Mark 14 - Kice Manito Ocki Omirwatcimowin

Ka kiskinohamaketcik cota aiamihe irakonikewiniw e natowi totakik kitci ki otci makonakaniwiritci Cecoca

¹ Mamitcitc nicwo kicko kitci otcitciparinik kitci mawotcihitotcik cota iriniwok kitci aiamihe makocetcik, e mirwatcitcikaterik aniheriw Pâque ka icinikaterik, kaie aniheriw makocaniw otci, “Pakwecikan aka ka opisotc” e icinikaterik, aniki cota makatewokorewok ka tiperitakik kirika ka kiskinohamaketcik cota aiamihe irakonikewiniw natowi totamwakopan kimotc kitci makonakaniwiritci Cecoca, kaie kitci nipahakaniwiritci.

² Taci aititopanak: “Nama kata miroparin kitci makonaiikw mekwata e aiamihe makocaniwonik. Kwecan ki ka kiciwahanowok iriniwok.”

Peikw iskwew e actwatc ka miromakonik Cecoca octikwanirik

³ Nete Béthanie otenacik pa tacikepan Cecoc, neta omikiwamirik iriniwa, Simo ka icinikasoritci. Anahwe Simo omikiwapinekopan. Mekwata e mitcisospan Cecoc mitcisowakanik, aci peikw iskwew ki pe pitakew, e petaritci opotaciriw ka micta mirwacinik, ka mirwapiskosiritci asiniwa e ki apatcihakaniwiritci e ocitakaniwonik aniheriw opotaciriw, tekaci e mockineperik neta pimiteriw ka miromakonik e misakitakonik. Ki pikotaw onoskotc aniheriw opotariw. Ki iti sikinamwew Cecoca octikwanirik aniheriw pimiteriw ka miromakonik.

⁴ Atita ka tacikewaspan kiciwasiwok e ki totamiritci anihi iskwewa, e tca aititotcik: “Ceckwat ki onactaw aniheriw ka miromakonik e micta misakitakonik.

⁵ Matci kata ki atawepan awik, nictowaw mitato mitana coriawapiskoriw kitci kackitatc, kitci ki tca miraspan ka kitimakisiritci.” Nama nac ponimewok anihi iskwewa.

⁶ Aci Cecoc itew: “Ponihakw! Kekwan wetci nekasimekw? Micta mirwaciniw aniheriw ka ki totak nin otci.

⁷ Mocak kata tawok ka kitimakisitcik ota ka ici tacikeiekw. Tatwaw nataweritamekwe kitci miro totawekok, ki ka kackitanawaw kitci totamekw. Aric nin, nama mocak ki ka witci tacikemitinawaw ota.

⁸ Ki totam anahwe iskwew e ici kackitaspan. Ni ki pe actamakw ka miromakonik niwiawirik, e wi nisawihitc kitci nahikakowan matikowocik.

⁹ Tapwe ohwe ka witamatakok: kaskina wiec ke ici tipatcimonaniwok Mirwatcimowin, kaskina e irikokoskamikak, kata tipatcitcikateriw ohweriw ka ki totak anahwe iskwew, mocak kaie kata mikawerimakaniwiw.”

Judas e wi pakiterimatc Cecoca, cota makatekorek e iciwitowatc

¹⁰ Aci anahwe Judas Iscariote ka icinikatakaniwitc, peikw nta e mitato acitc niciritci owitcewakana Cecoc, ki nta witamawew cota makatewokorewa ka tiperitamiritci e wi pakiterimatc Cecoca.

¹¹ Micta mireritamok ani e itikotcik. Itewok kitci miratcik coriariw. Ekoni aci e iti kitciparitc Judas e natowi aitotak mia apitc ke ki pakiterimatc Cecoca, kitci tca makonikoritci anahweriw cota maketekorewa ka tiperitamiritci.

