Mark 13 - Kice Manito Ocki Omirwatcimowin

E nikan tipatcimotc Cecoc kitci orapatcikaterik kitci aiamihe mikiwamiriw

¹ Aci e iti orowitc Cecoc nta kitci aiamihe mikiwamik, peikw owitcewakana itiko: “Kiskinohamake iriniw, kanawapata! Micta mitcapiskisiwok aniki asiniik! Micta kice mirwacino kaskina anihi ka ki otci ocitakaniwoki!”

² Aci itew Cecoc: “Ki wapaten ia kaskina anihi ka ki ocitakaniwoki e micta micaki? Kecko kata otcitciparin aka otci peikw asiniik kitci akwatowickik. Kaskina kata oraparin.”

Ke ici arimiparinaniwok acitc ke ici nekatcitakaniwok

³ Ki nta aipiw Cecoc nte matinak Mont des Oliviers ka icinikaterik, tipickotc nte kitci aiamihe mikiwamik e ici takonik, tepirak anahweriw owitcewakana Pien, Cak, Jean kirika Atre e witcewikotc. Aci kokwetcimiko:

⁴ “Witamacinan apitc anihe ke isparik. Tan nta ke otci nisitowinamak apitc mia ke pe iciwepak kaskina ka itein?”

⁵ Itew Cecoc: “Aiekwamisikw aka kitci paskewiritakw awik.

⁶ Mitcet iriniwok kata takociniwok niticinikasowiniw kitci apatcitatcik, kitci tca itetcik: ‘Nin ni anihi ka ki itespan Kice Manito kitci pe iciticohwatc ota askik kitci akwacimiweritci!’ Mitcet iriniwa kata paskewirewok.

⁷ Petamekwe pecotcik e mote natoparinaniwok, kaie petakeiekwe e natoparictatonaniwok warawik kotakihi askik, akawir sekisikw. Actew kitci icinakok. Nama aric ni moci kata ponaskiwon.

⁸ Kata mamowinehitowok iriniwok ite kotc e ici aitaciketcik. Peikw okimaw kata nta natoparictawew kotakihi okimawa. Kata kwekon atita e aitaskamikak, kaie kata kokataniwon. Kata micta ariman, mitowi iskwew e iti matce akositc aci kitci wapamawasotc, ekoni ke apitc akosiweritakok.”

⁹ “Aric kirawaw, nanakatcihitisokw! Ki ka iciwirikowawok tipaskonike irinik kitci tipaskonikoiekw. Ki ka macikakowinawaw neta cota aiamihe mikiwamik. Osam e nosanehwiekw, ki ka iciwirikowinawaw okimawok kirika kice okimawok ka ici taciketcik, kaie wirawaw kitci tipaskonitakok. Ani apitc, ki ka tipatcimonawaw ka ki totaman.

¹⁰ Enko meka anihe nictam ke isparik: kaskina iriniwok ota askik kata tipatcimoctawakaniwiwok ohweriw Mirwatcimowiniw.”

¹¹ “Makonikoiekwe kitci iciwirikoiekw neta tipaskonike irinik, akawir kicatc arimeritamokw e mamitoneritamekw ke ki iteiekw. Apitc witamakoiekwe kitci naskamoekw neta, tepirak anihe ke mirikoiekw kitci iteiekw ki ka itanawaw. Namaiew ni meka kirawaw tipirawe ke aiarimweiekw. Miro Manito ki ka mirikowaw aniheriw mia ke aiteiekw.”

¹² “Atita iriniwok kata pakiterimewok tipirawe octesiwawa kekotc ma ocimiwawa kitci nipahakaniwiritci. Peikon atita ke totawatcik tipirawe onitcaniciwawa. Matci atita awacak kata wepakonewok onikihikowawa, nac kata itotiskewok kitci nipahakaniwiritci.

¹³ Kaskina awik ki ka cikerimikowaw, osam e nosanehwiekw. Aric anahwe mocak ke sokikapowitc, aka ke pakiteritak e asperimototawitc nac kaskina ke ickwaparinik, kata akwacimakaniwiw.”

Cecoc e nikan witak ke ici nekatcitakaniwonik

¹⁴ “Ki ka wapamawaw anahwe ka icinikatakaniwitc ‘ka kice maratisitc.’ Kata arakaniwiw neta aka tekaci e ici acterik kitci apitc. (Anahwe ka tapwatak ohweriw, acteriw kitci miro nisitotak.) Ani apitc iriniwok Judée askik ka taciketcik arimatc nte kata ici ocimowok e ici matinarik.

¹⁵ Anahwe okitc omikiwamik ke pa taciketc ani apitc, nama acteriw kitci nitatowitc kitci natcipatatc aniheriw ka ici tatak kitci matcewitatc.

¹⁶ Kaie anahwe ke pa otamirotc okitikan askik, nama acteriw kitci kiwetc omikiwamik, okapotowan kitci natcipatatc.

¹⁷ Ani apitc aici kicikarike kata nekatcitawok iskwewok ka kanawerimawasotcik kaie aniki ke nocanihawasotcik.

