Mark 8 - Kice Manito Ocki Omirwatcimowin

Cecoc e acamatc newaw kice mitato mitana iriniwa

¹ Ani apitc kiapatc micta mitcet iriniwok ki mawotcihitowok neta ka ici kiskinohamakespan Cecoc. Nac nama otci takoniw ke mitcikik aniki iriniwok. Aci Cecoc wicamew owitcewakana e itatc:

² “Ni kitimakerimawok aniki iriniwok. Aci meka nicto kickwa esko pe witci tacikemitcik ota, aka tca tekaci e takonik kekociciriw ke mitcikik.

³ Kecpin kiweticohwakenak aka e mitcisotcik, kata iti pakiciniwok meskanak e kiwetcik. Warawik meka ki pe ototewok atita.”

⁴ Itiko anahweriw owitcewakana: “Tante tca ke ki otinamak mitcim kitci acamawikok ni tca e tacitcik iriniwok, ota e ici cipewatawokak?”

⁵ Kokwetcimikowok Cecoca: “Tan e tacitcik kipakwecikanimiwawok?” “Nicowaso taciwok,” itewok.

⁶ Aci Cecoc itew anihi iriniwa e mitcetiritci kitci aipiritci motcik. Minawatc ki otapinew anihi e nicowatciritci pakwecikana. Mikwetc ki itew Kice Manitowa. Ki pakwepitew. Ki mirew owitcewakana kitci mamiraritci kaskina anihi iriniwa. Ki tca papakitineriwa.

⁷ Atita namesa kirika taripana. Mikwetc ki itew kiapatc Kice Manitowa, kirika ki itew owitcewakana kitci papakitinaritci.

⁸ Tato nta e tacitcik ki mitcisowok aniki iriniwok, kaie ki miro tipipariwok. Ka ickwa mitcisonaniwonik, Cecoc owitcewakana ki mawotcitawok kiapatc nicowaso pakitenakaniw e mockinerik mitcimiriw e ki ickoparinik.

⁹ Aniki iriniwok ka ki mitcisotcik, wiec newaw kice mitato mitana taciwakopan. Minawatc Cecoc ki itew anahweriw iriniwa kitci kiweritci.

¹⁰ Ki positcimew kirika owitcewakana, nete e icitcimetcik Dalmanoutha askik itekera.

Pharisien iriniwok e nataweritamawatcik Cecoca kitci mata kackitaritci

¹¹ Minawatc Pharisien iriniwok ki pe takociniwok. Ekoni e iti aimihitotcik kirika Cecoca. Wikokwe paciwirewakopan Cecoca arotc kitci iteritci, ke ki otci itactahorakaniwiritci. Ekoni tca e ici nataweritamawatcik kitci mata kackitaritci, kitci wapatahikotcik Kice Manitowa e ki mirikoritci aniheriw ka ici kackitaritci.

¹² Ki micta iskotamo Cecoc, e itetc: “Kekwariw wetci micta nataweritakik anotc iriniwok kitci mata kackitakaniwonik? Tapwe ohwe ka witamatakok: nama kata mirakaniwiwok kitci wapatakik aniheriw.”

¹³ Minawatc ki nakatew anahweriw iriniwa. Ki positcimew e acohak, akam sakihikanik e icitcimetc.

Ociwockitcitcikaniwaw Pharisien iriniwok kirika Hérode

¹⁴ Ki onikepanak aniki Cecoc owitcewakana kitci matcewitatcik mitcimiriw otcimaniwak. Tepirak peikociriw pakwecikana.

¹⁵ Aci itikowok Cecoca: “Aiekwamisikw! Nanakatcihitisokw aka kitci apatcihimekw ociwockitcitcikaniwaw Pharisien iriniwok, kaie okimaw Hérode anihi!”

¹⁶ Aititowok Cecoc owitcewakana: “Pot wetci aitetc aniheriw, osam aka e opakwecikanimiikw.”

¹⁷ Kiskerimew Cecoc ani e aiteritamiritci. Aci kokwetcimew: “Kekwan wetci iteiekw ‘osam aka e opakwecikanimiikw’? Nama ia ni moci ki nisitotenawaw? Nama ia ni ki kackitanawaw kitci mamitoneritamekw?

¹⁸ Takon kickicikowaw. Nama ia tca ki wapatenawaw? Takon kaie kitokawaw. Peikon ia nama ki petenawaw? Aci kotc kit ickwa onikanawaw,

¹⁹ ka pakwepitakik niaran pakwecikanak, aniki otci iriniwok niaranaw kice mitato mitana ka ki tacitcik, tan tato ka ki mawotcitaiekw pakitenakan e mockinek nta mitcim e ki ickoparik?” “Mitato acitc nicw,” itiko owitcewakana.

²⁰ “Minawatc aniki nicowaso pakwecikana ka pakwepitakik, aniki otci iriniwok newaw kice mitato mitana ka ki tacitcik, tan tato ka ki mawotcitaiekw pakitenakan e mockinek nta mitcim e ki ickoparik?” “Nicowaso,” itiko owitcewakana.

