparinopan kir otci aka misiwe kitci takok kiwiawik, patok kaskina kitci takok e itikitiin kitci tca iciwepinikoin atamaskamikok.”

³⁰ “Kecpin kinihiwini kitcitci e pactatiwakein, kickitcitcehotiso! Warawik iciwepina! Kirawe kata miroparinopan kir otci aka misiwe kitci takok kiwiawik, patok kaskina kitci takok e itikitiin kitci tca iciwepinikoin atamaskamikok.”

E wepinitonaniwok

³¹ “Weckatc kaie ki pe itwaniwon: ‘Anahwe ka wepinatc okoma, acteriw kitci miratc masinahikaniw e itemakanik e wi wepinatc.’ Deutéronome 24.1

³² Aric nin ki witamatinawaw: kecpin iriniw e wepinatc okoma, aka aric e ki otci wecimikotc, pacikwatisihew, kecpin minawatc wikimaritena kotakihi iriniwa. Minawatc anahwe iriniw ka wikimatc anihi iskwewa ka ki wepinakaniwiritci, kaie wir pacikwatisiw.”

E nespi tapwaniwok

³³ “Ki ki petenawatake aniheriw ka ki ici kiskinohamawakaniwitcik weckatc kitaniskotape kimocominook: ‘Aka pikota ka ki ici nespi tapwein. Otcitakotc tca ki ka toten anihe ka ki ici nespi tapwein Teperitciketc otci kitci itotiskein.’ Lévitique 19.12; Nombres 30.3(2); Deutéronome 23.22-24

³⁴ Aric nin ki witamatinawaw ohwe: aka nespi tapwewake kekocic kitci tapwetakoin, kecpin kekocic wa totamane. Nama ki ka nespi tapwewakan wakwek. Ekota meka e ici apitc Kice Manito.

³⁵ Nama kaie aski ki ka nespi tapwewakan. Ekota ota meka ka icisitecik. Nama kaie Jérusalem otenaw ki ka nespi tapwewakan. Enkweriw meka otenam Kikice Okimamino.

³⁶ Nama kaie kictikwan ki ka nespi tapwewakan. Nama meka ki kackitan kitci wapiskwehitisoin kekotc kitci makateatipehitisoin, nama otci peikw nta e tatiki kiwirisis.

³⁷ Tepirak ‘ehe’ ki ka itan, kekotc ma, ‘nama.’ Ekoni kotc ke itein. Minawatc awocamec iteine, Ka Matcatikositc ni ke itehisk.”

Aka kitci koski mirekw awik ka ki akohitakw

³⁸ “Ki ki petakanawatake e itwaniwok: ‘Kecpin awik e namehak kickicikoriw e macikask, acteriw kaie wir ockicikw kitci namehamowakaniwitc. Kirika kecpin awik e maniwepahak kiwipitiriw e otamikwehisk, acteriw kaie wir kitci maniwepahamowakaniwitc owipit.’ Exode 21.23-25; Lévitique 24.19-20; Deutéronome 19.21

³⁹ Pitoc aric nin kit ici witamatinawaw: nama ki ka koski matci totawaw awik ka ki matci totask. Kecpin awik pasakwehwiske kinihiwinik itekera, ki ka pakitinaw kitci otamahwisk kinamatciwini kitamikikekanik.

⁴⁰ Kecpin awik wi arimihiske, kitci otapinak kipapakiwaniw, pakitini kaie kikapotowaniw kitci otapinak.

⁴¹ Kecpin awik itiske: ‘Patam ki ka miwotamowin ohwe ka kosikok peikwo tipahikan irikik e asitcarik,’ nitowatc nicwo tipahikan irikik ki ka iciwitawan aniheriw.

⁴² Miri anahwe ka nataweritamask kekociciriw. Awihi awik aniheriw ka wi awihasomisk.”

Kitci sakihekok aniki ka cikerimitakok

⁴³ “Ki ki petenawatake e itwaniwok: ‘Ki ka sakihaw kiwitc iriniw, aric ki ka cikerimaw awik ka cikerimisk.’ Lévitique 19.18

⁴⁴ Pitoc aric nin kit ititinawaw: sakihakok aniki ka cikerimitakok kaie aiamihectamowakok aniki ka nekatcihitakok.

⁴⁵ Ekoni tca ke iteritakosiekw Kotawiwaw Kice Manito wakwek ka taciketc onitcanica. Wir meka ka pakitinak kitci sakasikeritci kicikaw pisimwa ka matci iriniwiritci, kaie ka miro iriniwiritci otci. Pakitinam kaie kitci kimiwonik wiec e ici tacikeritci anahweriw icikowisk ka iteritakosiritci, kaie peikon neta e ici tacikeritci aka icikowisk ka iteritakosiritci.

⁴⁶ Kecpin sakihekwe tepirak aniki ka sakihitakok, kekwan wetci petaiekw kitci cawerimitakw Kice Manito? Wawatc ka natockaketcik sakihewok anahweriw ka sakihikotcik.

⁴⁷ Kecpin tepirak kiwitcicaniwawok e arimikowekok, nama micta kitci kekocic ki totenawaw! Wawatc iriniwok aka ka kiskerimatcik Kice Manitowa itotiskewok!

⁴⁸ Mia tca ki ka itatisinawaw, kotc e itatisitc Kotawiwaw wakwek ka taciketc.”