Matio 19 - Kice Manito Ocki Omirwatcimowin

E kiskinohamaketc Cecoc aka kitci wepinitonaniwonik

¹ Ka ickwa aitespan aniheriw Cecoc, ki matcaw neta Galilée askik, nete e icatc itekera Judée askik, akam sipik Jourdain itekera.

² Micta mitcetiripana iriniwa ka nosanehikotc kaie ki kikehew ka akosiritci e aitarispana neta.

³ Aci atita Pharisien iriniwa pe natcikapowictako, e wikokwe paciwirikotc, arotc kitci itetc ke ki otci itactahorakaniwitc. Aci kokwetcimewok Cecoca: “Kirano kitirakonikewinino, masinatew ia matci kitci wepinatc iriniw okoma kotc arotc kekociciriw otci?”

⁴ Aci itew Cecoc: “Nama ia ki ki otci tapwatenawaw anihe ka itemakak Kice Manito Omasinahikanik: ‘Ickotok ka kitciparitc Kice Manito kaskina kekociciriw ka kiceritak, iriniwa kaie iskwewa ki kicerimew.’ Genèse 1.27; 5.2

⁵ Kaie itemakaniw: ‘Ekoni ke otci nakatatc onikihikowa iriniw, kitci witci tacikematc owiwa, kitci mamweritakositcik.

⁶ Nama aci nicw kata iteritakosiwok, aric mia peikw awik.’ Genèse 2.24 Nama tca acteriw iriniw kitci tipananak aniheriw Kice Manitowa ka ki mamowinamiritci!”

⁷ Aci kokwetcimiko anahweriw Pharisien iriniwa: “Kekwariw tca wetci ki itetc Moïse, kecpin iriniw e matcetcitcicohatc okoma, masinahikaniw kata ocitomawew e witamawatc aka aci e wikimatc anihi okoma?”

⁸ Itew Cecoc: “Moïse ki pakitinam kitci wepinekok kitiskwemiwawok, osam aka e wi nisitotamekw okiskinohamakewin. Aric weckatc ickotok Kice Manito ka kiceritak kaskina kekociciriw, pitoc ki icinakoniw.

⁹ Ki witamatinawaw: kecpin iriniw e matceticohwatc okoma, aka e ki otci wecimikotc, e tca nipowitc kotakihi iskwewa, pacikwatisiw.”

¹⁰ Aci itiko owitcewakana: “Kecpin tca aka e mireritcikaterik iriniw kitci wepinatc okoma kotc e ici nataweritak, kirawe kata mirwacinipan aka kitci nipowitc.”

¹¹ Itikowok Cecoca: “Nama kaskina iriniwok kackitawok tapwe kitci naheritakik aniheriw kiskinohamakewiniw, aric tepirak aniki iriniwok ka ki mirikotcik Kice Manitowa kitci ici naheritakik.

¹² Mitceniw ke ki otci isparitc awik aka kitci ki nipowitc: atita nama kackitawok, osam ekoni e ki icinakositcik esko ka nitawikitcik. Kotakihik tca nama ki nipowiwok osam e ki matocwakaniwitcik kitci icinakositcik. Minawatc kotakihik, wetci aka wi nipowitcik, osam e wi atoskectawatcik Kice Manitowa Okimawinik. Anahwe tca ka kackitatc kitci naheritak ohweriw kiskinohamakewiniw, acteriw kitci ici naheritak.”

Cecoc e aiamitowatatc awaca

¹³ Iriniwok pe iciwirepanak awaca kitci takinikoritci Cecoca, kitci tca aiamitowatikoritci. Aric aniki Cecoc owitcewakana ki otcinehwewok anahweriw iriniwa.

¹⁴ Itew tca Cecoc: “Pakitinakok awacak kitci pe natawapamitcik. Akawir otcinehwakok. Iriniwok meka ka asperimototawitcik mia ohki awacak, enko aniki ka ici tatakik Kice Manitowa Okimawiniw.”

¹⁵ Ekoni e ici takinatc anihi awaca, tato nta e taciritci e aiamitowatatc. Minawatc ki iti matcaw.

