Matio 12 - Kice Manito Ocki Omirwatcimowin

Cecoc e arwepi kicikarik

¹ Peikwaw e arwepi kicikarik, Cecoc acockamopan kitikan askiriw kirika owitcewakana. Pakateripana anahweriw owitcewakana. Ekoni tca ka ici iti manipitaritci mirominockwa e mowaritci.

² Pharisien iriniwok ka wapamatcik ani e totamiritci, ki itewok Cecoca: “Kanawapamik kiwitcewakanak e totakik. Kitirakonikewinino nama nte itactew ani kitci totcikatek e arwepi kicikak!”

³ Aci itikowok Cecoca: “Nama ia ni wiskat ki ki otci tapwatenawaw anihe ka masinatek, aniheriw peikwaw e kicikarik ka ki totamwakopanen Okimaw Tapit kirika anahweriw iriniwa ka witcewikospan, e pakatewakopanen?

⁴ Ki pitakew Tapit Kice Manitowa otaiamihe mikiwamirik kitci natcipahatc neta pakwecikana ka ki pakitinakaniwiritci Kice Manitowa otci. Ki mowewok, wir acitc otirinima. Nama aric ata acteripan kitci mowatcik. Masinatew meka kitirakonikewininak tepirak makatewokorewok kitci mowatcik.

⁵ Kekotc ma, nama ia ki ki otci tapwatenawaw Moïse otirakonikewin e itacterik: e arwepi kicikarik makatewokorewok ka mitatcik kitci aiamihe mikiwamiriw otamirowok. Nama tca nosanetawok irakonikewiniw e arwepi kicikarik otci. Nama aric anweritakosiwok aniheriw otci.

⁶ Ki witamatinawaw tca, taw ota awik kirawe e kicteritakositc patok anihe kitci aiamihe mikiwam e asitci kicteritakok.

⁷ Kecpin tapwe ki nisitotamekw wa itemakak anihe ka masinatek neta Kice Manito Omasinahikanik: ‘Ni nataweriten kitci kitimakerimekw kiwitc iriniwaw, nama kitci aiamihe pakitinikeiekw, e ickwaswekok awesisak,’ Osée 6.6 nama ki ta ki otci anwerimataik aniki aka ka ki otci matci totakik.

⁸ Anahwe meka Ka ki pe iriniwihitisotc tiperitam e arwepi kicikarik.”

Iriniw otcitcik ka niponesitc

⁹ Ki matcaw Cecoc neta, nete e icatc e ici takonik ocota aiamihe mikiwamiwaw.

¹⁰ Pa tacikepan neta peikw iriniw e niponesitc otcitcik. Aniki Pharisien iriniwok neta ka tacikewaspan nantowapatamowakopan ke otci itactahoratcik Cecoca. Ekoni wetci kokwetcimatcik: “Itactew ia kitirakonikewininak kitci kikehakaniwitc awik e arwepi kicikarik?”

¹¹ Itikowok Cecoca: “Kecpin peikw awik neta e taciekw e peikociritci tepirak omaritcenicima, kecpin tca e posipariritci nte e pokonetawokarik e micta icpanarik mekwata e arwepi kicikarik, nama ia ni kata ki nta wikotcihew kitci orowitahatc neta?

¹² Iriniw ni kirawe mictahi kicteritakosiw patok maritcenic! Kitirakonikewinino tca itactew matci kitci miro totawakaniwitc awik e arwepi kicikarik.”

¹³ Aci Cecoc itew anihi iriniwa ka niponesiritci otcitcirik: “Pe icitcitceri.” Ekoni e ici icitcitcerictowatc anahwe iriniw. Ekoni e iti mirwatisitc, mia kotakeriw otcitci kitci icinakonik.

¹⁴ Pharisien iriniwok ki matcawok kirika ki arimotamok tan ke ki totakik kitci ki nipahakaniwiritci Cecoca.

Kice Manito otarotakana ka ki orapamatc

¹⁵ Cecoc ka petaketc aniheriw ka wi totamirispana anahweriw Pharisien iriniwa, ki matcaw neta. Mitcet iriniwa ki nosanehiko. Ki kikehew kaskina ka akosiritci.

¹⁶ Aric ki micta otcihiwew aka kitci tipatcimonaniwonik awin wir.

¹⁷ Ekoni ka ki isparinik, kitci ki tapwe otcitciparinik aniheriw weckatc ka ki masinahakipan anahwe ka nikan tipatcimospan, Ésaïe ka icinikasospan:

¹⁸ Itew Kice Manito: “Enko ohwe nitarotakan ka ki orapamak, anahwe ka sakihak kirika ka micta mirerimak. Ni ka miraw Nimiro Manitoma kitci pitciteheckakotc kirika kata pe tipatcimoctawew iriniwa kaskina wiec ota askik aniheriw icikowisk totakewiniw ke itactaian.

