Matio 25 - Kice Manito Ocki Omirwatcimowin

Atisokanicic: Mitato ickwecak

¹ Cecoc itew: “Ani apitc, ekoni ke icinakonik Kice Manito Okimawin, mitowi ohwe ke atisokeian. Tapanak mitato ickwecak ka nisawiwakopanen kitci icatcik ke ici nipowinaniwonik. Ki orowiwok e wi nakickowatcik anihi ke nipowiritci. Papeikw takonamopanak wactenamakaniw.

² Niaraniwakopan nta e tacitcik e miroctikwanitcik, kirika aniki kotakihik e niaraniwitcik pisinakaweritamawakopan.

^3-4 Aniki ka miroctikwanitcik kicatc ki otapinamowakopan opotariw, pimiteriw nta e acterik, aka kitci noteparitcik. Aniki kotakihik ickwecak nama ki otci mamitoneritamok kitci matcewitatcik pimiteriw, tepirak owactenamakaniwaw ki matcewitawok.

⁵ Mictahi itapitciw anahwe ke nipowitc ka pehakaniwitc, nama nac takociniw. Nac notekociwok aniki ickwecak e aieskositcik e pehotcik.”

⁶ “Kek e apita tipiskak, pe tepwaniwon: ‘Aci takociniw anahwe ke nipowitc! Orowikw kitci nta nakickowekw!’

⁷ Kaskina onickawok aniki ickwecak, e iskahakik owactenamakaniwaw.

⁸ Aci aniki niaran ickwecak aka ka miroctikwanitcik, itewok owitc ickweciwawa ka miroctikwaniritci: ‘Miricinan memantcic pimite ka ki petaiekw. Aci meka actawew niwactenamakanan!’

⁹ Itakaniwiwok: ‘Nama ki ka ki miritinan. Nama ni ka tipiparinan kaie ninan. Kirawe kata miroparinopan atawewikamikok kitci nta natcipataiekw kitci otapinamasoekw!’

¹⁰ Aci matcawok aniki ickwecak aka ka miroctikwanitcik, e nta otapinakik pimiteriw. Mekwata e itanahotcik, aci takociniriw anihi ke nipowiritci. Aniki kotakihik ickwecak ka ki miro nisawitcik kitci takociniritci iti witcewewok, nete tca e pitaketcik ka ici makocaniwonik. Ekoni e ici kipaskonikatek ickwatem.

¹¹ Ani apitc wiskata aci takociniwok aniki kotakihik ickwecak ka ki nta otapinakik pimiteriw. Aci tepwatewok anihi ke nipowiritci, e itatcik: ‘Okimaw! Okimaw! Cenamacinan ickwatem!’

¹² Itew aric anahwe iriniw ke nipowitc: ‘Tapwe ohwe ka witamatakok: nama ki kiskerimitinawaw.’”

¹³ Aci itew Cecoc: “Aiekwamisikw tca. Nama meka ki kiskeritenawaw ke tato kicikak kaie ke tato tipahikaneak ke takocinian.”

Atisokanicic: Nicto arotakanak

¹⁴ Cecoc atisokew kiapatc, e arimotak ke icinakonik Kice Manito Okimawin: “Mia mitowi iriniw e wi matcaspan e nta pa pimatisitc. Ki wicamew iriniwa ka atoskectakotc, e acotamawatc e ici tatak.

¹⁵ Tato neta e taciritci ki awihew irikik ke kackitaritci. Peikw neta e taciritci ki awihew niaranaw kice mitato mitana tatowapiskiriw. Minawatc kotakihi nicwaw kice mitato mitana tatowapiskiriw. Minawa kotakihi, peikwaw kice mitato mitana tatowapiskiriw tepirak. Ekoni ka ici matcatc.

¹⁶ Anahwe arotakan ka ki awihakaniwitc niaranaw kice mitato mitana tatowapiskiriw tecikotc ki matcaw kaie wir, e nta otamirotatc aniheriw coriariw, nac kitci kackitatc kotakeriw niaranaw kice mitato mitana tatowapiskiriw.

