Matio 27 - Kice Manito Ocki Omirwatcimowin

Cecoc e iciwirakaniwitc kice okimak Pilate

¹ Wipatc e kicepawonik, kaskina aniki cota makatewokorewok ka tiperitakik kaie cota aiamihe okimawok tapickotc ki oreritamok kitci nipahakaniwiritci Cecoca.

² Ki itewok kitci takopitakaniwiritci, kitci matcewirakaniwiritci, minawatc kitci iciwitowakaniwitc anahwe Romain kice okimaw, Pilate ka icinikasotc.

E nipahitisotc Judas

³ Judas, anahwe ka ki pakiterimatc Cecoca, ki petakew e ki anwerimakaniwiritci. Ki micta cikeritam aniheriw ka ki totak kaie ki nta kiwe mirew anahweriw cota makatewokorewa ka tiperitamiritci kirika cota aiamihe okimawa aniheriw coriawapiskoriw, nicto mitana e tatinik.

⁴ Ki itew: “Nit anweritakosin! Ni ki pakiterimaw awik kitci nipahakaniwitc, aka kekociciriw e ki otci matci totak.” Aric ki itiko: “Nama wiec nit iteritenan. Kir ni ka ki totaman.”

⁵ Judas ki iciwepinam aniheriw coriariw neta pitakamik kitci aiamihe mikiwamik. Minawatc ki matcaw, e nta nakwatitisotc.

⁶ Aniki cota makatewokorewok ka tiperitakik ki mawotcitawok aniheriw coriariw, kirika ki itewok: “Nama actew kitci actaikw anihe coria neta ka ici pakitinikaniwok coria kitci aiamihe mikiwam otci, osam meka e ki irapatak e kicikasonaniwok kitci nipahakaniwitc iriniw. Ekoni e itactek kitirakonikewinino.”

⁷ Minawatc ki oreritamok aniheriw coriariw ke irapatcitatcik, kitci kicpinatatcik kitikan askiriw, iriniw ka ocitaspan orakaniw aniheriw otaski, kitci ocitatcik rikwaskaniw, mantewa ke ici rikwaskatakaniwiritci.

⁸ Ekoni wetci kiapatc anotc icinikatek anihe rikwaskan “miko kitikan aski.”

⁹ Ekoni tca ka otcitciparinik tapwe kitci pe isparinik aniheriw weckatc ka ki itespan peikw ka nikan tipatcimospan, Jérémie ka icinikasospan: “Ki otapinamok aniheriw nicto mitana e tatinik coriawapiskoriw, enko aniheriw irikik Israël iriniwok ka ki oreritakik kitci pakitinikaterik e kicikasonaniwonik kitci nipahakaniwiritci.

¹⁰ Kirika ki irapatcitawok aniheriw coriariw kitci otapinakik kitikan askiriw, iriniw ka ocitatc orakaniw otaski, mia ka ki icitc Teperitciketc.” Zacharie 11.12-13; Jérémie 18.2-3; 19.1-2; 32.6-15

Pilate e kokwetcimatc Cecoca

¹¹ Aci Cecoc ki pe iciwirakaniwiw kitci icikapowitc nikanik e ici apiritci kice okimawa, kirika ki kokwetcimiko: “Kir ia ni cota iriniwok okimamiwawa?” Itew Cecoc: “Kir ni ka itein.”

¹² Aci ki itactahoriko anahweriw cota makatewokorewa ka tiperitamiritci kaie cota aiamihe okimawa. Nama aric wiec ki otci itew Cecoc.

¹³ Aci Pilate itew: “Nama ani ki petamwan kaskina e ici itactahoriskik aniki?”

¹⁴ Ki tca mamiskaterimew Cecoca anahwe kice okimaw tekaci aka otci peikwaw e naskamoritci.

Cecoc e atamerimakaniwitc kitci nipotc

¹⁵ Tato pipona, mekwata e cota aiamihe makocaniwonik, Pâque ka icinikaterik, kice okimaw Pilate pakitinekopan ko peikw iriniwa ka kipohwakaniwiritci. Wirawaw tca iriniwok e mitcetitcik itakaniwiwakopan kitci orapamatcik tan anihi mia ke pakitinakaniwiritci.