E witci mitcisomatc Cecoc owitcewakana

¹² Aci nictam ohwe e kicikak e mirwatcitcikatek, “Pakwecikan aka ka opisotc” e icinikatcikatek anihe cota aiamihe makocan, anihe e kicikak e makocaniwok e aiamihe pakitinakaniwitcik maritcenicak kitci ki makocaniwok, Pâque otci, aci kokwetcimiko Cecoc owitcewakana: “Tante e ici nataweritaman kitci ici nta ocitaiak makocan?”

¹³ Aci nicw owitcewakana iciticahwew Cecoc, e itatc: “Icakw neta otenak. Mekwata e pimoteiekw ki ka nakickowawaw iriniw e miwotatc nipiriw opotak. Nosanehwakw,

¹⁴ kirika neta mikiwamik ke ici pitaketc, ki ka itawaw neta ka tiperitak mikiwamiriw: ‘Kiskinohamake iriniw ki kokwetcimikw: Tante anihe aricap ke taci mitcisoak, kitci aiamihe makoceiak Pâque otci, nin kirika niwitcewakanak?’

¹⁵ Ki ka tca wapatahikowaw icpimitakok omikiwamik micta aricapiriw, kaskina kekociciriw e takonik, aci e ki nisawinaniwonik kitci icaikw. Ekota tca neta ke ocitaiekw makocan.”

¹⁶ Aci matcawok aniki Cecoc owitcewakana, otenak e icatcik. Kaskina mia ki icinakoniw Cecoca ka ki aiteritci. Ki tca nisawitawok ke aiamihe makocetcik.

¹⁷ E iti otakocinik, Cecoc takociniw neta kirika owitcewakana e witcewikotc.

¹⁸ Mekwata e aipitcik mitcisowakanik e taci mitcisotcik, aci itew Cecoc: “Tapwe ohwe ka witamatakok: peikw neta e taciekw e witci mitcisomiekw ni ka pakiterimikw.”

¹⁹ Micta kackeritamiriwa anahweriw owitcewakana. Aiackotc kokwetcimiko: “Namaiew ni nin, taina?”

²⁰ Itew Cecoc: “Anahwe ke totak, enko anahwe peikw neta mitato acitc nicw e taciekw ke akotcimatc opakwecikanima mia peikon kaie nin akotcimake nipakwecikanim orakanik.

²¹ Tapwe kata nipo anahwe Ka ki pe iriniwihitisotc, kotc ka itacterik Kice Manito Omasinahikanik e arimomakaniwitc. Aric kata micta arimipaririw anihi iriniwa ke pakiterimikotc! Kirawe kata ki miroparinipan kecpin aka ki otci nitawikiritci anihi iriniwa.”

Mamitcitc e witci mitcisomatc Cecoc owitcewakana

²² Mekwata e mitcisotcik, Cecoc ki otapinew pakwecikana. Ka ickwa aiamihatc, mikwetc e itatc Kice Manitowa, ki papakwepitew. Ki mamirew owitcewakana, e itatc: “Mowakw ohwe. Enko ni niwiaw.”

²³ Minawatc ki otapinam peikwo orakan minicaporiw. Ka ickwa naskamowatc Kice Manitowa, mameckotc ki mirew anihi owitcewakana, kaskina tca kitci minikweritci.

²⁴ Ki itew: “Enko ohwe nimikw ke ki otci kiskeritakok Kice Manito otacotamakewin, e nataweritak kitci miroparihitoekw kirika wir. Ohwe nimikw kata macikowitakaniwon mitcet iriniwok otci.

²⁵ Tapwe ohwe ka witamatakok: aci anotc nama awocamec ni ka minikwan minicapo, patoc minawatc minikweiane ocki minicapo neta Kice Manito Okimawinik.”

²⁶ Minawatc ki nakamowok mirwatatamo nakamowiniw. Minawatc ki matcawok, e icatcik matinacik Mont des Oliviers ka icinikaterik.