¹⁷ Minawatc anahwe ka ki awihakaniwitc nicwaw kice mitato mitana tatowapiskiriw, peikon ka totak. Ki kackitaw kaie wir nicwaw kice mitato mitana tatowapiskiriw.

¹⁸ Aric anahwe ka ki awihakaniwispan peikwaw kice mitato mitana tatowapiskiriw ki matcaw e nta rikotawokahak. Ki kataw aniheriw okimama ocoriamiriw.”

¹⁹ “Ani apitc wiskata anahwe okimaw pe kiwew e pe nta kiskeritak ocoriam.

²⁰ Anahwe arotakan ka ki awihakaniwispan niaranaw kice mitato mitana tatowapiskiriw pe natawapamew okimama e iciwitowatc irikik ka ki kackitatc, e itatc: ‘Okimaw, ki ki miritai niaranaw kice mitato mitana tatowapiskw. Kanawapata tca anahwe kotak niaranaw kice mitato mitana tatowapiskw ka ki kackitaian.’

²¹ Okimama itiko: ‘Mirwatikwatc e miro arotakaniin, mocak ke ki asperimototakoin. Ki ki pe miro irapatcitan anahwe memantcic ka ki awihitan. Nipara aci ki ka acotamatin, kirawe ka akitakok. Ekoci pe nta orapi kitci mirwatikotaikw.’”

²² “Minawatc anahwe arotakan ka ki awihakaniwitc nicwaw kice mitato mitana tatowapiskw pe natawapamew okimama, e itatc: ‘Okimaw, ki ki awihitai nicwaw kice mitato mitana tatowapiskw. Kanawapata ohwe kotak nicwaw kice mitato mitana tatowapiskw ka ki kackitaian.’”

²³ “Okimama itiko: ‘Mirwatikwatc e miro arotakaniin, mocak ke ki asperimototakoin. Ki ki pe miro irapatcitan anahwe memantcic ka ki awihitan. Nipara tca aci ki ka acotamatin, kirawe ka akitakok. Ekoci pe nta orapi kitci mirwatikotaikw.’”

²⁴ “Minawatc anahwe arotakan ka ki awihakaniwitc peikwaw kice mitato mitana tatowapiskiriw pe natawapamew okimama, e itatc: ‘Okimaw, ni kiskeritetai e wi tipototaman, e mawotcitain coria, misawatc aka kir tipirawe e ki otci otamiroin, kaie e mawotcitain kitikan aka ka ki otci matce kitikein.

²⁵ Ni ki sekisin, ekoni wetci ki nta kataian kicoriam atamitawak. Kanawapata tca kicoriam, enko tca ohwe ka tiperitaman!’”

²⁶ “Okimama itiko: ‘Wesa, ki matci arotakaniwin, kaie ki kitimin. Ki kiskeritetai orina e wi mawotcitaian kekocic aka e ki otci otamiroan, e mawotcitaian kitikan aka ka ki otci matce kitikeian!

²⁷ Kirike ki ta ki nahiken nicoriam coriawikamikok! Anotc ni ta ki orowititatai nicoriam kaie irikik ke ki rikihamakipan!’”

²⁸ “ ‘Maninamakw aniheriw coriariw, minawatc mirakw anahwe ka takonik mitatowaw kice mitato mitana tatowapiskiriw.

²⁹ Anahwe meka ka takonik kekociciriw, awocamec kata mirakaniwiw, nac kitci mitcenik. Aric anahwe aka ka takonik kekociciriw, kata maninamowakaniwiw kaskina e ici tatak, misawatc onawis e takonik kekociciriw.

³⁰ Minawatc anahwe arotakan aka wiec ka irapatisitc, ki ka orowepinaw neta e ici tipiskarik. Ekote nete e taci matonaniwonik kaie e ici micta kakiceapitecininaniwok.’”

