Mark 12 - Kice Manito Ocki Omirwatcimowin

Atisokanicic: Matci kitike iriniwok

¹ Ekoni e ici aimihatc anahweriw iriniwa Cecoc, atisokaniciciriw e apatcitatc: “Tapan peikw iriniw, cweminatikwa e kitiketc okitikan askik. Ki waskaskaham kitci takonik e opimetakarik. Ki waritawokahikew neta ke ici camakohwakaniwiritci cwemina, kirika ki ocitaw mikiwamiciciriw e ki icpaskahak, warawik kitci ki wapatcikaterik e nanakatcitakaniwonik okitikan aski. Minawatc ki awihew kitike otamiro iriniwa aniheriw okitikan aski. Ekoni e ici matcatc, kitci pa pimatisitc.

² Apitc wetcitciparinik kitci mawotcihakaniwiritci cwemina, aci ki iciticahwew peikw otarotakana kitci natawapamaritci anahweriw kitike otamiro iriniwa kitci tca mirikotc irikik cwemina ka ki acotamatotcik kitci mirakaniwitc e ki awihiwetc otaski.

³ Aric anahwe ka ki iciticohwakaniwitc ki makoniko anahweriw otamiro iriniwa. Ki macikako. Ki tca kiweticohoko, aka kekociciriw e ki otci mirikotc.

⁴ Minawatc anahwe iriniw ka tiperitak aniheriw kitikan askiriw iciticahwew kiapatc peikw kotakeriw otarotakana. Anahwe arotakan ki otamictikwanehiko anahweriw kitikan otamiro iriniwa, e marerimikotc.

⁵ Minawatc anahwe ka tiperitak iciticahwew kiapatc kotakeriw iriniwa. Anihi tca ki nipahakaniwiriw. Kiapatc mitcet arotakanak iciticohwakaniwiwok. Peikon ka ki totawatcik aniki kitike otamiro iriniwok. Atita ki macikawewok. Kotakihi ki nipahewok.

⁶ Nac tepirak peikociriw aka moci ka ki otci iciticohwatc anahwe ka tiperitak, tipirawe okosa e micta sakihatc. Aci anihi mamitcitc iciticahwew e iteritak, ‘Aniki ka ki awihakik nitaskiriw, otcitakotc nikosa kata kicterimewok.’

⁷ Aric ka wapamatcik aniki kitike otamiro iriniwok e takociniritci, ki aititowok, ‘Enko anaha ke tiperitak nanake! Ahw! Ki ka nta nipahano! Kirano tca ki ka tiperitenano ohwe aski!’

⁸ Ki makonewok anihi okosiriw okimamiwawa. Ki nipahewok. Ekoni e ici orowepinamwatcik owiawiriw nete kitikan askik.”

⁹ Aci kiapatc kokwetcikemo Cecoc, e itetc: “Kiskeritake aniheriw ka ki isparinik anahwe ka tiperitak kitikan askiriw, tan ke totawatc anahweriw otamiro iriniwa? Kata icaw neta otaskik. Minawatc kata nta nipahew anahweriw kitike iriniwa. Kotakeriw otamiro iriniwa kata awihew aniheriw okitikan aski kitci mitaritci.

¹⁰ Ki kiskeritenawaw e itemakanik Kice Manito Omasinahikan: ‘Anihi asiniwa ka ki wepinatcik manike iriniwok, e ki iteritakik “nama wiec irapatisiw,” enko anihi aci ka mawotci kictapatisiritci.

¹¹ Wir Teperitciketc ka ki totak. Ki micta mirwinamwano.’” Psaumes 118.22-23

¹² Aniki cota okimawok natowi totamwakopan kitci ki makonatcik Cecoca. Kiskerimewakopan meka e ki atisokatikotcik aniheriw ka iteritci. Koctewakopan aric iriniwa e mitcetiritci. Ki tca nakatewok Cecoca. Ki matcawok.

E kicikowakaniwitc Kice Okimaw

¹³ Ki iciticohwakaniwiwok atita Pharisien iriniwok kirika atita ka atoskectawatcik okimawa Hérode kitci nta kokwetcimatcik Cecoca. Wikokwe paciwirewakopan Cecoca arotc kitci iteritci, ke ki otci itactahorakaniwiritci.

¹⁴ Aci natawapamewok e tca itatcik: “Kiskinohamake iriniw, ni kiskeritenan tapwe mia e itein. Nama otci peikw awik ki koctaw tan kotc e iterimiskik. Nama wawatc ki pameriten e apitc kicterimakaniwakwen iriniwok ota askik. Mia kit ici kiskinohamakan kitci itatisinaniwok e ici mireritak Kice Manito. Witamacinan tca: itemakan ia kitaiamihe irakonikewininak kitci kicikamokw ka ici natockasotc Kice Okimaw, Rome askiriw ka tiperitak, kekotc nama?”