E nikan witak Cecoc kitci itikotc Piena aka e kiskerimikotc

²⁷ Aci itew Cecoc anahweriw owitcewakana: “Kaskina e taciekw ki ka pakiteriminawaw. Masinatew meka Kice Manito Omasinahikanik: ‘Ni ka nipahaw maritcenici iriniw. Kaskina tca wiec kata orackawok maritcenicak, arotcikotc kitci ici matcatcik.’” Zacharie 13.7

²⁸ Kiapatc itew Cecoc: “Aric ickwa apitcipaiane, nete Galilée askik itekera ni ka ican kitci pehitakok.”

²⁹ Pien itew: “Misawatc kaskina aniki kotakihik pakiterimiskawe, nin nama ki ka pakiterimitin.”

³⁰ Itiko Cecoca: “Tapwe ohwe ka witamatan: anotc ke mi kicikak, tipiskake tca, epwamoci nicwaw kitotc nape pakahakwan, aci nictowaw ki ka ickwa itwan aka e kiskerimiin.”

³¹ Aric Pien itew kiapatc kirawe e kiciwetc: “Nama wiskat ni ka itwan aka e kiskerimitan, misawatc kecpin acteke kitci nipoan kirika kir.” Ekoni peikon kaskina ka iteritci anihi kotakihi Cecoc owitcewakana.

Gethsémané pitowatikw e nta aiamihatc Cecoc

³² Aci iti takociniwok nete Gethsémané pitowatikw ka icinikaterik. Aci itew Cecoc anahweriw owitcewakana: “Ekota ota apikw. Nin tca ni ka nta aiamihan.”

³³ Minawatc ki matcewirew anihi Piena, Caka kirika Jeanwa. Aci ki iti micta arimeritam kaie e nekateritak.

³⁴ Ki itew owitcewakana: “Ni micta kackeriten nitehik. Ekota ota tacikekw. Nanakatisikw.”

³⁵ Minawatc nakewara iti icaw. Ki nipiskopariho e aiamihatc, e pakoserimotc aka kitci iciwepasitc kitci micta nekatcitatc.

³⁶ Aci itepan: “Notawi, kaskina kir ki kackitan. Ocita tca aka kitci nekatcitaian. Nama aric nin nititeritamowin kitci apatak, aric kir kititeritamowin.”

³⁷ Aci natawapamew minawatc anahweriw owitcewakana e nictiritci. Ki tca wapamew e taci niparitci. Aci itew Piena: “Simo, ki nipan ia ni? Nama ia wawatc ki ki otci kackitan peikwo tipahikan irikik aka kitci nipain?

³⁸ Nanakatisikw! Aiamihakw kaie aka kitci cakotcihikoiekw e kokwetcihikoiekw kitci pactatiekw. Ata nataweritam iriniw omitoneritcikanik kitci miro totak. Nama aric tipi mackawisiw owiawik itekera kitci itotisketc.”

³⁹ Aci minawatc nakatew owitcewakana anahwe Cecoc, peikon tca kiapatc e itetc e aiamihatc.

⁴⁰ Ka pe natawapamatc minawatc owitcewakana, wapamew e niparitci. Nama ki otci kackitawok kitci aitapitcik. Nama aci kiskeritamok ke itatcik.

⁴¹ Nac nictowaw ki pe natawapamew. Itew: “Kiapatc ia ki nipanawaw kirika e arwepihitisoekw? Ekoni aci, kanawapatamokw! Aci otcitciparin kitci pakiterimakaniwitc anahwe Ka ki pe iriniwihitisotc, pactati iriniwa kitci makonikotc.

⁴² Pasikokw! Matcatan! Kanawapamakw tca anahwe iriniw ka pakiterimitc! Aci pe takociniw.”