Mamitcitc kitci tipaskonikaniwok

³¹ “Apitc pe koski takocike anahwe Ka ki pe iriniwihitisotc oticperitakosiwinik, kirika kaskina aceriwok e pe witcewikotc, kata pe nta apiw okimaw tetapiwakanik kitci okimawitc.

³² Kaskina kata mawotcihew iriniwa ota askik kitci pe itactamikapowictakotc. Tatipan kata arew iriniwa, mia mitowi maritcenici iriniw e tatipanaratc maritcenica kirika atikocica.

³³ Onihiwinik kata arew anahweriw omaritcenicima, anahweriw tca otatikocicima, onamatciwinik.

³⁴ Minawatc anahwe okimaw kata itew anahweriw onihiwinik ka icikapowiritci: ‘Petcimotekw, kirawaw ka cawerimitakw Notawi. Pe nta otapinamokw ohwe Okimawin ka wi mirikoiekw, aci weckatc ka ki nisawitakaniwok kirawaw otci, esko ka kiceritcikatek aski.

³⁵ Ni pakatatai meka, ki ki acaminawaw. Ni pakatamotai, ki ki minihinawaw. Nama ki ki otci kiskeriminawaw, peikon ki ki pitakahinawaw kimikiwamiwak.

³⁶ Nama ni owikasimitai, ki ki wespicinawaw. Nit akositai, ki ki natokohinawaw. Kipahotowikamikok ni tacikatai, ki ki pe natawapaminawaw.’”

³⁷ “Aci aniki ka ki nitotwatcik Kice Manitowa pe naskamew: ‘Teperitcikein, tan apitc ka ki wapamitak e pakatein, e ki tca acamitak? Kekotc ma tan apitc ka ki wapamitak e pakatamoin, e ki tca minihitak?

³⁸ Tan apitc aka ka ki otci kiskerimitak, e ki tca pitakahitak nimikiwaminak? Kekotc ma tan apitc ka ki wapamitak aka e owikasimiin, e ki tca wespititak?

³⁹ Tan apitc ka ki wapamitak e akosiin, kekotc tan apitc kipohotowikamikok ka ki tacikein, e ki tca natawapamitak?’”

⁴⁰ “Kata itew okimaw: ‘Tapwe ohwe ka witamatakok: tatwaw ka ki pe miro totawekw peikw iriniw misawatc aka e kicteritakositc, nin ka ki pe miro totawiekw.’”

⁴¹ “Minawatc ni ka itawok iriniwok namitciwonik ka icikapowitcik: ‘Matcakw nete aka kitci pecowapamiekw, kirawaw ka anwerimikoiekw. Icakw neta kakike ickotek ka ki ocitakaniwok wirawaw otci Matci Manito acitc ka atoskectakotc.

⁴² Ni pakatatai meka, nama ki ki otci acaminawaw. Ni pakatamotai, nama aric ki ki otci minihinawaw.

⁴³ Nama ki ki otci kiskeriminawaw, nama aric ki ki otci pitakahinawaw kimikiwamiwak. Nama ni ki otci owikasimitai, nama aric ki ki otci wespicinawaw. Nit akositai, kirika kipohotowikamikok ni tacikatai, nama kaie ki ki otci pe witcihinawaw.’”

⁴⁴ “Aci ni ka pe itikok: ‘Teperitcikein, tan apitc ka wapamitak e pakatein, kekotc e pakatamoin, kekotc aka ka ki otci kiskerimitak, kekotc aka e owikasimiin, kekotc e akosiin, kekotc kipohotowikamikok e tacikein, kirika aka e ki otci nta witcihitak?’”

⁴⁵ “Aci kata itikowok okimamiwawa: ‘Tapwe ohwe ka witamatakok: tatwaw aka ka ki otci pe miro totawekw peikw iriniw misawatc aka e kicteritakositc, peikon kaie nin nama ki ki otci pe miro totawinawaw.’”

⁴⁶ “Aniki iriniwok kata iciticohwakaniwiwok kakike arimisiwinik. Aric aniki ka ki totakik e ici nataweritamiritci Kice Manitowa kata icawok kakike pimatisiwinik.”