¹⁸ Pakoserimakw Kice Manito aka kitci aisparik mekwata e pipok.

¹⁹ Kecpin meka ani apitc aici kicikake, kirawe kiapatc kata nekatcitakaniwon patok kaskina ka ki ici pe kiskeritcikatek e nekatcitakaniwok esko ka pe askiwok, Kice Manito ka kiceritak kaskina kekociciriw, nac anotc. Nama kaie wiskat awocamec kata asitci nekatcitakaniwon.

²⁰ Kecpin aka ki otci oreritak Teperitciketc kitci atciwonak irikik ka tatinikipan kicikoriw ke nekatcitakaniwonikipan, nama awik kata pimatisipan. Aric ki atciwonam anahweriw otci iriniwa ka ki orapamatc kitci iteritakosiritci otirinima.

²¹ Kecpin tca awik ititakwe: ‘Kanawapamakw! Enkweriw anihi ka ki itespan Kice Manito kitci pe iciticohwatc ota askik kitci akwacimiweritci!’ kekotc ma kecpin ititakwe: ‘Enko anaha ka pa taciketc!’ akawir tapwetowakw.

²² Kata pe takociniwok meka iriniwok ke itekasotcik: ‘Ni ki pe iciticohokw Kice Manito kitci akwacimitakok,’ aka aric tapwe e icinakonik. Kaie kotakihik iriniwok ke nikan tipatcimokasotcik kata pe takociniwok, aka aric tapwe e itotisketcik Kice Manitowa otci. Kata mata kackitawok. Kata matawi aitotamok e natowi aitotakik kitci wikokwe wecimatcik iriniwa ka ki orapamikoritci Kice Manitowa, kecpin e kackitatcik.

²³ Kirawaw tca, aiekwamisikw! Kaskina meka ki nikan witamatinawaw.”

Ke isparinik minawatc pe takocike anahwe Ka ki pe iriniwihitisotc

²⁴ “Ani apitc iciwepake, ickwa nekatcitakaniwoke, nama kata nokosiw pisimw, kaie tipiskaw pisimw nama kata wasikew.

²⁵ Atcikocak waskok kata otci papakiciniwok. Kaskina tca aniki pisimw, tipiskaw pisimw kaie atcikocak kata ninikipariwok.

²⁶ Kata tca wapamakaniwiw anahwe Ka ki pe iriniwihitisotc, oskok kitci otci pe nokositc minawatc pe takocike, e mackawisitc kirika e icperitakositc.

²⁷ Kata iciticahwew aceriwa kaskina wiec ota askik e irikokoskamikarik kitci pa icaritci, kaskina e ici newi aicirowetinanik askik kitci mawotciharitci anahweriw iriniwa ka ki orapamikoritci Ka ki pe iriniwihitisoritci, kaskina wiec ota askik e irikokoskamikarik kitci pa natcipahatcik.”

Ka ici kiskinohamatokw wapiminatikw

²⁸ “Enko ohweriw ka ici kiskinohamaketc wapiminatikw: e iti mirokarik otikon, kaie e iti sakipakarik, ki kiskeritenawaw aci e peconakok kitci pe nipik.

²⁹ Peikon wapatamekwe anihe kitci isparik, ki ka kiskeritenawaw aci kekatc kitci pe takocik anahwe Ka ki pe iriniwihitisotc.

³⁰ Tapwe ohwe ka witamatakok: anotc ka pimatisitcik iriniwok nama moci kaskina kata nipowok epwamoci kaskina aniheriw pe iciwepanik.

³¹ Waskok kaie aski tekaci kata ickwaparino, aric nititewin nama wiskat kata ickwaparin.”

Kice Manito tepirak wir kiskeritam apitc ke ponaskiwonik

³² “Nama aric awik kiskeritam tan apitc mia ke takociparinik aniheriw e kicikarik kekotc ma aniheriw ke tato tipahikanearik. Nama wawatc aceriwok wakwek ka taciketcik kiskeritamok, nama kaie Kice Manito Okosa. Wircike tepirak Kotawino kiskeritam.

³³ Aiekwamisikw tca! Miro nanakatisikw! Nama meka ki kiskeritenawaw kaie kirawaw apitc mia ke pe iciwepak.

³⁴ Tarasak mia iriniw e wi matcatc, e nta pa pimatisitc. Epwamoci matcatc, itew kaskina otarotakana kitci mitaritci omikiwam. Mirew tato neta e taciritci ke itotiskeritci mekwata ke itanahotc. Itakaniwiw kaie anahwe ka kanaweritak ickwatemiriw mocak wewerita kitci nanakatisitc.

³⁵ Kaie kirawaw tca, nanakatisikw! Nama meka ki kiskeritenawaw apitc ke takocik kokimamiwaw. Pot e otakocinik kata takociniw, kekotc ma mekwata e tipiskarik, kekotc apitc mia kitorite nape pakahakwana kekotc ke kicepawonik.

³⁶ Kecpin keskat takocike, nama kata mirwacinipan kitci miskatakw e nipaiekw!

³⁷ Ohwe ka iteian, kaskina awik ka itak: Nanakatisikw!”