Mark 7 - Kice Manito Ocki Omirwatcimowin

Okice omocomiwawa ka ki ici kiskinohamakotcik

¹ Pharisien iriniwok kirika atita ka kiskinohamaketcik cota aiamihe irakonikewiniw ki mawotcihitowok waska Cecoca e ici tacikeritci. Jérusalem otenak ki ototewakopan.

² Aci wapamewok atita Cecoca owitcewakaniriw e mitcisoritci aka wirowatc e ki otci kasitcitceritci wewerita, kotc e itacterik cota aiamihe irakonikewinik kitci totcikaterik. Iterimewok, ometciwiriwa cota aiamihewinik itekera.

³ Tapwe meka ekoni e itotisketcik aniki Pharisien iriniwok kaie kaskina kotakihik cota iriniwok. Kicteritamok ka ki ici kiskinohamakotcik okice omocomiwawa: nama mitcisowok patoc wewerita e kasitcitcetcik.

⁴ Kaie nte e ototetcik ka ki ici atawaniwonik, nama mitcisowok patoc wewerita e kasitcitcetcik. Mitcet kotakeriw nosanetawakopan weckatc ka ki pe totcikaterik, mitowiriw ohweriw: wewerita kitci totcikatek e kisisipatakaniwoki minikwakana, opotaia, askikok ka piwapiskowitcik acitc nipakanatikwa.

⁵ Aniki Pharisien iriniwok kirika ka kiskinohamaketcik cota aiamihe irakonikewiniw kokwetcimewok Cecoca: “Kekwariw aka wetci sapitakik kiwitcewakanak aniheriw kiskinohamakewiniw ka ki pe totakik weckatc kitaniskotape kimocominapanak? Kekwariw wetci mitcisowaketcik otcitciwaw, e ometcitcitcetcik cota aiamihe irakonikewinik itekera?”

⁶ Aci itikowok Cecoca: “Tapwekopan Ésaïe, anahwe weckatc ka ki nikan tipatcimospan, e arimomitakopanen kirawaw ka miro iriniwikasoiekw, e ki masinahak: ‘Itew Kice Manito: Ni kicterimikok iriniwok e mirwatcimitcik, otitewiniwaw e apatcitatcik, aric otehiwak nama ni kicterimikok.

⁷ Nama wiec irapataniw e nipiskoctawitcik. Aniheriw meka ka ici kiskinohamaketcik namaieriw ni Kice Manito okiskinohamakewin, iriniwok ni tepirak otirakonikewiniwaw.’” Ésaïe 29.13

⁸ Kiapatc itew Cecoc: “Ki pakiteritamwanawaw Kice Manito otirakonikewin, tepirak e wi nosanetaiekw aniheriw iriniwok ka iteritakik kitci ici kicteritcikaterik e pimatisinaniwonik.”

⁹ Minawatc kiapatc itew: “Kit iteritenawaw mirwacin ka totamekw e wepinamekw Kice Manito otirakonikewin, kirawaw tca ka ici kicteritamekw kitci ici pimatisinaniwok kitci apatcitaiekw.

¹⁰ Moïse ki itew: ‘Kicterimik kotawi kaie kikawi.’ Exode 20.12; Deutéronome 5.16 Kaie ohweriw: ‘Anahwe ka marerimatc otawiwa kekotc okawiwa, acteriw kitci nipahakaniwitc.’ Exode 21.17

¹¹ Aric kirawaw ki kiskinohamakanawaw aka arimatc kitci witcihatc awik onikihikwa e kitimakisiritci, kecpin e itatc, ‘Nama ki ka ki witcihitinawaw, osam meka e ki ickwa nespi tapweian kitci aiamihe pakitinaman Kice Manito otci, anihe ke ki miritakokipan.’

¹² Iteritamotake, ‘Nama aci arimatc ni ka witcihawok notawi kaie nikawi.’ Ki pakitinawaw anahwe kitci tapweritak aniheriw.

¹³ Ani e totamekw, ki pikotawanawaw Kice Manito otitewin, ani e ici kiskinohamakeiekw. Nipara kotak kekocic ki totenawaw mitowi anihe kitci ki otci onicinitcik iriniwok.”

Anihe ke ki ometcickakoikw kitcitcakocinak

¹⁴ Minawatc Cecoc ki wicamew iriniwa ka ici mitcetiritci kitci pe natawapamikotc, e tca itatc: “Kaskina natotacikw ohwe ke iteian, kitci miro nisitotamekw:

¹⁵ Nama ometcickako iriniw otcitcakocik, e ki mitcik kekociciriw. Tepirak otehik ka orowiparinik, enkweriw ka otci iterimikotc Kice Manitowa ‘ometciw.’ [

¹⁶ Wewerita natotamokw ohwe, kirawaw ka kackitaiekw kitci nisitotamekw.]”

