Matio 22 - Kice Manito Ocki Omirwatcimowin

Atisokanicic: E micta makocaniwok e nipowinaniwok

¹ Kiapatc minawatc atisokaniciciriw ki apatcitaw Cecoc e aimihatc iriniwa, e itatc:

² “Ekoni e icinakonik Kice Manito Okimawin: Peikw okimaw ki ocitaw kitci makocaniwonik, okosa otci ke nipowiritci.

³ Ki iciticahwew otarotakana kitci nta wicakemoritci kitci pe nta makocaniwonik. Nama aric wi pe icariwa anahweriw ka ki wicamatc.”

⁴ “Kiapatc kotakihi arotakana ki iciticahwew, e itatc: ‘Itakok aniki ka wicamakik: Aci nit ickwa aikan anihe ka ki ocitaian nimakocan. Aci ni ki ickwa nipahawok nimotcewotikomak kaie nitawesisimak ka wirinotcik. Kaskina ickwa aikaniwon! Pe nta makocekw e nipowinaniwok!’”

⁵ “Aric aniki ka ki wicamakaniwitcik nama pameritamok. Ekoni e ici matcatcik e natawapatakik otamirowiniwaw: peikw anahwe okitikan aski natawapatam, kotak anahwe otatawewikamikw.

⁶ Kotakihik makonewok anihi arotakana, e nekatcihatcik kirika e nipahatcik.

⁷ Ki micta kiciwasiw anahwe okimaw. Ki iciticahwew ocimakanicima kitci nta nipaharitci anihi ka nipahiweritci kirika ki itew kitci ickwasikaterik otenamiwariw.”

⁸ “Minawatc ki itew otarotakana: ‘Anihe makocan e nipowinaniwok otci aci nit ickwa aikaten, aric aniki ka ki wicamakaniwitcik nama ki otci kackitamatisowok kitci pe icatcik.

⁹ Matca pa aicakw nte meskanak. Wicamakok kaskina iriniwok ke miskawekok kitci pe nta mitcisotcik.’

¹⁰ Ki pa aicawok meskanak aniki arotakanak. Ki mawotcihewok kaskina iriniwa ka ki miskawatcik, misawatc ka matci iriniwiritci kaie ka miro iriniwiritci, ekoni e ki mockinaniwonik neta mikiwamik ka ici makocaniwonik.”

¹¹ “Aci anahwe okimaw ki pe pitakew, e pe nta kanawapamatc anihi ka ki wicamakaniwiritci. Ki wapamew peikw iriniwa aka orina e mirwaspisoritci e nipowinaniwonik otci.

¹² Ki itew: ‘Nikwimes, kekwan wetci ki pe pitakein aka mirwaspisoin e nipowinaniwok otci?’ Aric anahwe iriniw nama ki otci naskamo.”

¹³ “Aci okimaw itew otarotakana: ‘Takopitakw ositik kaie otcitcik. Orowiwepinakw nte e ici kiski tipiskarik. Ekota nta ke taci matotc kirika kitci miteapitecinitc.’”

¹⁴ Kirika ki iti itew Cecoc: “Mitcet meka wicamakaniwiwok, nama aric mitcet pitakewirakaniwok.”

E kicikowakaniwitc Kice Okimaw

¹⁵ Ki mawotcihitowok Pharisien iriniwok kitci arimotakik ke ki ici kokwetcimatcik Cecoca. Wikokwe paciwirewakopan Cecoca arotc kitci iteritci, ke ki otci itactahoratcik.

¹⁶ Ki tca iciticohwewakopan atita otirinimiwawa kirika atita ka atoskectawatcik okimawa Hérode kitci nta kokwetcimaritci Cecoca, kitci itaritci: “Kiskinohamake iriniw, ni kiskeritenan tapwe mia e itein, kaie mia e ici kiskinohamakein kitci itatisinaniwok e ici nataweritak Kice Manito, tapwewin e arimotaman. Nama otci peikw awik ki koctaw tan kotc e iterimiskik, aka wiskat e pameritaman e apitc kicterimakaniwakwen iriniwok ota askik.

¹⁷ Witamacinan e iteritaman ohwe: itemakan ia kitaiamihe irakonikewininak kitci kicikamokw ka ici natockasotc Kice Okimaw, Rome askiriw ka tiperitak, kekotc nama?”

¹⁸ Aric Cecoc kiskeritamopan e wikokwe paciwirakaniwitc arotc kitci itetc. Ki itew: “Kirawaw ka micta miro iriniwikasoekw, kekwan wetci wikokwe paciwiriekw?

¹⁹ Wapatahicikw e icinakok anihe coria ka apatcitakaniwok, kice okimaw e kicikowakaniwitc.” Ki tca wapatahewok peikw coriapiskoriw.

²⁰ Kokwetcikemo Cecoc, e itetc: “Awin neta ka nokonik otactamikw kirika oticinikasowin?”

²¹ “Kice Okimaw,” itewok. Itew Cecoc: “Mirakw Kice Okimaw ka ici tiperitak, peikon kaie wir Kice Manito mirakw ka ici tiperitak.”

²² Ka petawatcik e aiteritci, ki micta mamiskasitawewok. Ki matcawok e nakatatcik.