¹⁹ Nama awiriwa kata kikamew, nama kaie kata notakosiw. Nama kata petawakaniwiw kitci pa aiarimwetc meskanak.

²⁰ Nama kata pikotaw pisekaniw, aci ka cacikitik. Nama kata actaweham wactenamakaniw aka ka miro wacterik. Ekoni ke itotisketc nitarotakan, nac mocak icikowisk kitci ici pimatisinaniwonik.

²¹ Kaskina kaie iriniwok ota askik, tan kotc wetotetcik, kata asperimototawewok.” Ésaïe 42.1-4

Ka itetc Cecoc e ki itactahorakaniwitc

²² Pe iciwitowakaniwiw peikw iriniwa Cecoc, aka ka wapiritci kirika aka ka kackitaritci e arimweritci, osam e ki pitciteheckakoritci matci manitowa. Ki kikehew Cecoc anihi iriniwa. Ki tca kackitariw e arimweritci kaie ki wapiriw.

²³ Kaskina iriniwok neta ka tacikewaspan e mitcetitcik ki micta kockopariwok. Ki itewok: “Enko na potc anahwe Okimaw Tapit Okosa?”

²⁴ Aric Pharisien iriniwok ka petawatcik, ki itewok: “Anahwe iriniw kackitaw kitci matceticohwatc matci manitowa, osam e ki mirikotc Béelzébula, anihi ka tiperimaritci kaskina matci manitowa, kitci ici kackitatc!”

²⁵ Aric Cecoc kiskeritamopan e iteritamiritci. Aci tca itew: “Kecpin e matciparihitotcik iriniwok peikw okimawinik ka taciketcik, wirawaw tipirawe e macikotatotcik, nikotin kata oraparin anihe okimawin. Peikon kaie kecpin iriniwok ka taciketcik peikw otenak macikotatotawe, kekotc kecpin ka tcirowemitotcik matciparihitotawe, nama kinowec aci kaie wirawaw kata niciwinatcihitisowok.

²⁶ Kecpin Matci Manito matceticohwate anahweriw ka atoskectakotc, wir tipirawe matciparihitiso, taina! Tan tca kiapatc ke ki otci takonik okimawin?

²⁷ Kit itwanawaw e matceticohwakik matci manitowok, osam Béelzébul e ki miritc aniheriw kitci ici kackitawak. Kitirinimiwawok tca, awin ka miratc aniheriw kitci ici kackitaritci kitci matceticohwaritci? Wirawaw tipirawe wapatahiwewok aka mia e iteritamekw.

²⁸ Tapwe wirata, Kice Manito ni Omiro Manitoma ni ki mirikowin kitci kackitawak e matceticohwakik matci manitowok. Ekoni tca ka otci kiskeritakok aci e ki pe takociparinik Kice Manito Okimawin ota ka ici tacikeiekw.”

²⁹ “Nama awik kata ki pitakew omikiwamirik iriniwa ka mackawisiritci, kitci tca matcewitatc e ici tatamiritci, patoc kata takopitew anihi iriniwa ka mackawisiritci. Aric ickwa takopitate, aci neta kaskina kata ki matcewitawew ka ici takonik neta omikiwamirik.”

³⁰ “Anahwe aka ka witcewitc, ni wi cakotcihikw ni. Kirika anahwe aka ka witcihitc e mawotcihimaki iriniwa, oraticahwew.

³¹ Ekoni wetci witamatakok: iriniwok matci kata ki kasihamawakaniwiwok kaskina opactatowiniwawa kirika kaskina e ici marerimatcik Kice Manitowa. Aric anahwe ka marerimatc Miro Manitowa nama kata kasihamawakaniwiw.

³² Anahwe ka marerimatc anihi Ka ki pe iriniwihitisoritci kata kasihamawakaniwiw. Aric anahwe ka marerimatc Miro Manitowa, nama kata kasihamawakaniwiw, anotc mekwata peikon kaie misawatc kecko.”

Mictikw kirika owapiminima

³³ “Kecpin wapiminatikw e mirokitc, owapiminima kaie kata mirosiriwa. Kecpin aric aka e mirokitc wapiminatikw, nama kaie kata mirosiriwa owapiminima ke nitawikihatc. Nisitowinakosiw meka e apitc mirokikwen wapiminatikw, e wapamakaniwiritci owapiminima.

³⁴ Kirawaw ka micta matci iriniwiekw, mia tapickotc kinepikok ka itatisiekw! Nama ki ka ki miro arimwanawaw kecpin aka e miroteheiekw. Iriniw meka itew tan e ici takonik otehik.

³⁵ Iriniw e miro iriniwitc, otehik otinam ka mirwacinik kitci miro totak kirika kitci miro arimwetc, osam e mirotehetc. Awik e matci iriniwitc, otehik otinam ka maratanik kitci matci totak kirika kitci matci arimwetc, osam e matcitehetc.