E makonakaniwitc Cecoc

⁴³ Mekwata kiapatc e taci arimwetc Cecoc, aci pe takociniriw peikw anihi owitcewakana, Judas ka icinikasoritci. Mitcet iriniwa pe witcewiko, micta mokomaniw e pe takonamiritci kaie mictikoriw. Ki pe iciticohokowakopan anahweriw cota makatewokorewa ka tiperitamiritci acitc ka kiskinohamakeritci cota aiamihe irakonikewiniw kaie cota aiamihe okimawa.

⁴⁴ Judas, anahwe ka pakiterimatc Cecoca, ki itepan anahweriw iriniwa ka ki pe witcewikotc ke totak kitci ki otci kiskerimaritci Cecoca, e ki itatc: “Anahwe iriniw ke otcemak, enko na ka natawerimekw. Makonakw tca. Wewerita kaie nanakatcihakw matcewirekwe.”

⁴⁵ Tekocik anahwe Judas, ki natawapamew Cecoca, e tca itatc: “Kiskinohamake iriniw.” Minawatc ki otcemew.

⁴⁶ Tecikotc aniki kotakihik ki makonewok Cecoca.

⁴⁷ Peikw tca nta ka tacikespan, ki korokopitam omicta omokoman. Ki otamitotawew kitci makatewokorewa otarotakaniw, e kickitokewepowatc.

⁴⁸ Aci itew Cecoc: “Actepan ia kitci pe icaiekw e takonamekw micta mokomana kaie mictikwa kitci ki makoniekw, tarasak mia kimoti iriniw e iterimiekw?

⁴⁹ Tato kickwa kitci aiamihe mikiwamik ki ki witci tacikemititawaw, e kiskinohamakeian. Nama aric wiskat ki ki otci makoninawaw. Anihe tca anotc ka totawiekw, iciwepan aci kitci ki isparik anihe ka masinatek Kice Manito Omasinahikanik.”

⁵⁰ Aci kaskina nakatiko owitcewakana e ocimoritci.

⁵¹ Peikw ockinikiw mi nosanehwepan Cecoca, tepirak wapowaniw e wikwekitc. Ki kotci makonakaniwiw.

⁵² Ekoni ka ici nakatcipatatc aniheriw owapowan e tca ocimotc e cacakarikatepatatc.

Cecoc e iciwirakaniwitc neta ka ici mawotcihitoritci Ka Kitci Tipaskonikeritci

⁵³ Kice makatekorek ki iciwirewok Cecoca, nete ka ici mawotcihitotcik ko cota makatewokorewok ka tiperitakik kaie cota aiamihe okimawok kirika ka kiskinohamaketcik cota aiamihe irakonikewiniw.

⁵⁴ Warawik otci nosanehwew Pien Cecoca. Ki tca icaw nete kitci makatewokorewa omikiwamirik. Orowitimik nta pa tacikew, e witapimatc iriniwa ka nanakatcitaritci kitci aiamihe mikiwamiriw, kaie tca e pa awasotc.

⁵⁵ Aniki cota makatewokorewok ka tiperitakik kaie kaskina ka tipaskoniketcik cota iriniwok otci, Ka Kitci Tipaskoniketcik e icinikatakaniwitcik, natowi totamwakopan kitci itactahorakaniwiritci Cecoca, ke ki otci atamerimakaniwiritci kitci tca nipahakaniwiritci. Nama aric ki otci miskamok.

⁵⁶ Mitcet iriniwok itactahorepanak Cecoca e kiraskitcik kitci atamerimakaniwiritci. Aric osam papitoc aitewakopan e arimwetcik.

⁵⁷ Aci atita pasikowok, e tca itetcik:

⁵⁸ “Ni ki petawanan e itetc: ‘Ni ka orahen ohwe kitci aiamihe mikiwam, iriniwok ka ki ocitatcik. Kotak tca ni ka ocitan, nicto kickwa irikik kitci tacikaman. Namaiew ni aric iriniwok ke ocitatcik aniheriw.’”

