Matio 3 - Kice Manito Ocki Omirwatcimowin

Capatis otipatcimowin

¹ Ani apitc Capatis pa tacikepan neta askik Judée ka icinikaterik, ka ici cipewatawokarik. Ki kakeskwew e aitetc:

² “Kweskatisikw! Aci peconakoniw Kice Manito Okimawin!”

³ Capatis, enko anahwe weckatc ka ki tipatcimakaniwispan, ka ki arimomikotc anihi ka ki pe nikan tipatcimoritci, Ésaïe e icinikasorispana, e ki tipatcimoritci: “Petakosiw iriniw e tepitepwetc neta ka ici cipewatawokarik, e itetc: Oracimotawakw meskanariw kitci kowiskocimonik taci ke pimotetc Teperitciketc!” Ésaïe 40.3

⁴ Aniheriw tepirak owikasimipan atikowana anahwe Capatis, kaie pakekini pakotehona apatcihekopan. Kwackwackotcihimanakecica mowekopan ko, kaie amo namanasiriw mitcikopan ka ki miskakipan neta askik ka ici cipewatawokarik.

⁵ Mitcet iriniwok ka taciketcik Jérusalem otenak kirika kaskina wiec Judée askik ki pe ototewok e pe natawapamatcik Capatisa, peikon kaie mitcet ka taciketcik aitowikam aniheriw Jourdain sipiriw e ki pe ototetcik.

⁶ Ka ickwa petawatcik Capatisa e kakeskweritci, ekoni ka ici wawitakik tapwe e cikeritakik e ki patahakik. Ki tca sikahatakowok Capatisa neta Jourdain sipik.

⁷ Ka wapatak Capatis e pe natawapamikotc mitcet Pharisien iriniwa kaie Sadducéen iriniwa kitci ki sikahatowatc, aci itew: “Kirawaw ka micta matci iriniwiekw, mia tapickotc kinepikok ka itatisiekw! Awin ka ki kiskinohamatakw kitci otci ocimohitisoekw otipaskonikewin Kice Manito.

⁸ Ki ta miro totenawaw, kitci ki wapatahiweiekw tapwe e ki kweskatisiekw.

⁹ Aka iteritamokw kitci tipiparik aka kitci ki tipaskonikoiekw, e ititisoekw: ‘Abraham nitaniskotape nimocominan.’ Ki witamatinawaw meka, Kice Manito kata kackihepan, asiniwa e totawatc, kitci ocihatc Abraham otaniskotape osimiriw!

¹⁰ Aci ickwa micipotakaniwon ositaskw ke apatak kitci ki kickikohwakaniwitcik mictikok, neta e asko otapiwitcik. Kaskina mictikw aka ka nitawikihatc miro wapimina kata kickikohwakaniwiw kirika kata wepinakaniwiw ickotek.”

¹¹ “Nin anotc ki sikahatatinawaw, nipi e apatcitaian, kitci ki wapatahiweiekw e wi kweskatisiekw. Aric anahwe nanake ke pe takocik, ki ka sikahatakowaw ickoteriw kitci apatcitatc kirika Miro Manitowa kitci miritakw. Kirawe mackaweritakosiw patok nin. Nin nama ni tipi kicteritakosin wawatc kitci ki maninamowak omaskisiniapi.

¹² Kata itotiskew tarasak mitowi kitike iriniw e takonak omakaripakan kitci tatipan actatc kitikaniw kirika ka maratanik. Kaskina kata mawotcitaw aniheriw okitikan e nahikak otactasokiwamik. Aric aniheriw ka maratanik kata ickwasam neta ickotek aka wiskat ka actweparinik.”

Ka sikahatasotc Cecoc

¹³ Aci nete Galilée askik ki pe ototew Cecoc, nac nete Jourdain sipik e icatc. Ekoni ka ici natawapamatc Capatisa kitci ki sikahatakotc.

¹⁴ Aric Capatis nama mireritamokopan. Itekopan: “Kir ni, ki ta sikahatowin! Kekwan tca wetci pe natawapamiin kitci sikahatatan!”

¹⁵ Aci itew Cecoc: “Mirerita patama kitci icinakok. Ekoni meka e actek kitci aitotiskeikw kaskina e ici nataweritak Kice Manito.” Ki tca ici naheritam Capatis kitci sikahatowatc.

¹⁶ Kotc ka ickwa sikahatasotc Cecoc, ki akowatakasiw neta sipik. Mia apitc ki cepariniw wakwek wir otci. Ki wapamew Kice Manitowa Omiro Manitomiriw e pe racireritci mia omemew e icinakosiritci, e pe poneritci.

¹⁷ Kirika ki petam e itakaniwitc, wakwek e otewetcikaterik: “Enko anahwe nikosis ka sakihak. Ni micta mirerimaw!”