Matio 21 - Kice Manito Ocki Omirwatcimowin

Cecoc e pitaketc Jérusalem otenak

¹ Apitc ka iti pecowapatakik Jérusalem otenak Cecoc kirika owitcewakana, aci e iti takocikik otenacik Bethfagé, nte matinacik Mont des Oliviers ka icinikatek ka ici takonik, aci nicw neta e taciritci owitcewakana ki itew Cecoc:

² “Icakw nete otenacik, nte nikanik ka takok. Takociniekwe nete, tecikotc ki ka wapamawaw atikw e takopisotc, kirika otatikocicima e witcikapowictakotc. Ki ka apikonawawok. Ote tca ki ka pe iciwirewok.

³ Kecpin awik kokwetcimitakwe: ‘Kekwan wetci apikonekok,’ ki ka itawaw: ‘Teperitciketc wi apatcihew.’ Tecikotc kata pakitinew kitci matcewirakaniwiritci.”

⁴ Ekoni ke isparik kitci ki otcitciparik aniheriw ka ki itespan weckatc peikw ka nikan tipatcimospan:

⁵ “Witamawakok aniki Sion otenak ka taciketcik: Kanawapatamokw! Aci pe takociniw kokimamiwaw e pe natawapamitakw, e micta roskitehetc, atikok e ki okitapitc, atikocicik apiw, noce atikw onitcanica.” Zacharie 9.9

⁶ Aci kata matcawok Cecoc owitcewakana e nicitcik, e tca itotisketcik kaskina ka ki itakaniwitcik.

⁷ Ki pe iciwirewok aniheriw atikwa kirika atikocica. Ki actawewok ospiskonirik okapotowaniwawa, e tca okitapitc nta Cecoc.

⁸ Ani apitc micta mitcetinaniwonikopan neta meskanak. Mitcet iriniwok tacowekititowakopan okapotowaniwaw motcik ite ke ici tatokoskeritci anahweriw atikwa acitc atikocica. Kotakihik kickicwewakopan cikopiwa, meskanak e aiarawakopanen.

⁹ Aniki ka nikanickowatcik Cecoca neta meskanak kaie kotakihik ka nosanehwatcik tepitepwewok, e aitetcik: “Icperitakosiw anahwe Tapit Okosa! Caweritakosiw anahwe ka pe iciticohikotc Teperitcikeritci! Icperitakosiw Kice Manito, icpimik ka tatc!”

¹⁰ Kotc ka pitaketc Cecoc neta Jérusalem otenak, ki micta oraparohowok ka wapamatcik kaskina neta ka taciketcik, e kokwetcimitotcik: “Awin anahwe iriniw?”

¹¹ Ki tca itakaniwiwok: “Enko anahwe ka nikan tipatcimotc, Cecoc, Nazareth otenacik ka otcitc, Galilée askik itekera!”

E orowiticohowetc Cecoc kitci aiamihe mikiwamik

¹² Aci kitci aiamihe mikiwamik iti pitakew Cecoc. Kaskina iti orowiticohwew anihi ka ataweritci acitc ka otapinasoritci neta. Ki kwetipiwepinamwew omitcisowakanatikoriw iriniwa ka meckotanamiritci coriariw, kirika ki kwetipiwepinamwew otetapiwakaniwariw anahweriw iriniwa ka ataweritci omemewa.

¹³ Minawatc ki itew: “Itemakan Kice Manito Omasinahikanik: ‘Kata icinikatew nimikiwam aiamihe mikiwam. Ekota meka neta e taci aiamihaniwok.’ Ésaïe 56.7 Aric kirawaw, ki ki ocitanawaw mia kimotiwikiwam kitci irapatak!”

¹⁴ Iriniwok aka ka wapitcik kirika ka maskisitcik ki pe natawapamewok Cecoca neta kitci aiamihe mikiwamik kirika ki kikehikowok.

¹⁵ Cota makatewokorewok ka tiperitakik kirika ka kiskinohamaketcik cota aiamihe irakonikewiniw ki kiciwasiwok ka wapatakik ka aitotamiritci e matawinakonik, kaie ka wapamatcik awaca e tepitepweritci neta kitci aiamihe mikiwamik, e iteritci: “Icperitakosiriw Tapit Okosa!”

