Matio 11 - Kice Manito Ocki Omirwatcimowin

Capatis ka pe iciticohwatc owitcewakana

¹ Ka ickwa witamawatc Cecoc ke aitotamiritci anahweriw owitcewakana e mitato acitc niciritci, ki matcaw neta, nte e pa icatc otenaskak e pa nta kiskinohamaketc kirika e pa kakeskwetc.

² Mekwata kipohotowikamikok e tacikespan Capatis, ki petakew e aitotamiritci Cecoca. Ki tca iciticahwew atita owitcewakana,

³ kitci nta kokwetcimaritci: “Kir ia ni Kice Manito ka ki itespan kitci pe iciticohwatc kitci akwacimiweritci kekotc ma kotak kiapatc kitci pehakitc?”

⁴ Itikowok Cecoca: “Matca nta witamawakw Capatis e ici petamekw kaie e ici wapatamekw:

⁵ Iriniwok aka ka wapiwaspan aci wapiwok, ka maskisiwaspan aci pimotewok, ka micta omikiwapinewaspan ki kikehakaniwiwok, ka kipitewaspan aci petamok, ka ki nipowaspan ki apitcipahakaniwiwok, minawatc ka kitimakisitcik witamawakaniwiwok Mirwatcimowiniw.

⁶ Caweritakosiw anahwe aka ke ponitatc e asperimototawitc.”

⁷ Ka ickwa matcatcik aniki Capatis owitcewakana, Cecoc ki iti aimihew iriniwa e mitcetiritci, Capatisa e arimomatc, e itetc: “Ka icaiekw neta askik ka ici cipewatawokak, awin ka ki iteritamekw kitci wapamekw? Iriniw ka otike cakosimakaniwitc, mia pisekan ia e aiatacitc e rotinik e iteritakositc? Nama ketcinatc!

⁸ Kekwan tca ka ki nta kanawapatamekw? Iriniw ia e micta mirwaspisotc? Aric aniki ka mirwaspisotcik nte tacikewok kice okimawa omikiwamirik.

⁹ Kekwan tca ka ki natawapatamekw? Iriniw ka nikan tipatcimotc? Ehe, ki witamatinawaw. Wawatc kaie kirawe kicteritakosiw patok awik ka nikan tipatcimotc.

¹⁰ Enko meka Capatis anahwe ka arimomakaniwispan Kice Manito Omasinahikanik ka ki masinaterik: Ki itew Kice Manito, ‘Ni ka iciticohwaw anahwe ke nikan witamaketc, ke nikanickask, kitci nta ocitamask meskanariw.’ Malachie 3.1

¹¹ Tapwe ohwe ka witamatakok: kaskina ka ki pe tacitcik iriniwok, nama wiskat ki otci taw awik kirawe kitci kicteritakositc patok Capatis. Peikon aric anahwe mawotci aka ka kicteritakositc nete tca Kice Manitowa Okimawinik kirawe wir kicteritakosiw patok Capatis.

¹² Esko nta ki kitciparitc Capatis e pa tipatcimotc, nac anotc, mictahi macihiwaniwon Kice Manito Okimawinik otci, kaie iriniwok ka macihiwetcik natowi totamok kitci matcikonakik.

¹³ Kaskina ka pe nikan tipatcimowaspan ki tipatatamok aniheriw Okimawiniw, kaie Moïse otirakonikewinik ki tipatcitcikateriw, nac apitc Capatis ka kitciparitc e tipatcimotc.

¹⁴ Kecpin tca wi tapwetowiekwe, Capatis, enko na anahwe Élie ka ki pe itatcimakaniwispan.

¹⁵ Wewerita natotamokw ohwe, kirawaw ka kackitaiekw kitci nisitotamekw!”

¹⁶ “Anotc iriniwok, tan ani peikon e iteritakositcik? Mia ko awacak, wiec e ici mitcetinaniwonik e aipitcik, e pa tepitepwetcik e aititotcik:

¹⁷ ‘Ni ki potatcikanan kitci nimihitak. Nama aric ki ki otci niminawaw! Ni ki nakamonan tcipai nakamowin. Nama aric kaie ki ki otci matonawaw!’

¹⁸ Tapwe wirata, Capatis ki pe icaw, mocak e roskosotc, aka kaie e minikwetc minicaporiw, kirika itakaniwiw: ‘Matci manitowa ki pitciteheckako!’