⁵⁹ Aniheriw aric ka itetcik, papitoc kiapatc aitewakopan.

⁶⁰ Aci pasiko anahwe kitci makatewokorew, nete nikanik e mitcetinaniwonik, e tca kokwetcimatc Cecoca, e itatc: “Nama ia kekocic kit itan? Nama ia ki petamwan aniheriw ka itetcik aniki iriniwok e arimomiskik?”

⁶¹ Nama aric ki otci naskamo Cecoc. Tekaci nama kito. Aci kiapatc kokwetcimiko anihi kitci makatewokorewa: “Kir ia ni Kice Manito Okosa, anihi ka ki itespan Kice Manito kitci pe iciticohwatc ota askik kitci akwacimiweritci, anahwe mocak ka mirwatcimakitc e aiamihaiak?”

⁶² Cecoc itew: “Ehe, nin ni. Kaie kaskina e taciekw ki ka wapamawaw anahwe Ka ki pe iriniwihitisotc e apitc onihiwinirik Kice Manitowa e mackawisiritci, kaie ki ka wapamawaw wakwek e pe ototetc oskok e pe otci nokositc.”

⁶³ Ekoni e ici pikopitak anahwe kitci makatewokorew owikasim, e tca itetc: “Nama aci awocamec ki ka irapatcihanowok iriniwok kitci mamicimatcik.

⁶⁴ Aci wir tipirawe ki ki petawawaw ka ki itetc e marerimatc Kice Manitowa! Tan tca e iteritamekw?” Kaskina ki itewok: “Anweritakosiw kirika ki kackitamatiso kitci nipahakaniwitc!”

⁶⁵ Atita neta e tacitcik, ekoni e ici kitciparitcik e iskwatatcik. Ki akonakwenehwewok kirika ki pasakwehwewok, e itatcik: “Awin ka ki otamohwisk?” Ki tca makonewok aniki cimakanicak kirika tca e ki macikowatcik.

Pien e itetc aka e kiskerimatc Cecoca

⁶⁶ Pien kiapatc pa tacikepan orowitimik neta kitci makatewokorew omikiwamirik, aci ka pe takociniritci peikw iskwewa, kitci makatewokorewa ka atoskectawatc.

⁶⁷ Ki wapamew anihi Piena e pa awasoritci. Wewerita ki kanawapamew, e tca itatc: “Kaie kir ni, ki pa witcewatai anaha Cecoc, Nazareth ka otcitc!”

⁶⁸ Aric ki kaso anahwe Pien, e itetc: “Nama ni kiskeriten anihe wa itein. Nama ni nisitoten.” Ekoni ka iti icatc pecotcik nete ka ici pitakaniwonik ickwatemik. Aci matce kito nape pakahakwan.

⁶⁹ Aric ki wapamiko anihi iskwewa. Ekoni kiapatc e itaritci neta ka tacikeritci: “Anahwe iriniw, kaie wir ni pa witcewepan anihi Cecoca.”

⁷⁰ Kiapatc Pien ki kaso, e itetc: “Nama ni kiskerimaw.” Nama kinowec aci minawatc itiko Pien anahweriw iriniwa neta ka tacikerispana: “Tapwe kaie kir ni, peikw nta e taciritci ka pa witcewatcik Cecoca. Galilée askik meka kaie ki otcin.”

⁷¹ Aci itew Pien: “Kitci kicakonitc Kice Manito kecpin kiraskiwanen! Tapwe ohwe ka iteian, nama ni kiskerimaw anaha iriniw ka arimomekw.”

⁷² Mia ka ickwa itetc aniheriw, aci minawatc kitoriw nape pakahakwana, ekoni nicwaw e kitoritci. Aci mikawiw Pien aniheriw ka ki itikotc Cecoca: “Epwamoci nicwaw kitotc nape pakahakwan, aci nictowaw ki ka ickwa itwan aka e kiskerimiin.” Aci iti micta mato.