¹⁶ Aci itewok Cecoca: “Ki petawawok ia e itetcik?” “Ehe,” itikowok Cecoca. “Nama ia ni wiskat ki ki otci tapwatenawaw anihe ka masinatek Kice Manito Omasinahikanik? ‘Ki ki toten wawatc awacak kaie awacicicak kitci mirwatcimiskik.’” Psaumes 8.3

¹⁷ Minawatc ki nakatew, e orowitc neta otenak, nete e icatc otenacik Béthanie ka icinikaterik, ekota ka nipatc.

Wapiminatikwa e anwerimatc Cecoc

¹⁸ Minawatc kecepawonik, mekwata e pimotespan, e pe kiwe icatc otenak, pakatepan Cecoc.

¹⁹ Opimeskana ki wapamew wapiminatikwa. Ki natawapamew pecotcik. Tepirak nipiciwiriw anihi mictikwa. Aci itew anihi wapiminatikwa: “Nama wiskat aci kata tawok kiwapiminimak!” Tecikotc anahwe wapiminatikw paso.

²⁰ Ka wapatakik aniheriw Cecoc owitcewakana, ki kockowapamowok. Ki kokwetcimewok Cecoca: “Kekwariw wetci keskat pasotc anahwe wapiminatikw?”

²¹ Itikowok Cecoca: “Tapwe ohwe ka witamatakok: kecpin e tapwerimekw Kice Manito, kaie aka e anwetamekw, nama tepirak ki ta totenawaw aniheriw ka ki totawak anahwe wapiminatikw, aric wawatc ki ka ki itwanawaw anihe matinacic: ‘Atcitica nta, pakope kwackoti tca neta kitcikamik,’ ekoni tapwe ke isparikipan.

²² Kecpin tapweritamekwe, ki ka mirikowinawaw kaskina kekocic ke ici nataweritamekw e aiamihaiekw.”

Tante wetciparinik otiperitamowin Cecoc

²³ Minawatc Cecoc iti pitakew kitci aiamihe mikiwamik e iti kiskinohamaketc. Pe iti natawapamiko cota makatewokorewa ka tiperitamiritci kirika cota aiamihe okimawa, e tca kokwetcimikotc: “Witamacinan, tante wetciparik kitiperitamowin kitci itotiskein? Awin ka ki mirisk aniheriw?”

²⁴ Itew Cecoc: “Kaie nin peikw kekocic ki ka kokwetcimitinawaw. Kecpin naskamowiekwe, ki ka witamatinawaw nte wetciparik nitiperitamowin kitci itotiskeian.

²⁵ Awin ka ki pe iciticohwatc Capatisa kitci pe nta sikahatakeritci? Kice Manito kekotc ma iriniwok?” Aci aniki iriniwok aimihitowok, e aititotcik: “Kecpin iteikwe: ‘Kice Manito ni ka ki pe iciticohwatc,’ ki ka kokwetcimikono: ‘Kekwan tca wetci aka ki otci tapwerimekw Capatis?’

²⁶ Kecpin aric iteikwe: ‘Iriniwok ka ki pe iciticohwatcik,’ ki ta koctanowok aniki iriniwok e mitcetitcik ke ki totakik. Tapweritamok meka e ki pe nikan tipatcimorispana anihi Capatisa Kice Manito otci.”

²⁷ Naskamoctawewok aniki ka nikaniwitcik Cecoca: “Nama ni kiskeritenan.” Kaie wir naskamo Cecoc: “Ka! Nama meka tca kaie nin ki ka witamatinawaw nte wetciparik nitiperitamowin kitci itotiskewak.”

Atisokanicic: Peikw iriniw kirika nicw okosa

²⁸ Minawatc ki itew Cecoc: “Tan e iteritamekw ohwe atisokan? Takopan iriniw e niciritci okosa. Ki itew anihi ka mawotci kiceatisiritci: ‘Nikosis, anotc ke mi kicikak, matca nta otamiro kitikan askik.’

²⁹ ‘Nama,’ ki itiko anihi okosa. Aric nanake, aci pitoc ki iteritam anahwe ockinikiw. Ki icaw neta kitikan askik.

³⁰ Aci minawatc anahwe iriniw, peikon e itatc anihi kotakihi okosa. Aci wir ki itiko: ‘Ehe, nitata, ni ka ican.’ Nama aric ki otci icaw.

³¹ Tan anahwe mia nta e nicitcik ka ki itotisketc e ici nataweritamiritci otawiwa?” “Anahwe nictam ka ki itakaniwitc,” itewok. Aci itew Cecoc: “Tapwe ohwe ka witamatakok: ka natockaketcik kaie iskwewok orina ka nosanetatcik matci pimatisiwiniw, wirawaw kirawe ki ka nikanickakowawok Kice Manito Okimawinik e pitaketcik.