E itetc Cecoc: “Tapwe apitcipawok ka nipotcik”

²³ Anahwe peikon e kicikak, atita cota iriniwok Sadducéen ka icinikatakaniwitcik ki pe natawapamewok Cecoca. Tapweritamwakopan aniki Sadducéen iriniwok aka kitci apitcipaniwonik. Kokwetcimewok Cecoca e wi paskewiratcik,

²⁴ e tca itatcik: “Kiskinohamake iriniw, weckatc Moïse ki ki witamakono ohweriw irakonikewiniw, e itasinaterik: ‘Kecpin iriniw e nipotc, e nakatatc tca okoma aka e ki otci onitcaniciritci, acteriw anihi ocima kitci wikimaritci ka cikawiritci, kitci tca onitcanicitcik, octesa otci ka ki niporitci.’ Deutéronome 25.5-6

²⁵ Tawakopan iriniwok ota ka ici tacikeikw, nicowaso e taciwakopanen e owitcicanitotcik. Anahwe ka mawotci kiceatisitc ki nipowiw. Ki tca poni pimatisiw aka e ki otci taritci onitcanica. Peikw tca ocima kitci nipowiritci aniheriw okoma ka nakatatc.

²⁶ Ka niconiwitc tca octesimaw ki wikimew anihi owitimwa. Kaie wir ki poni pimatisiw. Minawatc kiapatc anahwe ka nictoniwitc octesimaw peikon kaie wir ka ki iciwepasitc. Nac kaskina aniki ka owitcicanitotcik, ekoni kaie wirawaw ka ki iciwepasitcik.

²⁷ Kek mamitcitc kaie wir ki poni pimatisiw anahwe cikaw.

²⁸ Nikotin tca apitcipatawe aniki ka poni pimatisitcik, awin ni mia ke okomitc? Aniki meka kaskina e nicowatcitcik ki iti wikimewok anihi iskwewa?”

²⁹ Itikowok Cecoca: “Arotc kit iteritenawaw, osam aka e kiskeritamekw Kice Manito Omasinahikan kaie apitc e mackawisitc Kice Manito.

³⁰ Tapwe wirata, apitcipatawe ka nipotcik, nama kata wikimitowok iriniwok kirika iskwewok. Aric kata ici pimatisiwok mia mitowi aceriwa e ici pimatisiritci wakwek ka tacikeritci.

³¹ Kitci ki tca kiskeritamekw ke icinakok apitcipaniwoke, nama ia wiskat ki ki otci tapwatenawaw anihe ka ki ititakw Kice Manito Omasinahikanik, e itemakanik:

³² ‘Nin Abraham Okice Manitoma, kaie Isak, acitc Cakop.’ Exode 3.6 Kice Manito anahwe, ka pimatisitcik ni iriniwok Okice Manitomiwaw, namaiew ni ka poni pimatisitcik.”

³³ Kaskina tca iriniwok ka ki petawatcik ki micta mamiskasitawewok e ici kiskinohamakeritci.

Irakonikewin ka mawotci kicteritakok

³⁴ Ka ickwa petaketcik aniki Pharisien iriniwok ka ki isparinik, Cecoc e ki cakosimatc anahweriw Sadducéen iriniwa, aci mawotcihitowok.

³⁵ Peikw neta e tacitcik, ka kiskinohamaketc cota aiamihe irakonikewiniw, wikokwe paciwirekopan Cecoca arotc kitci iteritci, ke ki otci itactahoratcik. Ekoni tca e itatc:

³⁶ “Kiskinohamake iriniw, kekw irakonikewin ka mawotci kicteritakok neta aiamihe irakonikewinik?”

³⁷ Aci itew Cecoc: “‘Ki ka sakihaw Teperitciketc Kikice Manitom kaskina e irikokotehein, kaie tekaci kitcitcakocik, acitc kimitoneritcikanik.’ Deutéronome 6.5

³⁸ Enko ni irakonikewin ka mawotci micak kaie ka kicteritakok.

³⁹ Minawatc tca, enko ohwe kotak irakonikewin ka micta kicteritakok: ‘Ki ka sakihaw kiwitc iriniw mia mitowi e asitci sakihitisoin.’ Lévitique 19.18

⁴⁰ Anihi irakonikewina e niciki, ekota neta wetciparinik kaskina otirakonikewin Moïse acitc kaskina ka ki ici kiskinohamaketcik ka nikan tipatcimowaspan.”

Anahwe ka ki pe iciticohikotc Kice Manitowa kirika Okimaw Tapit

⁴¹ Mekwata e mawotcihitowakopanen aniki Pharisien iriniwok, aci kokwetcimikowok Cecoca, ohweriw e iteritci:

⁴² “Tan kirawaw e iterimekw Krist, anihi Kice Manito ka ki itetc kitci pe iciticohwatc kitci akwacimiweritci? Awin ni anihi otaniskotape omocoma?” Aci itewok: “Okimaw Tapit, enko anihi otaniskotape omocoma.”

⁴³ Itikowok Cecoca: “Kekwariw tca Tapit, wetci pitciteheckakotc Miro Manitowa, ekoni wetci ki icinikatatc ‘Ka Tiperimitc’? Tapit meka ki itew:

⁴⁴ ‘Teperitciketc Kice Manito ki itew anihi Ka Tiperimimitc: Pe nta api ninihiwinik, nac kitci tepahakik ka cikerimiskik, kir tekaci kitci tiperimatcik.’ Psaumes 110.1

⁴⁵ Tapit ki icinikatew ‘Ka Tiperimimitc’ anihi ka ki itespan Kice Manito kitci pe iciticohwatc kitci akwacimiweritci. Tan tca ke isparinik kitci ki otaniskotape omocomitc anihi Tapita?”

⁴⁶ Nama otci peikw neta e tacitcik ki otci miskam kekociciriw ke ici acitematc. Ekoni kaie esko aniheriw apitc kicikarik nama aci awik ki otci wi kokwetcimew kekociciriw.