Matio 15 - Kice Manito Ocki Omirwatcimowin

Weckatc cota iriniwok okiskinohamakewiniwaw

¹ Minawatc atita Pharisien iriniwok kirika ka kiskinohamaketcik cota aiamihe irakonikewiniw ki pe natawapamewok Cecoca, Jérusalem otenak e ki pe ototetcik. Kokwetcimewok Cecoca, e itetcik:

² “Kekwariw wetci aka sapitakik kiwitcewakanak weckatc okiskinohamakewiniwariw kitaniskotape kimocominowa? Nama meka wewerita kasitcitcewok epwamoci mitcisotcik, kotc ka ki ici kiskinohamakoikw kitci itotiskeikw!”

³ Aci naskamawew Cecoc, e itatc: “Kaie kirawaw tca, kekwan wetci aka sapitamekw Kice Manito otirakonikewin, kitci tca nosanetaiekw anihe kirawaw tipirawe kikiskinohamakewiniwaw?

⁴ Ki itew meka Kice Manito: ‘Kicterimik kotawi kaie kikawi,’ Exode 10.12; Deutéronome 5.16 kaie ohweriw: ‘Anahwe ka marerimatc otawiwa kekotc okawiwa, acteriw kitci nipahakaniwitc.’ Exode 21.17

⁵ Aric kirawaw ki kiskinohamakanawaw aka arimatc kitci witcihatc iriniw onikihikwa e kitimakisiritci, kecpin e itatc: ‘Nama ki ka ki witcihitinawaw, osam meka e ki ickwa nespi tapweian kitci aiamihe pakitinaman Kice Manito otci, anihe ke ki miritakokipan.’

⁶ Kecpin tca e nosanetatc anahwe iriniw kikiskinohamakewiniwariw, iteritam: ‘Nama aci arimatc ni ka witcihaw notawi.’ Ekoni e ici wi pikotaiekw Kice Manito otitewin, kitci tca nosanetaiekw anihe kirawaw tipirawe kikiskinohamakewiniwaw.

⁷ Ki micta miro iriniwikasonawaw! Tapwepan Ésaïe, anahwe weckatc ka ki nikan tipatcimospan, kirawaw e ki arimomitakw, e ki itetc:

⁸ ‘Itew Kice Manito: Ni kicterimikok iriniwok e mirwatcimitcik, otitewiniwaw e apatcitatcik, aric otehiwak nama ni kicterimikok.

⁹ Nama wiec irapataniw e nipiskoctawitcik. Aniheriw meka ka ici kiskinohamaketcik, namaieriw ni Kice Manito okiskinohamakewin, iriniwok ni tepirak otirakonikewiniwaw.’” Ésaïe 29.13

Kekwariw ka ometcickakotc awik otcitcakocik itekera

¹⁰ Minawatc Cecoc ki wicamew iriniwa ka ici mitcetiritci kitci pe natawapamikotc, e tca itatc: “Kaskina natotacikw ohwe ke iteian, kitci miro nisitotamekw:

¹¹ Nama ometcickako iriniw otcitcakocik itekera, e ki mitcik kekociciriw. Kotc e itetc aka e mirowacinik, enkweriw ka ometcickakotc.”

¹² Aci owitcewakana pe natcikapowictako Cecoc, e itikotc: “Ki kiskeriten ia Pharisien iriniwok e ki kiciwasitcik ka petaskik aniheriw ka ki itewotc?”

¹³ Ki itew Cecoc: “Kaskina kitikan aka ka ki otci matce kitiketc Notawi ka taciketc wakwek kata monipitcikatew.

¹⁴ Ponihakok aniki Pharisien iriniwok, mia e iteritakositcik iriniwok aka ka wapitcik kaie tca ka iterimitisotcik kitci ki keskinowiwiratcik kotakihi iriniwa aka ka wapiritci. Kecpin meka iriniw aka ka wapitc e wi keskinowewiratc kotakihi iriniwa aka ka wapiritci, tapickotc e nicitcik kata posipariwok e ici waratawokarik.”

¹⁵ Aci Pien arimwew e itetc: “Wewerita witamacinan wa itemakak anihe kitatisokan.”

¹⁶ Aci itew Cecoc: “Kiapatc ia kaie kirawaw nama ki kackitanawaw kitci nisitotamekw?

¹⁷ Nama ani ki nisitotenawaw ohwe: kaskina kekociciriw ka ici kotak awik, minawatc orowipariniw.

¹⁸ Kotc e itetc awik, otehik otcipariniw. Enkweriw ka ometcickakotc otcitcakocik itekera.

¹⁹ Otehik meka otcipariniw e matci iteritak, kirika e manohotc, e pacikwatisitc, e matci pimatisitc, e kimotitc, e kiraskitc acitc e mareritciketc.

²⁰ Enkweriw ka otciparinik iriniw kitci ometciwitc otcitcakocik itekera! Aric e mitcisotc aka e kasitcitcetc, namaieriw ni aniheriw ka ometcickakotc.”

