Mark 3 - Kice Manito Ocki Omirwatcimowin

Cecoc e kikehatc iriniwa e arwepi kicikarik

¹ Minawatc iti pitakew Cecoc cota aiamihe mikiwamik. Arwepi kicikarikopan. Iriniw e niponesitc otcitcik pa tacikepan neta.

² Pharisien iriniwok neta ka tacikewaspan wewerita nanakatcihewakopan Cecoca e totamiritci, e wi kiskeritakik ke apitc kikehakwen awiriw e arwepi kicikarik. Nantowapatamowakopan meka ke ki otci itactahoratcik Cecoca.

³ Itew Cecoc anihi iriniwa ka niponesiritci otcitcirik: “Pasiko, kaskina awik kitci wapamiskik.”

⁴ Minawatc ki kokwetcimew Cecoc anahweriw ka taci kanawapakeritci, e itatc: “Ki kokwetcimitinawaw, tan e itemakak kitaiamihe irakonikewininak kitci totcikatek e arwepi kicikak? Kitci miro totawakaniwitc iriniw kekotc ma kitci matci totawakaniwitc? Kitci natokohakaniwitc e akositc, kekotc ma kitci pakiterimakaniwitc kitci nipotc?” Nama aric ki otci kitowok.

⁵ Kiciw kanawapamew Cecoc anahweriw neta ka tacikeritci kirika micta kice kackeritamokopan, osam tekaci aka e wi nisitotamiritci. Aci itew anihi iriniwa ka niponesiritci: “Pe icitcitceri.” Ekoni e ici icitcitcerictowatc anahwe iriniw. Ekoni e iti kiketc.

⁶ Ki orowiwok Pharisien iriniwok neta cota aiamihe mikiwamik e tca mawotcihitotcik kirika kotakihik iriniwok ka atoskectawatcik Romain kice okimawa Hérode ka icinikasoritci, e arimotakik tan ke ki totakik kitci ki nipahakaniwiritci Cecoca.

Mitcet iriniwok e pe natawapamatcik Cecoca

⁷ Cecoc iti matcawok kirika owitcewakana, neta rarewak Galilée sakihikanik e icatcik. Mitcet iriniwa iti nosanehikowok. Atita Galilée askik ototepanak, kaie Judée askik.

⁸ Kotakihik Jérusalem otenak ototewakopan, kirika Idumée acitc kotak askik, akam sipik Jourdain ka ici takonik. Ekote atita e ototewakopanen, kaie nete kotakihi askik pecotcik ka ici takonik otenariw Tyr kaie Sidon ka icinikaterik. Wetci pe natawapamatcik Cecoca aniki mitcet iriniwok, osam e ki petaketcik e aitotiskeritci.

⁹ Itew Cecoc owitcewakana kitci natcipatamakotc tcimaniw aka kitci cakotcickakotc anihi mitcet iriniwa.

¹⁰ Osam mitcetiriwa e ki kikehatc ka akosiritci. Kaskina tca kotakihik papitoc ka itapinetcik wi kotci natcikapowictawewok Cecoca e wi pecowapamatcik, e wi takinatcik kitci ki kikehikotcik kaie wirawaw.

¹¹ Kirika kotc ko e wapamikospan Cecoc matci manitowa, nipiskoparihoriwa pecotcik nte ositik e tca iteritci e tepitepweritci: “Kir Kice Manito Okosa!”

¹² Aric Cecoc kaketin ki witamawew aka kitci tipatcimonaniwonik awin wir.

Cecoc e orapamatc mitato acitc nicw otarotakana

¹³ Minawatc Cecoc ki amatciwew matinacik. Aci wicamew iriniwa ka ki orapamatc. Tato nta e taciritci ki pe natcikapowictako.

¹⁴ Mitato acitc nicw ki orapamew, “nitarotakanak” e icinikatatc. Ki orapamew anahweriw kitci ki pa witcewikotc kirika kitci ki iciticohwatc kitci pa tipatatamiritci Mirwatcimowiniw,

¹⁵ kaie ki mamirew tiperitamowiniw kitci orowiticohwaritci matci manitowa.

¹⁶ Enko ohki mitato acitc nicw iriniwok ka ki orapamakaniwitcik: Simo (kotakeriw icinikasowiniw ki miriko Cecoca, Pien ki icinikatiko),

¹⁷ minawatc Cak acitc ocima, Jean ka icinikasoritci, Zébédée anihi okosa e niciritci. (Kaie wirawaw ki mirikowok Cecoca kotakeriw icinikasowiniw. Boanergès ki icinikatikowok. Wi itemakan anihe icinikasowin: “Iriniwok mia onimiskiw ka asiteritakositcik.”)