¹⁶ Takopan neta peikw iriniw ani apitc e kipohwakaniwitc, e miro kiskerimakaniwitc, Jésus Barabbas icinikasopan.

¹⁷ Aci kokwetcimew Pilate anihi iriniwa e mitcetiritci ka ki mawotcihitoritci neta, e tca itatc: “Awin ka natawerimekw kitci pakitinak? Jésus Barabbas kekotc Cecoc, anahwe ka icinikatakaniwitc Krist?”

¹⁸ Kiskeritamokopan meka Pilate e asawakeritamiritci anahweriw cota okimawa. Ekoni wetci ki pakiterimatcik Cecoca kitci nipahakaniwiritci.

¹⁹ Mekwata e apispan neta tipaskonikewikamikok, Pilate okoma ki pe iciticahamako awiriwa kitci itakaniwitc: “Ponihi anahwe iriniw, aka wiec ka ki otci ici matci totak. Ni ki meka micta nekateriten otepiskak, e ki wecipapamak.”

²⁰ Aniki cota makatewokorewok ka tiperitakik kaie cota aiamihe okimawok ki cikimewok kaskina iriniwa kitci natawerimaritci Barabbasa kitci pakitinakaniwiritci, Cecoca tca kitci nipahakaniwiritci.

²¹ Aci kice okimaw kiapatc kokwetcimew iriniwa: “Tan anahwe mia nta e nicitcik ke pakitinak?” “Barabbas!” ki itewok e naskamotcik aniki iriniwok.

²² “Tan tca ke totawak anahwe Cecoc, Krist ka icinikatakaniwitc?” itew Pilate. Kaskina ki itewok: “Tcictaskowaci tcipaiatikok!”

²³ Pilate itew: “Kekwariw ka ki ici matci totak?” Kirawe kiapatc micta kiciwewok e itetcik: “Tcictaskowaci tcipaiatikok!”

²⁴ Ka wapatak Pilate aka pitoc e iteritamiritci anahweriw iriniwa, kirawe e nanotakosiritci e micta kiciweritci, ki otapinam orakaniw, nipiriw e takonik, e kasitcitcetc e wapatahiwetc aka wir kitci atameritakositc ickwa niporitena Cecoca. Kaie ki itew: “Kecpin nipote anahwe iriniw, namaiew nin ke totaman! Kirawaw ke totamekw! Kirawaw meka ka ki ici nataweritamekw kitci nipahakaniwitc!”

²⁵ Kaskina iriniwok ki naskamowok, e itetcik: “Kitci anwerimikoiak, kaie wirawaw ninitcanicinanak, nipote anahwe iriniw.”

²⁶ Aci Pilate ki pakitinew Barabbasa. Ki itew cimakanica kitci pasakactehwaritci Cecoca, kaie kitci tcictaskowatakaniwiritci tcipaiatikok.

Cimakanicak e papirotowatcik Cecoca

²⁷ Minawatc Pilate ocimakanicima ki iciwirewok Cecoca kice okimawa omicta omikiwamirik. Kaskina e tacitcik aniki cimakanicak e mitcetitcik ki waskakapowictawewok.

²⁸ Ki maninamawewok owikasimiriw. Kapotowaniw tca e mikwekacinik ki piskamotarewok.

²⁹ Minawatc ki apikatamok minesikaciriw, octikwanirik tca Cecoca e actawatcik, kaie mictikoriw ki actawewok otcitcirik onihiwinik itekera. Ekotca e ici nipiskoctawatcik e marerimatcik e itatcik: “Kwei, cota iriniwok okimamiwawa!”

³⁰ Ki iskwatewok kaie ki otapinamok papeikw aniheriw mictikoriw e otatamohwatcik octikwanirik.

³¹ Ka ickwa papirotowatcik, ki maninamawewok aniheriw kapotowaniw. Ki piskamotarewok wir tipirawe owikasimiriw. Minawatc ki matcewirewok kitci nta tcictaskowatatcik tcipaiatikok.

Cecoc e tcictaskowatakaniwitc tcipaiatikok

³² E iti orowitcik otenak, ki nakickawewok peikw iriniwa. Cyrène otcirikopan. Simo icinikasoripan. Cimakanicak ki icikemewok anihi iriniwa kitci miwiraritci Cecoca otcipaiatikomiriw.