¹⁷ Ka ickwa nakatatc Cecoc nta iriniwa, ki pitakew mikiwamik. Ki pe natawapamiko owitcewakana e kokwetcimikotc aniheriw ka wi itespan.

¹⁸ Aci itew: “Kaie kirawaw ia, nama ki kackitanawaw kitci nisitotamekw? Nama ia ni ki nisitotenawaw, awik e mitcik kekociciriw, namaieriw aniheriw ka otci iterimikotc Kice Manitowa ‘ometciw.’

¹⁹ Nama meka otehik pitakepariniw, aric omisitak, minawatc tca pe orowipariniw.” Aniheriw ka itetc Cecoc, witamopan matci kaskina mitcimiriw kitci ki mitcinaniwonik.

²⁰ Kiapatc ki itew: “Aniheriw ka orowiparinik e maratanik iriniw otehik, enkweriw ka ometcickakotc otcitcakocik.

²¹ Otehik meka, ekota e otciparinik e matci iteritak. Ekota tca minawatc e otciparinik e matci pimatisitc, e kimotitc, e manohotc,

²² e pacikwatisitc, kaie e nataweritak kitci tatak e ici tatamiritci owitc iriniwa. Ekota kaie ka otciparinik awik e matcitwatc, e wecimiwetc, e matcatikositc, e asawakeritak, e mareritciketc, e sasekatc, kaie e kiwockweritak.

²³ Kaskina anihi matci kekocica, otehik orowipariniw iriniw. Ekota tca wetci ometcickakotc otcitcakocik itekera.”

Iskwew, kotak askik e otcitc, tapwerimew Cecoca

²⁴ Aci neta matcaw Cecoc, nete itekera e icatc pecotcik otenariw ka ici takonik, Tyr ka icinikaterik. Peikw mikiwamik ki pitakew. Ki nataweritam aka kitci kiskeritakonik e taciketc neta, peikon aric ki petakaniwoniw.

²⁵ Tapan nta peikw iskwew, otanisa e ki pitciteheckakotc matci manitowa. Ki petakew e arimomakaniwiritci Cecoca. Ki tca natawapamew e nipiskoctawatc.

²⁶ Neta Phénicie askik otciwikopan anahwe iskwew, Syrie askik itekera. Aci ki pakoserimew Cecoca kitci orowiticohwaritci anihi matci manitowa, otanisa ka ki pitcickakoritci.

²⁷ Aci itew Cecoc: “Pakitinik awacak wirctamiwaw kitci mitcisotcik kitci tipiparitcik. Nama meka mirwaciniw e maskamakaniwitcik omitcimimiwaw, atimwa tca kitci iciwepinamowakaniwiritci.”

²⁸ Aci itiko anihi iskwewa: “Tapwe anihe ka itein, Teperitcikein, aric wawatc atimok kaie wirawaw mitciwok cipa mitcisowakanatikok mitcimiriw, awaca ka ki panitcikeritci.”

²⁹ Aci itiko Cecoca: “Ekoni ici kiwe. Osam ani e ki ici naskamoin, aci ickwa orowickako matci manitowa kitanis.”

³⁰ Ekoni ka ici kiwetc. Ki tca wapamew onitcanica e miciniritci nipakanatikok. Aci tapwe ki ickwa orowickakopan anihi matci manitowa.

Iriniw ka kipitetc kaie aka e arimwetc e kikehakaniwitc

³¹ Aci matcaw Cecoc nta Tyr otenak. Nte ki icaw Sidon otenak. Minawatc nte ki ici pe kiwew Galilée sakihikanik, e capotoweckak aniheriw askiriw, Mitato Otenaw ka icinikaterik.

³² Ki pe iciwitowakaniwiw peikw iriniwa ka kipiteritci, aka kaie tapwe e nitaweritci. Ki tca pakoserimakaniwiw Cecoc kitci takinatc kitci kikeritci.

³³ Aci iciwirew Cecoc anihi iriniwa, wircikewaw kitci taciketcik. Ki icitcitcectaw otokarik. Minawatc ki takitotawew osikowinapo oterinirik.

³⁴ Minawatc ki icpapiw wakwek e racitamotc kirika e itatc anihi iriniwa: “Effata.” Aniheriw ka itetc, wi itemakaniw araméenarimwewinik: Cena.

³⁵ Tecikotc ki iti miro petam anahwe iriniw kaie wewerita ki iti kackitaw e arimwetc. Aci miro nisitotakosiw.

³⁶ Ki itikowok Cecoca aniki iriniwok nta ka tacikewaspan aka kitci pamatisoketcik. Aric kirawe e otcinehikotcik, kirawe kiapatc pamatisokewok.

³⁷ Micta kice mamiskateritamok. Itewok: “Kaskina ka aitotak, kaskina micta mirwaciniw! Wawatc totam kitci petamiritci ka kipiteritci kaie aka ka kackitaritci ka arimweritci kitci miro nisitotakosiritci!”