Iskwew pitoc ka otcitc e tapwerimatc Cecoca

²¹ Matcaw Cecoc nta ka taci kiskinohamakespan, nete itekera e icatc otenawa ka ici takoki, Tyr acitc Sidon ka icinikateki.

²² Tapan neta peikw iskwew, Canaan askik itekera e otcirikopanen otaniskotape omocoma. Anahwe iskwew ki pe natcikapowictawew Cecoca, e tepwatatc: “Teperitcikein, Tapit Okosa, kitimakerimici! Nitanis mictahi nekatcihiko matci manitowa e ki pitciteheckakotc!”

²³ Nama aric ki otci kito Cecoc. Kek owitcewakana natcikapowictako, e itikotc: “Matceticoho anahwe iskwew. Nama ponitaw e tepitepwetc e nosanehitokw!”

²⁴ Itew Cecoc: “Ni ki pe iciticohokowin kitci witcihakik Israël iriniwok, mia maritcenicak ka onicikik e iteritakositcik.”

²⁵ Aric anahwe iskwew pe nta nipiskoctawew Cecoca, e itatc: “Teperitcikein, witcihici!”

²⁶ Itew Cecoc: “Nama mirwaciniw e maskamakaniwitcik awacak omitcimimiwaw, atimwa tca kitci iciwepinamowakaniwiritci.”

²⁷ “Tapwe anihe ka itein, Teperitcikein,” itew anahwe iskwew. “Aric peikon mitciwok atimok mitcimiriw e ickotcikaterik mitcisowakanatikok e otci pakitinik, okimamiwawa ka ki kitickinamiritci.”

²⁸ Aci itiko Cecoca: “Micaw kit asperimowin! Ki mirikowin anihe ka ici nataweritaman.” Ekoni mia ka mirwatisiritci anihi otanisa.

Cecoc e kikehatc mitcet ka akosiritci

²⁹ Cecoc neta ki otci matcaw, nete e icatc rarewak Galilée sakihikanik. Ki okitamatciwew. Ki apiw.

³⁰ Micta pe mitcetiriwa e pe natawapamikotc iriniwa, e pecowaritci ka akosiritci: ka atciwockaritci, aka ka wapiritci, ka maskisiritci, aka ka nitaweritci, acitc kotakihi ka akosiritci. Neta pe nta arakaniwiriwa e icisitepitc Cecoc. Kaskina ki kikehew.

³¹ Aniki iriniwok ki micta kockowapamowok ka wapamatcik anahweriw iriniwa aka ka nitaweritci aci e nitaweritci, ka maskisiritci aci e ki kikehakaniwiritci, ka atciwockaritci aci e miro pimoteritci kaie aka ka wapiritci aci e wapiritci. Ki tca micta mirwatcimewok Israël iriniwa Okice Manitomiwariw.

Cecoc e acamatc 4 000 iriniwa

³² Cecoc wicamew owitcewakana, e itatc: “Ni kitimakerimawok aniki iriniwok. Aci meka nicto kickwa esko pe witci tacikemitcik ota, aka tca tekaci e takonik kekociciriw ke mitcikik. Nama tca ni wi kiweticohwawok e pakatetcik. Matci meka kata iti pakiciniwok meskanak e kiwetcik, aka e sapitcik, aka moci e ki otci mitcisotcik.”

³³ Kokwetcimiko owitcewakana: “Tante tca ke ki otinamak mitcim kitci acamawikok ni tca e tacitcik iriniwok, ota e ici cipewatawokak?”

³⁴ Kokwetcimikowok Cecoca: “Tan e tacitcik kipakwecikanimiwawok?” Ki itewok: “Nicowaso taciwok acitc atita namesicicak.”

³⁵ Aci Cecoc itew anihi iriniwa e mitcetiritci kitci aipiritci motcik.

³⁶ Minawatc ki otapinew anihi e nicowatciritci pakwecikana acitc anihi namesa. Mikwetc ki itew Kice Manitowa. Ki pakwepitew, e miratc anahweriw owitcewakana. Minawatc aniki witcewakanak ki mamiriwewok aniheriw kaskina iriniwa.

³⁷ Tato nta e taciritci ki mitcisoriwa kaie ki miro tipipaririwa aniheriw mitcimiriw. Aniki Cecoc owitcewakana ki mawotcitawok kiapatc nicowaso pakitenakaniw e mockinerik mitcimiriw e ki ickoparinik.

³⁸ Aniki ka ki mitcisotcik, newaw kice mitato mitana taciwakopan, tepirak iriniwok e akimakaniwitcik, aka e ki otci akimakaniwitcik iskwewok acitc awacak.

³⁹ Ka kiweticohwatc anihi e mitcetiritci iriniwa Cecoc, ki positcimew, nete e icitcimetc Magadan askik itekera.