¹⁵ Aric kiskerimepan Cecoc e kasoritci tapwe e ici iteritamiritci. Ki tca itew: “Kekwan wetci wikokwe paciwiriekw? Petakw ote peikw coriapiskw kitci wapataman.”

¹⁶ Ki tca nta iciwitowewok peikw coriapiskoriw. Kokwetcikemo Cecoc, e itatc: “Awin neta ka nokonik otactamikw kirika oticinikasowin?” “Kice Okimaw,” itewok.

¹⁷ Itew Cecoc: “Mirakw Kice Okimaw ka ici tiperitak, peikon kaie wir Kice Manito mirakw ka ici tiperitak.” Ki micta mamiskasitawewok ka ki ici naskamikotcik.

Ka nipotcik e apitcipatcik

¹⁸ Atita cota iriniwok Sadducéen ka icinikatakaniwitcik ki pe natawapamewok Cecoca. Tapweritamwakopan aniki Sadducéen iriniwok aka kitci apitcipaniwonik. Kokwetcimewok Cecoca e wi paskewiratcik, e tca itatcik:

¹⁹ “Kiskinohamake iriniw, weckatc Moïse ki ki witamakono ohweriw irakonikewiniw, e itasinaterik: ‘Kecpin iriniw e nipotc, e nakatatc tca okoma aka e ki otci onitcaniciritci, acteriw anihi ocima kitci wikimaritci ka cikawiritci kitci tca onitcanicitcik, octesa otci ka ki niporitci.’” Deutéronome 25.5-6

²⁰ “Nikotin peikwaw, nicowaso tacipanak iriniwok e owitcicanitotcik. Anahwe ka mawotci kiceatisitc ki nipowiw. Ki tca poni pimatisiw, aka e ki otci taritci onitcanica.

²¹ Ka niconiwitc tca octesimaw ki wikimew anihi owitimwa. Kaie wir ki poni pimatisiw, aka kaie wir e ki otci taritci onitcanica. Minawatc kiapatc anahwe ka nictoniwitc octesimaw peikon kaie wir ka ki iciwepasitc.

²² Nac kaskina aniki ka owitcicanitotcik, ekoni kaie wirawaw ka ki iciwepasitcik. Aniheriw kaie owitimowawa, ki poni pimatisiriwa, aka tca otci peikw e ki otci taratcik awaca. Kek mamitcitc kaie wir ki poni pimatisiw anahwe cikaw.

²³ Nikotin tca apitcipatawe aniki ka poni pimatisitcik, awin ni mia ke okomitc? Aniki meka kaskina e nicowatcitcik ki iti wikimewok anihi iskwewa.”

²⁴ Itikowok Cecoca: “Arotc kit iteritenawaw, osam aka e kiskeritamekw Kice Manito Omasinahikan kaie apitc e mackawisitc Kice Manito.

²⁵ Tapwe wirata, apitcipatawe ka nipotcik, nama kata wikimewok iriniwok kirika iskwewok. Aric kata ici pimatisiwok mia mitowi aceriwa e ici pimatisiritci wakwek ka tacikeritci.

²⁶ Arimotcikatew nete Moïse omasinahikanik kitci apitcipatcik ka nipotcik. Nama ia wiskat ki ki otci tapwatenawaw e ici arimotcikaterik e minictikwaskwearik e ickotewonik. Masinatew meka neta, Kice Manito e ki itatc Moïsa: ‘Nin Abraham Okice Manitoma, kaie Isak, acitc Cakop.’” Exode 3.6

²⁷ Minawatc kiapatc itew Cecoc: “Kice Manito anahwe, ka pimatisitcik ni iriniwok Okice Manitomiwaw, namaiew ni ka poni pimatisitcik. Ekoni wetci iteian, tekaci arotc kit iteritenawaw.”

Irakonikewin ka mawotci kicteritakok

²⁸ Peikw iriniw ka kiskinohamaketc cota aiamihe irakonikewiniw ki petawew e taci aimihitoritci anahweriw Sadducéen iriniwa, kaie ki petawew Cecoca wewerita e naskamowaritci. Ki natcikapowictawew Cecoca e tca kokwetcimatc: “Kekw irakonikewin ka mawotci kicteritakok neta aiamihe irakonikewinik?”

²⁹ Aci itiko Cecoca: “Enko ohwe ka mawotci kicteritakok: ‘Natotamokw Israël iriniwok: Teperitciketc Kikice Manitomino, enko anahwe tepirak ka tiperitciketc. Nama taw kotak.

