Mark 4 - Kice Manito Ocki Omirwatcimowin

Atisokanicic: Kitike iriniw

¹ Minawatc kiapatc taci kiskinohamakew Cecoc rarewak Galilée sakihikanik. Mitcetiriwa iriniwa ka pe natawapamikotc neta waska ka ici taciketc. E apitc mitcetiritci, ki nta positcimew. Ekoni ka ici apitc. Akotinopan anihe tciman, aniki tca iriniwok rarewak tacikepanak.

² Mitcet kekociciriw kiskinohamakepan Cecoc, atisokaniciciriw e apatcitatc. Aci itepan:

³ “Natotamokw ohwe! Takopan kitike iriniw. Peikwaw e kicikarik, ki icaw okitikan askik kitci matce kitiketc.

⁴ Mekwata e taci matce kitiketc, atita okitamina papakiciniriw meskanak. Pirecicak mockimewok kaskina aniheriw okitamina.

⁵ Kotakihi kaie aniheriw okitamina e ici asiniwakarik ki ici papakiciniriw, aka nipara e ici takonik askiriw. Tecikotc ki iti nitawikiniw aniheriw kitikaniw, aka e kiskipitawokarik.

⁶ E mekwa kicikarik e micta kiciterik, aci ickwateriw aniheriw ocki ka nitawikinik. Ki pacteriw, osam aka e tipi micarik otapia.”

⁷ “Kotakihi atita kiapatc aniheriw okitamina, nta ka ici nitawikinik minesikaciriw ki ici papakiciniriw. Ki iti matcekiniw aniheriw minesikaciriw, aric nipatcikemakaniw neta kitikanik e ici mirwacikipan. Nama tca kekocic ki otci nitawikin.

⁸ Aric kotakihi okitamina ka matce kitikaniwok papakiciniwok nta miro askik. Ki mirokino. Aci tca ka takociparik kitci mockinakaniwitcik, atita nicto mitana kirawe nipara ki nitawikin, kotakihi nikotwaso mitana, minawatc kotakihi mitato mitana.”

⁹ Minawatc ki itew Cecoc: “Wewerita natotamokw ohwe, kirawaw ka kackitaiekw kitci nisitotamekw!”

Wetci apatcitatc atisokaniciciriw e kiskinohamaketc Cecoc

¹⁰ Minawatc warawik ka iti aitatc Cecoc, aka awocamec e pecowapamikotc anihi mitcet iriniwa, aci kokwetcimiko anahweriw iriniwa ka pa witcewikotc ko kirika anihi owitcewakana e mitato acitc niciritci, e kokwetcimikotc kekwariw ka wi itetc ka ki atisoketc.

¹¹ Itew Cecoc: “Kirawaw, aci ki ki pe otitikonawaw kitci nisitotamekw anihe ka ki katcictekipan Kice Manito Okimawinik otci. Aric kitci ki iciwepanik aniheriw ka ki masinahikaterik neta Kice Manito Omasinahikanik, kotakihik iriniwok petamok aniheriw tepirak kecpin atisokaniciciriw e apatanik e kiskinohamakaniwonik,

¹² ekoni tca kitci iciwepanik: ‘Kanawapatamok iriniwok, nama aric tapwe wewerita wapatamok. Petamok, nama aric nisitotamok. Kecpin meka tapwe ki nisitotakik, kata kweski natawapamepanak Kice Manitowa. Kata kasihamakopanak.’ ” Ésaïe 6.9-10

Wewerita e witak Cecoc wa itemakanik otatisokaniciciriw

¹³ Minawatc itew Cecoc: “Nama ani ki ki otci nisitotenawaw anihe atisokanicic ka ki kiskinohamakewakeian? Tan nte tca ke ki otci nisitotamekw anihi kotakihi nitatisokana?”

¹⁴ “Anahwe kitike iriniw e atisokatakaniwitc, tarasak awik e kitiketc Kice Manitowa otitewiniw, e tipatatak aniheriw.

¹⁵ Atita iriniwok tarasak icinakosiwok mia anihi okitamina ka papakicinitcik meskanak. Petamok Kice Manitowa otitewiniw, aric tecikotc Matci Manito pe nta maninamawew aniheriw ka ki kitikaniwonik otehiwak.”

¹⁶ “Kotakihik iriniwok tarasak icinakosiwok mia anihi okitamina ka papakiciniritci neta e ici asiniwakarik. Petamok Kice Manitowa otitewiniw. Tecikotc mireritamok e petakik. Wi tapweritamok.

¹⁷ Nama aric kinowec kanaweritamok otehiwak. Memacic tepirak tapwetamok. Kotc aric e arimihakaniwitcik kekotc ma e ki nosanetawatcik Kice Manitowa otitewiniw, tecikotc pakiteritamok otasperimowiniwaw.”

¹⁸ “Kotakihik kiapatc iriniwok icinakosiwok mia okitamina ka papakiciniritci ka ici nitawikinik minesikaciriw. Ki petamok Kice Manitowa otitewiniw,

¹⁹ aric osam ki kanawapatamok kekociciriw ka kicteritcikaterik ota askik, kekotc ma e paciwirikotcik micikitawiniw, e iteritakik aniheriw kitci mireritamihikotcik, kaie mitceniw kotakeriw ka ici nataweritakik. Nipatawok aniheriw Kice Manito otitewiniw ka ki iti matcekinikipan otehiwak. Nama tca mirokiwok aniki iriniwok otcitcakociwak itekera, aka awocamec e pameritakik Kice Manitowa otitewiniw.”