¹⁹ Minawatc anahwe Ka ki pe iriniwihitisotc ki pe takociniw, mocak e mitcisotc kaie e minikwetc, kirika itakaniwiw: ‘Kanawapamakw sa anaha iriniw. Tepirak mamitoneritam kitci mitcisotc kirika kitci minikwetc minicaporiw! Okwimesiw ka natockakeritci kaie kotakihi iriniwa aka ka kicterimakaniwiritci!’ Aric miro nisitowinakoniw icikowisk e iteritakonik Kice Manito omiro omitoneritcikan e wapamakaniwitcik aniki ka nosanetawatcik.”

Cecoc e aimihatc iriniwa otenak ka tacikeritci aka ka wi tapwerimikotc

²⁰ Cecoc ki iti kakeskimew iriniwa neta otenak ka ki ici mawotci mata kackitaspan, osam aka e ki otci kweskatisiritci. Ki itew:

²¹ “Ekwa kirawaw neta Chorazin otenak ka tacikeiekw! Nikotin ki ka nakickenawaw kitci arimipariekw! Kaie kirawaw Bethsaïda otenak ka tacikeiekw, nikotin ki ka arimiparinawaw! Kecpin nitowatc nete Tyr otenak kirika Sidon otenak ki taci mata kackitaian patok ota kirawaw ka ici tacikeiekw, aci weckatc wirawaw aniki iriniwok kata ki piskamopanak wikasiriw ka kawekinik acitc kata ki cicocimoropanak iskwaskiteskok kitci wapatahiwetcik e kweskatisitcik.

²² Ekoni tca wetci witamatakok: takociparike anihe ke kicikak kitci tipaskonikaniwok, kirawe kata ariman kirawaw ke ici anwerimikoiekw patok aniki Tyr otenak kirika Sidon otenak ka taciketcik ke ici anwerimakaniwitcik.

²³ Minawatc kirawaw Capernaüm ka tacikeiekw, kit iteritenawaw ia kitci icpinikoiekw wakwek? Ki ka nitinikowinawaw, neta ka ici taciketcik ka nipotcik kitci icaiekw! Kecpin meka anihe ki ici mata kackitaiapan nete Sodome otenak, mia anotc e ici mata kackitaian kirawaw otci, kiapatc anotc kata ki takonopan anihe otenaw.

²⁴ Ekoni tca wetci witamatakok: takociparike anihe ke kicikak kitci tipaskonikaniwok, kirawe kirawaw kata ariman ke ici anwerimikoiekw patok aniki wirawaw Sodome otenak ka taciketcik.”

Pe natawapamicikw kitci miskamekw arwepiwin

²⁵ Ani apitc Cecoc aiamihapan, e itetc: “Notawi, kir ka tiperitaman wakwek kaie askik, mikwetc kit ititin e ki wapatahatcik kitapwewiniw ka apicicitcik kaie tca e ki katowatcik iriniwok ka iterimitisotcik ‘ni omiro omitoneritcikaninan’ kirika ‘ni micta miro kiskeritenan kitci kekocic e ki kiskinohamasoak.’

²⁶ Tapwe, Notawi, ekoni mia ka ki ici nataweritaman kitci icinakok.”

²⁷ Minawatc kiapatc Cecoc aimihepan mitcet iriniwa, e itetc: “Notawi ni ki mirikw kaskina kekociciriw kitci tiperitaman. Peikociw ka kiskerimatc Kice Manitowa Okosiriw, enkweriw Otawiwa. Peikociriw kaie anihi ka kiskerimikotc Kotawino, enkweriw Okosa, acitc kaskina anihi ka wi witciharitci kitci kiskerimaritci.”

²⁸ “Pe natawapamicikw, kaskina e taciekw ka aieskosiekw, e miwotaiekw kekocic ka kosikok. Ki ka tca miritinawaw kitci arwepiekw.

²⁹ Pakiterimitisokw kitci atoskectawiekw. Pakitinicikw kitci kiskinohamatakok. Ni roskitehan meka, kaie ni tipaterimitison. Ki ka tca miskenawaw tapwe arwepiwin kitehiwak.

³⁰ Wetan meka anihe ke miritakok kitci itotiskeiekw e atoskectawiekw. Rakicin kaie anihe ke miritakok kitci miwotaiekw.”