Matio 28 - Kice Manito Ocki Omirwatcimowin

Ka apitcipatc Cecoc

¹ Ka ickwa arwepi kicikarik, e iti wapanik, Mari, Magdala otenak ka otcitc, kirika anahwe kotak Mari ki pe natawapatamok Cecoca omatikowociriw.

² Kek ki micta kwekon. Peikw aceriw, Teperitcikeritci e ki pe iciticohikotc, ki pe otcirew wakwek. Opimera ki pe nta tetipinew anihi asiniwa ka ki kipahikewakaniwonik nete ickwatemik matikowocik. Ki apiw neta asinik.

³ Mia e micta wasisotc e icinakosispan anahwe aceriw, acitc ki wapekahacew, mia kon.

⁴ E apitc sekisitcik aniki cimakanicak, ki iti micta nikipariwakopan, kek pakiciniwok, mia e nipotcik e icinakosiwakopanen.

⁵ Aci anahwe aceriw ki itew anahweriw iskwewa: “Aka sekisikw! Ni kiskeriten e nantowapamekw Cecoc, anahwe ka ki tcictaskowatakaniwitc tcipaiatikok.

⁶ Nama ni aci taw ota. Aci ki apitcipaw, kotc ka ki itespan. Pe nta kanawapatamwakw neta ka ici micikipan.

⁷ Matcakw, wipatc nta witamawakok aniki Cecoc owitcewakana, ‘Ki apitcipaw ni Cecoc! Nete tca ki ka nta pehikowaw Galilée askik! Ekote ni ke ici wapamekw!’ Enko ni ka wi witamatakokipan.”

⁸ Tecikotc ki nakatamok aniheriw omatikowociriw aniki iskwewok, e sekisitcik kaie peikon e micta mireritakik. Ki mipatawok e nta witamawatcik anahweriw Cecoc owitcewakana.

⁹ Kek keskat ki pe nta nakickakowok Cecoca, e tca arimikakotcik, “kwei” e itikotcik. Tecikotc ki nipiskoctawewok, e matcikonatcik ositirik, kirika e kicterimatcik.

¹⁰ Itikowok Cecoca: “Aka sekisikw! Matcakw, nta witamawakok niwitcewakanak Galilée askik kitci icatcik. Ekote ni ke ici wapamitcik.”

Cimakanicak e tipatcimotcik tan ka ki iciwepanik

¹¹ Mekwata e pimotetcik meskanak aniki iskwewok, atita cimakanicak neta ka nanakatcitawaspan matikowociriw, ki pe kiwewok Jérusalem otenak, e nta atisokowatcik cota makatewokorewa ka tiperitamiritci kaskina ka ki iciwepanik.

¹² Ki mawotcihitowok aniki cota makatewokorewok ka tiperitakik kirika cota aiamihe okimawok. Ka ickwa nahitatotcik ke totakik, ki mirewok anahweriw cimakanica nipara coriariw,

¹³ kaie e itatcik: “Ki ka itanawaw, ‘Cecoc owitcewakana ki pe icawok e mekwa tipiskarik e ki pe nta kimotitcik Cecoca owiawiriw, mekwata e nipaiakipan.’

¹⁴ Kecpin kice okimaw petakete, ni ka cakosimanan, kitci itakitc aka kitci pameritak, kaie ki ka witcihitinan aka kitci anwerimikoiekw.”

¹⁵ Aniki cimakanicak ki otapinamok aniheriw coriariw ka mirakaniwitcik, ekoni kaie ka ki totakik kotc ka ki itakaniwitcik. Enko ohwe atisokan mocak ka ki itatisoketcik cota iriniwok nac anotc ohweriw e kicikarik.

Cecoc e wapamikotc owitcewakana

¹⁶ Ka ickwa apitcipatc Cecoc, owitcewakana e mitato acitc peikw e taciritci ki icariw matinacik, nete ka ki ici iciticohwatc kitci icaritci, Galilée askik itekera.

¹⁷ Kek ka wapamatcik Cecoca, ki nipiskoctawewok e kicterimatcik. Atita aric neta e tacitcik anwetamwakopan.

¹⁸ Cecoc ki natcikapowictawew, e tca itatc: “Kaskina mackawisiwin ni ki mirikowin wakwek kaie ota askik.

¹⁹ Natawapamakok kaskina iriniwok ota askik, kaskina wiec e pe otcitcik, kotc e icinakositcik. Witcihakok kitci nosanehwitcik, kaie sikahatowakok, kitci iteiekw, oticinikasowinik e Otawiwitc kaie Weokositc kaie Miro Manito.

²⁰ Kiskinohamawakok nitirinimak kitci nosanetatcik kaskina ka ki ici witamatakok kitci itotiskeiekw. Kaie otcitakotc kitci kiskeritamekw mocak ki ka witci tacikemitinawaw nac kitci ponaskiwok.”