¹⁸ Minawatc Atre, Pirip, Barthélemy, Matio, Toma, Cak (Alphée anihi okosa), Thaddée, Simo (“Anahwe aka ka naheritak kitci tiperimikotc kice okimawa” ka icinikatakaniwispan),

¹⁹ acitc Judas Iscariote, anahwe ke pakiterimatc Cecoca.

Cecoc e wi matcewirikotc otcirowemakana

²⁰ Minawatc ki pe kiwew mikiwamik. Pe mitcetinaniwoniw neta. E apitc mitcetinaniwonik, nama wawatc ki mitcisowok Cecoc kirika owitcewakana.

²¹ Ka petakeritci atita otcirowemakana Cecoc, ki pe matcawok e wi pe natcipahatcik kirika e aitetcik: “Nama aci waskamatisiw!”

Cecoc e naskamotc e ici itactahorakaniwitc

²² Ka kiskinohamaketcik cota aiamihe irakonikewiniw Jérusalem otenak ki otci pe matcawok e pe icatcik neta Cecoca ka ici tacikeritci. Ki aiarimomewok e tca itatcik: “Matci manito, ‘Béelzébul’ e icinikasotc, enko anaha ka ki pitciteheckowatc Cecoca!” Kotakihik aitepanak: “Anahwe ka tiperimatc matci manitowa, enko na ka ki miratc Cecoca kitci kackitaritci kitci ki orowiticohwaritci manitowa!”

²³ Minawa Cecoc wicamew anahweriw ka ki aiteritci e tca aimihatc, atisokaniciciriw e apatcitatc, e itatc: “Tan ke ki totak Matci Manito kitci ki orowiticohotisotc?

²⁴ Kecpin e matciparihitotcik iriniwok peikw okimawinik ka taciketcik e macikotatotcik, nama kinowec kata takon anihe okimawin.

²⁵ Peikon kaie kecpin ka tcirowemitotcik matciparihitotawe, nama kinowec kaie wirawaw kata niciwonatcihitisowok.

²⁶ Peikon tca kaie wir Matci Manito, kecpin e matciparihitoritci anahweriw ka atoskectakotc, kecpin kaie e papikaniparinik e tiperitak, nama kinowec kata tiperitam. Otcitakotc kata ickwapariniw otiperitamowin.”

²⁷ “Nama awik kata ki pitakew omikiwamirik iriniwa ka mackawisiritci, kitci tca matcewitatc e ici tatamiritci, patoc kata takopitew anihi iriniwa ka mackawisiritci. Aric ickwa takopitate, aci neta kaskina kata ki matcewitawew ka ici takonik neta omikiwamirik.”

²⁸ “Tapwe ohwe ka witamatakok: kaskina kata ki kasihamawakaniwiwok opactatowiniwaw iriniwok, kaie kaskina ka ki ici mareritciketcik.

²⁹ Aric anahwe ke marerimatc Miro Manitowa nama wiskat kata ki kasihamawakaniwiw. Nespitc kata kanaweritam aniheriw opactatowin.”

³⁰ Wetci ici aiarimwekopanen Cecoc e aimihatc anahweriw iriniwa, osam e ki iteritci: “Matci manito ka ki pitciteheckowatc Cecoca.”

Cecoc okawiwa acitc owitcicana

³¹ Aci pe takociniwok Cecoc okawiwa acitc owitcicana. Orowitimik taci nanipowiwok. Ki tca iciticohwewok peikw iriniwa kitci nta wicamaritci Cecoca.

³² Ani apitc mitcetinaniwonikopan e waskapinaniwonik neta ka ici apitc Cecoc. Aci itakaniwiw: “Kikawi kirika kiwitcicanak ki taci pehikok orowitimik neta. Ki natawerimikok.”

³³ Aci itew Cecoc: “Awin na nikawi? Kaie awin aniki niwitcicanak?”

³⁴ Minawatc kanawapamew neta iriniwa ka waskapiritci neta ka ici apitc, e tca itatc: “Kanawapamakokw! Nikawi kirika niwitcicanak tacikewok ota!

³⁵ Anahwe meka awik ka aitotisketc e ici nataweritamiritci Kice Manitowa, enko na niwitcican kekotc nikawi.”