³³ Kek takociniwok neta matinacik, Golgotha ka icinikaterik. Wi itemakan anihe, Octikwanikekan.

³⁴ Aci nta ki mirewok Cecoca ke minikweritci, minicaporiw kirika matci mackikiriw ka matcispokonik e ki actakaniwonik. Aric ka ickwa kotcictamiritci, nama ki otci wi minikweriw.

³⁵ Ki tcictaskowatewok tcipaiatikok aniki cimakanicak. Minawatc owikasimiriw ki tetawonamatowok, kaie ki metowewok kitci kiskeritakik anahwe ke kanewitc aniheriw wikasiriw.

³⁶ Minawatc ki apiwok neta kitci nanakatcihatcik.

³⁷ Ki actawewok napakitikwatikociriw okitc Cecoca octikwanik otcipaiatikomirik, e ki masinahakik neta kekwariw wetci ki anwerimakaniwiritci, ohweriw e itasinaterik: “Enko ohwe Cecoc, cota iriniwok okimamiwawa.”

³⁸ Nicw kimoti iriniwok kaie wirawaw ki tcictaskowatakaniwiwok otcipaiatikomiwak, opimera Cecoc ka ici tcictaskowatakaniwitc, peikw onihiwinik, kotak onamatciwinik.

³⁹ Iriniwok ka pimotewakopanen neta marerimewakopan Cecoca, e wewepiskoweparihowakopanen,

⁴⁰ kirika e itatcik: “Kir ka ki itein kitci orahaman kitci aiamihe mikiwam, minawatc kitci ocitain, nicto kickwa tepirak kitci tacikaman, kir tipirawe wikotcihitiso, kecpin tapwe kir Kice Manito Okosa! Nitatowi kaie neta kitcipaiatikomik.”

⁴¹ Peikon kaie wirawaw cota makatewokorewok ka tiperitakik kaie ka kiskinohamaketcik cota aiamihe irakonikewiniw acitc cota aiamihe okimawok kaie wirawaw marerimewakopan Cecoca, e itatcik:

⁴² “Ki wikotcihew kotakihi iriniwa, nama aric kackitaw kitci wikotcihitisotc! Enko anahwe iriniw ka ki itetc: ‘Nin cota iriniwok okimamiwawa!’ Kecpin tapwe Israël okimawikwen, kata kackitapan kitci nitatowitc neta otcipaiatikomik. Aci nta ki ta tapwerimano.

⁴³ Asperimototawew Kice Manitowa kaie ki itew, ‘Nin Kice Manito Okosa.’ Kecpin tapwe sakihikokwen Kice Manitowa, acteriw kitci wikotcihikotc!”

⁴⁴ Aniki kimoti iriniwok kaie wirawaw ka ki tcictaskowatakaniwitcik opimera Cecocik, ekoni peikon kaie wirawaw e ici marerimawakopanen.

Ka nipotc Cecoc

⁴⁵ Ka apita kicikak, tekaci ki tipiskaw kaskina wiec neta askik, nac nicto tipahikan e ickwa apita kicikak.

⁴⁶ Ka nicto tipahikanearik, ki tepwew Cecoc, e micta kiciwetc, e itetc: “Éli, Éli, lema sabactani!” Wi itemakaniw aniheriw: “Nikice Manitom, Nikice Manitom, kekwan wetci ki pakiterimiin?” Psaumes 22.1

⁴⁷ Atita neta ka nanipowiwaspan ki petawewok. Aci tepwewok e itetcik: “Éliwa ka tepwatatc!”

⁴⁸ Aci peikw nta e tacitcik tecikotc matcepataw e natcipatatc pakiwaniciriw, pinekinapok e ki kitanak. Onoskotc mictikok ki akokataw, e itaskanamowatc Cecoca kitci minikweritci.

⁴⁹ Aric kotakihik neta ki itewok: “Aka patama! Ki ka tca wapamano ke apitc ma Élie pe nta wikotcihakwen!”

⁵⁰ Cecoc minawatc ki micta notakosiw, ekoni ka iti nipotc.