Peikw ockinikiw e micikitatc

¹⁶ Peikw iriniw iti natcikapowictawew Cecoca, e kokwetcimatc: “Kiskinohamake iriniw, tan ke ki ici miro totaman kitci ki mirikoian kakike pimatisiwin?”

¹⁷ Cecoc itew: “Kekwan wetci kokwetcimiin ke ki ici miro totcikatek? Tepirak peikociw anaha mocak e miro totak. Enko na Kice Manito. Kecpin wi pitakeine kakike pimatisiwinik, kaskina irakonikewina kitci nosanetain.”

¹⁸ “Tan anihi irakonikewina,” itiko iriniwa. Itew Cecoc: “Akawir manoho. Akawir pacikwatisi. Akawir kimoti. Akawir kiraski, awik kitci ki otci atamerimakaniwitc.

¹⁹ Kicterimi kotawi kaie kikawi. Ki ka sakihawok kiwitc iriniwok mia mitowi e asitci sakihitisoin.” Exode 20.12-16; Deutéronome 5.16-20; Lévitique 19.18

²⁰ Aci itew anahwe ockinikiw: “Aci ni ki sapiten kaskina anihi irakonikewina. Kekwan ni kiapatc ke ki totaman?”

²¹ Itew Cecoc: “Kecpin tekaci mia wa itatisiwonen, matca nta atawe kaskina e ici tataman. Ki ka tca mamirawok ka kitimakisitcik aniheriw coriariw irikik ke kackitain. Meckotc tca wakwek ki ka micikitan. Petcimote pe nosanehici.”

²² Aric anahwe ockinikiw ka petak aniheriw e itakaniwitc ki matcaw, e micta kackeritak. Mictahi meka micikitapan.

²³ Cecoc itew owitcewakana: “Tapwe ohwe ka witamatakok: arimaniw iriniw e micikitatc kitci pitaketc Kice Manitowa Okimawinik.

²⁴ Ohwe kaie ki witamatinawaw: arimaniw micta atikw kitci ki pitaketc e iriko pokoneckarik caponikaniw. Kirawe aric kiapatc arimaniw iriniw e micikitatc kitci ki pitaketc Kice Manitowa Okimawinik.”

²⁵ Ka petakik aniheriw Cecoc owitcewakana, ki micta kockopariwok kirika e itetcik: “Awin tca ke ki akwacimakaniwitc?”

²⁶ Kanawapamew Cecoc, e itatc: “Iriniwok nama kackitawok kitci akwacimitisotcik. Wir aric Kice Manito kackitaw kitci akwacimiwetc. Kaskina meka kekociciriw wir kackitaw.”

²⁷ Ekoni tca e ici arimwetc Pien, e itetc: “Natota! Kaskina kekocic ni ki pakiteritenan e nosanehitak. Tan tca ke iciwepasiak?”

²⁸ Itew Cecoc: “Tapwe ohwe ka witamatakok: apitc kaskina kekocic ocitakaniwoke mia ocki kitci icinakok, anahwe Ka ki pe iriniwihitisotc pe nta apite neta okimaw tetapiwakanik ka micta kicteritakonik kitci tiperitciketc, kirawaw e mitato acitc niciekw ka ki pe nosanehwiekw kaie kirawaw papeikw okimaw tetapiwakanik ki ka apinawaw, kitci tipaskonekok Israël iriniwok e mitato acitc nicw otenwesitcik.

²⁹ Kaskina aniki ka ki nakatakik omikiwamiwawa nin otci, kaie otaskiwawa, kekotc ka ki nakatatcik octesiwawa, omisiwawa, ocimiwawa, otawiwawa, okawiwawa, kekotc onitcaniciwawa, awocamec mitato mitana tatwaw kata mirakaniwiwok e iteritakonik, kaie kakike pimatisiwiniw kata mirakaniwiwok.

³⁰ Aric mitcet iriniwok anotc ka nikanickatcik, kecko otananik kata pimotewok. Aniki tca anotc ka otananickatcik kata nikanickawok.”