³⁶ Ki witamatinawaw: takociparinike aniheriw ke kicikarik kitci tipaskonikaniwonik, kata acteriw iriniwok kitci witakik kaskina tan ka ki aitetcik e arimwetcik mekwata ka pimatisiwaspan ota askik.

³⁷ Ekoni meka ke otci tipaskonikoin, kaskina ka ki aitein, kitci tca itikoin ‘nama anweritakosiw’ kekotc ‘anweritakosiw.’”

E nataweritamawakaniwitc Cecoc kitci mata kackitatc

³⁸ Aci atita ka kiskinohamaketcik cota aiamihe irakonikewiniw kirika atita Pharisien iriniwok itewok Cecoca: “Kiskinohamake iriniw, ni nataweritenan kitci wapamitak e mata kackitain kitci ki kiskeritamak e apitc tapwe Kice Manito ka atoskectotc.”

³⁹ Ekoni e ici naskamowatc Cecoc, e itatc: “Iriniwok anotc ka matci iriniwitcik kirika aka ka nosanehwatcik Kice Manitowa ni nataweritamakok kitci mata kackitawak kitci kiskeritakik tapwe e atoskectawak Kice Manito. Nama aric kata mirakaniwiwok. Aci meka ickwa atisokowakaniwiwok weckatc ka ki iciwepasiritci anihi ka nikan tipatcimorispana, Jonas ka icinikasorispana. Ekoni tepirak ke ici kicawatcitamowakaniwitcik anotc iriniwok e mata kackitakaniwonik.

⁴⁰ Tapwe wirata anahwe Jonas nicto kickwa kirika nicto tipiskwa ki tacikekopan omisitarik micta namesa. Enko tca mitowiriw kaie wir ke isparitc anahwe Ka ki pe iriniwihitisotc: nicto kickwa kirika nicto tipiskwa kata tacikew atamik askik.

⁴¹ Iriniwok weckatc ka tacikewaspan Ninive otenak ki kweskatisiwok, ka petawatcik Jonasa e kakeskweritci. Aci anotc taw awik kirawe e kicteritakositc patok Jonas. Takociparinike aniheriw ke kicikarik kitci tipaskonikaniwonik, aniki Ninive iriniwok kata pasikowok kitci icikapowictawatcik anahweriw anotc iriniwa, kitci itactahoratcik aka ka wi kweskatisiritci.

⁴² Kaie wir weckatc okimakwew, cawonok ka ki pe otcitc, warawik ki pe ototew kitci ki pe natotawatc okimawa Salomon e aiarimweritci e omiro omitoneritcikaniritci. Aci anotc taw awik kirawe e kicteritakositc patok anihi okimawa Salomon. Takociparinike aniheriw ke kicikarik kitci tipaskonikaniwonik, kata pasiko anahwe okimakwew kitci icikapowictawatc kaie kitci itactahoratc anahweriw iriniwa anotc aka ka wi natotamiritci.”

Matci manito e kiwe pitciteheckowatc iriniwa

⁴³ “Kecpin peikw matci manito e orowictawatc iriniwa, nte pa aitacikew wiec ka ici cipewatawokarik, e nantowapatak nte ke ici taciketc. Aka tca e miskak,

⁴⁴ aci itew: ‘Ni ka natawapaten minawatc anihe nimikiwam ka ki nakataman.’ E kiwetc, miskam aniheriw mikiwamiriw aka awiriwa e tacikeritci, e miro wepahikanonik kaie e mirocterik.

⁴⁵ Ekoni kiapatc e ici matcatc e natcipahatc nicowaso kotakihi matci manitowa, kirawe kiapatc anahweriw e matcatikosiritci patok wir. Minawatc pe icawok tapickotc kitci taciketcik neta. Enko tca anahwe iriniw kirawe kiapatc mictahi kata nekatcitaw patok ickotok ka peikocirispana anihi matci manitowa. Ekoni peikon ke isparitcik ka matci iriniwitcik anotc ka pimatisitcik.”

Cecoc, okawiwa kirika owitcicana

⁴⁶ Kiapatc taci aimihepan Cecoc anihi iriniwa e mitcetiritci, mia apitc e pe takociniritci okawiwa kirika owitcicana. Orowitimik taci tacikeripana e wi aimihikotc.

⁴⁷ Kek awiriw itiko Cecoc: “Natota! Kikawi kirika kiwitcicanak orowitimik taci tacikewok. Nataweritamok kitci aimihiskik.”

⁴⁸ Cecoc itew anihi iriniwa: “Awin na nikawi, kaie awin aniki niwitcicanak?”

⁴⁹ Minawatc itohwew owitcewakana, e itetc: “Kanawapamakok, nikawi kirika niwitcicanak tacikewok ota.

⁵⁰ Anahwe meka awik ka aitotisketc e ici nataweritamiritci Notawiwa wakwek ka tacikeritci, enko na niwitcican kekotc nikawi.”