⁵¹ Mia ani apitc nete kitci aiamihe mikiwamik, micta akwekahikanekin tekaci ki tetawekiparin e rarikiparik, icpimik nte e otci kitciparik, nac nte nitek. Ki kwekon. Asiniik ki pactipariwok.

⁵² Matikowoca ki ceparino, kirika mitcet ka tapwerimawaspan Kice Manitowa ka ki nipotcik, ki apitcipawok.

⁵³ Ki pe orowiwok omatikowociwak. Minawatc tca ka ickwa apitciparitci Cecoca, ki pitakewok neta Jérusalem otenak. Mitcet iriniwok ki wapamewok.

⁵⁴ Ka tiperimatc cimakanica kaie anahweriw cimakanica ka witcihikospan neta e nanakatcihawaspan Cecoca, ki wapatamok e ki kwekonik kaie kaskina ka ki isparinik. Ki micta sekisiwok kirika ki itewok: “Enko anahwe tapwe Kice Manito Okosa!”

⁵⁵ Mitcet iskwewok nete pa tacikewakopan, warawik e otapiketcik. Galilée askik ki otci pe nosanehwewakopan Cecoca e wi atoskectawakopanen.

⁵⁶ Peikw anahwe, Mari, Magdala otenak ka otcitc, tacikepan nte, kaie kotak Mari (okawiwawa Cak kirika Sosep), acitc kotak iskwew, Zébédée anihi okoma (Cak acitc Jean anihi okawiwawa).

Cecoc ka nahikowakaniwitc matikowocik

⁵⁷ E iti otakocinik, aci peikw micikita iriniw ki takociniw. Arimathée otenak otcikopan. Sosep icinikasokopan. Kaie wir anahwe nosanehwepan Cecoca.

⁵⁸ Ki natawapamew Pilata, e nataweritamawatc Cecoca owiawiriw. Ki tca itew Pilate kitci mirakaniwiritci Sosepa aniheriw.

⁵⁹ Aci Sosep ki nta nitinamwew Cecoca owiawiriw. Ki wikwekinam ocki pakiwaniciapik.

⁶⁰ Ki nta nahikam neta matikowocik, wir tipirawe aniheriw omatikowoc ka ki atoskemokopanen kicatc kitci ocitakaniwonik asinik. Minawatc micta asiniwa ki tetipiwepinew neta, kitci kipitinik aniheriw matikowociriw. Minawatc ki matcaw.

⁶¹ Kaie wirawaw tacikewakopan, Mari, Magdala otenak ka otcitc, acitc anahwe kotak Mari. Taci apiwakopan neta, nikanik matikowocik.

Cimakanicak e iciticohwakaniwitcik wewerita kitci nanakatcitatcik matikowociriw

⁶² Minawatc kecikak, arwepi kicikapan. Aniki cota makatewokorewok ka tiperitakik acitc Pharisien iriniwok tapickotc ki natawapamewok Pilata,

⁶³ e itatcik: “Nokimaminan, ni mikawinan ka ki aitetc anahwe ka kiraski iriniwispan, mekwata kiapatc e pimatisispan: ‘Nicto kickwa ickwa nipoane ni ka apitcipan.’

⁶⁴ Cimakanicak tca ki ta itawok kitci nanakatcitatcik aniheriw matikowociriw, nac nicto kickwa irikik, aka kitci ki pe nta kimotitcik aniki Cecoc owitcewakana aniheriw owiawiriw, kitci tca itetcik, ‘aci ki apitcipaw.’ Kirawe meka kata maratanopan ani kitci ici wiecimiwaniwok, patok anihe nictam ka ki ici wecimiwaniwok.”

⁶⁵ Aci itew Pilate: “Nit iciticohwawok tca atita nicimakanicimak, kitci nanakatcitatcik aniheriw matikowociriw. Totamokw wewerita kitci nanakatcitakaniwok kotc ke iteritamekw kitci totcikatek.”

⁶⁶ Ekoni ka ici matcatcik e nta orictatotcik kitci nanakatcitakaniwonik aniheriw matikowociriw. Ki arewok e matcapiskiritci asiniwa neta matikowocik aka awik kitci pitaketcik, kaie ki arewok cimakanica ke nanakatcitaritci.