³² Capatis meka ki ki natawapamikowaw e wapatahitakw miro meskanariw icikowisk itatisiwinik, nama aric ki ki otci wi tapwetowawaw. Aric aniki ka natockaketcik kirika iskwewok orina ka nosanetatcik matci pimatisiwiniw ki tapwetawewok wirawaw. Misawatc e ki wapatamekw anihe, nama ki ki otci kweskatisinawaw kitci tapwerimekw.”

Atisokanicic: Kitike iriniwok ka wi makonakik askiriw e ki awihakaniwitcik

³³ “Natotamokw ohwe kotak atisokanicic: tapan peikw iriniw ka ki kitiketc cweminatikwa okitikan askik. Ki waskaskaham kitci takonik opimetakarik. Ki waritawokahikew neta ke ici camakohwakaniwiritci cwemina. Kirika ki ocitaw mikiwamiciciriw e ki icpaskahak, warawik kitci ki wapatcikaterik e nanakatcitakaniwonik okitikan aski. Minawatc ki awihew kitike otamiro iriniwa aniheriw okitikan aski. Ekoni e ici matcatc, kitci pa pimatisitc.

³⁴ Apitc wetcitciparinik kitci mawotcihakaniwiritci cwemina, aci ki iciticahwew otirinima kitci natawapamaritci anahweriw kitike otamiro iriniwa kitci tca mirikotc irikik cwemina ka ki acotamatotcik kitci mirakaniwitc e ki awihiwetc otaski.

³⁵ Aric aniki ka ki iciticohwakaniwitcik ki makonikowok anahweriw otamiro iriniwa. Peikw ki macikowakaniwiw, kotak ki nipahakaniwiw, minawatc anaha kotak ki pe mosinihakaniwiw, nac e nipotc.

³⁶ Aci anahwe iriniw ka tiperitak ki iciticahwew kiapatc kotakeriw iriniwa kirawe e mitcetiritci patok nictam ka iciticohowetc, peikon aric ka totawakaniwiritci.

³⁷ Kek nac ki iciticahwew tipirawe okosa kitikan askik, e iteritak: ‘Aniki ka ki awihakik nitaskiriw, otcitakotc nikosa kata kicterimewok.’

³⁸ Aric ka wapamatcik e takociniritci okosiriw aniki otamiro iriniwok, ki aititowok: ‘Enko anaha ke tiperitak nanake! Ahw! Ki ka nta nipahano! Kirano tca ki ka tiperitamawano otaski!’

³⁹ Ki makonewok. Ki orowepinewok nete kitikan askik. Nac e ki nipahatcik.”

⁴⁰ Kokwetcikemo Cecoc, e itetc: “Takocike anaha ka tiperitak kitikan askiriw, tan ke totawatc anahweriw otamiro iriniwa?”

⁴¹ Itiko: “Nama kata mana nipahew anahweriw matci iriniwa. Kotakeriw otamiro iriniwa kata awihew aniheriw okitikan aski, ke mirikotc irikik cwemina ka acterik kitci mirakaniwitc, apitc mawotcitakaniwonike.”

⁴² Minawatc itew Cecoc: “Nama ia wiskat ki ki otci tapwatenawaw e itasinaterik Kice Manito Omasinahikanik? ‘Anihi asiniwa ka ki wepinatcik manike iriniwok, e ki iteritakik “nama wiec irapatisiw,” enko anihi aci ka mawotci kictapatisiritci. Wir Teperitciketc ka ki totak. Ki micta mirwinamwano.’” Psaumes 118.22-23

⁴³ Kiapatc itew Cecoc: “Ekoni wetci ititakok, ki ka maninamakowinawaw Kice Manito Okimawin, kotakihik iriniwok kitci ki acotamawakaniwitcik ke miro nosanetatcik. [

⁴⁴ Anahwe ke pakicik neta asinik kata apitcicin. Kecpin kaie anahwe asini pactackowate awiriwa, kata apitcickosoriwa.]”

⁴⁵ Aniki cota makatewokorewok ka tiperitakik kirika Pharisien iriniwok ki petamok Cecoca otatisokaniciciriw. Ki nisitotamok e atisokatikoritci.

⁴⁶ Ki tca natowi totamwakopan kitci ki makonatcik, aric koctewakopan iriniwa e mitcetiritci e iterimaritci Cecoca “ka nikan tipatcimotc Kice Manitowa otci.”