³⁰ Ki ka sakihaw Teperitciketc Kikice Manitom kaskina e irikokotehein, kaie tekaci kitcitcakocik, acitc kimitoneritcikanik, kaie irikik e ici mackawisiin.’ Deutéronome 6.4-5

³¹ Minawatc tca enko ohwe kotak irakonikewin ka micta kicteritakok: ‘Ki ka sakihaw kiwitc iriniw mia mitowi e asitci sakihitisoin.’ Lévitique 19.18 Nama takon kotak irakonikewin kirawe e kicteritakok, enko tepirak anihi e niciki.”

³² Anahwe ka kiskinohamaketc cota aiamihe irakonikewiniw itew Cecoca: “Kiskinohamake iriniw, kaskina ka ki itein ki tapwan. Teperitciketc, enko tepirak ka kice manitowitc. Nama taw kotak.

³³ Acteriw iriniw kitci sakihatc Kice Manitowa kaskina e irikokotehetc, kaie tekaci omitoneritcikanik, acitc irikik e mackawisitc, kirika kata sakihew owitc iriniwa mitowi e asitci sakihitisotc. Kirawe mictahi mirwapatan anihe patok kitci cawerimakaniwitc Kice Manito awesisa e ickwaswakaniwiritci e aiamihe pakitinikaniwonik kaie kotakeriw kekociciriw e ici cawerimakaniwitc.”

³⁴ Cecoc kiskerimew wewerita e ki naskamoritci. Itew tca: “Ki pecowapaten Kice Manito Okimawin.” Ka ickwa aitetc aniheriw, nama aci awik ki otci wi kokwetcimew kekociciriw.

Anihi ka ki itespan Kice Manito kitci pe iciticohwatc kitci akwacimiweritci kirika Okimaw Tapit

³⁵ Minawatc mekwata e kiskinohamakespan Cecoc neta kitci aiamihe mikiwamik, ki kokwetcikemo e itetc: “Kekwariw wetci itetcik aniki ka kiskinohamaketcik cota aiamihe irakonikewiniw, ‘Anihi ka ki itespan Kice Manito kitci pe iciticohwatc ota askik kitci akwacimiweritci, enkweriw Okimaw Tapit otaniskotape osima’?

³⁶ Tapit meka wir tipirawe ki masinaham ohweriw, Miro Manitowa e tiperimikotc: ‘Teperitciketc Kice Manito ki itew anihi Ka Tiperimimitc: Pe nta api ninihiwinik, nac kitci tepahakik ka cikerimiskik, kir tekaci kitci tiperimatcik.’ Psaumes 110.1

³⁷ Tapit wir tipirawe ki icinikatew ‘Ka Tiperimimitc’ anihi ka ki itespan Kice Manito kitci pe iciticohwatc kitci akwacimiweritci. Tan tca ke isparinik kitci ki otaniskotape omocomitc anihi Tapita?” Miro natotakopan Cecoc anihi iriniwa e mitcetiritci. Mirotakokopan.

Cecoc e witamawatc iriniwa kitci akwamisiritci ka kiskinohamakeritci aiamihe irakonikewiniw

³⁸ Aci kiapatc kiskinohamawepan e itatc: “Aiekwamictowakok aniki ka kiskinohamaketcik aiamihe irakonikewiniw, ka mireritakik e pa pimotetcik, okapotowaniwaw ka kinekinik e apatcitatcik e wi kicterimikositcik, kirika e mitcetinaniwonik sakitawok wewerita kitci arimikowakaniwitcik.

³⁹ Ke ici miro nokositcik ici apiwok cota aiamihe mikiwamik, kaie ka mawotci mirwacinik apiwinik ici apiwok e makocaniwonik.

⁴⁰ Kimotimewok cikawa kaskina e ici tatamiritci. Peikon ko kinowec aiamihawok, tepirak kitci iterimakaniwitcik ‘micta aiamihatisiwok.’ Enko aniki ke mawotci anwerimakaniwitcik!”

Cikaw ka ki pakitiniketc

⁴¹ Cecoc ki nta aipiw neta pecotcik e ici acterik pweteriw, taci neta e pakitinikaniwonik kitci aiamihe mikiwamik. Ki nanakatcihew mitcet iriniwa tan e ici pakitinikeritci. Mitcet micikita iriniwok nipara ki pakitinamok ocoriamiwaw.

⁴² Kek takociniw cikaw orina e kitimakisitc. Ekoni e ici pakitinak nicw comarikeriw.

⁴³ Aci wicamew Cecoc kaskina anihi owitcewakana kitci pe natcikapowictakotc, e tca itatc: “Tapwe ohwe ka witamatakok: anahwe cikaw ka kitimakisitc, kirawe nipara ki pakitinikew patok kaskina aniki kotakihik iriniwok.

⁴⁴ Kaskina meka aniki kotakihik iriniwok ki pakitinamok tepirak ka ici ickoparitcik. Aniheriw aric ka ki pakitinak anahwe iskwew, enkweriw ni mamitcitc ocoriam, e micta kitimakisitc. Enkweriw ni ke ki otci pimatisiwakespan.”