²⁰ “Kotakihik aric icinakosiwok, mia anihi okitamina ka papakiciniritci miro askik. Petamok Kice Manitowa otitewiniw, kirika ka tapwetakik. Aci tca e otcitciparik kitci mawotcitakaniwok kitikanicica, atita nicto mitanawaw kirawe nipara nitawikin, kotakihi nikotwaso mitana, minawatc kotakihi mitato mitana.”

Atisokanicic: Wactenamakan

²¹ Minawatc ohweriw itew Cecoc: “Kecpin awik e ickwa iskahak wactenamakaniw, kata akonakwenam ia, askikwa kitci totawatc? Kekotc ma cipa nipakanatikok kitci actatc? Nama ketcinatc! Kirawe kata actaw neta ko ka ici tcimatakaniwonik.

²² Kaskina ka katakaniwok kata nokotakaniwon, kaie kaskina aka ka kiskeritcikatek kata kiskeritakon.

²³ Wewerita natotamokw ohwe, kirawaw ka kackitaiekw kitci nisitotamekw!”

²⁴ Minawatc kiapatc ohweriw itew Cecoc: “Kaketin aiekwamisikw e ici petamekw: Kice Manito kata tipaham irikik ke mirikoiekw, mitowi kirawaw ka asitci tipahamekw e mirekw kiwitc iriniwaw. Aric Kice Manito kirawe nipara wir kata actaw.

²⁵ Anahwe meka aci ka ici tatak kekociciriw, awocamec kata pe mirakaniwiw. Anahwe aric kotak aka ka takonik kekociciriw, wawatc aniheriw memantcic e ici tatak, kata maninamowakaniwiw, misawatc aka e sapinakonik.”

Atisokanicic: Kitikan wircike ka matcekik

²⁶ Aci Cecoc itew: “Ekoni e icinakonik Kice Manito Okimawin: mia iriniw e matce kitiketc okitikan askik. Minawatc nama awocamec kata pameritam aniheriw okitikan.

²⁷ Ekoni e ici nipatc tato tipiskwa, kaie onickaw tato kickwa. Peikon tca nitawikiniw kaie matcekiniw, misawatc aka e kiskeritak tan wetci isparinik.

²⁸ Nicike matcekin anihe kitikan neta askik. Nictam nitawikin, minawatc iti nipiciwon, nac kitci ki mawotcitakaniwok.

²⁹ E ickwa kicinitawikinik, aci kata kickicam anahwe iriniw, mackoci mokomaniw ka kinapiskarik e totak, aci kitci mawotcitakaniwonik.”

Atisokanicic: Rimotat okitamina

³⁰ Cecoc itew minawatc: “Tan e icinakonik Kice Manito Okimawin? Tan ke ki ici atisokeian kitci ki arimotamokw?

³¹ Mia mitowi okitamina, rimotat ka icinikatcikatek, askik e kitikaniwok. Mawotci anihe apicacin patok kaskina kotakihi okitamina ka takoki.

³² Aric e ickwa matce kitikaniwok, minawatc e kicinitawikik, enko ni ka mawotci kinwaskok neta kitikan askik, nac e apitc micarik otikon, matci kaie pirecicak kitci pe nta ocitatcik otcictoniwaw neta e akwactewarik.”

³³ Ekoni mocak e ici kiskinohamakekopanen Cecoc. Aniheriw towiriw atisokaniciciriw apatcitakopan ko e mitcenik, kotc ke ki ici nisitotamiritci iriniwa ka ki pe nta natotakeritci.

³⁴ Nama otci kiskinohamakekopan patoc ko aniheriw e apatcitatc atisokaniciciriw. Aric wircike e tacikespan kirika owitcewakana, aci nta wewerita witamawepan wa itemakanik.

Cecoc e nakahak e micta rotinik

³⁵ Anihi peikon ka ki mi kicikarik e iti otakocinik, aci itew Cecoc anahweriw owitcewakana: “Acohetan sakihikan.”

³⁶ Minawatc matcawok. Ki nakatewok e mitcetiritci iriniwa nte. Tcimanik ki nta apikopan Cecoc. Ki positcimeriwa owitcewakana kaie wirawaw. Matcehowok, Cecoca e matcewiratcik. Mitcetotakisipanak kotakihik iriniwok pecotcik e acohakik kaie wirawaw.

³⁷ Kek keskat micta rotiniw. Sisikahoteriw otcimaniwaw osam e micta mitcahanik, aci kaie kekatc mockineperiw.

³⁸ Mekwata nipapan Cecoc otaketakok tcimanik, apikwecimonik e apikwecimotc. Aci kockoniko owitcewakana, e tca itikotc: “Kiskinohamake iriniw, aci ki ka niponano! Nama ia wiec kit iteriten kir?”

³⁹ Aci onickaw Cecoc. Kaketin arimwew e nakahak e rotinik kirika e aimitatc sakihikaniw e mitcahanik, e itetc: “Pekatc nte, aci kata arwactan!” Tecikotc ki acteraweriw kaie ki micta arwactaniw.

⁴⁰ Aci itew Cecoc anahweriw owitcewakana: “Kekwan wetci micta sekisiekw? Nama ani awocamec kit asperimototawinawaw?”

⁴¹ Aric micta sekisipanak. Aci aititowok: “Awin ia anahwe iriniw, ka sapitakotc wawatc e rotinik kaie tca e mitcahanik sakihikaniw!”