²¹ Aci minawatc itikowok Cecoca: “Nama ia tca kiapatc ki nisitotenawaw anihe ka aiarimotamapan?”

Bethsaïda otenacik e kikehakaniwitc iriniw aka ka wapitc

²² Aci takociniwok Bethsaïda otenacik. Iciwitowakaniwiw neta Cecoc iriniwa aka ka wapiritci, e tca pakoserimikotc tepirak kitci takinatc kitci kikehatc.

²³ Aci otapiniskenew Cecoc anihi aka ka wapiritci. Nte tca iciwirew nakewar otenacik. Minawatc ki actamawew osikowinapo ockicikorik anihi iriniwa. Ki takinew ockicikorik e tca kokwetcimatc: “Ki wapaten ia kekocic?”

²⁴ Itapiw anahwe aka ka wapitc, e tca itetc: “Ni wapamawok iriniwok kekatc mitowi mictikok e aicinakositcik, aric pimotewok.”

²⁵ Kiapatc ki takinew Cecoc anihi iriniwa ockicikorik. Tipickotc nikanik itapiriw. Ekoni e kikeritci. Aci kaskina micta miro wapatamiriw.

²⁶ Kiweticahwew tca Cecoc omikiwamirik, e tca itatc: “Akawir ica neta otenacik.”

Pien e itetc: “Cecoc, enko anihi Kice Manito ka ki itespan kitci pe iciticohwatc kitci akwacimiweritci”

²⁷ Minawatc ki matcawok Cecoc kirika owitcewakana, neta e icatcik otenaciskarik, pecotcik ka ici takonik aniheriw otenariw Césarée de Philippe ka icinikaterik. Mekwata e pimotetcik, aci kokwetcimew Cecoc: “Tan ni e itetcik iriniwok e arimomitcik?”

²⁸ Itiko owitcewakana: “Atita itewok, ‘Capatis anahwa.’ Kotakihik, ‘Élie na.’ Minawatc kotakihik itewok, ‘Peikw nta e tacitcik weckatc ka ki pe nikan tipatcimowaspan.’”

²⁹ Itikowok Cecoca: “Aric kirawaw, awin ka iterimiekw?” Pien itew: “Kir anihi ka ki itespan Kice Manito kitci pe iciticohwatc ota askik kitci akwacimiweritci!”

³⁰ Aci itew Cecoc anahweriw owitcewakana aka awiriw kitci arimotamowaritci.

E nikan witak Cecoc ke iciwepasitc

³¹ Minawatc Cecoc iti kiskinohamawew owitcewakana, e itatc: “Acteriw anahwe Ka ki pe iriniwihitisotc kitci micta nekatcitatc. Cota aiamihe okimawok acitc cota makatewokorewok ka tiperitakik kaie ka kiskinohamaketcik cota aiamihe irakonikewiniw kata wepakonewok. Kata nipahakaniwiw, minawatc ickwa nicto kickokarike kata apitcipaw.”

³² Wewerita ki witamawew aniheriw kitci miro nisitotamiritci. Aci tipan ki iciwiriko Piena, wircikewaw kitci arimwetcik. Kaketin ki aimihiko Cecoc aniheriw e ki itetc.

³³ Aric kiwekapowiw Cecoc e kanawapamatc anihi kotakihi owitcewakana, e itatc anihi Piena, kaketin e aimihatc: “Matca, matca, nete warawik Matci Manito, ponihici!” itew Cecoc. “Nama meka kit iteriten mia wir Kice Manito e iteritak, aric mia iriniwok e iteritakik.”

³⁴ Minawatc Cecoc ki wicamew anihi iriniwa e mitcetiritci kirika owitcewakana kitci pe natotakotc, e itatc: “Kecpin awik wi pe nosanehwite, kata ponitaw wir tepirak e mamitonerimitisotc. Kata miwirew otcipaiatikoma kitci pe nosanehwitc.

³⁵ Anahwe meka tepirak ka iteritak ota askik opimatisiwin, kata onitaw. Aric anahwe ke pakiteritak opimatisiwin nin e nosanehwitc, kirika Mirwatcimowiniw otci, kata kanaweritam.

³⁶ Ceckwat awik kata wi tatamopan kaskina kekociciriw ota askik, kecpin wir tipirawe onicimitisote.

³⁷ Kecpin awik onitate opimatisiwin, takoniw ia kekociciriw ke ki meckotinamaketc, kitci ki pe kiwe mirakaniwitc aniheriw opimatisiwin? Nama!

³⁸ Anotc nama orina wi nosanehwakaniwiw Kice Manito. Matci itatisiwin wi nosanetakaniwon. Kecpin awik wanerimite kirika waneritake nititewiniw, kata wanerimiko anihi Ka ki pe iriniwihitisoritci, minawatc pe takociniritena, Otawiriw oticperitakosiwinirik, Kice Manito otacerima kitci pe witcewikoritci.”